არ შეიძლება გარუჯვა უზმოზე ან ახალნაჭამზე - ხალხური საშუალებები გარუჯვის მოყვარულთათვის

მაქსიმალური დრო გარუჯვისთვის დღეში 1-2-საათს არ უნდა აღემატებოდეს. თანაბარი რუჯის მისაღებად მზის აბაზანის წინ წაისვით მიხაკის, ნიგვზის, ატმის ან სხვა მცენარეული ზეთი.

გარუჯვისთვის შედარებით ხელსაყრელი დრო დილის 10-იდან 12 საათამდეა. აუცილებელია, თავზე მზისგან დამცავი ქუდი დაიხუროთ. ასევე, სავალდებულოა თვალების დაცვა: უპირატესობა მუქი შუშის მქონე სათვალეს მიანიჭეთ.

არ შეიძლება გარუჯვა უზმოზე, ან პირიქით, ახალნაჭამზე. დაუშვებელია მზეზე ძილი; ასევე, არ არის სასურველი კითხვა. გადაჭარბებული დროით მზეზე ყოფნამ შეიძლება მზის დარტყმა და დამწვრობა გამოიწვიოს.

ხალხური საშუალებები

მთავარი პრობლემა, რაც რუჯს თითქმის ყოველთვის თან ახლავს, კანის ხორკლიანობაა, რომელიც რაღაც დროის მანძილზე რჩება. ამ შემთხვევაში დაგეხმარებათ უმი კარტოფილის წვენი. კარტოფილის წვენი ანელებს სიმხურვალეს და აცხრობს შეწითლებულ ადგილებს, ამაგრებს კანის ზედა შრეს.

იმისათვის, რომ კანი მზის სხივების მავნე ზემოქმედებისგან დაიცვათ:

კიტრის თესლს დაასხით 40-გრადუსიანი სპირტი (1;10), გააჩერეთ 2 კვირა, შემდეგ გადაწურეთ. მოხმარების წინ ნაყენი წყლით გააზავეთ (1.10) და ყოველდღიურად წაისვით კანზე. ეს ნაყენი შეგიძლიათ მზით გამოწვეული ჭორფლისგან დასაცავადაც გამოიყენოთ.

თვითნამჟავი მაწონი (ჩვეულებრივიც შეიძლება) დაგეხმარებათ კანის მზისგან დაცვაში.
ხშირად გარუჯვის შემდეგ წითლდება ცხვირის და ლოყის მიდამოები. შეწითლებულ ადგილებზე წაისვით ამჟავებული რძე, ოდეკოლონი ან არაყი და სიწითლის სრულ გაქრობამდე მოერიდეთ მზესთან კონტაქტს.

რუჯით გამოწვეული ლაქების შესამცირებლად წაისვით კანზე ამჟავებული რძე ან ლიმონის წვენი.

თუ კანი გექერცლებათ, კვერცხის გული დასრისეთ ხელში და შემდეგ გულდასმით წაისვით სახეზე. როდესაც კვერცხის გული მოხმება, ჩამოიბანეთ საპნიანი წყლით.

კანის გაწითლების შემთხვევაში ასევე ეფექტური საშუალებაა კიტრი.

ყოველი მზის აბაზანის შემდეგ სახის კანს გამაგრილებელი ნიღაბი ესაჭიროება. აიღეთ ნახევარი ბანანი, 3-4 ცალი ყურძნის მსხვილი მარცვალი, 2 ჩ/კ ალოეს რბილობი და 2 ჩ/კ ნებისმიერი მცენარეული ზეთი. ხილი ბლენდერში დააქუცმაცეთ და დაუმატეთ ზეთი.

წაისვით მიღებული მასა სახეზე, კისერსა და დეკოლტეზე, გაიჩერეთ 10-15 წუთით და თბილი წყლით ჩამოიბანეთ.

მოამზადეთ მზისგან დამცავი კრემი: სპერმაცევტი -3გრ, საცხი (ვაზელინი)-47 გრ, წყალი-48 მლ, გლიცერინი-1,5 მლ, სუნამო-0,5 მლ.

ხალხური საშუალებები მზით დამწვრობის დროს:

• კარტოფილი გათალეთ, გახეხეთ წვრილ სახეხზე და დოლბანდის დახმარებით წვენი გამოწურეთ. სითხე წაისვით სახეზე ან დაალბეთ დოლბანდის ნაჭერი და წაისვით დამწვარ ადგილებზე. კარტოფილის წვენს ანთების საწინააღმდეგო თვისებები აქვს და ეფექტურია მზით დამწვრობის დროს. შეგიძლიათ წვენი ხორბლის ფქვილში აურიოთ და ნიღბის სახით გამოიყენოთ.

• ნიღაბი დამწვარი სახის კანისათვის. რამდენიმე კარტოფილი მოხარშეთ კანიანად, კარგად დასრისეთ და შეურიეთ არაჟანი ან ნაღები. უნდა მიიღოთ სქელი კონსისტენციის მასა. ნიღაბი წაისვით სახეზე, გაიჩერეთ 10-15 წუთით და ბამბის ტამპონით მოიშორეთ.

• ა) თუ უმ გახეხილ კარტოფილს მაშინვე წაისვამთ ახალდამწვარ ადგილებზე, ტკივილი შეგიმსუბუქდებათ და ბებერებიც აღარ გაგიჩნდებათ.

• გაწითლებულ და გაღიზიანებულ კანზე მიიყარეთ კარტოფილის ფქვილი.

• მზით დამწვრობის დროს კარგია მაგარი ჩაის ნაყენის კომპრესები (1 ჩ/კ ჩაი დააყენეთ ¼ჭიქა მდუღარე წყალში, გააჩერეთ 30-40 წთ, გადაწურეთ). პროცედურა ჩაიტარეთ დღეში 2-3-ჯერ. ჩაის კომპრესი მოგიხსნით ტკივილსა და წვის შეგრძნებას.

გვირილა (სამკურნალო, იყიდება აფთიაქებში)

• 1 ს/კ გვირილას დაასხით 1 ჭიქა მდუღარე, გააჩერეთ 30 წთ და გაიკეთეთ კომპრესები.

• კომშის კურკას დაასხით გადადუღებული წყალი (1:50), 5 წუთით შეანჯღრიეთ და შემდეგ დოლბანდის მეშვეობით გადაწურეთ. მიღებული ბლანტი სითხით დაიმუშავეთ დამწვარი ადგილები 1-2-ჯერ დღეში.

• დამწვარ ადგილებზე წაისვით ალოეს ახალგამოწურული წვენი.

• თანაბარი რაოდენობის კიტრისა და საზამთროს წვენი კარგად შეურიეთ. ლოსიონი წაისვით დამწვარ ადგილებზე.

• დამწვრობის დროს ეფექტურია მჟავე კომბოსტოს ფურცლები.

• კანის დამწვრობის დროს გამოიყენება 10-20%-იანი მუხის ქერქის ნახარში (20-40 გრ მუხის ქერქი 200 მლ წყალზე). ნახარში გადაწურეთ, გააგრილეთ და გაიკეთეთ კომპრესები 1 საათის განმავლობაში ყოველ 10-15 წუთში ერთხელ.