რატი დურგლიშვილი: ”იურმალაში სალომემ უნდა გაიმარჯვოს”

დუეტი "ჯორჯია" 5 წლის შემდეგ ისევ იმ სცენაზე დადგება, რომელიც ფაქტობრივად მის ტრამპლინად იქცა. მომღერლების, მაკა ზამბახიძის და რატი დურგლიშვილის წარმატება იურმალის კონკურსიდან იწყება. 2008 წელს მათმა დუეტმა გაიმარჯვა, ბევრი კონცერტი, დიდი პერსპექტივაც ჰქონდათ, მაგრამ საქართველოში განვითარებულმა პოლიტიკურმა პროცესებმა მათი წინსვლა შეაფერხა. ახალ ეტაპს შემოქმედებაში ახლა იწყებენ.
ამ ზაფხულ მაკა და რატი იურმალას სცენაზე ისევ გამოვლენ, ამჯერად – სტუმრის სტატუსით. მათ კიდევ ერთი მისია აქვთ შესასრულებელი, ნაციონალურ ტურში ქართველ კონკურსანტ სალომე ქათამაძესთან ერთად ქართული სიმღერების პოპური უნდა იმღერონ. მაკა და რატი მზადების პროცესში არიან, რეპერტუარზე, კოსტიუმებზე ფიქრობენ. ჩვენ სწორედ ამ დროს მივედით მათთან ინტერვიუს ჩასაწერად, თუმცა საუბარი სულ სხვა კონკურსით დავიწყეთ – მრავალწლიანი მოლოდინის მიუხედავად, დუეტი "ჯორჯია" ევროვიზიაზე ვერა და ვერ მოხვდა. მიზეზებზე მაკა და რატი პირველად "სარკესთან" ალაპარაკდნენ.
– საუბარი ევროვიზიაზე წლევანდელი ქართველი კონკურსანტებით დავიწყოთ, როგორ შეაფასებდით სოფო გელოვანის და ნოდიკო ტატიშვილის ახალ დუეტს?
მაკა: მათთან ვმეგობრობ, როგორც სოლო მომღერლები, პროფესიონალები არიან. თავიანთი საქმე არაჩვეულებრივად იციან, თუმცა დუეტი სულ სხვა რამ არის, ძალიან რთულია პარტნიორთან მუშაობა. "ხუთიანზე" ნამღერი არ ნიშნავს იმას, რომ ყველაფერი კარგად არის. რაც შეეხება ევროვიზიაზე მათ გამოსვლას, მომეწონა.
რატი: ისინი ინდივიდუალური მომღერლები არიან და, თუ დუეტად ჩამოყალიბდებიან, ღმერთმა ხელი მოუმართოთ.
მაკა: ყველაფერი იმაზეა დამოკიდებული, თუ როგორ შეეწყობიან და სცენაზე როგორ იგრძნობენ ერთმანეთს. არ შეიძლება დუეტში სიმღერა ისწავლო, ამას უნდა გრძნობდე. იურმალადან თბილისში რომ ჩამოვედით, ყველა აღნიშნავდა, რატისკენ გაშლილი ხელით რომ წახვედი, ძალიან ლამაზად გამოვიდაო. მეუბნებოდნენ, ხალხს ამ ხელის გაშლით დაამახსოვრდიო. ეს დადგმული არ იყო, იმ წუთში მომინდა, რომ ასე გამეკეთებინა.

რატი: სცენაზე ემოცია, მანერა ჩვენი გვაქვს, სინქრონში ბუნებრივად გამოგვდის. ამიტომაც ჩვენი გამოსვლა არასდროს არის ერთნაირი.
– იმის თქმა გინდათ, რომ სოფო და ნოდიკო ისეთი შეწყობილი დუეტი არ არის, როგორიც თქვენი?

მაკა: არა, ამის თქმა არ მინდა. მათ კარგი, სტაბილური გამოსვლა ჰქონდათ, თუმცა მათ დუეტში სხვა რაღაცეების დამატებაც შეიძლებოდა.
– ევროვიზიის სცენაზე თქვენ როგორ წარდგებოდით?

მაკა: ამ კონკურსში ჩვენ რატის სიმღერით წარვდგებოდით. სხვა მნიშვნელობა აქვს, როცა მომღერალი თავის სიმღერას ასრულებს. სცენაზე ჩვენი სიმღერით, ჩვენი დადგმით გავიდოდით. მონახაზი გვქონდა შედგენილი, თუ ჩვენ წავიდოდით კონკურსზე, როგორ გამოვიდოდით. იურმალას პერიოდში იმდენი ვინერვიულე, რომ კონკურსის ხსენებაც არ მინდოდა, მაგრამ, როცა საქართველოს სჭირდება, გაუთქვა სახელი, ამის გულისთვის თავს არ დავზოგავდი და ყველაფერს გავაკეთებდი.
– რამ შეგიშალათ ხელი? რატომ წავიდა ახალშექმნილი დუეტი და არა – თქვენ, "ჯორჯია"?
მაკა: ჩვენ ძალიან გვინდოდა, მაგრამ გადაწყვიტეს, შემდგარი დუეტის ნაცვლად ევროპისთვის ახალი დუეტი შეეთავაზებინათ.
– ასეთი არჩევანი რატომ გააკეთეს?
მაკა: ამაზე პასუხი არ მაქვს, თუმცა ჩვენც გვაინტერესებს და ჩვენ ირგვლივმყოფებსაც. ნოდიკოსთან და სოფოსთან არანაირი პრეტენზია არ გვაქვს, ორივე ჩვენი მეგობარია, ძალიან გვიყვარს, მაგრამ სადაც მივდიოდით, ყველგან გვეკითხებოდნენ, როცა საქართველოს ჰყავს დუეტი, ასეთ მნიშვნელოვან კონკურსზე ახალი დუეტი რატომ უნდა გავიდესო. თუ უნდოდათ, რომ დუეტი წასულიყო, ისმის კითხვები – რატომ ახალი? რატომ ექსპერიმენტი? ჩვენს დუეტზე ლაპარაკი არ მიყვარს, მაგრამ სადაც მივდივართ, ყველგან თბილად გვხვდებიან, გვეფერებიან. მსოფლიოში დუეტში სიმღერა პრობლემაა, ჩვენ კი ყველა გვეუბნება, ერთ ენაზე მღერით, კარგი ვიზუალური მხარე გაქვთ, ერთმანეთის გარეშე ვერ წარმოგვიდგენიხართო.
რატი: ამ თემაზე უკვე დავიწყვიტე ნერვები. წლებია ამ კონკურსზე გვინდა წასვლა, მაგრამ რატომღაც ვერ ხერხდება. თუ რატომ, ეს ევროვიზიის ქართული მხარის პროდიუსერებს უნდა ვკითხოთ.
– მაინც რა გგონიათ მიზეზი?

რატი: ალბათ გვიწუნებენ. ამ საკითხში კომპეტენტური არ ვარ, კითხვებს თავად გასცენ პასუხები. ოთხი წელია ამ კონკურსის კარს ვართ გამოკიდებული, დიდი სურვილი მქონდა იქ წასვლის, რასაც მაკაზე ვერ ვიტყვი. წელს საზოგადოებრივ მაუწყებელში პირობების გასარკვევად რომ მივედით, საუბარი იყო კახუჩელას კანდიდატურაზე. მათ არჩევანს მივესალმე და შევთავაზეთ, რა შეგვეძლო, შოუსთვის გაგვეკეთებინა. რასაკვირველია, პასუხი იმ წუთში ვერ მივიღეთ, რაღაც პერიოდის შემდეგ კი მაკამ ტელევიზიით მოისმინა, რომ შეიქმნა ახალი დუეტი, რომელიც ევროვიზიაზე წავიდოდა. რაც უფრო მეტი დუეტი ეყოლება საქართველოს, მით უკეთესია, არავის ვეხები, ჩვენ ჩვენი საქმე გვაქვს.
– როცა ითქვა, რომ სოფოს და ნოდიკოს დუეტი წავიდოდა ევროვიზიაზე, სოციალურ ქსელებში დიდი აჟიოტაჟი ატყდა, ამ გადაწყვეტილებას ბევრი არ ეთანხმებოდა. ალბათ ამაზე თქვენთანაც საუბრობდნენ.
მაკა: დიახ, ასეა, სადაც გავიდოდით, ყველგან ერთი და იგივე განწყობა გვხვდებოდა. რომელიმე მათგანი როგორც სოლო მომღერალი, ისე რომ წასულიყო, მერწმუნეთ, ასეთი გამოხმაურება არ მოჰყვებოდა.
– ფიქრობთ, რომ თქვენს დუეტს უფრო წარმატებული გამოსვლა ექნებოდა და უკეთეს შედეგს მივიღებდით?
მაკა: ამის თქმა ძნელია. იურმალაშიც რომ მივდიოდით, ასეთ შედეგს არ ველოდით. პროგნოზების გაკეთება უაზრობაა, მთავარია, იმღერო და მაყურებლის წინაშე კარგად წარდგე. ევროვიზია პოლიტიკური კონკურსია, აქედან გამომდინარე, მომღერალს მოწინავე ადგილზე გასვლა გაუჭირდება. თუმცა სიმღერას მაინც ძალიან დიდი მნიშვნელობა აქვს.
– მომავალში თუ იქნება შემოთავაზება, მიიღებთ მონაწილეობას?
მაკა: საქართველო მომავალ წელსაც რომ დუეტით წარდგეს, შეიძლება მაყურებელმა სწორად ვეღარ აღიქვას.
რატი: ჩვენი ქვეყნიდან ევროვიზიაზე მეტი დუეტი აღარ უნდა წავიდეს, ნიშა არ უნდა გაუფასურდეს. სიმართლე გითხრათ, ამ კონკურსში მონაწილეობის სურვილი უკვე აღარ მაქვს.
– ევროვიზიაზე წასვლის წინ სოფოს და ნოდიკოს ხომ არ შეხვედრიხართ, რომ გარკვეული რჩევები მიგეცათ?

მაკა: არა, ჩვენ არ შევხვედრივართ ერთმანეთს. არავისზე მეტი არ ვართ, რომ ვინმეს რჩევები მივცეთ. როგორც გამოცდილ დუეტს, რჩევის მიცემა შეგვეძლო, მაგრამ არა – ვოკალური კუთხით.
– საბოლოოდ მათი გამოსვლა ევროვიზიაზე მოგეწონათ?
რატი: იმ პერიოდში გადარბენა მქონდა და არ მინახავს. მერე ვუყურე და, ჩემი აზრით, ძალიან ლამაზად იმღერეს. ბაქოს წარმომადგენელი ძალიან მომეწონა. კონკურსზე ფავორიტი მყავდა. ვინც ხუთეულში გავიდა, ყველას ვუწინასწარმეტყველე კონკურსზე წარმატება. წლევანდელი ევროვიზია ძალიან მომეწონა. საქართველოსაც ულამაზესი ნომერი ჰქონდა.
– როგორ ფიქრობთ, დუეტ "ჯორჯიას" ევროვიზიაზე მოხვედრის შანსები აღარ აქვს?
მაკა: იურმალაში გამარჯვების შემდეგ ყოველ წელიწადს ველოდით, რომ ევროვიზიაზე წავიდოდით, ხალხს უფრო ჰქონდა ჩვენი იქ ნახვის მოლოდინი. მათი მოთხოვნა იყო, რომ ჩვენ წავსულიყავით ევროვიზიაზე. მათი კითხვა, თუ რატომ ვერ მოვხვდით ევროვიზიაზე, ჩვენთვისაც პასუხგაუცემელი რჩება.
– ყველა ამბობს, რომ ევროვიზია პოლიტიკური კონკურსია და ყოველთვის ღირსეულები არ იმარჯვებენ.

რატი: ევროვიზიის თითქმის ყოველი ფინალისტი იმსახურებდა გამარჯვებას. ფული და პოლიტიკა რა შუაშია?! სელინ დიონი, "აბბა" ევროვიზიის გამარჯვებულები არიან, არ იმსახურებდნენ? ეს არის ჩემი აზრი, კარგი მსმენელის პოზიციიდან.
– იურმალაზეც ვისაუბროთ. 5 წლის შემდეგ ისევ იმ სცენაზე ახვალთ, საიდანაც თქვენი წარმატება დაიწყო. რა ემოციით მიდიხართ იქ?
რატი: წარმოიდგინეთ, რა შეგრძნება უნდა გქონდეს, როცა, მინიმუმი, 135 მილიონი ადამიანი გიყურებს.
მაკა: იურმალაზე ყოველ წელს ვიყავით სტუმრის სტატუსით მიწვეული, მაგრამ საქართველოში შექმნილი ვითარების გამო ვერ მივდიოდით. ვერ გადმოგცემთ, ახლა ისეთი ემოციით მივდივართ, ამ კონკურსმა ხომ ჩვენი ცხოვრება შეცვალა.
– პოლიტიკური ვითარების გამო ვერ მიდიოდით იურმალაში თუ უბრალოდ იმაზე ფიქრობდით, ვინ რას იტყოდა თქვენზე?
რატი: 2009 წელს იურმალაში სტუმრის სტატუსით წავედით და არავის არაფერი უთქვამს. ხელოვნება ხელშეუხებელი უნდა იყოს და რაღაც საკითხები პოლიტიკამ არ უნდა გადამიწყვიტოს. ჩემს საქმეს ვაკეთებდი ყოველთვის. როცა ქვეყანას ჩემი გვერდით დგომა სჭირდებოდა, ასეც ვიქცეოდი. რუსეთსა და საქართველოს შორის არსებული უთანხმოების გამო 38 კონცერტი გაგვიუქმდა. ფაქტობრივად ჩვენს კარიერაზე უარი ვთქვით.
– და ამ არჩევანით წააგეთ.
რატი: არა, რატომ წავაგეთ? ქუჩაში ადამიანებთან შეხვედრის არ მერიდება, პირიქით.
– წლევანდელ კონკურსანტზე რას გვეტყვით?
რატი: სალომე ქათამაძე წლებია ჩემი ფავორიტია. მას პირველად 4 წლის წინ კარაოკე–ბარში მოვუსმინე და აღვფრთოვანდი. მჯერა, რომ სცენაზე არ დაიბნევა და ჩვენს ქვეყანას ღირსეულად წარადგენს. მე თუ მკითხავთ, მან უნდა გაიმარჯვოს.
მაკა: წელს ორი მისია გვაკისრია, ერთი – ის, რომ სტუმრის სტატუსი გვაქვს და მეორე, ნაციონალურ ტურში სალომესთან ერთად ქართული სიმღერების პოპური უნდა ვიმღეროთ. ყოველ წელს ჟიურის რომელიმე წევრის საიუბილეო კონცერტი ტარდება. წელს აგუტინის საღამო გაიმართება, სადაც მე და რატი მის სიმღერას შევასრულებთ.
რატი: აგუტინი მოსკოვში ნომერი პირველი ვარსკვლავია. მის საიუბილეო კონცერტზე სიმღერა ნიშნავს, რომ ტელეკომპანია "ოერტე" მთელი წლის განმავლობაში დღეში ორჯერ სხვადასხვა მუსიკალურ ნომრებს გაუშვებს. ხომ ხვდებით, როგორ კარგად უნდა ვიმღეროთ, რომ შემდგომში არ შეგვრცხვეს.
– "ჯორჯიას" გვერდით სალომე ქათამაძე ხომ არ დაიჩრდილება?

მაკა: არა, რას ამბობთ! სალომე ლიდერია. მან თავისი საქმე იცის. კონკურსანტია და მასზე მეტი აქცენტი გაკეთდება.
– თქვენი კოსტიუმების დიზაინს ვინ გააკეთებს?
მაკა: არ ვიცი, რა სტილის კაბას ჩავიცვამ, მაგრამ ამ საქმეს დათუნა სულიკაშვილს მივანდობ.
რატი: მე "სამოსელი პირველში" ჩავიცვამ და მაყურებლის წინაშე ნაციონალური სამოსით წარვდგები.
ლანა კიკნაძე