რატომ დატოვა კუტუნიომ ჟიური

"ახალი ტალღა 2013"-ის მორიგი საკონკურსო ტური იურმალაში დღეს გაიმართება. გუშინ კონკურსანტები ისვენებდნენ, ვინაიდან რუსული ესტრადის ვარსკვლავის - ლეონიდ აგუტინის საიუბილეო (45 წელი) საღამო გაიმართა, რომელშიც მისი კოლეგები მონაწილეობდნენ. თუმცა იმღერეს ქართველებმაც, კერძოდ, დუეტმა "ჯორჯიამ" (რატი დურგლიშვილი და მაკა ზამბახიძე). არა იმიტომ, რომ ქართველები და ჩვენები არიან, მართლაც საუკეთესო მუსიკალური ნომერი და საშემსრულებლო ოსტატობა გვაჩვენეს. ყველასგან გამორჩეულები იყვნენ, ვინც კი გუშინ "დინტარის" სცენაზე იმღერა. რატიმ და მაკამ აგუტინის საღამოზე სპეციალური მიწვევა თავად აგუტინისგან მიიღეს. დარბაზში მყოფმა მაყურებელმა დუეტი "ჯორჯია" მქუხარე აპლოდისმენტებით დააჯილდოვა, ისევე, როგორც 2008 წელს, როდესაც ისინი იმ წლის "ახალი ტალღის" გამარჯვებულები გახდნენ.

გუშინვე ცნობილი გახდა, რომ ჟიურის შემადგენლობა დატოვა იტალიელმა მომღერალმა ტოტო კუტუნიომ, რომელიც კონკურსის ორგანიზატორის, იგორ კრუტოის სპეციალური მიწვევით იმყოფებოდა იურმალაში. ჟიურის შემადგენლობა დატოვა არა იმიტომ, რომ ქართველი კონკურსანტი, სალომე ქათამაძე არაობიექტურად შეაფასა, არამედ იმიტომ, რომ თავიდანვე ასე ყოფილა დაგეგმილი, ის მესამე საკონკურსო ტურზე იოსებ კობზონსა და ანი ლორაკს უნდა შეეცვალათ... კულუარული ინფორმაციით, როგორც ამას იურმალაში სალომეს საგულშემატკივროდ ჩასული ქართველები გვატყობინებენ, - გვაქვს გამარჯვების შანსი, ქულებს უნდა "ვეჭიდავოთო", - ამბობენ. თუმცა როგორები აღმოჩნდებიან ჟიურის ახალი წევრები - კობზონი და ლორაკი, ამას დღეს საღამოს შევიტყობთ. ობიექტურობის ზღვარი თუ მათაც დაარღვიეს, თუმცა ნუ დავასწრებთ მოვლენებს, დაველოდოთ...

ისე, როგორც შევიტყვეთ, სალომეს მიმართ ჟიური კეთილგანწყობილია, მოსწონს მისი საშემსრულებლო მანერა, ხმა, თავადაც მონდომებულია და ბრძოლის ჟინით, როგორც ყოველთვის, ახლაც ანთებულია. მთავარია შუა კონცერტზე ტოტო კუტუნიოსავით რომელიმეს არ ჩაეძინოს (!)...

რაც შეეხება იმ ქართველ გულშემატკივრებს, რომლებიც "ახალი ტალღის" კონკურსზე იმყოფებიან, ყოველდღიურად გვეხმიანებიან და გარკვეულ ინფორმაციასაც გვაწვდიან, გვაწვდიან კულისებში გადაღებულ სამახსოვრო ფოტოებსაც (ამ მიმართულებით აქტიურობს მომღერალი ნინა წკრიალაშვილიც), რომლებსაც ჩვენს საიტზე ვათავსებთ.

ლალი ფაცია
წყარო