ქრისტინე იმედაძე უკრაინაში გადაბარგდა

მომღერალი ქრისტინე იმედაძე რამდენიმე თვეა კიევშია. ამბობს, რომ მისი პროფესიის ადამიანისთვის იქ მეტი მასშტაბებია. ახალ სიმღერებს წერს, კლიპის გადაღებას აპირებს და იმედი აქვს, რომ წარმატებასაც მიაღწევს. ცოტა ხნის წინ თბილისში ჩამოვიდა, შვილი ბებიას ჩამოუყვანა საქართველოში ზაფხულის გასატარებლად, თვითონ კი უკან გაბრუნებას აპირებს. მანამდე "სარკეს" თავის გეგმებზე ესაუბრა.
– ჩემმა მეგობარმა დიმკა თეიმურაზოვმა სიმღერები დამიწერა და მათზე ვმუშაობ. უახლოეს მომავალში კლიპის გადაღებასაც ვაპირებ. ერთი სიტყვით, დროებით კიევში ვაგრძელებ საქმიანობას. იქაურობას ადვილად შევეგუე იმიტომ, რომ იქ ჩემი ბევრი მეგობარი ცხოვრობს. უკრაინაში ჩემი პროფესიის ადამიანებისთვის მეტი მასშტაბები და შესაძლებლობებია. იქ ბევრი დრო მრჩება საკუთარი თავისთვის. ვვარჯიშობ და ვცდილობ, ყველა საინტერესო კულტურულ ღონისძიებას დავესწრო.
ჩემი შვილი, ტაისია, ძირითადად ჩემთან ერთადაა. დიდხანს ვერ ვძლებთ უერთმანეთოდ. ახლა ზაფხულში დასასვენებლად წავა ბებიასთან ერთად, ამიტომ ჩამოვიყვანე კიევიდან. ტაისია ყოველ ზაფხულს რაჭაში ისვენებს. მერე ისევ ჩემთან დაბრუნდება, – გვითხრა მომღერალმა.
მანანა ნოდია