სოფო ხალვაში: "ჩემი ქმარი ჩვენი გოგონას დაბადებას დაესწრო და გულზე დაიწვინა"

მომღერალი სოფო ხალვაში მეორე ქალიშვილის დედა გახდა. მარიამ ძოძუაშვილი 5 ივლისს დაიბადა. ამ დღისთვის ყველაზე გულმოდგინედ სოფოს უფროსი გოგონა, 5 წლის ქეთო ემზადებოდა. მთელი ის პერიოდი, რაც დედა ახალშობილთან ერთად სამშობიაროში იყო, გვერდიდან არ მოსცილებია.
სოფო 22 წლის იყო, როცა პირველი შვილი შეეძინა, ამჟამად 27 წლისაა და ამბობს, რომ დედური ინსტინქტი ახლა უფრო გაძლიერებული აქვს. ოჯახში მატებით გამოწვეულ სიხარულზე მომღერალი "სარკესთან" საუბრობს.
– სოფო, გილოცავთ მეორე შვილის შეძენას და ბედნიერ დედობას გისურვებთ. როგორი გოგონა დაიბადა?
– 5 ივლისს, 10 საათს 20 წუთი აკლდა, როცა ჩემი ქალიშვილი მოევლინა ქვეყანას. "სარკეს" წინა ინტერვიუს დროს ვუთხარი, რომ სახელი ჩემმა უფროსმა გოგონამ შეურჩია – მარიამი და მას დავარქმევდით. ასეც მოვიქეცით. ჩაჩავას კლინიკაში ვიმშობიარე, ჩემი ექიმი ზურა დარახველიძე გახლდათ. მარიამი წონით პატარა დაიბადა – 2 კილოგრამი და 600 გრამი, 46 სანტიმეტრი. ძალიან მოცუცქნული გოგო მყავს, სამაგიეროდ აქტიურია.
– მშობიარობამ გართულებების გარეშე ჩაიარა?
– პირველი შვილიც საკეისრო კვეთით გავაჩინე, რადგან მჯდომარე მდგომარეობაში იყო. მაშინ ნარკოზი გამიკეთეს და ისე ამოიყვანეს ქეთო მუცლიდან. ამჯერად საკეისრო კვეთა სპინალური ანესთეზიით გამიკეთეს და ამ შედეგით ბევრად კმაყოფილი ვარ. არაფერი გამიგია, ყველაფერმა ძალიან კარგად ჩაიარა.
– როგორ შეხვდა ქეთო დის დაბადებას, ხომ არ ეჭვიანობს?
– ქეთო მარიამს ძალიან კარგად შეეგება. შეჩვეული იყო იმ აზრს, რომ მალე ოჯახში ახალი წევრი გვეყოლებოდა. არ ეჭვიანობს, პირიქით, ზედმეტად ზრუნავს დაზე. სამშობიაროში გვერდიდან არ მოსცილებია, ყოველ ღამე ჩემთან რჩებოდა. ორივე შვილი თან მყავდა. კლინიკაში ქეთო ყველამ გაიცნო. ექიმები მარიამს რომ გაიყვანდნენ, ქეთოც თან მიჰყვებოდა. მარიამი ერთ ღამეს გაიყვანეს და დილას ქეთომ თავისი და რომ ვერ ნახა საწოლში, ერთი ამბავი ატეხა. უვლის და მასზე ზრუნავს.
– როგორც ჩანს, დის დაბადებისთვის ფსიქოლოგიურად კარგად მოამზადეთ.
– კი, საკმაოდ მომზადებული დახვდა. სანამ მარიამი დაიბადებოდა, ერთად წავედით მაღაზიებში და პატარა დისთვის ძალიან ბევრი რამ შეარჩია, მათ შორის საზაფხულო კაბა და ფეხსაცმელები. მოგეხსენებათ, ახალშობილებს სცივათ და ქეთოს ნაყიდ სარაფანს ჯერ ვერ ვაცმევ. ამის გამო ისე ბრაზობს, ვერ გადმოგცემთ. დის გარდერობში ფერების მიხედვით კიდებს კაბებს. სტუმრებს მარიამისთვის საჩუქრები რომ მოაქვთ, კაბებს ქეთო ახარისხებს.
– წარმომიდგენია, მარიამმა რამხელა სიხარული შემოიტანა ოჯახში.
– მარიამს ძალიან კარგი, ღირსეული დახვედრა მოუწყვეს. ოჯახში ყველაზე პატარა წევრი ის არის, ამიტომ ყველა განსაკუთრებით ეფერება და ზრუნავს მასზე.
– თქვენი ქმარი დაესწრო მშობიარობას?
– საკეისრო კვეთის დროს მიშიკო სამშობიარო ბლოკში შემოვიდა და მარიამის დაბადებას დაესწრო, შემდეგ კი გულზე დაიწვინა.
– მეორე შვილის გაჩენისთვის დაგასაჩუქრათ?
– ჩვენ უკვე ორი შვილი გვყავს და ეს საჩუქარი არ არის? ჯერჯერობით სხვა მატერიალურ საჩუქრებზე ვერ ვფიქრობთ. სულ რამდენიმე დღეა, რაც სახლში დავბრუნდი.
– როგორი შეგრძნებაა, როცა აცნობიერებთ, რომ უკვე ორი შვილის დედა ხართ?
– როცა ქეთო დაიბადა, 22 წლის ვიყავი და დედობრივ ინსტინქტს მაშინ ასე მძაფრად ვერ შევიგრძნობდი. თურმე უფრო დაბნეულიც ვყოფილვარ, ვიდრე ახლა. უკვე 27 წლის ვარ, მეორე შვილი ქალისთვის საკმაოდ შეგნებულ ასაკში, თან 5 წლიანი პაუზის შემდეგ გავაჩინე. მშობიარობის მეორე დღეს ჩემი ორივე შვილი ერთად რომ დავინახე, ვერ გეტყვით, რა გრძნობა დამეუფლა! რთულია უცებ ამის გააზრება. მიჭირს ამ სიხარულის გადმოცემა. დედობის განცდას, მგონი, არანაირი სიტყვა არ შეეფერება.
– თქვენი პირველი და მეორე ორსულობა განსხვავდებოდა?
– ქეთოზე ორსულად რომ ვიყავი, მომწონდა ნამცხვარი შუ, რომელიც დღემდე ძალიან მიყვარს, მიუხედავად იმისა, რომ ტკბილეულის მოყვარული არ ვარ. მარიამზე უაზროდ ვჭამდი ნაყინს, სხვათა შორის, ახლა ისე ძალიან აღარ მომწონს. ქეთოზე უპრობლემოდ გაიარა 9 თვემ, მარიამზე კი ჯანმრთელობის თვალსაზრისით, ცოტა ცვლილებები მქონდა, მაგრამ არც ჩემთვის იყო საშიში და არც ნაყოფისთვის.
– ბოლო თვემდე შესანიშნავად გამოიყურებოდით. დიეტურად იკვებებოდით?
– კომპლიმენტისთვის დიდი მადლობა! პირველ ორსულობაზე მხოლოდ 16 კილო მოვიმატე, ამჯერად კი 14 კილოზე მეტი არ მომიმატია. ახლა ცოტა მაქვს მომატებული, მაგრამ ამას პრობლემად არ აღვიქვამ. დიეტაზე არასოდეს ვყოფილვარ, ქეთოს გაჩენის შემდეგ თავისით ჩავდექი ფორმაში და, იმედია, არც ახლა გამიჭირდება.
– მართალია, ბავშვი, სანამ გაიზრდება, მრავალნაირად შეიცვლება, მაგრამ მაინც ვისკენ უფრო იხრება მარიამი გარეგნობით – დედისკენ თუ მამისკენ?
– თავიდან მეგონა, რომ მარიამი ქეთოს ჰგავდა, მაგრამ შევცდი. აბსოლუტურად სხვანაირია. დარწმუნებული ვარ, დები მომავალში რადიკალურად განსხვავებულები იქნებიან. ქეთო რომ დაიბადა, მიშიკოს ასლი იყო და დღემდე მამას ჰგავს. მარიამს კი ჩემს თავს უფრო ვამსგავსებ. ვნახოთ, შემდეგ როგორი იქნება... რამდენიმე დღეა, რაც სახლში ვარ და ჯერ ბოლომდე არ მოვსულვარ აზრზე. სამშობიაროდან რომ გამოვედი, ქეთო ავად გამიხდა, საავადმყოფოში გადასხმები გავუკეთეთ. დიდი ქაოსური პერიოდი გავიარე და ცოტა დაბნეული ვარ.
– ქმარი თუ გეხმარებათ?
– რასაკვირველია, მეხმარება, ხან ერთ შვილთან ვართ, ხან – მეორესთან.
– ორი შვილის მამობამ მიშიკო თქვენ მიმართაც შეცვალა?
– როდესაც ოჯახში ბავშვი იბადება, უფრო დიდი სითბო ჩნდება, ურთიერთობები უფრო მყარდება, მეტი სტაბილურობაა. წლებთან ერთად ცოლქმრული ურთიერთობებიც სხვანაირი ხდება.
– ჯერ ადრეა ამაზე ლაპარაკი, მაგრამ ოჯახს ალბათ სურს, გვარის გამგრძელებელი გაჩნდეს.
– თუ ღმერთი ინებებს, ამ სიამოვნებაზე ნამდვილად არ ვიტყვი უარს, მაგრამ ეს ახლო მომავლის გეგმებში არ შედის. ჩვენი ოჯახის წევრებს, რა თქმა უნდა, სურთ გვარის გამგრძელებელი. მეორე ორსულობის დროს სანამ სქესს გავიგებდით, ვგეგმავდით, თუ ბიჭი იქნებოდა, ჩემი მამამთილის პატივსაცემად რეზო დაგვერქმია და ოჯახში პატარა რეზო ძოძუაშვილი გვყოლოდა. ჯერ რა გითხრათ, ახლა ამაზე ლაპარაკი და ფიქრი ადრეა.
– შემოქმედებაში ახლა ალბათ ცოტა ხნით პაუზა გექნებათ.
– გაგიკვირდებათ და, სამშობიაროდან რომ გამოვედი, ანუ რამდენიმე დღის წინ, ხმის ჩამწერ სტუდიაში მივედი. ალბომზე ვმუშაობ, პირველი სიმღერის ჩაწერა დაწყებული მაქვს. სტუდიაში ინსტრუმენტების ჩაწერა მიმდინარეობდა და მოსასმენად მივედი. მაინტერესებდა, რა და როგორ გაკეთდებოდა. არ ვიცი, ალბომი როდის გამოვა, ჯერ მხოლოდ პირველ სიმღერას ვწერ. ასე რომ, ამ მხრივაც ძალიან აქტიური ვარ და არა მგონია, ორი შვილის დედობამ საყვარელ საქმეს ჩამომაშოროს. ჩემი აზრით, ერთი მეორეს ხელს არ შეუშლის.
– სახლში დამხმარე გყავთ?
– კი, ეს ქალბატონი ქეთოს დაბადებიდან ჩვენს ოჯახშია და ახლა მარიამის გაზრდაში დამეხმარება. მეტწილად პატარა სულ ჩემთანაა, დედამ უკვე პირველი იავნანა უმღერა.
მადლობა ჩვენს ახლობლებს, მეგობრებს, ნათესავებს, რომლებმაც ჩვენი სიხარული გაიზიარეს. უამრავი მოლოცვა მივიღე. ძალიან ბედნიერი ვარ. ქალის ცხოვრებაში შვილი უმთავრესია, ამაზე კარგს რას გააკეთებ? ყველას ვუსურვებ ბედნიერებას და გამრავლებას!
ლანა კიკნაძე, ჟურნალი ”სარკე”