რას ნანობს კოტე თოლორდავას ცოლი განო მელითაური

მსახიობმა კოტე თოლორდავამ ექვსი წლის წინ მეორედ შექმნა ოჯახი და ცხოვრება განო მელითაურს დაუკავშირა. ინტერვიუებში ხშირად აღნიშნავს, რომ ნამდვილი მეორე ნახევარი იპოვა და რთული პერიოდების დაძლევა სწორედ მისი დახმარებით შეძლო. პროფესიით რეჟისორ განოს არ უჭირს ქმრის გაგება. ცოლ–ქმარს არც ის ავიწყდებათ, რომ სიყვარულს ფერების შემატება ყოველთვის სჭირდება. მათი ურთიერთობა რომანტიკულობას ინარჩუნებს. განოს თქმით, კოტემ იცის, ცოლი როგორ გაანებივროს. ქმრისგან ყველაზე დიდი მხარდაჭერა მშობიარობისას იგრძნო – კოტე ორივე შვილის, ტასოს და თარაშის დაბადებას დაესწრო და როცა შვილები ევლინებოდნენ ქვეყანას, ცოლის ხელი ეჭირა.
კოტე თოლორდავას მეორენახევრობის ტვირთსა თუ ბედნიერებაზე განო მელითაური გვესაუბრება.
– განო, რას ნიშნავს, იყო მსახიობის მეორე ნახევარი?
– კოტე ჩემთვის, პირველ რიგში, საყვარელი ადამიანია, მერე არის მსახიობი, წარმატებული მამაკაცი და ა.შ. ჩემი პროფესიის ქალისთვის მსახიობის ცოლობა არც ისე რთულია, რადგან გადასაღებ მოედანზე გავიზარდე. მშობლებიც რეჟისორები მყავს. გარდა ამისა, მე და კოტეს ბევრი საერთო ინტერესი გვაერთიანებს.
– დღის დიდ ნაწილს საქმეების გამო ცალ–ცალკე ატარებთ. ურთიერთობაში ეს სირთულეს ხომ არ ქმნის?
– სირთულე ის არის, რომ ერთმანეთი მუდმივად გვენატრება. ვცდილობთ, საღამოს მეტი დრო დავუთმოთ ერთიმეორეს. კოტეს კარგად შეუძლია თავისი საქმისა და პირადი ცხოვრების გამიჯვნა. საღამომდე თუ ვერ ვახერხებთ გათავისუფლებას, ერთმანეთს ვეხმიანებით, რომ სადმე მაინც დავსხდეთ სავახშმოდ.
– სერიალ "ჩემი ცოლის დაქალებში" კოტეს პერსონაჟი, დიტო, საკმაოდ რთული ხასიათისაა. თქვენ ქმარშიც ხომ არ იჭერთ მსგავს თვისებებს?
– კოტე და დიტო ძალიან განსხვავდებიან ერთმანეთისგან, მაგრამ ის მამაკაცური თვისებები, რაც დიტოს აქვს და რაც ქართველ მოზარდ გოგონებს მოსწონთ, კოტეს ნამდვილად ახასიათებს. ზოგადად დიტოთი ამგვარად აღფრთოვანების მიზეზად ის მიმაჩნია, რომ საქართველოში მამაკაცურობის დეფიციტია, მაგრამ ჩემი ქმარი დიტოსნაირი "ბნელი" ნამდვილად არ არის.
– რა სჭირდება კოტეს ოჯახში ან პირადად თქვენგან?
– მას არ აქვს განსაკუთრებული მოთხოვნები. მასთან ცხოვრება ძალიან კომფორტულია. ჩვენს ოჯახში არ არსებობს დოგმები და კანონები, მაგალითად, ქალმა საჭმელი უნდა გააკეთოს, კაცმა კი პროდუქტი მოიტანოს. პასუხისმგებლობებს და მოვალეობებს თანაბრად ვინაწილებთ სიტუაციის მიხედვით. ორივეს გვიყვარს შოპინგი.
– ყველაფერში ერთნაირი გემოვნება გაქვთ?
– კოტეს ერთ–ერთი დადებითი თვისება არის ის, რომ ძალიან გემოვნებიანია. ჩვენი გემოვნება თითქმის ყველაფერში ემთხვევა. ჩემს გარდერობზე ხშირად კოტე ზრუნავს. ამბობენ, რომ კაცებს არ უყვართ სამოსის ყიდვა, მაგრამ ჩემს ქმარს ეს არ ეხება.
– თქვენს ოჯახში როგორ არის მიღებული, აუცილებელია, ქმარს ცხელი სადილი დახვდეს თუ აქაც ერთმანეთ ენაცვლებით?
– 6 წელია ცოლ–ქმარი ვართ და მოთხოვნები და პრეტენზიული დამოკიდებულებები არასდროს გვქონია. რა კერძებსაც ვაკეთებ, კოტეს ყველაფერი მოსწონს. თვითონაც ძალიან კარგი კულინარია. რომ გავთხოვდი, კვერცხის შეწვაც არ ვიცოდი. ქმარმა კი ბევრი კერძის გაკეთება მასწავლა. ის ძალიან კარგად ამზადებს სოკოს და სტეიკს.
– როგორც ჩანს, ხასიათით უფრო ევროპელის ტიპის ქმარი გყავთ.
– მე ვიტყოდი, რომ ჩემი ქმარი სწორად მოაზროვნე მამაკაცია. კოტე კლასიკური ქართველი "მურთაზი" არ არის, მაგრამ ეს იმას არ ნიშნავს, რომ მე არ ვიცი, რაღაცეებს შორის სად გადის ზღვარი. კოტეს მოსწონს, როცა მოკლე კაბა მაცვია, მაგრამ, ამასთანავე ვიცი, სად რა ჩავიცვა. კოტე ისეთი ადამიანია, რომც გინდოდეს, სხვანაირად ვერ მოიქცევი. ასე რომ, აზიატიც არის და ევროპელიც.
– მაგალითად, რაში შეიკავებთ თავს და "ზღვარს" არ გადახვალთ?
– მგონია, რომ საზღვარგარეთ მარტოს არ გამიშვებს. მეორე მხრივ, არც მე მინდა კოტეს გარეშე უცხოეთში წასვლა. არის საკითხები, რასთან დაკავშირებითაც კოტეს თავისი პრინციპული აზრი აქვს. ცოტა ეჭვიანობაც ახასიათებს.
– თქვენ არ ეჭვიანობთ?
– არ ვარ ეჭვიანი. ერთი, რომ საკუთარ თავში დარწმუნებული ვარ და მეორე, კოტე არ მაძლევს ეჭვიანობის საბაბს.
– არც გაღიზიანებთ ქმრის თაყვანისმცემელთა რაოდენობა და მათი გადაჭარბებული ყურადღება?
– მიხარია, კოტეს რომ თაყვანისმცემლები ჰყავს, რადგან რეალური შოუ "შეგირდის" მერე ეს პერიოდი მეც გამოვიარე, თუმცა ჩემი გულშემატკივრები, კოტეს ქომაგებისგან განსხვავებით, გარკვეულ ზღვარს არ გადადიოდნენ. თავიდან ჩემი ქმრის რამდენიმე გულშემატკივარს გულუბრყვილოდ მივეცი მისი ტელეფონის ნომერი. მერე აღმოჩნდა, რომ ზოგი ზღვარს გადასულია. შეუძლიათ, ღამის ორ საათზე დარეკონ ან გაუთავებლად რეკონ, მიუხედავად იმისა, რომ კოტე არ პასუხობს, ან მესიჯები წერონ დ ა.შ. ეს ცოტა გამაღიზიანებელია.
– ცოლის დაქალების მიმართ რა დამოკიდებულება აქვს კოტე თოლორდავას?
– მე და ჩემი დაქალები კოტეს ხელში გავიზარდეთ. მათთან არაჩვეულებრივი ურთიერთობები აქვს. კოტე ერთ–ერთ საუკეთესო მრჩევლად ითვლება მათთვის. გათხოვებამდე ჩემი ცხოვრება მეგობრების გარეშე ვერ წარმომედგინა და, საბედნიეროდ, ამის წარმოდგენა არც დამჭირდა. მეც ძალიან ახლოს ვარ კოტეს მეგობრებთან.
– ერთ–ერთ ინტერვიუში თქვით, რომ საკმაოდ ხშირად კინკლაობთ. რა არის ამის მიზეზი?
– ყოველდღიურობა, სამსახური, ბავშვები გამორიცხავს კამათის არარსებობას, მაგრამ ეს არ არის გრანდიოზული და გლობალური მასშტაბის კონფლიქტი. ამგვარი რამ ყველა ოჯახში ხდება. ბოლო პერიოდში შემოვიღეთ წესი – ჩხუბის პირას მყოფნი ერთმანეთს ვუყურებთ, სამჯერ ჩავისუნთქავთ და ასე ვუბრუნდებით ძველ განწყობას. ერთ–ერთს აუცილებლად გვეცინება და იქვე ვრიგდებით.
– ექვსწლიანი ოჯახური ცხოვრება როგორ აისახა თქვენს ურთიერთობაზე – რა შემატა ან რა დააკლო მას?
– ყველამ იცის, კოტეს როგორ უყვარს სიურპრიზების მოწყობა. მას არაფრისგან შეუძლია დღესასწაული შექმნას. ვერც ვხვდები, რომ ჩვენი ქორწინებიდან ექვსი წელი გავიდა, რადგან ყველაფერი მხოლოდ უკეთესობისკენ იცვლება და რომანტიკულობა ძალიან დიდი დოზით გვაქვს ურთიერთობაში.
– ვიცი, რომ ამ ხნის განმავლობაში გქონდათ რთული პერიოდებიც. ასეთ დროს როგორ იქცევა კოტე, რა თვისებებს ავლენს?
– გვქონია რთული და გამოუვალი სიტუაციებიც კი და ასეთ დროს კოტე გაასმაგებულად ემოციური და ფეთქებადია. საკუთარ თავზე იმდენად არ ნერვიულობს, რამდენადაც ჩემსა და ბავშვებზე. წარმოუდგენელ სიტუაციებში კოტეს ისე შეუტრიალებია ყველაფერი, რომ მივმხვდარვარ, მისი სახით როგორი საყრდენი მყავდა. კოტე და მე, პირველ რიგში, მეგობრები ვართ.
– ცოლ–ქმარს შორის ურთიერთობა რომ არ გახუნდეს, რა არის საჭირო?
– გრძნობა და ვნება. შენი მეორე ნახევრისთვის ყოველთვის სასურველი უნდა იყო. ამასთან ერთად, თუ რამე უპატიებელი შეცდომა არ დაუშვა, პატარა მიზეზების გამო დათმობაზე წასვლა არ უნდა გაგიჭირდეთ.
– დაბოლოს, გაიხსენეთ თქვენი და კოტეს თანაცხოვრებიდან ყველაზე მნიშვნელოვანი წუთები.
– ასეთი ბევრი წუთი მახსენდება, მაგრამ განსაკუთრებით მახსოვს ბავშვების დაბადება, როცა კოტე ჩემ გვერდით იყო თავისივე სურვილით და ხელს არ მიშვებდა.
მანანა ნოდია, ჟურნალი სარკე