როგორ მოვხიბლოთ გოგონა

ფსიქოლოგების ეს რჩევები იმ ყმაწვილებისთვისაა გათვალისწინებული, რომლებიც პირველ ნაბიჯებს დგამენ სასიყვარულო ურთიერთობებში და ეს-ესაა სწავლობენ, როგორ მოაწონონ გოგონებს თავი.

შეეცადეთ, თქვენს თანატოლებში ყველაზე პოპულარულ გოგონას დაუმეგობრდეთ, შემდეგ ჰკითხეთ, როგორი ბიჭები მოსწონს და საყვარელ გოგონასთან ურთიერთობებში მისი რჩევებით იხელმძღვანელეთ.

კარგი იქნება, თუ პაემანზე ორიგინალურად, მაგრამ იმავდროულად ბუნებრივად და თავაზიანად მოიქცევით. ყველაფერი წინასწარ მოიფიქრეთ, მოამზადეთ და დაუვიწყარი საღამო მოუწყვეთ თქვენს რჩეულს.

შეეცადეთ, ჩაცმის ისეთი სტილი მოძებნოთ, რომელიც მხოლოდ თქვენთვის დამახასიათებელი დეტალით გამოგარჩევთ. გოგონებს მოსწონთ ორიგინალურად ჩაცმული ბიჭები. სტილიზებული და მოწესრიგებული სამოსი ერთ-ერთი მნიშვნელოვანი წინაპირობაა, რომ გოგონას მოეწონოთ. გარდა ამისა, უნდა გაითვალისწინოთ, რა ვითარებაში აპირებთ გოგონას გაცნობას ან მასთან შეხვედრას.

თუ კლუბში მიდიხართ, შეგიძლიათ მკვეთრი ფერები, თვალში საცემი ორიგინალური სტილი შეარჩიოთ, თუ უნივერსიტეტში აპირებთ წასვლას, სამოსი უფრო სადა უნდა იყოს. სხვათა შორის, კარგი იქნება, თუ გაითვალისწინებთ, რომ კლუბში წასასვლელად ყველა თვალში საცემად და მოდურად ჩაცმას ცდილობს, ამიტომ თქვენ ისეთი სტილი უნდა შეარჩიოთ, რომ ყველასგან გამოირჩეოდეთ.

ამისთვის რაიმე განსაკუთრებულად ორიგინალური და ძვირად ღირებული სამოსის მოძიება არ დაგჭირდებათ, პირიქით, ჩაიცვით უბრალოდ და სადად და ყველა მოგაქცევთ ყურადღებას. იმ შემთხვევაში კი, თუ ისეთ გარემოში მიდიხართ, სადაც ხალხი ჩვეულებრივად იცვამს, თქვენ მოდურად გამოეწყვეთ და აუცილებლად მოექცევით ყურადღების ცენტრში.

შეეცადეთ მრავალმხრივ განავითაროთ საკუთარი ნიჭი და შესაძლებლობები. რაც უფრო ბევრ თემაზე შეძლებთ საუბარს და მეტ სფეროზე გექნებათ წარმოდგენა, მით უკეთესი. სამწუხაროდ, ბიჭების უმრავლესობას, რომლებიც გოგონებისთვის თავის მოწონებას ცდილობენ, მიაჩნია, რომ ამისთვის `მაგარი ზმანი~ და მანქანა საკმარისია, მაგრამ ყოველთვის ასე ნამდვილად არ არის.

არც ის იფიქროთ, თითქოს საპირისპირო სქესისთვის მთავარი მხოლოდ ინტიმური ურთიერთობებია. ეს დროს მოაქვს, ამიტომ მაშინვე ფიზიკურ სიახლოვეს ნუ ეცდებით. გრძნობები გოგონასთვის ყოველთვის უფრო მნიშვნელოვანია. მათ მოსწონთ გვერდით ძლიერი და იმავდროულად ნაზი გრძნობებით აღსავსე მზრუნველი მამაკაცი.

ჟურნალი „რეიტინგი“