მოდელი საკუთარი სახელობის მაისურებს ქმნის +ვიდეო

კრისტი ყიფშიძეს სამოდელო ბიზნესში დაგროვილმა გამოცდილებამ საკუთარი სახელობის მაისურების ქსელის შექმნის სურვილი გაუჩინა. რატომ მაისურები? იმიტომ, რომ ეს სამოსი ძალიან უყვარს, პრაქტიკულიც არის და მოდურია.

კრისტი ყიფშიძე:
- საერთოდ, მსოფლიოში არსებობს ასეთი ტენდენცია - ცნობილი სახე სამოსის ხაზს ქმნის. იდეის განხორციელებაში მაკა კვიციანი, კომპანია "დალოოდის" ხელმძღვანელი დამეხმარა. ყველაფერი ამ ბაზაზე შეიქმნა; მოკლედ, ქსოვილი და მკერავი ამ კომპანიის გახლდათ, რითაც ძალიან კმაყოფილი ვარ. შემდეგ შექმნილი პროდუქცია თავადვე ჩავიცვი და ფოტოსესია მოვაწყვე, მუშაობდა ფოტოგრაფი ირა კუდრიაშოვა. მაისური სხვადასხვაგვარია, - უმკლავებო, მოკლემკლავიანი, ბრეტელიანი, მთავარი ის არის, რომ თითოეულზე ჩემი სხეულის ნაწილებია ასახული: ხელები, თვალები, ტუჩები...

- კრისტი, ეს ყველაფერი იმას ნიშნავს, რომ დიზაინერობას აპირებ?
- არა, უბრალოდ ამ საქმეში ძალები მოვსინჯე და გავაკეთე ასეთი პროექტი, მაგრამ თუკი კარგი იდეა კვლავ მომივა, შეიძლება, ამ მიმართულებით კიდევ გავაკეთო რაღაც...ფოტოსესიის შემდეგ თავადვე გადავიღე კლიპი, არავის ვანდე და ვიდეორგოლს "ციური სხეული" ვუწოდე. მაგრამ არ მითხრათ ახლა, კლიპმეიკერობასაც ხომ არ აპირებო, - ნამდვილად - არა. უბრალოდ, მინდოდა, ყველაფერი თვითონ გამეკეთებინა.

- ამ ზაფხულს დასვენება თუ მოასწარი?
- გაზაფხულიდან დავიწყე ბათუმში სიარული, მაგრამ სულ საქმიანი ვიზიტები მქონდა. რამდენიმე სილამაზის კონკურსზე ჟიურის თავმჯდომარედ ვიყავი მიწვეული. ცოტა ხნის წინ ერთ-ერთი ღვინის სარეკლამო კლიპი გადავიღეთ, სადაც ცნობილ მსახიობებთან: მიშა გომიაშვილთან და ზურა ინგოროყვასთან ერთად, მეც ვმონაწილეობ. მიშა იქ მამაჩემის როლს თამაშობს.

- 10 აგვისტოს, შენს ყოფილ მამამთილს, ზურა ყიფშიძეს დაბადების დღე ჰქონდა - 60 წლის გახდა. თუ მიულოცე?
- კი, როგორ არა, ზუსტად მაგ დღეს კლიპის გადაღება გვქონდა და იქიდან დავურეკე ზურას...

- როგორც გატყობ, ბოლო დროს რაღაც ძალიან საქმიანი ხარ.
- კი, ბევრი საქმის კეთება მიწევს. ცოტა დაღლილიც ვარ. თან, ვმუშაობ საავტორო უფლებების დაცვის ასოციაციაში ("ჯისიეი"), საზოგადოებასთან ურთიერთობის სამსახურის უფროსი ვარ. ამასთან, იქ ჟიურისთანაც ვთანამშრომლობ და ჟურნალისტობა მიწევს. რუბრიკა მაქვს ასეთი - "ახალი კრისტისგან", სადაც მკითხველს ნიჭიერ ახალგაზრდა ადამიანებს ვაცნობ, მყავდა მეთოჯინე, დიზაინერი...

- მოდელი, დიზაინერი, კლიპმეიკერი, ჟურნალისტი, პიარმენეჯერი, - კარგია, ბევრ საქმეს აკეთებ...
- ჰოდა, ვატყობ, რომ უკვე მაგრად "გადავიწვი"...

- პირად ცხოვრებაში რა სიახლეები გაქვს?
- არაფერი. წელიწად-ნახევარია, მარტო ვარ და თავს ასე მშვენივრად ვგრძნობ. ეტყობა, ურთიერთობებისგან დასვენება მჭირდება. მყავს შვილი, ოჯახი, მეგობრები, სამსახური და არაფერს ვუჩივი...

ლალი ფაცია

წყარო