ნინი დედალამაზიშვილი ქმარს დაშორდა

დაახლოებით წელიწად-ნახევრის წინ ნინი დედალამაზიშვილმა საზოგადოებაც და ახლობლებიც თავისი გათხოვებით გააკვირვა, ჯგუფ „მგზავრების“ სოლისტის, გიგი დედალამაზიშვილის დამ არჩევანი ასევე მომღერალ კოტიკო ყიფიანზე შეაჩერა. 10 მარტს წყვილს გოგონა შეეძინა, რომელსაც ელენე დაარქვეს, დაახლოებით წელიწადნახევრიანი თანაცხოვრების შემდეგ კი ერთმანეთს დაშორდნენ. დღეს ნინი ოჯახთან ერთად ზრდის პატარას, შეიცვალა იმიჯი, საკმაოდ კარგად გამოიყურება და აქტიურად მუშაობს კიდეც, რათა შვილს ყველანაირად რეალიზებული დედა ჰყავდეს.

- მშობიარობის შემდეგ ფორმაში ჩადგომა გადავწყვიტე, რადგან წონაში საკმაოდ ბევრი მქონდა მომატებული, დავიწყე ვარჯიში, ჩავერთე ფიტნესში და ამით ძალიან კმაყოფილი ვარ. ორსულობის მთელი ცხრა თვე მივუძღვენი ელენეს, ახლა კი დრო საკუთარი თავისთვისაც გამოვნახე. 18 კილო დავიკელი, იმდენად მივეჩვიე ვარჯიშს, რომ ეს ყველაფერი საქმეშიც მეხმარება, ბევრად უფრო მობილიზებულიც გავხდი და ენერგიულიც, სექტემბრიდან კი იოგით დავკავდები.
- გარდა ამისა, იმიჯიც შეიცვალე, თმა შეიღებე.
- ფერის შეცვლა ექსპერიმენტი იყო, მივედი სალონში თმის მოსაწესრიგებლად და ჩემი სტილისტი შემიჩნდა, ერთხელ მენდე ცხოვრებაში და თმა გაიღიავე, შენზე დიდი ხანია ღია ფერის თმას „ვხედავ“ , თუ არ მოგეწონება ისევ შენს ფერზე შეგიღებავო. გამიჭირდა გარისკვა, მაგრამ დავთანხმდი, შედეგით ძალიან კმაყოფილი დავრჩი, ჩემს მეგობრებსაც ძალიან მოეწონათ. ბოლო წლებია, სულ მოკლე თმას ვატარებ, მომბეზრდა და ახლა გაზრდა გადავწყვიტე, ამიტომ აქტიურად ვსარგებლობ ხალხური მეთოდებით და ვიკეთებ სხვადასხვა ნიღაბს, ამ საკითხზე უკვე დისერტაციის დაწერაც შემიძლია.
- ელენეზე მოგვიყევი მეტი, რა ხნისაა?
- 4 თვის, არაჩვეულებრივი გასაზრდელია, რაც ჩემთვის მოულოდნელი იყო, რადგან ყვე-ლა მეუბნებოდა, პირველი წელი გაგიჭირდება, უნდა გაუძლო უძილობასო და ა.შ. სიმართლე გითხრა, საერთოდ ვერ ვიგრძენი ასეთი რამ, იმიტომ რომ კარგად სძინავს, დილით იღვიძებს, არ ტირის, კარგ ხასიათზეა და ძალიან უპრეტენზიოა. ამასთანავე ყველა ჩემი დამხმარეა, ჩემებისთვის პირველი შვილიშვილია და გაგიჟებული არიან მასზე, ხანდახან მგონია, ელენე ჩემი დაა, ყველა მასზეა გადართული, ელენეს ეს სჭირდება, ელენეს ის უნდა. ციცი უკვე გეგმავს, როგორ სკოლაში უნდა ისწავლოს ელენემ, სად უნდა მიიღოს განათლება და ა.შ. დედაჩემსა და მამაჩემს მეორე სუნთქვა გაეხსნათ. გიგი ხომ საერთოდ გადარეულია, არადა, მას, როგორც კაცების უმრავლესობას, ჩვილი ბავშვების მიმართ ცოტა შიშნარევი დამოკიდებულება ჰქონდა, მაგრამ ძალიან უყვარს და კარგად ეთამაშება, ამბობს ხოლმე, შვილი რომ მეყოლება, ამაზე მეტად ვერ მეყვარებაო, როგორც საკუთარ შვილს, ისე ექცევა. როგორც კი ზაფხული დადგა, დაიწყო ფიქრი იმაზე, სად უნდა დაისვენოს ელენემ, მოკლედ, ამ პატარა არსებამ დიდი ხალისი შემოიტანა ოჯახში.
მოგეხსენებათ, გიგის მეუღლე, მარინა, ფოტოგრაფია, ფოტოსესიებს უწყობს ხოლმე ბავშვს და უნდა ნახო, კამერის გამოჩენისთანავე ელენე როგორ იპრანჭება, თითქოს მართლა იცოდეს, რაც ხდება, როგორც კი ხედავს, რომ უღებენ - იცინის, არტისტული მონაცემები აქვს. სავარაუდოდ, არტისტი გვეზრდება (იღიმის).

- კოტიკო როგორი მამაა?
- კოტიკოს ელენესთან შესანიშნავი ურთიერთობა აქვს, კარგი და ყურადღებიანი მამაა, მაგრამ ამაში ვერაფერს განსაკუთრებულს ვერ ვხედავ. ყველა ნორმალური მამაკაცი კარგი მამაა, თავის შვილს არაფერს აკლებს და შვილის გარეშე ვერ ძლებს, გამონაკლისი არც ელენეს მამაა.
- თუმცა გავრცელდა ჭორი, რომ ქმარს დაშორდი, მართალია?
- მართალია, ერთად აღარ ვართ, მაგრამ ყველა იმ მოვლენას, რაც ჩემს ცხოვრებაში ხდება, ყოველთვის პოზიტიურად ვუყურებ, რადგან ვიცი, რაღაც რომ მთავრდება, ძალიან კარგიც იწყება. ტრაგედიას არაფრისგან ვქმნი, ყოველთვის მაქვს ღმერთის იმედი და არასდროს ვეწინააღმდეგები მოვლენებს, როგორც ჩემთვის უკეთესია, ალბათ ყველაფერი ისე ხდება. ახლა შვილსა და სამსახურზე ვარ გადართული, მინდა, ჩემს შვილს რეალიზებული დედა ჰყავდეს.
- თქვენი დაშორების მიზეზი რა გახდა?
- კოტიკო ელენეს მამაა და თავს უფლებას არ მივცემ, რომ ამ ფაქტორებზე გულწრფელად ვისაუბრო.
- შენი ოჯახი როგორ შეხვდა ამ ფაქტს?
- ჩემი ოჯახის წევრები ჩემს ყველა გადაწყვეტილებას პატივს სცემენ და ეს ყველაფერიც ცივილიზებულად მიიღეს. იქიდან გამომდინარე, რომ მე დღეს თავს ვგრძნობ კარგად, ჩემ გარშემო მყოფი ადამიანები ბედნიერს მხედავენ, ამასთანავე ვარ რეალიზებული ქალი, არავინ არაფერს მეუბნება და არავინ ერევა ჩემს ცხოვრებაში. მე ყოველთვის დამოუკიდებლად და იმავდროულად რთულად ვიღებ გადაწყვეტილებას, მაგრამ თუ მივედი კონკრეტულ გადაწყვეტილებამდე, ის გასაჩივრებას აღარ ექვემდებარება. იშვიათ შემთხვევაში ვიცვლი ხოლმე პოზიციას.

- არ არის რთული მარტოხელა დედობა?
- იმ გარემოში, სადაც მე ვცხოვრობ, ძალიან უმადური და არასამართლიანი უნდა ვიყო, ჩემს თავს მარტოხელა დავარქვა.
- რაც შეეხება შენს საქმიანობას, გვითხარი ახლა სად მუშაობ?
- როგორც ყოველთვის, ახლაც ჩემი საქმით - პიარით ვარ დაკავებული, ერთ-ერთი კინოკომპანიის პიარმენეჯერი გახლავართ, სატელევიზიო სფეროსთვისაც ვმუშაობ ჩემს გუნდ-თან ერთად და გვინდა, სერიოზული განაცხადი გავაკეთოთ. გარდა ამისა, ერთ პროექტზე ვმუშაობ, რის გამოც ზაფხულს დასასვენებლად გასვლას ვერ ვახერხებ. ჩემ გამო არ მინდა, ელენეც თბილისში დარჩეს, ჰოდა, ციცი წაიყვანს ყირიმის სანაპიროზე, სადაც მარინას ოჯახს აქვს ბიზნესი, ფლობენ სასტუმროს და სწორედ იქ წავლენ ბებია და შვილიშვილი. თუ მოვახერხე, მე 2-3 დღით ზღვაზე წავალ. მართალია, „მგზავრებს“ 13 აგვისტოს კონცერტი აქვთ ბათუმში, მაგრამ სამწუხაროა, რომ ამ დროს ვერ მოვახერხებ ჩასვლას. ბიჭებს ამ ბოლო პერიოდში ჰქონდათ კონცერტები უკრაინაში, მოსკოვში ევგენი გრიშკოვეცთან ერთად და მიხარია, რომ ბათუმშიც გამართავენ კონცერტს, რადგან მათ ძალიან უყვართ ბათუმური აუდიტორია. გარდა ამისა, მე და ჩემი მეგობარი განო მელითაური ვიწყებთ სიმღერაზე მუშაობას, დუეტის ჩაწერას ვგეგმავთ.

ციცი ომანიძე
ჟურნალი „რეიტინგი“