თამარა თუმანოვა (თუმანიშვილი) +ფოტო
4 740 ნახვა
თამარა თუმანოვა წარმოშობით ქართველი მსახიობი და ბალერინა იყო, რომელმაც გასულ საუკუნეში საკმაოდ დიდ წარმატებას მიაღწია ჰოლივუდში. თუმანოვამ სახელი გაითქვა ბალეტშიც. მას პარიზში "შავ მარგალიტს" უწოდებდნენ. ასევე აღსანიშნავია ის ფაქტიც, რომ თავისი საოცარი სილამაზისა და ნიჭის დამსახურებით საშუალება მიეცა ეთამაშა მრავალ ჰოლივუდურ ფილმში, ეთანამშრომლა გრეგორი პეკთან, პოლ ნიუმანთან და ალფრედ ჰიჩკოკთანაც კი.
თამარა თუმანიშვილი 1919 წლის 2 მარტს დაიბადა მატარებელში, რომელიც ციმბირიდან შანხაის მიმართულებით მიდიოდა. გოგონას მამა, რუსი სამხედრო, კონსტანტინე ზახაროვი გზაში დაიღუპა ინფექციური დაავადებით და ახალშობილს დედამ თავისი გვარი მისცა.
ჩინეთის დატოვების შემდეგ დედა-შვილი კაიროში გადადის საცხოვრებლად, ხოლო შემდეგ- პარიზში. სწორედ აქ შეისწავლა თამარამ ფორტეპიანოზე დაკვრა და ოლგა პრეობრაჟენსკაიასთან ქორეოგრაფიასაც დაეუფლა. 10 წლის ასაკში შედგა გოგონას დებიუტი. ამ დროს კი ის ჯორჯ ბალანჩინმა შეამჩნია. ბალანჩინის დახმარებით თუმანოვა ნამდვილ ვარსკვლავად იქცა პარიზის ოპერის სცენაზე. მან თამარასთვის სპეციალურად შექმნა ბალეტი "ბროლის სასახლე".
1937 წლიდან თამარას ოჯახი აშშ-ში გადავიდა. ბალანჩინის რჩევით ოჯახის ყველა წევრმა გვარი თუმანოვად გადაიკეთა. ამერიკაში თამარას კარიერული წარმატებები კვლავ გაგრძელდა. ის მონაწილეობას იღებდა ბროდვეის მიუზიკლებშიც. აქვე აღსანიშნავია, რომ აქტიურად იყო ჩართული მსოფლიო საბალეტო ტურნეებშიც.
გამოდიოდა ლა სკალაში, ლონდონის ფესტივალებზე და ა.შ.
1933 წლიდან თამარა თუმანოვა გამოდიოდა ჰოლივუდის ფილმებშიც. პირველი იყო ფილმი "შემიყვარე თუ გაბედავ". მსახიობისა და ბალერინის ფილმოგრაფიიდან განსაკუთრებულად გამორჩეულია ფილმი " დახეული ფარდა", რომლის რეჟისორიც ალფრედ ჰიჩკოკია. ამ ნამუშევარში თამარას პარტნიორობას უწევენ ვარსკვლავები პოლ ნიუმანი და ჯული ენდრიუსი.
თუმანოვას ჰოლივუდში წარმატების ერთ-ერთი უპირველესი მიზეზი აღმოჩნდა 1944 წელს გადაღებული ფილმი "დიდების დღეები", სადაც თამარა მთავარ როლს თამაშობს გრეგორი პეკთან ერთად.
მსახიობი 1956 წელს ლეგენდარულ ჯინ კელის უწევს პარტნიორობას ფილმში "ცეკვაზე მიპატიჟება". ფილმი ამავე წელს გახდა ბერლინის საერთაშორისო ფილმების ფესტივალზე ოქროს დათვის პრიზიორი.
ფილმის "დიდების დღეები" გადასაღებ მოედანზე გრეგორი პეკთან ერთად.
1944 წელს თამარამ იქორწინა ცნობილ ამერიკელ პროდიუსერსა და სცენარისტ კეისი რობინსონზე, რომელთანაც მალევე განქორწინდა. მას ამ ქორწინებიდან შვილები არ დარჩა. სიცოცხლის ბოლო წლები კი გაატარა ბევერლი ჰილსზე, საკუთარ სახლში. თუმანოვას ანდერძის მიხედვით, მისი ქონება საქველმოქმედო საქმეს მოხმარდა. ულამაზესი მსახიობი და ბალერინა 1996 წლის 29 მაისს, სანტა მონიკაში გარდაიცვალა. ის დაკრძალულია ლოს-ანჯელესის სასაფლაოზე „Hollywood Forever“.
თამარას პორტრეტები აქვთ დახატული მხატვრებს ქრისტიან ბერარდს (მენილის კოლექცია, ჰიუსტონი, აშშ), ხუან მიროს, ვლადიმერ ტრეტჩიკოვს და სხვა.
