ქმრის ძმაკაცმა სიყვარული ამიხსნა

გელა ჩემი მეუღლის ბავშვობის მეგობარია. მე სულ ათი თვეა რაც გავიცანი, რადგან ბოლო ცამეტი წელი მოსკოვში ცხოვრობდა. საქართველოში რუს მეუღლე ლუბასთან ერთად დაბრუნდა.

ჩამოსვლის მეორე დღეს ჩვენთან სტუმრად მოვიდა და მეუღლემ ბედნიერმა გამაცნო თავისი მეგობარი. მე და ლუბა მალე დავმეგობრდით. ორივეს ორი წლის შვილები გვყავს და თან ბავშვის გარდა ბევრი რაღაც აღმოგვაჩნდა საერთო.

თბილისი გავაცანი, ყველა მნიშვნელოვანი ადგილი ჩემი მანქანით შემოვატარე. ყველაფერი ორი თვის წინ აირია, როცა ერთ დღეს სახლში ნასვამი გელა გვესტუმრა.

მეუღლე სახლში არ იყო, მაგრამ კარი თამამად გავუღე. დაჯდა, ათას სისულელეს ლაპარაკობდა. მეგონა ლუბა აქ იყო და იმიტომ მოვედიო. წასასვლელად რომ მოემზადა, გულში ჩამიკრა და მითხრა, კაცობას როგორ გადავაბიჯო, მაგრამ პირველი ნახვისთანავე მომეწონეო.

ძლივს მოვიშორე თავიდან. იმის შემდეგ რამდენჯერმე მოვიდა ჩვენთან და როგორც კი ოთახში მარტოს დამიჭერს მეუბნება, რომ ჩემ გამო მოდის და ამ სიყვარულის ატანა აღარ შეუძლია.

არ ვიცი, როდემდე გავუძლებ ამ მდგომარეობას. უკვე ჩემი ქმრის მიმართ მიჩნდება ზიზღი, რომ საკუთარმა მეგობარმა ასეთი რამ აკადრა.

ჟურნალი „რეიტინგი“