"ცოლმა უცხოეთში მიღალატა, მე კი აქ მისი დაქალი შემიყვარდა"

სამი წლის განმავლობაში ვფიქრობდი, რომ ქალისკენ არ გავიხედავდი. ადამიანმა, რომელიც ძალიან მიყვარდა, მიღალატა. უცხოეთში წავიდა და იქიდან განქორწინება მომთხოვა. მითხრა, აქ ნამდვილ მამაკაცს შევხვდი, ახლა ვიგრძენი, რომ ქალი ვარო.
რაიონში ვცხოვრობდით. ცოლი ჩემით ყოველთვის უკმაყოფილო იყო, მისი გული ვერაფრით მოვიგე. უცხოეთში წასასვლელი არაფერი სჭირდა, ყოველთვის ვმუშაობდი და საჭმელ–სასმელს არ ვაკლებდი. მას კი თბილისში მოუნდა ბინა, კურორტებზე სიარული. სულ ამბობდა, ბავშვობიდან კარგ ცხოვრებას ვარ მიჩვეული და შენი სიღარიბის ატანა არ შემიძლიაო. უცხოეთში წასასვლელი საბუთები ისე გააკეთა, არაფერი მკითხა. მეუბნებოდა, იქ საქმეს რომ ავაწყობ, შენც წაგიყვანო. მერე კი ასეთი რამ შემომითვალა.
თავს დამცირებულად ვგრძნობდი. როგორია, რომ გეტყვიან, შენ გვერდით თავს ქალად ვერ ვგრძნობდიო?! ესე იგი, კაცი არ ხარო. სამი წელი მხოლოდ შვილის სიყვარულმა გამაძლებინა. ბავშვი საქართველოში იყო, ჩემი ცოლის მშობლებთან და ყოველდღე ვნახულობდი. ხშირად ცოლის დაქალს მოჰყავდა ჩემთან.
ისე მოხდა, რომ იმ ქალთან დავმეგობრდი. მეგობრის საქციელი სასტიკად არ მოსწონდა. მეუბნებოდა, მისგან ასეთ რამეს არ მოველოდიო. საკუთარ ცხოვრებაზე მელაპარაკებოდა, მე ჩემსას ვუყვებოდი. ამასობაში სიყვარული ისე შემომეპარა, ვერც კი მივხვდი.
ერთ დღეს ცოტა ნასვამი ვიყავი. მარტომ სახლში ვერ გავძელი და ვთხოვე, მოსულიყო. მაშინ კი ჩვენ შორის გრძნობამ იფეთქა, ვერც ერთმა დავმალეთ, რომ ერთმანეთი გვიყვარდა. იმ დღის შემდეგ ყოველდღე ვხვდები. მის გარეშე ვერ ვძლებ, ძალიან მიყვარს. ვიცი, რომ ჩვენს ურთიერთობას რაღაც გაგრძელება უნდა მოჰყვეს, მაგრამ მეშინია. როცა გავიფიქრებ, ცოლად მოვიყვან–მეთქი, თვალწინ მაშინვე ყოფილი ცოლის სახე დამიდგება. მგონია, რომ ყველა ქალი ერთნაირია და ერთ დღეს ისიც მეტყვის, შენ გვერდით ქალად ვერ ვგრძნობდი თავსო. ეს კომპლექსი ვერაფრით დავძლიე.
ყოფილმა ცოლმა გაიგო, რომ ჩემსა და მის დაქალს შორის რომანია. იქიდან რეკავს გაგიჟებული და ყვირის, ამას როგორ მიკეთებთო. თავისი დაქალი გალანძღა, ბავშვს ახლოს აღარ გვაკარებს. ვერ ვხვდები, რა პრეტენზიები აქვს. იქ ვიღაც კაცთან ოფიციალურად იქორწინა და რა მისი საქმეა, მე აქ რას გავაკეთებ? ჩემი საყვარელი ქალიც მაჩქარებს, ეს საკითხი დროულად გადავწყვიტოთ, ქვეყანას ნუ ვალაპარაკებთო, მაგრამ ქორწინების შიში ვერაფრით დავძლიე.
სარკის მკითხველი