უკრაინაში მოხუცი მძღოლებისთვის სპეციალური ნიშნები მოიგონეს

დნეპროპეტროვსკის რაიონის საგზაო პოლიციის სამმართველომ იმ ნიშნების შესაძლო ვარიანტები გამოაქვეყნა, რომლებსაც მოხუცი მძღოლების ავტომობილებზე მიამაგრებენ. ესკიზები ავტოინსპექციის მიერ გამოცხადებული კონკურსის ფარგლებში შეგროვდა. სპეციალური ნიშნის შექმნის ინიციატორი დნეპროპეტროვსკელი მხცოვანი მძღოლი, 60 წლის ნიკოლაი ბოიჩენკოა. საგზაო ინსპექციაში ამ იდეას მხარი დაუჭირეს.

"მხცოვანი მძღოლების პრობლემა ნამდვილად იგრძნობა. სტატისტიკით, ისინი ავარიაში იშვიათად ხვდებიან, სამაგიეროდ ახალგაზრდა მძღოლები მათ აბუჩად იგდებენ, რადგან მხცოვანი მძღოლები მოძრაობაში ხელს "უშლიან". დიახ, ისინი შეიძლება ნელა დადიან, მაგრამ საჭესთან ბევრად დისციპლინირებულნი არიან",- აღნიშნავს რეგიონის საგზაო პოლიციის პრესსამსახურის უფროსი ვლადიმერ ლებედევი.

ივლისის შუა რიცხვებში საგზაო პოლიციის საიტზე კონკურსის მონაწილეების მიერ გაგზავნილი ესკიზები გამოქვეყნდა. შემოთავაზებებს შორისაა: ხელჯოხი, ადამიანი ხელჯოხით, საჭის ბორბალზე დაწერილი ციფრი 60, საქანელა- სავარძელი, კუ, ძაფის გორგალი საქსოვი ნემსებით, ასევე ბუ, ხე და გაფრენილი ბაბუაწვერა.

კონკურსი გრძელდება. საგზაო პოლიციის განცხადებით, ნიშანი "მძღოლებისთვის გასაგები უნდა იყოს და ამასთან, მხცოვანი მძღოლის ღირსება არ უნდა შელახოს". კონკურსის გამარჯვებულს დააჯილდოვებენ.







მომზადებულია lenta.ru-ს მიხედვით.