ათმილიონიანი ქორწილი - შონ პარკერმა „ტახტების თამაშების“ სტილში იქორწინა

33 წლის მილიარდერი, „ფეისბუქის“ თანადამაარსებელი შონ პარკერი უკვე ცოლიანია - მან თავის მეგობარზე, 24 წლის მომღერალ ალექსანდრა ლენასზე იქორწინა. ზეიმი ზღაპარს ჰგავდა და ერთ-ერთი ყველაზე ძვირად ღირებულიც აღმოჩნდა.

ინტერნეტ-მეწარმე შონ პარკერი ასევე არის „ნაპსტერისა“ და „პლაქსოს“ თანადამაარსებელი. წყვილმა ჯერ კიდევ ივნისში იქორწინა, თუმცა მათი ზღაპრული საქორწინო ცერემონიის ფოტოები ახლაღა გამოჩნდა. ბევრს მიაჩნია, რომ პარკერი ახირებული მილიარდერია, თუმცა მან ნამდვილი ზღაპარი მოუწყო საცოლეს.

ქორწილი კალიფორნიის ერთ-ერთ მშვენიერ ადგილას - ბიგ-სიურში გაიმართა, ერთ-ერთ სასტუმროში, რომელიც ტყით არის გარემოცული და წყნარი ოკეანის სანაპიროზე აქვს გასასვლელი.


ტყეში დეკორაციები აიგო: ნანგრევები, ჩანჩქერები, ტბები, დაიდგა მასიური გრძელი ხის მაგიდები, ტყავებით შემოსილი სკამები, უშველებელი ჭიშკარი, რომელშიც სტუმრები შედიოდნენ და თითქოს სხვა სამყაროში აღმოჩნდებოდნენ.

სამასამდე სტუმრისთვის სპეციალურად შეიკერა კოსტიუმები ტოლკიენის „ბეჭდების მბრძანებლის“ სტილში, მათი მომზადება კოსტიუმების ოსკაროსან მხატვარს - ნაილ დიკსონს დაევალა. სტუმრებისთვის გაგზავნილი მოსაწვევები ძველებურ გრაგნილებს ჰგავდა. ბევრმა ზეიმი პოპულარულ სერიალ „ტახტების თამაშს“ შეადარა, თუმცა თვით პარკერი ირწმუნება, რომ მასზე ორიენტირებული არ ყოფილა.


პატარძალს ელი სააბის მშვენიერი კაბა ეცვა და გაშლილი ქერა თმით მართლაც ჰგავდა „ტახტების თამაშის“ გმირს დეიენერის ტარგარიენს. ქორწილის მთავარი სამკაული კი იყო ნეფე-პატარძლის ერთი წლის ქალიშვილი უინტერი.

მხოლოდ ჭიშკარი 600 ათასი დოლარის ღირებულების იყო, საცეკვაო მოედანი - 350 ათასი დაჯდა, ველური მცენარეები - 1 მილიონი. ამას დაემატა სასტუმროს ქირა, თითოეულის სტუმრის ტანსაცმლის ფული, კვება... საერთო ჯამში ზეიმი პარკერს დაახლოებით 10 მლნ დოლარი დაუჯდა.

„გვინდოდა, ჩვენი ქორწილი ზღაპარს დამსგავსებოდა. დაწყებულიყო სიტყვებით „დიდი ხნის წინათ“ და დამთავრებულიყო: „და ცხოვრობდნენ ისინი ტკბილად და ბედნიერად“ . ცერემონიის შემდეგ ბევრ სტუმარს არ სურდა ჯადოსნური ტყის დატოვება.

ბევრი მათგანი მზის ამოსვლამდე დარჩა. ჩვენ კი ყვავილებით მორთულ მდელოზე ვიწექით და ცაში ატყორცნილი წითელი ხეების შრიალით ვტკბებოდით. ოკეანიდან დილის ნისლი გველამუნებოდა და ნამდვილ ნეტარებას განვიცდიდით“ , - გაუზიარა პარკერმა ცნობისმოყვარეთ.

ქორწილს ბევრი ცნობილი ადამიანი ესწრებოდა, მათ შორის სტინგი ცოლით, ემა უოტსონი და ოლივია მანი, მუსიკოსი შონ ლენონი, კალიფორნიის ვიცე-გუბერნატორი, ასევე მთავარი პროკურორი.


თავის დროზე პარკერი „ფეისბუქის“ პრეზიდენტი და თანადამაარსებელი იყო. ცუკერბერგის კომპანიაში პარკერის მისვლის შემდეგ „ფეისბუქი“ სწრაფად გაიზარდა და მსხვილი ინვესტორებიც მიიზიდა. თუმცა 2005 წელს პარკერს კომპანიიდან წასვლამ მოუწია კოკაინის შენახვის ბრალდების გამო. დევიდ ფინჩერის ცნობილ ფილმში „სოციალური ქსელი“ შონის როლი ჯასტინ ტიმბერლეიკმა შეასრულა.

ჟურნალი „რეიტინგი“