"ცეკვავენ ვარსკვლავებში" სოფო ნიჟარაძე იცეკვებს

"ცეკვავენ ვარსკვლავების" III სეზონში მომღერალი სოფო ნიჟარაძე იცეკვებს. ამის შესახებ ”ამბები.გე”-ს შოუს პროდუსერმა, ნოე სულაბერიძემ განუცხადა.

თუ დღემდე სოფო ტელეკომპანია "რუსთავი 2"-ის პროექტ "ნიჭიერის" ჟიურის წევრი იყო, ახლა ტელეკომპანია "იმედის" ეთერით საზოგადოებას კონკურსანტის ამპლუაში მოევლინება. სოფო მზად არის, ყველაფერი გააკეთოს იმისთვის, რომ მაყურებლის სიმპათია დაიმსახუროს და ჟიურის ყველა შენიშვნა გაითვალისწინოს. "ამბები.გე" სოფო ნიჟარაძეს დაუკავშირდა:

- დიახ, "ცეკვავენ ვარსკვლავებში" მივიღებ მონაწილეობას. ჩემთვის ეს სერიოზული გამოწვევაა, რადგან საოცრად მიყვარს ცეკვა. უბრალოდ, ამ საქმეში დიდი გამოცდილება არ მაქვს, რადგანაც ეს ცეკვის სულ სხვა მიმდინარეობაა, რომელთანაც არანაირი შეხება არ მქონია, თუმცა სხვა ცეკვებში ცოტ-ცოტა გამოცდილება კი დავაგროვე...

ასე რომ, მგონი, საინტერესო იქნება ჩემთვის "ცეკვავენ ვარსკვლავებში" მონაწილეობა და მინდა, ამით საკუთარი თავიც გამოვცადო, რა შემიძლია და რა - არა.

- პროექტი თავისთავად რთულია, ხანგრძლივ რეპეტიციებს მოითხოვს, შესაბამისად, ენერგიაც ბევრი იხარჯება. ამისთვის მზად ხართ?
- რა თქმა უნდა, გააზრებული მაქვს, რომ პროექტზე მუშაობა 24-საათიან შრომას მოითხოვს. საერთოდ, მშრომელი და მიზანდასახული ადამიანი ვარ. ასე რომ, მიზნად მაქვს დასახული, რაც შეიძლება, დიდი ენერგია დავხარჯო იმისთვის, რომ მაქსიმალურად კარგი შედეგი მივიღო. თითოეული ცეკვა კარგად გამომივიდეს იქამდე, სადამდეც მივალ და სადამდეც ჩემი თანადგომის სურვილი ექნებათ. მოკლედ, მე შრომას არ დავაკლებ და დანარჩენი ხალხსა და ჟიურიზეა დამოკიდებული.

- სოფო, თქვენ ასევე მასშტაბურ პროექტში ("ნიჭიერი") მონაწილეობდით, რომელიც "რუსთავი 2"-ის ეთერში გადის. იქ ჟიურის წევრი იყავით, ახალ პროექტში კი კონკურსანტი გახდით. როგორ ფიქრობთ, როგორ მიიღებს ამას მაყურებელი?
- "ნიჭიერი" ჩემი ყველაზე საყვარელი პროექტია. იქ ბევრი რამ მივიღე და მგონი, მას მეც შევძინე რაღაც. ვცდილობდი, ბუნებრივი ვყოფილიყავი, ისეთი, როგორიც ვარ. თუ მანამდე ჩემი შემოქმედებით მიცნობდნენ, "ნიჭიერით" ხალხმა უფრო ადამიანური კუთხით გამიცნო, როგორც რიგითი მოქალაქე და ჩვეულებრივი ადამიანი. ამიტომ ეს პროექტი შვილივით მიყვარს. მასში ზედიზედ ორი წლის განმავლობაში ვმონაწილეობდი, ახლა კი ასეთ საინტერესო სიახლეში ჩავერთე და ვნახოთ.

- ადვილად დათანხმდით ნოეს ახალ პროექტში მონაწილეობაზე?
- რომ გითხრათ, ადვილად დავთანხმდი-მეთქი, მოგატყუებთ. ისე, როდესაც ნოე პირველ პროექტს აკეთებდა, ჯერ კიდევ მაშინ შემომთავაზა მეცეკვა. მეორე სეზონზეც მივიღე წინადადება, მაგრამ მაშინ "ნიჭიერში" ვიყავი დაკავებული და მან გადასწონა...

ახლა კი "ვარსკვლავებში" მაინტერესებს, როგორც კონკურსანტს, ჟიური რა რჩევებს მომცემს, რასაც აუცილებლად გავითავლისწინებ.

- ჟიურის წევრების ყველა რჩევას მიიღებთ?
- კი, დარწმუნებული ვარ, რომ III სეზონზეც ჟიურიში კომპეტენტური ადამიანები იმუშავებენ, რადგანაც შოუს არაჩვეულებრივი პროდიუსერი ჰყავს და იცის, ვინ მოიწვიოს ამ ჯგუფის შემადგენლობაში. ვინც არ უნდა იყოს, ხელოვნებასთან კავშირი რომ ექნება, ამაში დარწმუნებული ვარ. თუმცა ვინც გინდა იყოს, ამას მნიშვნელობა არ აქვს, როგორც კონკურსანტს, გათავისებული მაქვს, რომ ჟიური მხოლოდ არ შეგაქებს, შენიშვნასაც მოგცემს. ისე, შექება ყველას უყვარს, მაგრამ ხანდახან ბევრი შექებაც საზიანოა. შენიშვნაზე უნდა მიუთითო. როგორც ჟიურის წევრს, გამოცდილება მაქვს, ძალიან რთულია შენიშვნის და მითითების მიცემა. როდესაც კონკურსანტს თვალებში ვუყურებ, შენიშვნის მიცემა მიჭირს. საერთოდ, ვცდილობ, ადამიანში პლუსები დავინახო, უარყოფითს ნაკლები დოზით ვამბობ, მაგრამ ახლა ცეკვებში აუცილებელია შენიშვნა. ასე რომ, ველოდები მითითებებს.

- როგორ ფიქრობთ, "ცეკვავენ ვარსკვლავებში" გაიმარჯვებთ?
- მაინცდამაინც ასე არ მაქვს განსაზღვრული, არ ვიცი, რა იქნება, რაც მთავრია, ამ პროექტისგან სიამოვნება მივიღო, მაქსიმალურად ვაჩვენო საკუთარი შესაძლებლობები, სცენაზე, ახალ ამპლუაში კარგად გამოვიყურებოდე და შემდეგ უკვე მაყურებელი და ჟიური გადაწყვეტს. რა თქმა უნდა, მაღალი შედეგი გამახარებს და ჩავთვლი, რომ რაც ვიშრომე, დამიფასდა-მეთქი. ვნახოთ, ყველაფერი მაინც იმაზეა დამოკიდებული, რამდენად ფორმაში ვიქნები და რამდენად კარგად მოვემზადები და წარვდგები საზოგადოების წინაშე.

ლალი ფაცია
"ამბები.გე"