როგორ გავხდეთ სწრაფად სახლის პირობებში?

ყველას გვინდა, ვიყოთ ლამაზები და მოხდენილები! მაგრამ ხანდახან არ არის იმის საშუალება, ვიაროთ სატრენაჟორო დარბაზებში, რეგულარულად დავკავდეთ სპორტით ან დავიცვათ მკაცრი დიეტა.

მაშინ როგორ მოვიშოროთ ზედმეტი კილოგრამები ისე, რომ არ გავიდეთ სახლიდან და პარალელურად, ვაკეთოთ ჩვეული საოჯახო საქმეები? გთავაზობთ რამდენიმე წესს, რომლებიც დაგეხმარებათ, სწრაფად ჩადგეთ ფორმაში!

სახლში გახდომის 10 წესი

1. დაიცავით დღისა და კვების რეჟიმი

პირველი წესი, რომელიც საწყისი ნაბიჯი იქნება გახდომის მცდელობაში – ეს დღის რეჟიმია. დაყავით დღე საათობით – ადგომის დრო, წყლის პროცედურები, საუზმე, სადილი, ვახშამი, საოჯახო საქმეები და სხვა. დაყავით საკვების მიღების დრო 5-ჯერადად, ერთნაირი დაშორებებით – საუზმე, მეორე საუზმე, სადილი, სამხარი, ვახშამი.

თუ გყავთ ოჯახი და ქმრის მოსვლამდე ვახშამი გაქვთ მოსამზადებელი, შეეცადეთ, მზადება მას მერე დაიწყოთ, რაც თავად შეჭამთ, იმისათვის, რომ საღამოს 7 საათის შემდეგ არ მოგინდეთ რაღაცების გასინჯვა.

გააანალიზეთ დღე – რომელ მონაკვეთში შეძლებთ დაუთმოთ საკუთარ თავს 15 წუთი? სასურველია, აირჩიოთ დრო ან საუზმემდე, ან სამხრამდე (მაგალითად, როცა ბავშვს სძინავს). გამოყავით 15 წუთი იმისათვის, რომ ცოტათი წაივარჯიშოთ – საკმარისი იქნება რამდენიმე ჩაკუზვა, ან პრესისა და თეძოს ვარჯიშები. ასე თქვენ ენერგიით დაიმუხტებით და თანდათანობით ეს ჩვევად გექცევათ.

2. უარი თქვით ალკოჰოლზე

თუნდაც ძალიან იშვიათად იღებდეთ ალკოჰოლურ სასმელებს, გახდომის მიზნით აუცილებელია, ალკოჰოლზე საერთოდ უარი თქვათ. ლუდი, ღვინო, ვისკი და სხვა სასმელები შეიცავს კალორიებს, ამასთან, ნასვამ მდგომარეობაში მძაფრდება მადა.

არ დაგავიწყდეთ, რომ ალკოჰოლის დალევა, თავის მხრივ, მოიცავს ჭამასაც და ყველაზე ხშირად ეს არის ხოლმე მარილიანი და ცხიმიანი თევზი, ტკბილეული, ყველი. ასე რომ, თუ საკუთარ თავს პროვოცირებას არ მოუწყობთ, თავიდან აიცილებთ ზედმეტ კილოგრამებს.

3. ატრიალეთ რგოლი და იხტუნავეთ სახტუნაოთი

სასიამოვნოა და მარტივი რგოლის ტრიალი, თანაც ეს დაგეხმარებათ, მუდამ ფორმაში იყოთ. თითქოს, დღეში მხოლოდ 10 წუთია, მაგრამ შედეგს თქვენ ერთ კვირაში ნახავთ. ატრიალეთ ჰულაჰუპი, როცა უყურებთ ტელევიზორს ან ელოდებით რეცხვის დამთავრებას. ამ ვარჯიშს ხანდახან შეუნაცვლეთ სახტუნაო. 30 ახტომა დღეში საკმარისი იქნება იმისათვის, რომ სულ მალე შედეგით დატკბეთ.

4. შეცვალეთ ჭურჭელი

ფსიქოლოგიური ტრიუკია, რომელიც, რაოდენ გასაკვირიც უნდა იყოს, მუშაობს! შეცვალეთ თქვენი თეფში შედარებით პატარათი. ამით შეამცირებთ საკვების რაოდენობასაც. არ დაალაგოთ სხვადასხვა კერძი ერთ თეფშზე – პირველი და ძირითადი კერძისთვის გამოიყენეთ ერთი თეფში, სალათისთვის – მეორე, ასევე მცირე მოცულობის. და შეეცადეთ არ დაიმატოთ!

5. აწარმოეთ დღიური

იმისათვის, რომ გაგიადვილდეთ შედეგების გაკონტროლება, აიწონეთ დიეტის დასაწყისში და ჩაწერეთ შედეგი სპეციალურ რვეულში. წინასწარ გააკეთეთ ყოველდღიური/კვირეული გეგმა და პლუსებით აღნიშნეთ ხოლმე ის პუნქტები, რომლებსაც შეასრულებთ და მინუსებით ისინი, რომლებიც – ვერ შეასრულეთ. ჩამოწერეთ იმ პროდუქტების სია, რომლებიც დღის განმავლობაში მიიღეთ, სიგარეტის რაოდენობა, თუ მწეველი ხართ.

საღამოს აიწონეთ და ეს მონაცემიც ჩაინიშნეთ. როგორც კი შედეგს შეამჩნევთ, კიდევ უფრო მეტი მოტივაცია გაგიჩნდებათ შემდგომი დიეტური გმირობების ჩასადენად.

6. გამოიყენეთ კრემები

დღეს კოსმეტოლოგიაში დიდი არჩევანია გასახდომი კრემების მხრივ და მათი გამოყენება მარტივია სახლის პირობებში. აარჩიეთ რომელიმე ანტიცელულიტური ტანის კრემი ან სკრაბი, შეგიძლიათ შეიძინოთ გასახდომი პლასტირებიც.

თავდაპირველად კრემი ხელზე დატესტეთ, რომ გაიგოთ, ალერგიას ხომ არ გაძლევთ და მხოლოდ ამის შემდეგ დაიწყეთ მისი აქტიურად გამოყენება. დილით, შხაპის მიღების შემდეგ წაისვით პრობლემურ ზონებზე და ჩაიცვით ტანზე მომდგარი შარვალი. გაიმეორეთ პროცედურა ძილის წინ.

7. აკეთეთ სახლის საქმეები ისე, თითქოს ვარჯიშობდეთ

რეცხვა, უთოობა, დალაგება, მაღაზიაში სიარული... გადააქციეთ ყველა ეს საოჯახო საქმე ფიტნესად. მაღაზიაში გასვლა თუ დაგჭირდათ, ისარგებლეთ კიბით და არა ლიფტით. თუ ჩანთები ძალიან მძიმე არ გაქვთ, უკანაც ფეხით ადით. უთოობის დროს თუ გაოფლიანდით, ეს ძალიან კარგია – ამიტომაც ჩაიცვით ისეთი ტანსაცმელი, რომელიც საუნის ეფექტს მოგცემთ. ყველანაირი ხერხი უნდა გამოიყენოთ გასახდომად!

8. გამორიცხეთ ზოგიერთი პროდუქტი

არსებობს პროდუქტები, რომელთა დავიწყებაც დიდი ხნით მოგიწევთ, თუ გსურთ, რომ წონაში დაიკლოთ. ბოსტნეული, ხილი, ორთქლზე მომზადებული ნატურალური ხორცი, რძის პროდუქტები – აი, რა უნდა გახდეს თქვენი მუდმივი თანამგზავრი კვების დროს.

გამორიცხეთ რაციონიდან პური, ტკბილი, ფუნთუშეული, შეამცირეთ ბურღულის მოხმარება, შეეცადეთ, მიირთვათ მცირე რაოდენობით კარტოფილი და დაივიწყეთ მაკარონი.

რა თქმა უნდა, მაიონეზი, ყველი, კარაქი, სოსისები და ძეხვიც უნდა გამორიცხოთ თქვენი მენიუდან.

9. არ ჭამოთ დაწოლილმა

წესად გაიხადეთ, ჭამოთ მაგიდასთან მჯდომმა! ტელევიზორთან ვახშმობა ან სიარულის დროს წახემსება – არ გამოგადგებათ. საკვების მიღებისთვის გამოყავით 5-10 წუთი, არ იჩქაროთ და არ იაროთ ჭამის დროს. გარდა ამ ყველაფრისა, რეკომენდებულია, ჭამოთ ისე, რომ არ გადაიტანოთ ყურადღება სხვა რამეზე – გამორთეთ ტელევიზორი, გადადეთ ლეპტოპი, შეწყვიტეთ კითხვა.

10. მიიღეთ აბაზანები

წყლის პროცედურები სასარგებლოა დღის ნებისმიერ მონაკვეთში! დილით კონტრასტული შხაპის მიღება, საღამოს კი წყლის მასაჟი (მიმართეთ წყლის ჭავლი სხეულის პრობლემურ ადგილებზე) საუკეთესო საშუალებაა სხეულის კორექციისთვის სახლის პირობებში. აბაზანის მიღების დროს გამოიყენეთ სხვადასხვა მეთოდი: არომატული ზეთები კუნთებს მოდუნების საშუალებას მისცემს, ხოლო შხაპის გელები კანის გამკვრივებასა და გადაჭიმვას შეუწყობს ხელს, სკრაბები კი ცელულიტს მოგაშორებთ.
წყარო