რამ აატირა ესპანეთში ეკა აბშილავა

''კომედი შოუს'' მსახიობ ეკა აბშილავას უყვარს ექსპერიმენტები, სამ თვეში თმის ფერი რამდენჯერმე შეიცვლა, შედეგად თმა დაეწვა, მერე მოკლედ შეიჭრა და შავად იმ იმედით შეიღება, რომ ამის შემდეგ კარგად მოუვლის და გაიზრდის კიდეც. წლევანდელი ზაფხული ეკამ საკმაოდ ნაყოფიერად გაატარა, დასთან ერთად ესპანეთში იმოგზაურა, შემდეგ გურია კარვებით დალაშქრა, რაჭასაც ესტუმრა რამდენიმე დღით და ბათუმიც არ დაუტოვებია უყურადღებოდ. მიღებულ შთაბეჭდილებებს ჩვენი რესპონდენტი ინტერვიუში გაგაცნობთ.

-  იქიდან გამომდინარე, რომ სამსახურში დღეს გავედი და შვებულების შემდეგ პირველად შევიკრიბეთ, ჯერჯერობით სიახლეებზე ვერაფერს გეტყვით, თუმცა ვიცი, რომ უამრავ ახალ პროექტს შევთავაზებთ მაყურებელს.
- როგორც ვიცი, ზაფხულში გქონდათ გადაღებები, მოგვიყევი, რას იღებდით?
- არ ვიცი, შეიძლება თუ არა ამის თქმა, მაგრამ გაგმიხელთ, რომ ჩვენი შემოქმედებითი ჯგუფი იღებდა კომედიურ ფილმს, რომელიც კინოთეატრებისთვის იქნება განკუთვნილი, ნახევრი გადავიღეთ, ცოტა ხანში ისევ განვაახლებთ გადაღებებს.
- ეკა, როგორც ჩანს, გიყვარს ექსპერიმენტების ჩატარება, ცოტა ხნის წინ იმიჯი შეიცვალე და თმაც შავად შეგიღებავს...
- საკუთარ თავზე მართლა დიდი ექსპერიმენტი ჩავატარე, გავიკეთე ''ქიმია'' და მალევე თმა წითურად შევიღებე, ცოტა ხანში გაქერავება მოვინდომე, გავიღიავე, დამეწვა, თან არ მომეწონა მიღებული შედეგი, მერე ისევ წითელი ფერი დავიბრუნე, მაგრამ ისეთი აღარ იყო, როგორიც მანამდე, ამდენი დატვირთვის შედეგად თმა დამეწვა და შევიჭერი, რამდენიმე დღის წინ კი შავად შევიღებე და გადავწყვიტე, რომ გავიზარდო და კარგად მოვუარო, თორემ სამ თვეში საოცრებები დავმართე (იღიმება). არასდროს ვნერვიულობ იმაზე, გაამართლებს თუ არა ჩემი ექსპერიმენტი, მომიხდება თუ არა ესა თუ ის ფერი, ვარცხნილობა, ადვილად ვუყურებ - თმაა და გაიზრდება, ყველაფერი მოგვარებადია და ამაზე ღელვა არ ღირს.
- რაც შეეხება ზაფხულს, როგორ გაატარე შვებულება?
- ფანტასტიკურად, მთელი ერთი თვე თავისუფალი გახლდით. ათი დღით ჩემს დასთან ერთად ესპანეთში გავემგზავრე, მოვინახულე მადრიდი, ბარსელონა, კარგად დავისვენე და განვიტვირთე... ამის შემდეგ ისე როგორ იქნებოდა, ჩემს საქართველოში მეგობრებთან ერთად ზღვაზე არ დამესვენა, ჰოდა, ბათუმს ვესტუმრე, შიგადაშიგ მქონდა პატარ-პატარა გასვლები რაჭასა და გურიაში.
- ესპანეთში პირველად იყავი? გაგვიზიარე შთაბეჭდილებები...
- კი, პირველად ვიყავი და დადებითი ემოციებით სავსე დავბრუნდი. გამაოცა ესპანელი ხალხის ცხოვრების წესმა, ძალიან მოწესრიგებულები არიან, არ არსებობს, ვინმემ შუქნიშნის წითელ ფერზე გზა გადაკვეთოს, სადმე ურიგოდ მივიდეს, ყველამ იცის, სად და როგორ მოიქცეს და მინდა გითხრათ, რომ საერთოდ არ ჰგვანან ქართველებს (იღიმის). ჩემზე განსაკუთრებული შთაბეჭდილება მოახდინა ქალაქმა ტოსამ, რომელიც ბარსელონიდან ერთი საათის სავალში მდებარეობს, ზღვის ფერმა გამაოგნა, ცისფერიც არსებობს და ცისფერიც, მაგრამ ასეთი არაფერი მინახავს, ცაში იკარგებოდა ზღვა, ჰორიზონტი არ ჩანდა, გარდა ამისა, გამაოცა საგრადა ფამილიას ტაძარმა, შესვლისას ყურსასმენებით ისმენ ისტორიას მის არქიტექტორ გაუდიზე, რამაც იმხელა ზეგავლენა მოახდინა ჩემზე, თავი მაქსიმალურად შევიკავე, ცრემლი რომ არ წამომსვლოდა, იმდენად დამაინტერესა ამ ყველაფერმა, საქართველოში დაბრუნების შემდეგ ინფორმაცია მოვიძიე და წავიკითხე გაუდის შესახებ. ასევე ძალიან მომეწონა ერთ-ერთ ცენტრალურ ქუჩაზე ცოცხალი მანეკენები, რომლებიც საათობით დგანან გაუნძრევლად და უცებ იწყებენ მოძრაობას, ისე იყვნენ გაშეშებულები, დიდხანს ვაკვირდებოდი, მართლა ცოცხლები იყვნენ თუ არა, ჩემი აზრით, საოცარი ხელოვნებაა, ნამდვილად შთამბეჭდავი იყო.

- სამახსოვრო სუვენირების წამოღება თუ გჩვევია მნიშვნელოვანი ადგილებიდან?
- კი, როგორ არა და ამ შემთხვევაშიც არ ვუღალატე ტრადიციას. აქედან წავედი ორი შორტითა და ორი მაისურით, იმიტომ, რომ ზუსტად ვიცოდი, იქიდან ძალიან დატვირთული დავბრუნდებოდი და მინდა გითხრათ, რომ სწორადაც მოვიქეცი... არ ვიცი ჩემს იქ ყოფნას დაემთხვა თუ რა იყო, მაგრამ უდიდესი ფასდაკლებები დამხვდა, კარგი ფეხსაცმელები 10-10 ევროდ ვიყიდე, ტყავის ქურთუკში 20 ევრო გადავიხადე. მართლა ძალიან კმაყოფილი დავბრუნდი. საერთოდ, როდესაც სადმე განსაკუთრებულ ადგილას მივდივარ, ყოველთვის ვცდილობ ისეთი რამ ჩამოვიტანო, რაც იმ პერიოდს გამახსენებს. ამჯერად ბარსელონიდან ჩამოვიტანე ზარდახშა, მადრიდიდან კი ხელნაკეთი საათი დამრჩება სამახსოვროდ.
- თანხას დასვენებისთვის მთელი წლის განმავლობაში აგროვებ?
- ყოველთვის მიყვარს თანხის შეგროვება. გარკვეული რაოდენობა რომ მიგროვდება, მერე ვწყვეტ, რა გავაკეთო, ამ შემთხვევაშიც ასე მოხდა, შევაგროვე ფული და მერე გადავწყვიტე ესპანეთში მემოგზაურა.
- ესპანური კერძები თუ დააგემოვნე?
- კი, მაგრამ ვერ ვიტყვი, რომ დიდად მოვიხიბლე.
- რაიმე უცნაურ სიტუაციაში ხომ არ აღმოჩენილხარ ამ მოგზაურობის დროს?
- თუ იმას არ ჩავთვლით, რომ რამდენჯერმე დავიკარგეთ, მაშინ არა. ძირითადად რუკებით ვმოძრაობდით, ამიტომ დაკარგვას პანიკაში არ ჩავუგდივართ, მალევე მივედით ჩვენთვის სასურველ ადგილას.
- ახლა ქართულ კურორტებზე დასვენების ამბები მოგვიყევი...
- სამი დღით გურიაში ლაშქრობაში ვიყავი, ძალიან კარგად გავერთეთ, ამის შემდეგ მეგობართან წავედით რაჭაში, სადაც ისეთი ჩანჩქერი ვნახე, დღემდე გაოცებული ვარ, ოთხ სართულად გადმოდიოდა წყალი, სამ სართულზე შევძელი ასვლა, მაგრამ მეოთხეზე ვეღარ მოვახერხე. რაც შეეხება ბათუმს, მიუხედავად იმისა, რომ ესპანეთში კარგი დრო გავატარე, ბათუმში დასვენება მაინც შეუდარებელი იყო, ყოველ წელს მეგობრები არაჩვეულებრივ დროს ვატარებთ ამ ქალაქში. მართალია, სულ ამბობდნენ, ცუდი ამინდებიაო, მაგრამ მე გამიმართლა ამ მხრივ.
- ადვილად ირუჯები?
- რამდენ ხანსაც უნდა დავწვე მზეზე, გარუჯვის რაღაც კონდიციამდე რომ მივალ, მეტად ვეღარ ვმუქდები, ამიტომ ჩემს ფერზე რომ დავდგები, აღარ ვწვალობ და ძირითად დროს წყალში ვატარებ. თანაც, სიმართლე გითხრათ, ნამზეურზე დიდად არ ვგიჟდები, სოლარიუმშიც ერთადერთხელ ვარ ნამყოფი, ვიცი, რომ საზიანოა ჯანმრთელობისთვის.
- ეკა, ექსტრემალური გასართობები თუ გიზიდავს?
- კი, ექსტრემალი ვარ. ბარსელონაში ძალიან საშიშ ატრაქციონზე ვიჯექი, მაგრამ არაფრის შემშინებია, პარაშუტით გადმოხტომა ნებისმიერ დროს რომ შემომთავაზონ, არც დავფიქრდები, ისე დავთანხმდები.
- პლაჟზე ალბათ მამაკაცების ყურადღებას იქცევ, ეს გიქმნის დისკომფორტს?
- ასე თუ ისე, ვიქცევ, მაგრამ დისკომფორტს არ მიქმნის, თავიდან უფრო იყო შემაწუხებელი, რადგან ვერ ხვდებოდნენ, მართლა მე ვიყავი თუ არა და ამის გამო რატომღაც ვიძაბებოდი, ახლა კი არ ვიცი მივეჩვიე თუ რა ხდება, მაგრამ ასეთი ფაქტები აღარ მაწუხებს. არავინ თქვას, რომ პოპულარობა დამღლელია და ამით წუხდება ვინმე, პირიქით, ნამდვილად სასიამოვნოა.

- ცეკვა, ღამის კლუბები რამდენად ახლოსაა შენთან, ზღვისპირა ქალაქებში თუ სტუმრობ ღამის კლუბებს?
- კი, მიყვარს კლუბური სიტუაციები, ბარსელონაში ერთხელ ვესტუმრე კლუბს, იქ ღირსშესანიშნაობების სანახავად უფრო მეტ დროს ვხარჯავდი, ბათუმში კი აქტიურად დავდიოდი და ვერთობოდი კლუბებში.
- ეკა, რა ხდება შენს პირად ცხოვრებაში? ბოლოს შენთან ინტერვიუ რომ ჩავწერე, მითხარი, სერიოზული ურთიერთობის დასაწყისში ვარო...
- მივხვდი, რომ პირად ცხოვრებაზე აღარ უნდა ვილაპარაკო, რამდენჯერაც ამაზე ხმამაღლა ვისაუბრე, მერე ან ურთიერთობა წარიმართა არასწორად, ან ვერ გამიგეს კარგად, ამიტომ ამჯერად თავს შევიკავებ ამ კითხვაზე პასუხისგან. მხოლოდ იმას გეტყვით, რომ ოჯახის შექმნა ჯერ გეგმაშიც არ მაქვს.
- საკურორტო რომანი თუ გქონია?
- კი, როგორ არა, ერთხელ იყო შემთხვევა, როცა ჩემი საკურორტო რომანი გასცდა კურორტის ფარგლებს და უფრო მეტხანს გაგრძელდა, ვიდრე ასეთ სასიყვარულო ურთიერთობებს შეეფერება, მაგრამ ბოლოს მაინც დასრულდა.
- საერთოდ, რამდენად შეგიძლია გრძნობების კონტროლი?
- მკაცრად შემიძლია გრძნობების კონტროლი და ხანდახან ეს არ მომწონს, რადგან ზოგჯერ უნდა მოეშვა და მიჰყვე ცხოვრების დინებას, მე კი სულ ვაკონტროლებ თავს.
- ამაში რა იგულისხმება, გონებით საზღვრავ ყველაფერს და არა გულით?
- ხშირ შემთხვევაში ასეა, მაგრამ უკეთესი იქნება, გულიდან გამომდინარე მივიღო გადაწყვეტილებები, თუმცა ჩემს ხასიათში ასე ზის, ამდენი წელია ასე ვიქცევი, ვერ ვიცვლები და ალბათ ასე გავაგრძელებ მუდამ.
- შეყვარებული რამდენჯერ ყოფილხარ?
- ნამდვილი სიყვარული ალბათ მხოლოდ ერთხელ განვიცადე, მაგრამ ბოლოს სხვადასხვა მიზეზის გამო ამ ურთიერთობამ კრახი განიცადა...

ციცი ომანიძე
ჟურნალი ''რეიტინგი''