მაია ასათიანის პირველი სკანდალური სტუმარი ნანუკა ჟორჟოლიანი აღმოჩნდა

სატელევიზიო სეზონი დაიწყო და ტელევიზიების დერეფნები ხალხმრავალი და ხმაურიანი გახდა. ''ნანუკას შოუსა'' და ''პროფილის'' ახალ გადაცემებს მაყურებელი განსაკუთრებული ინტერესით ელოდება.

სანამ ეთერში ანონსები გავა, ექსკლუზიურად ჩვენი საიტიდან შეიტყობთ, რომ მაია ასათიანმა კარგი გათვლა გააკეთა და პირველ გადაცემაში ნანუკა ჟორჟოლიანი მიიწვია სტუმრად. ცხადზე ცხადია, რომ ''პროფილის'' პირველ გადაცემას მაყურებელი ნამდვილად ეყოლება.

შეგახსენებთ, რომ პირველი ნაბიჯი ამ მხრივ ნანუკამ გადადგა. რამდენიმე წლის წინ, ჯერ კიდევ მაშინ, როცა ნანუკა ტელეკომპანია ''იმედში'' მუშაობდა, მაია სტუმრად მიიწვია.

მერე დიდი ხნის განმავლობაში ამ გადაცემაზე წერდნენ, ფსიქოლოგები კვლევებს ატარებდნენ, რამდენად გულწრფელი იყო ტელეწამყვანების ღიმილიანი სახეები. ნანუკამ მოწვეულ სტუმარს ძაღლიც კი აჩუქა.

ჩვენ ნანუკას დავუკავშირდით და ''პროფილში'' სტუმრობის შესახებ ვკითხეთ. მართალი გითხრათ, გაუკვირდა კიდეც, ეს ამბავი როგორ გაიგეთო, მაგრამ, აბა, რისი ჟურნალისტები ვართ, ამ ორი ტელეწამყვანის სტუდიაში ერთად ყოფნის ამბავი რომ გამოგვპარვოდა.

- ნანუკა, გავიგეთ, მაია ასათიანი სეზონს შენით ხსნის...
- ჰო, პირველ გადაცემაში მიმიწვია.
- რა თემაზე ისაუბრეთ?
- თითქმის ყველაფერზე ვილაპარაკეთ. არის თემები, რომლებზეც პირველად და უკანასკნელად ვისაუბრე საჯაროდ.
- მხოლოდ შენ ხარ პირველი გადაცემის სტუმარი?
- არა მგონია, მაგრამ სხვა სტუმრების შესახებ არაფერი ვიცი. პირველ ბლოკში მე ვარ ჩემი პროფილით (იცინის).
- ალბათ მაია ჩვეულებისამებრ სავარძელზე ჩამოგიჯდა?
- (იცინის) არა, ახალი სტუდია აქვს მაიას, ცალკე სავარძელში იჯდა და პირდაპირ მკითხა პირადზე.
- კიდევ რაზე ისაუბრეთ?
- ჩემს ბავშვობაზე, მშობლებზე, ძმაზე. ეს მართლაც პირველი შემთხვევაა, როცა პირადზე კამერების წინ ვყვები.
- რით ჰგავდა ეს გადაცემა შენსას, როცა მაია გყავდა სტუმრად?
- ჩემს შემთხვევაში იყო შოუ, აქ აქცენტი ინტერვიუზე გაკეთდა.
- მახსოვს, მაშინ მაიას საჩუქარიც გაუკეთე, შენც ხომ არ გისახსოვრა რაიმე ტელეწამყვანმა?
- არა, აქ მთავარი მისთვის, როგორც წამყვანისთვის, ინტერვიუ იყო.
- აღიარებ რომ მაიამ კარგად გათვალა სეზონის დაწყება რეიტინგის თვალსაზრისით?
- (იცინის) კი, აშკარად. ძალიან ეფექტური დასაწყისია და წარმატებებს ვუსურვებ მას.

ნინო მჭედლიშვილი
ჟურნალი ''რეიტინგი''