''ახალი ლელა და მამულიჩა'' ქართულ შოუბიზნესში

''საქართველოს ვარსკვლავის'' 2012 წლის მონაწილე ანი გოზალიშვილი ჯერ მხოლოდ 17 წლისაა. საერთაშორისო ურთიერთობებზე აპირებს ჩაბარებას, მაგრამ სიმღერისთვის თავის დანებებას არ გეგმავს. ცოტა ხნის წინ მისი პროდიუსერი ბექა ხალათაშვილი გახდა. კულუარებში მათზე უკვე ამბობენ, რომ ისინი ''ახალი ლელა და მამულიჩა'' გახდებიან.

- ''საქართველოს ვარსკვლავში'' მონაწილეობას არ ვაპირებდი. დამატებითი კასტინგი რომ გამოცხადდა, მაშინ მივედი. პროექტში რომ ამიყვანეს, ძალიან გამიხარდა. გამარჯვებაზე აღარც მიფიქრია. ბედნიერი ვიყავი, ''საქართველოს ვარსკვლავის'' პირველი ფინალისტი გოგო რომ გავხდი.
- დიდი ხანია მღერი?
- 8 წლიდან ვმღერი. ''საქართველოს ვარსკვლავში'' ყოველ კვირას ბენდთან ერთად ცოცხლად სიმღერამ დიდი გამოცდილება მომცა. ეს პროექტი დამეხმარა სცენის შიშის დაძლევაში.
- როგორ ფიქრობ, მოახერხებ, ჩაერთო შოუბიზნესში და აქტიური მომღერალი იყო?
- კონკურსის შემდეგ ჩემი ცხოვრება შეიცვალა. პროექტის შემდეგ ბევრ კონცერტში მივიღე მონაწილეობა. მიწვევენ კლუბებსა და ბარებში. მომავლის და ჩემი პროდიუსერის, ბექა ხალათაშვილის იმედი მაქვს. მინდა, უფრო დავიხვეწო და გავიზარდო. დღემდე ვოკალში სულ ვმეცადინეობ. მინდა, უფრო ბევრს მივაღწიო.
- სიმღერა რომ მართლა ძალიან გიყვარს, ეს შენი ტატუდანაც ჩანს. ნოტები გაქვს ხელზე ამოსვირინგებული.
- სანამ ''საქართველოს ვარსკვლავი'' დაიწყებოდა, ერთი კვირით ადრე გავიკეთე. სახლში ამის გამო დიდი ამბავი ატყდა. დედას არ უნდოდა, სვირინგი რომ მქონოდა. მამამ დამრთო ნება და დედამ რომ ნახა, სერიოზულად გამიბრაზდა.
- კონკურსებში მონაწილეობას კიდევ გეგმავ?
- ჯერჯერობით არც ერთ კონკურსში არ ვაპირებ მონაწილეობას. საქართველოში მხოლოდ ორი კარგი კონკურსია - ''საქართველოს ვარსკვლავი'' და ''ახალი ხმა'' . რადგან ''საქართველოს ვარსკვლავში'' გამიმართლა, ცოტა ხანი დაველოდები, იქნებ უფრო გრანდიოზული პროექტი დაიწყოს და მაშინ ვცდი კიდევ ბედს. უცხოეთში მაქვს მიწვევა ერთ-ერთ კონკურსზე და მომავალ წელს ვგეგმავ წასვლას.
- რომელ კონკურსში ფიქრობ მონაწილეობის მიღებას?
- გერმანიაში მიმიწვიეს. წელს უნდა წავსულიყავი, მაგრამ გადავწყვიტე, ჯერ ჩამებარებინა უმაღლესში და მერე დაწყნარებული წავსულიყავი კონკურსზე.
- ცოტა ხნის წინ შენი პროდიუსერი ბექა ხალათაშვილი გახდა, დიდი ხანია მას იცნობ?
- ბექა ცოტა ხნის წინ გავიცანი, მაგრამ დიდი გეგმები გვაქვს. გვინდა, ახალი სიმღერები ჩავწეროთ, ვეძებთ კომპოზიტორს, რომელიც ჩემი ხმის შესაფერის სიმღერას დამიწერს. გვინდა, ჩემი ახალი სიმღერები სხვადასხვა რადიოში დავატრიალოთ. ვგეგმავთ კონცერტებს საქართველოს სხვადასხვა ქალაქში და მომავალში ბექა ჩემს კლიპზეც იზრუნებს.
- პირადში ცხოვრებაში რა ხდება?
- განსაკუთრებული არაფერი. ბევრი თაყვანისმცემელი მყავს, მაგრამ პირადად მე არავინ მიყვარს და მომავალში რა იქნება, არ ვიცი.
- გავიგე, რომ პროდიუსერს მოსწონხარ.
- ზუსტად არ ვიცი.
- იმასაც ამბობენ, რომ ქართული შოუბიზნესის ''ახალი ლელა და მამულიჩა'' უნდა გახდეთ...
- მართლა ასე ამბობენ (იცინის)? პროდიუსერთან ვმეგობრობ და სიყვარულზე ლაპარაკი ზედმეტია. როგორც მეგობარი, ისე მიყვარს. არანაირი სხვა გრძნობა ჩემი მხრიდან არ არის და მინდა, მისი მხრიდანაც ასე იყოს (იცინის). არ მინდა, საკუთარ პროდიუსერს მოვწონდე.
- რატომ, თუ შეუყვარდები, უფრო იზრუნებს შენს პიარზე და ყველაფერს გააკეთებს, რომ აქტიურად ჩაერთო ქართულ შოუბიზნესში...
- მე მეგობრული გრძნობების გარდა არაფერი არ გამაჩნია ბექას მიმართ.
- როდის გაიცანი ბექა?
- ერთმანეთი ყვარლის ტბაზე გამართულ საქველმოქმედო კონცერტზე გავიცანით. საერთო მეგობარმა მთხოვა, ბექა საქველმოქმედო კონცერტს აწყობს და იქნებ იმღეროო. ჩავედი, გავიცანი და დავმეგობრდით. რამდენიმე კვირის წინ მითხრა, შენი პროდიუსერი მინდა გავხდეო. ამ წინადადებამ ძალიან გამახარა. როგორც გითხარით, მასთან ერთად უკვე ბევრი შემოქმედებითი გეგმა მაქვს. ვნახოთ, როგორ განვითარდება მოვლენები.

მერი კობიაშვილი
ჟურნალი ''რეიტინგი''