როგორ ებრძვის ცელულიტს თამთა შედანია

საერთაშორისო კონკურსი "მის მსოფლიო" 28 სექტემბერს ამჯერად ინდონეზიის დედაქალაქ ჯაკარტაში ჩატარდება. ჩვენი ქვეყნიდან კონკურსში მონაწილეობას "მის საქართველო 2012" თამთა შედანია მიიღებს. პარალელურად, ქართველი ლამაზმანი თავისი ცხოვრების უფრო მნიშვნელოვანი მოვლენისთვის – ქორწილისთვის ემზადება. თამთას რჩეული 24 წლის ერეკლე მანგოშვილი გახლავთ, ახალგაზრდა ბიზნესმენი და რალისტი (ერეკლეს პირველ ცოლთან, მომღერალ თაკო ვადაჭკორიასთან შვილი ჰყავს). სავარაუდოდ, ქორწილი შემოდგომაზე შედგება.
თამთა საგულდაგულოდ ემზადება კონკურსისთვის, რომ საუკეთესო ფორმაში იყოს. სხვა რამეზე ფიქრისთვის კი დრო არ რჩება. ამბობს, რომ ქორწილის დეტალებზეც მას შემდეგ იზრუნებს, როცა კონკურსს უკან მოიტოვებს.
– თამთა, ორი მნიშვნელოვანი მოვლენა მოდის თქვენს ცხოვრებაში – "მის მსოფლიოს" კონკურსი და თქვენი ქორწილი. როგორ ემზადებით ამ დღეებისთვის?
– როგორც არაერთხელ აღმინიშნავს, ამ ეტაპზე ჩემთვის კარიერას ყველაზე დიდი მნიშვნელობა აქვს. "მის მსოფლიოზე" გამგზავრებას მოუთმენლად ველოდები და ამ რთული და საპასუხისმგებლო მისიისთვის ინტენსიურად ვემზადები. რაც შეეხება ჩემს ქორწილს, ამაზე მოგვიანებით ვიფიქრებ.
– დიდიხანია მოდელი ხართ და ჩვენი რუბრიკისთვის "სარკის წინ" ალბათ ბევრი საინტერესოს თქმა შეგიძლიათ იმის შესახებ, როგორ მოუაროს ქალმა თავს, შეინარჩუნოს სილამაზე, გარეგნობა გაიუმჯობესოს. დავიწყოთ იმით, რა ასაკში გაიკეთეთ პირველი მაკიაჟი?
– როგორც ნებისმიერმა გოგონამ, მეც ბავშვობაში პირველი მაკიაჟი დედაჩემის ნივთებში აღმოჩენილი ტუჩსაცხით და ტუშით გავიკეთე, ალბათ ჯერ კიდევ 5 წლის ასაკში.
– ახლა, როცა უკვე კარგად იცით მაკიაჟის ხელოვნება, თქვენს სახეზე რაზე აკეთებთ აქცენტს, რომელ ნაკვთს უსვამთ ხაზს?
– უმეტეს შემთხვევაში თვალებზე ვამახვილებ ყურადღებას და გამოკვეთილი ტუჩები მომწონს. სხვადასხვა გადაღებებსა და ჩვენებებზე განსხვავებულ მაკიაჟს ვიკეთებ. თითოეული ვიზაჟისტი, დიზაინერი თუ ფოტოგრაფი თავისი ხედვის მიხედვით მირჩევს. პირადად მე ყოველდღიურ ცხოვრებაში მსუბუქ მაკიაჟს ვანიჭებ უპირატესობას. წვეულებებზე ან განსაკუთრებულ შემთხვევაში, ჩაცმულობიდან და სიტუაციიდან გამომდინარე ვწყვეტ, როგორი გავიკეთო.
ვარცხნილობის და მაკიაჟის გაკეთება კარგად მეხერხება, სწრაფად მოწესრიგება და ფორმაში ყოფნა ჩემთვის პრობლემას არ წარმოადგენს.

– თქვენს ხელჩანთაში ბევრი კოსმეტიკაა?
– გააჩნია, სად მივდივარ და რისთვის. თუ მაკიაჟი უკვე მაქვს, მხოლოდ მინიმალურით ვკმაყოფილდები. სუნამო და უფერული ან ბუნებრივი ფერის ტუჩსაცხი ის აუცილებელი ნივთებია, რომლებიც სულ თან დამაქვს.
– გიყვართ გარეგნობით, სამოსით ყურადღების მიქცევა, ექსტრავაგანტური სტილი?
– რა თქმა უნდა, მიყვარს. ეს ჩემი პროფესიის და უკვე ხასიათის ნაწილია, მაგრამ იმასაც გააჩნია, თქვენ რას უწოდებთ ექსტრავაგანტურს. მთავარია, სამოსი სიტუაციას, ადგილს და ჩემს გარეგნობას შეეფერებოდეს. არ მიყვარს ვულგარულად ჩაცმა და უპირატესობას კლასიკურ სტილს ვანიჭებ, მაგრამ ჩემი ასაკის შესაბამისად. ხშირად საკუთარი ხელით ვხაზავ ესკიზებს და ვაკერვინებ ჩემთვის სამოსს. შეიძლება ითქვას, ეს ჩემი ახალი ჰობია.
– გარეგნობაში, ჩაცმულობაში ექსპერიმენტირება გიყვართ?
– საკუთარი გარეგნობით კმაყოფილი ვარ და ამ ეტაპზე არ ვთვლი, რომ ექსპერიმენტი უნდა მაღელვებდეს. რაც შეეხება ჩაცმულობას, მე ვიტყოდი, რომ უფრო მრავალფეროვნება მაინტერესებს, ვიდრე ექსპერიმენტები. მიყვარს განსხვავებული ფერის, სტილის, ბრენდის ტანსაცმლის ერთმანეთთან შეხამება, რაც ორიგინალურ სტილს ქმნის. ალბათ ჩვენში ამას ექსპერიმენტს უწოდებენ, საქართველოში ხომ ერთი ფერი დომინირებს... შავი, შავი და კიდევ შავი.
– თქვენ რა ფერი გიყვართ?
– ცისარტყელას ყველა ფერი მიყვარს და, რაც მთავარია, მიხდება. ხალისიანი ვარ და ვცდილობ, ჩაცმულობაშიც ხალისიანი ფერები გამოვიყენო.
– რომელია თქვენი საყვარელი აქსესუარები?
– სათვალე, ჩანთა, ტელეფონი, საათი და ასე შემდეგ.

– სარკის წინ დგომისას თქვენს გარეგნობაში რა მოგწონთ და რა – არა?
– ყველაფერი მომწონს, რამის შეცვლას არ ვაპირებ. ისევე, როგორც ყველას, მეც ალბათ მაქვს ჩემი ნაკლი, თუმცა ბავშვობიდან მასწავლეს, რომ უნდა ვეცადო, ყველა ნაკლი პოზიტივად ვაქციო. ასე რომ, მუდმივი ზრდის და განვითარების პროცესში ვარ.
– თქვენი გარეგნობა კრიტიკის თემა გამხდარა?
– ჩემი თანდასწრებით მსგავსი რამ არასოდეს მომხდარა, თუმცა ყველა ადამიანს აქვს აზრის გამოხატვის თავისუფლება და შეუძლიათ, რაც უნდათ, ის იფიქრონ და თქვან სხვებზე, მათ შორის – ჩემზეც. როდესაც ცნობადი სახე ხდები, ამას უნდა შეეგუო და შენი მისამართით გამოთქმული კრიტიკა მშვიდად მიიღო.
– როცა სარკეში იხედებით, ვინ გიყურებთ იქიდან?
– სუსტი აღნაგობის, მაგრამ ძლიერი ხასიათის, მიზანდასახული გოგონა, რომელიც ცდილობს, მიღწეულით არ დაკმაყოფილდეს და მომავალი მწვერვალების დასაპყრობად ემზადება.

– უფროსი თაობისგან რაიმე რჩევა მიგიღიათ თავის მოვლასთან დაკავშირებით?
– ჩვენს ოჯახში კარგი სახის კანი გენეტიკურად გვაქვს, თუმცა მისი მოვლის ბევრი საიდუმლო ბებიამ და დედამ მასწავლეს. კანის მოვლის ძალიან დიდი რიტუალი მაქვს. არასოდეს ვიძინებ სახეზე მაკიაჟით და ყოველთვის ვცდილობ, ნიღბების გასაკეთებლად სახლში არსებული ნებისმიერი პროდუქტი გამოვიყენო. კანზე არანაკლებ ყურადღებას თმას ვაქცევ. სპეციალურ ნიღბებს ვყიდულობ და თმას მუდმივად ვუვლი.
– ბუნებრივად ხართ გამხდარი თუ სპეციალურად ზრუნავთ ამაზე დიეტით და ვარჯიშებით?
– როგორც პროფესიონალი მოდელი, ვალდებული ვარ, წონაზე ვიზრუნო. სხვა შემთხვევაში ეს ჩემს კარიერაზე აისახება. ყოველთვის ვცდილობ, რაციონი მკაცრად ვაკონტროლო. სტაბილური წონის შენარჩუნებაში გენეტიკაც მეხმარება.
– როგორია თქვენი კვების რაციონი?
– უპირატესობას ხილს და ბოსტნეულს ვანიჭებ, მაგრამ ვცდილობ, დაბალანსებული რაციონი მქონდეს.
– გადატვირთული დღის შემდეგ როგორ აღიდგენთ ძალებს?
– ჩემთვის ძალების აღდგენის ყველაზე კარგი საშუალება ძილი და ვარჯიშია.
– უცხოელი მოდელების გამოცდილებას ითვალისწინებთ, რომ ფორმა შეინარჩუნოთ?
– უცხოელი მოდელების რჩევებს ნაკლებად ვითვალისწინებ, მაგრამ ჩემი მასაჟისტის დარიგებებს კი დიდი პასუხისმგებლობით ვეკიდები. მაგალითად, აღარ ვჭამ სიმინდს და მისი ფქვილისგან დამზადებულ საკვებს, რადგან მან მითხრა, რომ ეს პროდუქტი ცელულიტს აჩენს.
– თქვენს საქმროს როგორ ფორმაში მოსწონხართ განსაკუთრებით და რაში არ ემთხვევა თქვენი გემოვნება ერთმანეთს?
– ჩემი აზრით, მას ყველანაირ ფორმაში მოვწონვარ – სპორტულშიც, ახალგაზრდულშიც და კლასიკურშიც, თუმცა ამბობს, რომ უყვარს, როდესაც ქალს კლასიკურად და გემოვნებით აცვია.
მანანა ნოდია, ჟურნალი სარკე