ვირის ღვიძლი და ყვავის კვერცხები თმისთვის

კოსმეტიკური საშუალებებით ადამიანები ჯერ კიდევ ჩვენს წელთ აღრიცხვამდე სარგებლობდნენ: ძველი კოსმეტიკა, რა თქმა უნდა, ძალიან განსხვავდებოდა თანამედროვისგან, მაგრამ, მიუხედავად ამისა, წარმატებით ასრულებდნენ საკუთარ დანიშნულებას - ქალის სილამაზეს მატებდნენ. შემოგთავაზებთ რამდენიმე საინტერესო ფაქტს კოსმეტიკის ისტორიიდან.

პომადა, რომელსაც თანამედროვე ქალბატონები იყენებენ, არცთუ დიდი ხნის წინ... XV საუკუნეში გამოიგონეს. მანამდე ევროპელი ქალბატონები ტუჩების შესაღებად ჭიაფერს, ანუ დანაყილი ხოჭოებისგან მომზადებულ პასტას იყენებდნენ.

ძველი ეგვიპტელები ტუჩებს წითელი ჟანგმიწისა და ბუნებრივი რკინის ოქსიდებისაგან მომზადებული პომადით იღებავდნენ - ეს საშუალება ტუჩებს უფრო თხელსა და მკვეთრს აჩენდა.

საინტერესო ფაქტია: ქალბატონები, რომლებიც მკვეთრი ფერების პომადებს იყენებენ, უფრო ხშირად იღიმებიან, ვიდრე ისინი, რომლებიც სადა ფერებს ანიჭებენ უპირატესობას.

რუსეთში ლოყებს ჯერ კიდევ ქრისტიანობის გავრცელებამდე იღებავდნენ. `რუმიანას~ ფუნქციას ბალახოვანი მცენარის წვენი ასრულებდა, რომელსაც რუსი ქალბატონები ლოყებზე ისრესდნენ.

სხვადასხვა ქვეყანაში ლოყების დასაბრაწად სხვადასხვა საშუალებას იყენებენ. მაგალითად, გერმანიაში ლოყებს დანაყილი მარწყვით ან ჭარხლის წვენით იღებავდნენ.

წამწამების ტუში XIX საუკუნეში გამოჩნდა. პირველად ის მშრალი კონსისტენციის იყო და საღებავებისა და ცვილისაგან შედგებოდა და მისი წასმა ძნელი იყო.

შამპუნი და თმის მოვლის სხვა საშუალებები სახელგანთქმულმა ეგვიპტელმა დედოფალმა კლეოპატრამ გამოიგონა. მისი რეკომენდაციით ქალბატონები თმაზე ცისფერი თიხის ან ღორის ქადის (ბალახეული მცენარე) ნიღაბს ისვამდნენ. მათი დახმარებით თმა უფრო გლუვი და მბზინავი ხდებოდა.

გარდა ამისა, პირველმა სწორედ კლეოპატრამ გაილაშქრა ჭაღარა თმის წინააღმდეგ. ჭაღარასთან საბრძოლველად ეგვიპტის დედოფალი ვირის ღვიძლისა და ზეითუნის ზეთის ან ყვავის კვერცხების ნაზავს იყენებდა.

მსგავსი რეცეპტები პოპულარული იყო არა მარტო ძველ ეგვიპტეში, არამედ ევროპაშიც, თითქმის XV საუკუნემდე, ვიდრე ისინი უხეშმა საპონმა არ შეცვალა.

ჭაღარის წინააღმდეგ საღებავის გამოყენება XX საუკუნეში დაიწყეს. მის გამოგონებამდე კი ქალბატონები თმას ინითა და ბასმით იღებავდნენ.

ჟურნალი „რეიტინგი“