ვინ დაიჭირა პატარძლის თაიგული ქეთა თოფურიას ქორწილში

მოსკოვში მოღვაწე ქართველი მომღერლის ქეთა თოფურიას სიყვარულის ამბავი ქორწინებით დაგვირგვინდა. მომღერალმა ეს დღე საკუთარ დაბადების დღეს დაამთხვია და 9 სექტემბერს საკონცერტო დარბაზ ''ბარვიხაში'' დიდი წვეულება გამართა. ქორწილს ქართული და რუსული შოუბიზნესის წარმომადგენლები ესწრებოდნენ. დღესასწაულზე თვით ალა პუგაჩოვაც მივიდა საყვარელ მამაკაცთან, გალკინთან ერთად.

წყვილს სოსო პავლიაშვილმა, იგორ ნიკოლაევმა, ვალერი მელაძემ უმღერეს. პატარძალმა პავლიაშვილის სიმღერაზე ქართული იცეკვა თურმე. ებრაელმა ბიზნესმენმა ლევ გეიხმანმა საყვარელ მეუღლეს ქორწილში სიურპრიზიც გაუკეთა. საქართველოდან ჩასულ სტუმრებს შორის პროდიუსერი გიგა კუხიანიძეც გახლდათ. სწორედ მას დავუკავშირდით ინტერნეტით და ქორწილის მეორე დღეს ნაბახუსევზე ქორწილის ამბების მოყოლა ვთხოვეთ.

- გიგა, ვისთან ერთად გაფრინდი მოსკოვში?
- ქეთას დეიდასთან, თეასთან, და დეიდაშვილ ნატალიასთან ერთად. ქეთას ბინაში დავბინავდით.
- კიდევ ვინ იყვნენ ქართული ბომონდიდან სტუმრებს შორის?
- ქრისტინე იმედაძე, დათო გომართელი, მამუკა ონაშვილი, ისინი სასტუმროში დაბინავდნენ. მოსკოვში მოღვაწე ქართველი მომღერლებიდან ქორწილს ესწრებოდნენ: აჩი ფურცელაძე, თამუნა ამონაშვილი, ზურა დოიჯაშვილი, თემურ თათარაშვილი, გიგა კვენეტაძე.
- პირველად ხარ ქეთასთან სტუმრად? როგორ მოგეწონა ქეთას სახლი?
- როგორც ოჯახის უახლოეს მეგობარს, ხშირად მეპატიჟებოდნენ, მაგრამ ვერასდროს მოვახერხე ჩასვლა. ახლა ისეთი მიზეზი იყო, ვერაფრით ვიტყოდი უარს. სახლი მართლაც გემოვნებიანად აქვს გაკეთებული, რაც მთავარია, ოჯახში კარგი აურაა.
- ქორწილზე მიამბე...
- მართლაც ულამაზესი ქორწილი იყო, ქართველი და რუსი ვარსკვლავები მონაცვლეობით იკავებდნენ სცენას. ქეთას საყვარელი მომღერალია ამერიკელი დაიანა კინგი. ქმარმა საჩუქარი გაუკეთა და ქორწილისთვის მოიპატიჟა დაიანა. ქეთასთან ერთადაც იმღერა სცენაზე. მომღერლები სცენიდან ქეთას სიმღერით ეფერებოდნენ. რუს მომღერლებს მართლაც ძალიან უყვართ ჩვენი ქეთა. პირველი სადღეგრძელო თავისთავად ნეფე-პატარძლის იყო, მეორე - მშობლების. მესამე - კობზონმა ფეხზე ადგომით ქეთას მამის მოსაგონარი შესვა. მთელი დარბაზი ფეხზე იდგა. საოცარი სიტყვები უთხრა ქეთას კობზონმა, - ასე მგონია, ჩემი ქალიშვილის ქორწილში ვარო. მერე რამდენიმე სიმღერა უმღერა პატარძალს და თბილი სიტყვებით მოეფერა. სტუმრებს შორის ერთ-ერთი, ქეთას დეიდაშვილის მეუღლე ლუკა ჩოხაში იყო შემოსილი. ჩვენ ვამაყობდით ქართული ტრადიციებით. ქეთა მგონი სცენიდან არ ჩამოსულა, სულ ცეკვავდა და მღეროდა. კობზონთან ერთად ''თბილისოც'' იმღერა. საღამოს წამყვანი გალკინი იყო. ქართულად ამეტყველდა, ხუმრობდა კიდეც ქართულად.
- ბედნიერების ცრემლები იყო?
- ძირითადად რუსულ შოუბიზნესში.
- ალა ბორისოვნასთან ფოტოები რომ გადაიღე, ხომ არ იეჭვიანა გალკინმა?
- არა, პატივისცემის ნიშნად ფოტო ერთად გადავიღეთ. უსაყვარლესი ქალია, ძალიან უყვარს ქეთა. ყველგან არ დადის, მაგრამ აქ აუცილებლად უნდა მოვსულიყავიო, თქვა.
- ალამ ქეთას რა აჩუქა?
- არ ვიცი და ჯერ მგონი, არც ქეთამ იცის. იმდენი საჩუქარი მიუტანეს, ხვალ ნახავს ალბათ, დღესაც რესტორანში მივდივართ ვახშამზე, ვიწრო წრეში... ქორწილის ბოლოს ქეთა, შეიძლება ითქვას, მთვრალი იყო. ძალიან საყვარელია ამ მდგომარეობაში. სულ ცეკვავდა, არ გაჩერებულა, ყველას აცეკვებდა.
- მეჯვარეები ვინ იყვნენ?
- არავინ, არც ერთს არ ჰყოლია მეჯვარე.
- საპატარძლო თაიგულიც არ უსროლიათ?
- ისროლეს. ''ა სტუდიოს'' დირექტორის ქალიშვილმა დაიჭირა.
- ქრისტინე იმედაძე არ იდგა უკან?
- იდგა, მაგრამ ქართველმა გოგონებმა ვერ ივაჟკაცეს.

დიჯეი ბუკლე
ჟურნალი ''რეიტინგი''