ნანიკო ხაზარაძემ "მაესტრო" "დღის შოუს" გამო დატოვა

ტელეკომპანია "მაესტრო" კიდევ ერთმა ტელესახემ დატოვა. ამჯერად ეს ნაბიჯი ნანიკო ხაზარაძემ გადადგა. ტელეარხი, რომელმაც წლების წინ ის პოპულარულ "ტოროლად" აქცია და რომელმაც ის ცოტა ხნის წინ, უმუშევრობის ჟამს შეიფარა, ნანიკომ ისევ "იმედში", გადაცემა "დღის შოუში" დაბრუნების შანსის გამო დატოვა. თურმე ის გუნდი მოენატრა, ვისთან ერთადაც ამ გადაცემაზე მუშაობდა. "სარკესთან" შეხვედრაც ამ ტელეკომპანიაში ისურვა. თუ ვინ იქნებიან მისი თანაწამყვანები, ამის შესახებ არაფერს ამბობს, დაბეჯითებით მხოლოდ ის გვითხრა, რომ დოდო ხურცილავა და ია ფარულავა დღის შოუს ეთერში ნამდვილად არ ბრუნდებიან.
– ნანიკო, გაგვიკვირდა, ისევ "იმედში" რომ გიხილეთ. აქ როგორ აღმოჩნდით?
– ტელესეზონი რომ დასრულდა, შვებულებაში გავედით, მომავალი სეზონისთვის ვემზადებოდით და ამ მოლოდინში ისევ "იმედში" აღმოვჩნდი. ამ ტელეკომპანიიდან შემოთავაზება მივიღე და კვლავ შუადღის ეთერში დავბრუნდები.
– ია ფარულავამ, რომელსაც "დღის შოუ" თქვენთან ერთად მიჰყავდა, სოციალურ ქსელში დაწერა, რომ ამ გადაცემას აღარ წაიყვანს. თქვენ რატომ დათანხმდით ამ წინადადებას?
– არ ვიცი, იამ უარი თქვა თუ არა. ძალიან მიყვარს ჩემი კოლექტივი და აქაურობა. ამიტომ გამიხარდა, ეს წინადადება რომ შემომთავაზეს. ძველი გუნდი ისევ ერთად ვართ, თანაწამყვანებს თუ არ ჩავთვლით. ამ ტელევიზიაში, როგორც სახლში, ისე ვგრძნობ თავს.
– "მაესტროც" თქვენი სახლი იყო, პირველი ნაბიჯები სწორედ ამ ტელევიზიაში გადადგით, როგორც ტელესახემ. მამუკა ღლონტთან ალბათ რთული იქნებოდა იმაზე საუბარი, რომ ისევ მიდიოდით.
– სანამ "იმედში" შეხვედრაზე მივიდოდი, ამის შესახებ მამუკა ღლონტს ვუთხარი. ისე ვერ წავიდოდი, რომ არაფერი მეთქვა, რადგან სინდისი შემაწუხებდა. მითხრა, თუ იქ უფრო სტაბილურად და კარგად იქნები, ცხადია, უნდა წახვიდეო. ეს ნაბიჯი მასთან შეთანხმებით გადავდგი.
– "მაესტროზე" როგორ აღმოჩნდით მას მერე, რაც "დღის შოუ" დახურეს?
– მამუკასთან სხვა გადაცემით მივედი და იმ დროს მოვიდა ნიკაც ასევე სხვა გადაცემით. მამუკამ ერთად რომ დაგვინახა, თქვა, ცუდი იდეა არ იქნება, ეთერი ისევ ერთად რომ წაიყვანოთო.
– თქვენი პარტნიორი ნიკა ლომიძეც ხომ არ აპირებს ახლა სხვაგან გადასვლას?
– არ ვიცი, ნიკა რას აპირებს. დიდი ხანია მასთან კონტაქტი არ მქონია.
– როგორი იქნება ახალი "დღის შოუ"?
– ეს ახლა წყდება. გარკვეულ მონახაზი ვიცი, მაგრამ დეტალებზე საუბრის უფლება არ მაქვს.
– ახალ გადაცემაში ახალი იმიჯით გამოჩნდებით?
– შეიძლება იმიჯი შევიცვალო, მაგრამ ამაზეც ვერაფერს ვიტყვი. ეთერში სექტემბრიდან გავალთ.
– თანაწამყვანები ცნობილი სახეები იქნებიან? ვიცით, რომ ერთ–ერთ წამყვანად მსახიობი ნინო გაჩეჩილაძე მოიაზრება.
– თანაწამყვანების შესახებაც ვერაფერს გეტყვით. მხოლოდ იმის თქმა შემიძლია, რომ, სამწუხაროდ, ძველები არ იქნებიან.
– გენატრებათ ძველი "დღის შოუ"?
– ის ჩემთვის ცხოვრების წესი იყო. უკვე ჩვევაში მქონდა გადასული დილით სამსახურში მისვლა და გადაცემაზე მუშაობა. ჩემი საქმე ძალიან მიყვარდა და, ბუნებრივია, მომენატრა კიდეც. მაგრამ მან დაასრულა თავისი პერიოდი და ახლა ახალი შოუს დროა.
– ყოფილ თანაწამყვანებთან დაკავშირებით იყო გარკვეული უთანხმოებაც...
– მე, პირადად, უთანხმოება არავისთან მქონია.
– დღემდე გაქვთ ურთიერთობა ყოფილ თანაწამყვანებთან?
– ერთმანეთს ყოველდღე არ ვურეკავთ, მაგრამ ხშირად მოვიკითხავთ ხოლმე. "ფეისბუქზე" ჯგუფი გვაქვს შექმნილი, სადაც ერთმანეთს ვეხმიანებით. ტრადიციად გვაქვს ხინკლის ერთად მირთმევა. რატომ ავიჩემეთ ეს ხინკალი, არ ვიცი.
– როცა "დღის შოუს" წამყვანი იყავით, ხშირად გიწევდათ კრიტიკის მოსმენა?
– პირში არავინ გაკრიტიკებს და ეს ძალიან სამწუხაროა. ყველა გიღიმის და გეუბნება, რომ კარგი ხარ, ზურგს უკან კი თურმე გჭორავენ. ჩემ შესახებ ჯერჯერობით ისეთი არაფერი მომისმენია, რომ გული მტკენოდა. ალბათ კარგია, რომ არ გამიგია ისეთი რამ, რაც უკან დამხევდა. პირიქით, სულ კარგი მესმის. მჯერა იმ გუნდის წევრების, ვისთან ერთადაც ვმუშაობ და მათ აზრს ვითვალისწინებ.
– ერთი პერიოდი ეროვნული ბიბლიოთეკის დირექტორის, გიორგი კეკელიძის და თქვენი რომანი თუ დაშორება აქტუალური თემა იყო. დღეს რა ურთიერთობა გაქვთ მასთან?
– ვმეგობრობთ. ცოტა ხნის წინ კაფეშიც ვისხედით ერთად. იშვათად დავდივარ საზოგადოებრივი თავშეყრის ადგილებში, მაგრამ ისე მოხდა, რომ იმ დღეს შევიკრიბეთ.
– საერთოდ რა იყო ეს ურთიერთობა, ამ ხანმოკლე რომანს რას დაარქმევთ?
– ეს იყო სოციალური ქსელით თამაშის ერთ–ერთი ნაწილი.

– ეს არ იყო პიარი?
– მე არ მჭირდება არანაირი პიარი. არა იმიტომ, რომ მაგარი ტიპი ვარ, არამედ უბრალოდ არ მჭირდება! მით უმეტეს, ეს ამისთვის არ გაკეთებულა. გულწრფელად ვამბობ, ამ ურთიერთობაში პიარს არანაირი ადგილი არ ჰქონია.
– ხშირად ამბობენ, რომ პირადი ცხოვრება კარიერის აწყობაში ხელს უშლით ადამიანებს. ეთანხმებით ამ აზრს?
– ერთი მეორეს არანაირად უშლის ხელს. ვთვლი, რომ ქალი თუ წარმატებულია პირად ცხოვრებაში, თავის საქმეს ბევრად კარგად აკეთებს.
– თქვენ ბევრად კარგად აკეთებთ თქვენს საქმეს ამ ეტაპზე?
– არა, ანუ არაფერი ხდება ჩემს პირად ცხოვრებაში, მაგრამ ზოგადად ვცდილობ, ჩემი საქმე შედეგიანი იყოს.
– ქვეყანაში ხელისუფლების ცვლილებამ ქართული შოუბიზნესი ორად გაყო. რას ფიქრობთ ამის შესახებ? თქვენ ხომ შოუბიზნესშიც პოპულარული სახე ხართ.
– ვთვლი, რომ ეს ცუდია. ადამიანის პოლიტიკური ორიენტაცია სცენაზე მის დგომა–არდგომას არ უნდა ეხებოდეს. ეს ჩემთვის სრულიად მიუღებელია. საერთოდ პოლიტიკა ჩემი საქმე არაა. ამ სფეროში იმდენად ღრმად არ ვარ ჩახედული, რომ ჩემი კონკრეტული მოსაზრება ხმამაღლა ვთქვა. შეიძლება ძალიან სუბიექტური ვიყო და დიდი შეცდომა დავუშვა. მირჩევნია, ანალიზი გავაკეთო სხვადასხვა წყაროდან, ვიდრე ჩემი აზრი ხმამაღლა დავაფიქსირო.
– ამ ზაფხულს სად იყავით?
– მხოლოდ ერთი კვირა მოვახერხე დასვენება. ჩემს შვილთან, 10 წლის ლილუ ნუცუბიძესთან, მეგობართან და მის ბავშვთან ერთად ვიყავი ურეკში. ცხოვრებაში პირველად გადავწყვიტე იქ დასვენება, რადგან არ მინდოდა ხალხმრავლობა. ჩემთვის დასვენებაა ცოტა ხალხი და ყურადღების ცენტრში ნაკლებად ყოფნა. ამ დროს კი მოვხვდი დედამიწის ცენტრში, რადგან ურეკში ძალიან ბევრი ხალხი იყო. ასე რომ, დასვენება არ გამომივიდა. დავიღალე და ჩამოვედი.
– ლილუს რა დროს უთმობთ, როცა მუშაობთ, თქვენი გრაფიკი ხელს არ გიშლით დედა–შვილს ურთიერთობაში?
– ისე ვახერხებ მუშაობას, რომ მე და ლილუს ურთიერთობის დეფიციტი არ გვქონდეს. ის რომ ამთავრებს სკოლას, მეც მაშინ გამოვდივარ სამსახურიდან. სკოლიდან ხშირად მე გამომყავს. არასდროს უგრძვნია უდედობა. ახლა, რაც წამოიზარდა, თავს უფლებას ვაძლევ, რომ ბებიასთან დავტოვო. ვიცი, რომ უჩემობას ისე აღარ განიცდის, როგორც პატარა ასაკში.
მანანა ნოდია, ჟურნალი სარკე