სალომე ჭაჭუა: "ჩემს პირად ცხოვრებაში სიახლეა"

მოცეკვავე სალომე ჭაჭუასთვის პროექტი "ცეკვავენ ვარსკვლავები" საბედისწერო აღმოჩნდა. ამ შოუმ პოპულარობა და აღიარება კი მოუტანა, მაგრამ სანაცვლოდ გიგი გაჩეჩილაძესთან 8 წლიანი სიყვარული წაიღო. მოკლედ, ეს ყველაფერი წარსულია, დღეს მშვერიერი მოცეკვავე ახალ გრძნობებში ერკვევა და პროექტის მესამე სეზონისთვის ემზადება. ჯერ არ იცის, ვინ იქნება მისი მესამე "ვარსკვლავი", მაგრამ ერთმნიშვნელოვნად არ უნდა როსტოსნაირი (ლევან როსტოშვილი) ზარმაცი პოპულარული სახე. თავად ძალიან შრომისმოყვარეა და მომავალ პარტნიორსაც ამ მოთხოვნას უყენებს.
სალომე თვლის, რომ ახლა შესანიშნავ საცეკვაო ფორმაშია და ამისთვის მთელი ზაფხული ვარჯიშობდა. ცეკვა, იოგა და ტანვარჯიში – სწორედ ეს სამი კომპონენტი აძლევს საშუალებას, პარკეტზე ფურორი მოახდინოს.
– სალომე, როგორ ემზადებით პროექტის "ცეკვავენ ვარსკვლავები" მესამე სეზონისთვის?
– ძალიან კარგი შემართება მაქვს. ვაცნობიერებ, რომ ეს პროექტი ჩვენგან, მოცეკვავეებისგან, ტიტანურ შრომას მოითხოვს, მაგრამ არ მაშინებს. მთელი ზაფხული ვვარჯიშობ, რომ კარგ საცეკვაო ფორმაში ვიყო. ჩემი მიზანი მხოლოდ ეს პროექტი არ არის, მინდა, აქტიური მოცეკვავე ვიყო და სხვადასხვა პროფესიულ კონკურსშიც მივიღო მონაწილეობა. ამის გამო მეორე ზაფხულია არ დამისვენია. ერთი დღით ვიყავი ჩასული ბათუმში პროექტის გახსნასთან დაკავშირებით. ათი დღე გავატარე გონიოში, ცეკვიდან მოსწავლეები გვყავდა წაყვანილი. მე სხვანაირი დასვენება მიყვარს.
– როგორი?
– ჩემთვის იდეალური დასვენებაა, ავიდე თბილისის მახლობლად ჩემს აგარაკზე და ერთი კვირით მოვწყდე გარესამყაროს, ხმაურიან ცხოვრებას. მხოლოდ ასეთი განმარტოებული დასვენება მაძლევს საშუალებას, ძალები აღვიდგინო. ხმაურიანი დასვენება არ მიყვარს.
– ალბათ განსხვავებულია მზადება კონკურსისათვის და მზადება ტელეპროექტისათვის.
– რა თქმა უნდა, ეს ორი სამზადისი რადიკალურად განსხვავებულია ერთმანეთისგან. როცა ტელეპროექტის ნაწილი ხარ, ბევრი ისეთი ელემენტი შემოდის შოუში, რაც მანამდე შენთვის უცხო იყო, მაგალითად, კამერები. როცა ცეკვას დგამ შოუსთვის, მუდმივად იმაზე უნდა იფიქრო, ეკრანზე რამდენად ეფექტური იქნება, კონკურსისთვის კი მხოლოდ პარკეტზე ცეკვისთვის ფიქრობ.

– დიდი ნერვები სჭირდება "ვარსკვლავების" პარტნიორობას?
– ორივე სეზონში სხვადასხვა ტიპის პარტნიორი მყავდა. პირველ შემთხვევაში – როსტო, რომელიც სულ იგვიანებდა, ზარმაცობდა და მუდმივად იმის თქმა მჭირდებოდა, რომ ჩემთან ერთად ევარჯიშა. მეორედ, გიორგი ვარდოსანიძის შემთხვევაში, ეს პრობლემა საერთოდ არ იყო. ის მსახიობია და კარგად აქვს გაცნობიერებული, სასურველი შედეგი რომ მიიღო, ბევრი უნდა იმუშაო. დღეში ორჯერ ვვარჯიშობდით, რომ სცენაზე კარგად გამოვსულიყავით.
ვერ ვიტყვი, რომ ვარსკვლავებთან მუშაობა დიდ ნერვებს მოითხოვს. მე თვითონ ქორეოგრაფი ვარ და ხშირად მიწევს ახალბედებისთვის ცეკვის სწავლება. ვცდილობ, ისე მივუდგე და ვასწავლო ცეკვა, რომ ჩემი ნერვული სისტემა არ დაზიანდეს. შემიძლია ადამიანი მთელი დღე ერთ მოძრაობაზე ვავარჯიშო.
– ამ პროექტში მუშაობისას სიამოვნებას რაში იღებთ?
– ტელეპროექტშიც და ტურნირზეც სიამოვნებას ვარჯიში და პარკეტზე ცეკვა მანიჭებს, როცა შენი დიდი ხნის ნაშრომი გამოგაქვს საჩვენებლად და ამით მაყურებელს სიამოვნებას ანიჭებ.
– ვინ იქნება თქვენი პარტნიორი მესამე სეზონში და მუშაობა დაიწყეთ თუ არა?
– პროექტზე მუშაობა სექტემბრის შუა პერიოდიდან დაიწყება. მე ჯერ პარტნიორიც არ მყავს, დაწყვილება არ მომხდარა.
– არჩევანის უფლება გაქვთ?
– მოცეკვავეს არჩევანის უფლება აქვს, მაგრამ ყველაფერი პროდიუსერებთან შეთანხმებით ხდება.
– რა ტიპის პარტნიორს ელოდებით ამჯერად?
– მთავარია, ზარმაცი ვარსკვლავი არ შემხვდეს. მინდა, ისეთი იყოს, რომელმაც ძალიან კარგად იცის შრომის ფასი და საცეკვაო დარბაზში დროის გატარება არ დაენანება. ჩემთვის სხვა ფაქტორებს მნიშვნელობა არ აქვს. სულ არ მაინტერესებს, პლასტიკური იქნება თუ არა, მთავარია არ იზარმაცოს. ზოგადად პარტნიორის მიმართ ცეკვაში ყოველთვის ძალიან მომთხოვნი ვარ.
– როგორ ფიქრობთ, რას მოითხოვს მაყურებელი მოცეკვავისგან, რომ მას მისცეს ხმა და გაამარჯვებინოს?
– დავინახე, რომ შეიძლება ძალიან პოპულარული იყო, ხალხს უყვარდე, მაგრამ პროექტში გამარჯვებისათვის ეს საკმარისი არ არის. თუ ცეკვა არ აჩვენე, თუ მაყურებელმა დაინახა, რომ შენ იზარმაცე, ნომერი ჩააგდე, კეთილგანწყობა მაშინვე ცუდი განწყობით იცვლება. მთავარი ისაა, პოპულარულმა ადამიანმა მაყურებელს დაანახოს, რომ ის ყველაფერს დებს საქმეში.
– ამ ტიპის ტელეპროექტები, როგორც პროფესიონალ მოცეკვავეს, ხელს არ გიშლით კარიერაში?
– მე, პირადად, ხელს არაფერში მიშლის. ამ შოუს გამო პროფესიულ კონკურსზე უარი არასდროს მითქვამს, პირიქით, ეს კიდევ ერთი მოტივაციაა, რომ მუდმივად ფორმაში ვიყო. ძალიან შრომისმოყვარე ვარ. დღე და ღამე შემიძლია ვიმუშაო და ერთხელაც არ დავიწუწუნო.
– კონკრეტულად რას აკეთებთ იმისათვის, რომ კარგ ფორმაში იყოთ?
– მთელი დღე სხეულს ვავარჯიშებ. თუ არ ვცეკვავ, ტანვარჯიშით და იოგათი ვარ დაკავებული. დღეში ორჯერ მაქვს ცეკვის გაკვეთილი, დანარჩენი დრო ან დავრბივარ, ან იოგას ვარჯიშებს ვაკეთებ, ან ტანვარჯიშზე ვარ. იოგას ვარჯიშები მოცეკვავეს სხეულის ცენტრის დაჭერაში ეხმარება, ტანვარჯიში – ილეთების ადვილად ათვისებაში.

– ამ პროექტში მოცეკვავეები დაჩაგრულ პოზიციაზე ხომ არ ხართ, ყველა პრიზი მაინც "ვარსკვლავებისკენ" მიდის.
– არა, მე ასე არ ვთვლი. პირველ რიგში, განვმარტავ, რომ ამ პროექტში მუშაობა ჩემთვის სამსახურია და ხელფასს ვიღებ. მოცეკვავე ეხმარება ვარსკვლავს, რომ ტურები დაძლიოს. რაც შეეხება პრიზებს, მაგალთიად, მეორე სეზონზე მე და ოთოს (ფოლადაშვილი) "თიბისი ბანკმა" 6.000–6.000 ლარი მოგვცა.
– კონკურსების კულისებში ხშირად ინტრიგები იხლართება. თქვენ ამას არასდროს შეჯახებიხართ?
– შოუში მეტოქეობა და ინტრიგები ნაკლებად იგრძნობა. შეიძლება ვარსკვლავმა და მოცეკვავემ რაღაცაზე იკამათონ და მორჩა. რაც შეეხება სამეჯლისო ცეკვების კონკურსებს, იქაური კულისები სულ სხვაა. 2007 წელს თბილისში "კავკასიის თასზე" გამოვდიოდი. ფინალში რომ უნდა მეცეკვა, კულისებში ჩემი საცეკვაო კაბა დახეული დამხვდა. დღემდე არ ვიცი, ეს რომელმა მეტოქემ გააკეთა. ამის შემდეგ ჭკუა ვისწავლე და კონკურსზე ვინც მახლავს, დედაჩემი იქნება თუ სხვა ვინმე, კოსტიუმებს მას ვაბარებ.
– თქვენი ყოფილი შეყვარებული, პროფესიონალი მოცეკვავე გიგი გაჩეჩილაძე, მესამე სეზონში არ მონაწილეობს. ამის მიზეზი თქვენი დაშორება ხომ არ გახდა?
– ჩემი და გიგის ურთიერთობა არავითარ გავლენას არ ახდენს ამ პროექტზე. ჩვენ ისეთი ურთიერთობა არ გვაქვს, რომ ერთად მუშაობის პრობლემა შეგვექმნას. ალბათ გიგის პროექტიდან წასვლის თავისი მიზეზები აქვს.
– გიგისთან დაშორების შემდეგ პირად ცხოვრებაზე საუბარს გაურბიხართ, ჩვენთან ინტერვიუს დაწყებამდეც აღნიშნეთ, რომ პირად თემებზე არ საუბრობთ. რატომ?
– მივხვდი, რომ პირადზე არ უნდა ილაპარაკო. ის, რომ ჩვენი პირადი ცხოვრება ყველგან განიხილებოდა – ჟურნალ–გაზეთებში, გადაცემებში, სოციალურ ქსელებში – საბოლოოდ ჩვენს ურთიერთობაზე ცუდად აისახა. ასეთ შეცდომას აღარ დავუშვებ.
– არც იმას გვეტყვით, გიგის შემდეგ თქვენს პირად ცხოვრებაში არის თუ არა რაიმე სიახლე?
– არის გარკვეული სიახლე, მაგრამ ამაზე მეტს არაფერს ვიტყვი.
ავთო ჩიტიძე, ჟურნალი სარკე