რატომ დატოვა ჯანეტ ქერდიყოშვილმა ''ვიაგრა'' - შეიძლება, ია ფარულავასა და დოდოშკასთვის ისე ვერ გამეგო

ტელეკომპანია ''იმედმა'' ახალ სეზონზე დღის ეთერში მაყურებლისთვის კარგად ნაცნობი გადაცემა ''დღის შოუ'' დააბრუნა. ნანიკო ხაზარაძე რომ ამ გადაცემის წამყვანი იქნებოდა, ამაზე ცოტა ხნის წინ ტელეწამყვანმა ჟურნალ ''რეიტინგში'' ისაუბრა.

დღეს კი ''დღის შოუს'' პირველი გადაცემის წამყვანებად ნანიკოსთან ერთად ''მის საქართველო 2011'' ჯანეტ ქერდიყოშვილი და სოფო ნარჩემაშვილი მოგვევლინნენ. შეგახსენებთ, რომ ცოტა ხნის წინ ჯანეტი უკრაინულ რეალითი-შოუში ''მე მინდა ვიაგრაში'' მონაწილეობდა.

გამარჯვების შემთხვევაში შანსი ჰქონდა ცნობილი ჯგუფის წევრი გამხდარიყო. კუნკურსი რამდენიმე ეტაპისგან შედგებოდა, პირველ ტურში ჯანეტმა წარმატებას მიაღწია და ბარიერი გადალახა, თუმცა შემდეგ მოულოდნელად პროექტი დატოვა და ტელეკომპანია ''იმედში'' დაიწყო მუშაობა.

ჯანეტს პირველი ეთერის მისალოცად დავუკაშვირდით და თან ცნობილი პროექტის დატოვების მიზეზებიც გამოვკითხეთ.

მანამ მოკლე ინტერვიუს შემგთავაზებდეთ, ერთ ფაქტს შეგახსენებთ: როდესაც ჯანეტი ''მის საქართველო'' გახდა, ''დღის შოუს'' სტუმრად ეწვია და მისი საუბრით წამყვანები აღფრთოვანებულები დარჩნენ. იმავე გადაცემაში თანაწამყვანობა სპონტანურად შესთავაზეს, რასაც მოდელმა თავი კარგად გაართვა, ოღონდ ეს მხოლოდ იმ ერთ გადაცემაში მოხდა, დღეს კი ჯანეტი ''დღის შოუს'' სამი წამყვანიდან ერთ-ერთი გახდა.

- ჯანეტ, როგორ აღმოჩნდი ''დღის შოუში'' ? რეკომენდაცია ხომ არ გაგიწია ვინმემ, მაგალითად ნანიკომ...
- რამდენადაც ვიცი, ჩემთვის რეკომენდაცია არავის გაუწევია. როდესაც რეალითი შოუდიან წამოსვლაზე ვფიქრობდი, ''ფეისბუქზე'' შეტყობინება მომივიდა, რომ ტელეკომპანია ''იმედში'' ქასთინგი ტარდებოდა და დაინტერესების შემთხვევაში შემეძლო მივსულიყავი. მაშინ ჯერ კიდევ კიევში ვიყავი, მაგრამ ამ წინადადების შემდეგ გადავწყვიტე პროექტის დატოვება და საქართველოში დაბრუნება. გული არ დამწყვეტია, ვიფიქრე, იქნებ ჩემს ცხოვრებაში უფრო საინტერესო ეტაპი იწყება-მეთქი და ''დღის შოუს'' ქასთინგის ორი ეტაპი წარმატებით გავიარე, დამაკვირდნენ, რამდენად გახსნილი და თავისუფალი ვიყავი კამერების წინ და მერე მიიღეს გადაწყვეტილება, თუმცა უნდა ვთქვა, რომ საკმაოდ დიდ ხანს მაწვალეს, კარგა ხნის მანძილზე არ ვიცოდი, ამიყვანდნენ თუ არა. დადებითი პასუხით დაახლოებით ერთი კვირის წინ დამირეკეს. ძალიან გამიხარდა მეც და ჩემ მშობლებსაც, მათ ძალიან უნდოდათ, რომ საქართველოში დავბრუნდებულიყავი და აქ გამეგრძელებინა საქმიანობა. თუმცა, ისიც უნდა ვთქვა, რომ ვფიქრობდი, რომელიმე რუსულ ტელეკომპანიაში მეცადა ბედი. განათლება რუსულ ენაზე მაქვს მიღებული და ენის მხრივ პრობელმა არ შემექმნებოდა, მაგრამ კმაყოფილი ვარ, როგორც განვითარდა მოვლენები.
- რაც შეეხება პროექტს ''მე მინდა ვიაგრაში'' , რამდენადაც ვიცით, კონკურსის პირველი ეტაპი კარგად გაიარე, რატომ დატოვე პროექტი?
- პირველ რიგში ამ პროექტზე უარი ოჯახის გამო ვთქვი, რადგან ჩემებს სურდათ, რომ საქართველოში მათ გვერდით მეცხოვრა. გარდა ამისა, ''მის უნივერსზე'' მივემგზავრები. თარიღი ერთმანეთს ემთხვეოდა და თუ კონტრაქტს ხელს მოვაწერდი, მერე თავისუფალი გრაფიკი აღარ მექნებოდა და შეიძლებოდა, რომ კონკურსზე არ გავეშვი. ისე, მინდა გითხრათ, რომ ფინალამდე გასვლის რეალური შანსი მქონდა, არ გახლდით მორიგი მონაწილე, რომელიც მეორე კვირას გავარდებოდა, საკმაოდ კარგი ჯგუფი შევიკრიბეთ და შესაძლებელი იყო ''ვიაგრას'' წევრი გავმხადრიყავი, მაგრამ გადაწყვეტილება შევცვალე და საქართველოში დავბრუნდი.
- კარიერული თვალსაზრისით ღირდა ''დღის შოუ'' ამად?
- ღირდა, რადგან ალბათ მაინც არ ზის ჩემში ''ვიაგრას'' ფორმატის საქმიანობა, თან იმანაც იმოქმედა, რომ ოჯახმაც არ დამიჭირა მხარი, თუმცა გული არ მწყდება.
- როგორ ჩაიარა პირველმა საეთერო დღემ?
- კარგად. სანამ კამერები ჩაირთვებოდა, ძალიან ვნერვიულობდი, მაგრამ როგორც კი წითელი ღილაკი აინთო, ყველანაირი დაძაბულობა მომეხსნა, თავისუფლად ვსაუბრობდი და კმაყოფილი დავრჩი. მომეწონა და მივხვდი, ეს არის ჩემი საქმე. დღევანდელი გადაცემის შემდეგ არამარტო მე, არამედ ყველა აღფრთოვანებული იყო.
- რაც შეეხება წამყვანებს, ნანიკოს აქამდეც იცნობდი, მაგრამ სოფოს? როგორ შეეწყვეთ მუშაობისას ერთმანეთს?
- ბედნიერი ვარ, რომ ასეთი არაჩვეულებრივი გოგოები შემხვდნენ. შეიძლება ია ფარულავასა და დოდოშკასთვის ისე ვერ გამეგო, როგორც ნანიკოსა და სოფოს ვუგებ, იმიტომ, რომ ორივეს კარგად ვიცნობ და ორივე საინტერესო პიროვნებაა, რაც მთავარია, არ არიან ვულგარულები, მათ აქვთ ყველა ის თვისება, რაც ადამიანში მომწონს.
- შუადღის ეთერში "იმედის" გარდა სხვა არხებზეც გადის მსგავსი გადაცემები, როგორ ფიქრობ, შეძლებთ მათთვის კონკურენციის გაწევას?
- მინდა გითხრათ, რომ პირველ გადაცემას დიდი აჟიოტაჟი მოჰყვა, ყველა გვეუბნებოდა, ახალი სოცოცხლე შემოიტანეთო. მგონია, რომ განსხვავებულები ვიქნებით. ''რუსთავი 2'' -თან გვექნება კონკურენცია და არ არის ამისთვის საჭირო ხუთი და ექვსი წამყვანი. ვეცდებით, სამეულმა მოვახდინოთ ფურორი.

ციცი ომანიძე
''რეიტინგი"