გიგი გაჩეჩილაძის ცხოვრებაში ახალი სიყვარული გამოჩნდა

გიგი გაჩეჩილაძემ სამეჯლისო ცეკვებს საბოლოოდ დაანება თავი. სპორტულ ცეკვებში სამსაჯო გამოცდები ჩააბარა და ახლა უკვე სხვებს შეაფასებს. ბევრი გეგმა აქვს, უნდა, საერთაშორისო კონკურსებზე ქართველ მოცეკვავეებს სერიოზული წარმატებების მოპოვებაში დაეხმაროს და ტელეპროექტზეც მუშაობს, რომლის დეტალების გამხელისგან ჯერჯერობით თავს იკავებს.
გიგი პროექტიდან "ცეკვავენ ვარსკვლავები" გახდა სუპერპოპულარული. იქ ორი სეზონი ცეკვავდა. მესამე სეზონზე კი, რომელიც ოქტომბერში იწყება, კატეგორიულად აღარ სურს მონაწილეობა. მიზეზზე ქვემოთ გვესაუბრება. არც იმ პოპულარობითაა კმაყოფილი, რაც პროექტმა მოუტანა, რადგან მასის მხრიდან ზღვარგადასულმა ინტერესმა შეაწუხა.
"ცეკვებში" მაყურებელმა გიგი თავის შეყვარებულთან, ასევე მოცეკვავე სალომე ჭაჭუასთან ერთად გაიცნო. ის და სალომე ნამდვილ ცეცხლს ანთებდნენ სცენაზე და თავიანთ არაპროფესიონალ მეწყვილეებს მართლაც ვარსკვლავებივით აცეკვებდნენ. მეორე სეზონის დასრულების შემდეგ კი ისინი მოულოდნელად ერთმანეთს დაშორდნენ. როგორც გიგიმ "სარკეს" უთხრა, მათ 8 წლიან ურთიერთობას საბოლოოდ დაესვა წერტილი, შერიგება გამორიცხულია, მეტიც, მას უკვე სხვა გოგონა მოსწონს.
– გიგი, როგორ გაატარეთ ზაფხული? როგორც ვიცი, საზღვარგარეთ იყავით.
– დასვენება საერთოდ ვერ მოვასწარი. წასული ვიყავი უცხოეთშიც, ბათუმშიც, მაგრამ არა – დასასვენებლად. გერმანიასა და იტალიაში ვიყავი, ერთგან კონგრესს დავესწარი, მეორეგან – ტურნირებს. მე და ჩემი მეგობრები ახლა ვაპირებთ 6 დღით სამეგრელოში წასვლას კარვებით. შეიძლება ბათუმშიც ჩავიდეთ ორი დღით. ახლახან ჩემი ძმა ჩამოვიდა ამერიკიდან, 4 წელია საქართველოში არ ყოფილა და რაღაცეები უნდა ვაჩვენო. სასტუმროში ცხოვრება არ მომწონს. ნადირობა და თევზაობა მიყვარს და მეგობრებთან ერთად კარვებით მოგზაურობა მირჩევნია.

– "ცეკვავენ ვარსკვლავები"–ს მესამე სეზონში აღარ იქნებით?
– არც ერთ ვარიანტში!
– რატომ ასე კატეგორიულად? როგორც ვიცი, ძირითადად ის ნაკადი რჩება, ვინც გასულ ორ სეზონში მონაწილეობდა.
– ჯერჯერობით ოთო ფოლადაშვილი, ჯულიანა ბარ–გნარი და სალომე ჭაჭუა აიყვანეს. ალბათ რეზო რობაქიძეს და რამაზ ლაზარიშვილსაც მიიწვევენ, დანარჩენები აღარ ვიქნებით. არ ვიცი, დანარჩენები რატომ არ იქნებიან, მაგრამ ჩემს უარს თავისი მიზეზები აქვს. ყველაზე მთავარი ის არის, რომ რისთვისაც ამ პროექტში მივედი, ის უკვე გავაკეთე. მინდოდა, სამეჯლისო ცეკვები ხალხისთვის სხვანაირად დამენახვებინა, თორემ იმისთვის არ მივსულვარ, რომ პოპულარული გავმხდარიყავი. არანაირი სურვილი მაქვს, პოპულარული ვიყო, ამისი მცდელობა არც არასოდეს მქონია.
– რატომ, რით არ მოგწონთ პოპულარობა?
– ჩემთვის არ არის სასიამოვნო. საქართველოში პოპულარობას დიდი არაფერი მოაქვს. ცოტა ხნის წინ ცუდ ხასიათზე ვიყავი, მანქანით სიარულით დავიღალე და ვიფიქრე, ფეხით გავივლი–მეთქი, მაგრამ უცებ რატომღაც გოგოების წრეში მოვექეცი. ჩემს ძმას მივწერე, აქედან გამიყვანე–მეთქი, მოვიდა, წამიყვანა, მაგრამ გოგოებიც ჩემთან ერთად შემოტრიალდნენ და გამომყვნენ. ასეთი რაღაცეები ძალიან მიშლის ნერვებს და არ მომწონს. როცა ცუდ ხასიათზე ვარ, მინდა, ჩემთვის, მარტომ ვიარო, მაგრამ ეს უკვე შეუძლებელია.
– მხოლოდ ამის გამო ამბობთ პროექტში მონაწილეობაზე უარს?
– მეორე მიზეზი ის არის, რომ მოცეკვავეს არც ერთ სეზონში არანაირი პრივილეგია არ ჰქონდა. ჩვენ ბევრი მუშაობა გვიწევს და ასეთი შრომა არ მიღირს იმის სანაცვლოდ, რასაც იქ ვიღებთ. დილიდან საღამომდე გადამკვდარი ვიყავით იმ ვარსკვლავზე, ვინც გვებარა. ჩაცმაც ჩვენი მოსაგვარებელი იყო, განსაკუთრებით – მეორე სეზონში. მუსიკაც ჩვენ უნდა შეგვერჩია და ხშირად ჩვენი შერჩეული ვარსკვლავს არ მოსწონდა, მათი შერჩეული კი – ჩვენ. ეს ყველაფერი ისეთი ნერვების ფასად დამიჯდა, რომ მონაწილეობა აღარ მიღირს.
მესამე მიზეზი ის არის, რომ ჩემი საქმე მაქვს, სპორტული ცეკვებით ვარ დაკავებული და არა – შოუს ცეკვებით. მოცეკვავე აღარ ვარ, დიდი ხანია ამას თავი დავანებე და ამ პროექტის გამო ორჯერ თავიდან დავიწყე. სამსაჯო გამოცდები ჩავაბარე, კონგრესზე ამისთვის ვიყავი წასული და ახლა უკვე სხვადასხვა კონკურსებზე ვაპირებ მსაჯობას. დაახლოებით 15 წყვილი მყავს დიდების ქვეჯგუფში, მათთან ერთად ვაპირებ სიარულს ქვეყნებში ტურნირებზე და სამომავლოდ ბევრი გეგმა მაქვს.
– მსაჯობა მოგწონთ?
– ჩემთვის განტვირთვაა, ეს საქმე მსიამოვნებს. გერმანიაში ვიყავი სამუშაოდ, იმ დროის განმავლობაში უბედნიერესი ვიყავი. სასტუმროში ისეთი გადაღლილი მივდიოდი, ვერსად გავდიოდი. შეიძლება ვიღაცისთვის არაფერია, მაგრამ ჩემთვის ბედნიერებაა კონკურსებზე სიარული. როცა ჩემს წყვილებს მსოფლიოში წამყვან მოცეკვავეებად ვაქცევ, ეს ყველაზე დიდი ბედნიერება იქნება. გერმანიაში ყველაზე დიდი კონკურსი ჩატარდება და მინდა, ჩემმა მოცეკვავეებმა, მინიმუმი, ნახევარფინალამდე მაინც მიაღწიონ. აქამდე საქართველოდან არც ერთი წყვილი გასულა მერვედფინალშიც კი.
– პროექტის ორგანიზატორებიც აღნიშნავენ, რომ საქართველოში ბევრი ვარსკვლავი არ მოიძებნება. რას ფიქრობთ, მონაწილეებს რამდენად სწორად ჰქონდათ მინიჭებული ვარსკვლავის წოდება?
– ალბათ არავის ეწყინება, თუ ვიტყვი, რომ საქართველოში თითოოროლა ვარსკვლავი გვყავს. ჩემთვისაც და ოთოსთვისაც ბევრჯერ უთქვამთ, ვარსკვლავები ხართო, მაგრამ ჩვენ არ ვთვლით, რომ ასეა. ჩემი აზრით, საქართველოში ვარსკვლავის წოდების მიღება ძალიან ცოტა ადამიანს შეუძლია. ჩემთვის ვარსკვლავია ბატონი ბუბა კიკაბიძე, ვისთან ერთად მუშაობაც მიუზიკლ "ვერის უბნის მელოდიებზე" მომიწია. ეს დიდი ბედნიერება იყო. ასევე ვარსკვლავია სოფო ნიჟარაძე, ქალბატონი ლელა წურწუმია. სხვათა შორის, რომ არა ლელა, "თელა" ამ პროექტში არ იქნებოდა...
მგონია, რომ უკვე ძალიან ბევრ რაღაცაში გავერიე, კარგად გავერკვიე შიდა სამზარეულოში და, ჩემი გადმოსახედიდან, არცთუ ისე კარგადაა საქმე, ერთობა არ არის. ჩემი აზრით, ოთოს, ჯულიანას და სალომეს უფრო შეუძლიათ თქვან, რომ ვარსკვლავები არიან, ვიდრე სხვებს. პროექტში ნებისმიერს აიყვანენ, რადგან მნიშვნელობა არ ენიჭება არც ხარისხს და არც – სხვა დანარჩენს. აჰყავთ ის ხალხი, ვინც უფრო იაფად იმუშავებს, რაც დიდი სისულელეა.
– ლელა წურწუმიას რა წვლილი მიუძღვის იმაში, რომ "თელა" პროექტში აღმოჩნდა?
– 8 წლის წინ, როცა ამერიკიდან ჩამოვედი, საზოგადოებრივ არხზე მსგავსი პროექტი უნდა გაკეთებულიყო, სადაც მე და ლელას ერთად უნდა გვეცეკვა. ეს პროექტი არ შედგა და, როცა წლების შემდეგ "იმედზე" დაიწყეს იმავე შოუს გაკეთება, ლელამ ორგანიზატორებს ჩემი თავი შესთავაზა. "თელაში" ჩემ სანახავად რომ მოვიდნენ, სხვა მოცეკვავეებიც აარჩიეს.
– მოცეკვავეები მიჩვეული ხართ ტიტანურ შრომას. ამას "ვარსკვლავები" როგორ უძლებდნენ, როგორ ერგებოდნენ თქვენს რეჟიმს?
– გააჩნია, რომელ ვარსკვლავებს ვიგულისხმებთ. პირველ სეზონში ძალიან გამიმართლა, როცა თიკო სადუნიშვილთან ერთად ვცეკვავდი. თაკო გაჩეჩილაძეც ჩემი მეგობარია. თიკო ზედმეტად კარგადაც კი ამყვა, უფრო სწორად მე ამიყოლია, იმდენად მონდომებული იყო და იმდენს ვარჯიშობდა. მე რომ მეზარებოდა, მარტო ვარჯიშობდა და მეუბნებოდა, ნუ ზიხარო, რასაც თაკოზე ვერ ვიტყვი. მე და თაკო ცოტას ვვარჯიშობდით, თუმცა ბოლოს ძალიან მოინდომა, რაც, ასე თუ ისე, ჩვენს ცეკვას დაეტყო.
დანარჩენებთანაც მიწევდა რაღაც დონის ურთიერთობა. შემიძლია გითხრათ, რომ რუსკა მაყაშვილი ძალიან კარგად მოერგო ამ რეჟიმს. ენერგიული, სიცოცხლით სავსეა. რატი წითელაძე გამორჩეული მოცეკვავე იყო, ძალიან შრომისმოყვარე. ვეუბნებოდი, გაჩერდი, დაისვენე–მეთქი, თავისი დრო რომ ამოიწურებოდა, სხვის დროზეც ვარჯიშობდა... არ ვიცი, ალბათ მართლაც მალე ამოიწურება ქართველი ვარსკვლავების რაოდენობა, მაგრამ სხვა პროექტები დაიწყება. ერთ–ერთ პროექტზე მეც ვმუშაობ და ძალიან მინდა, გავაკეთო. ეს ჩემს უახლოეს გეგმებში შედის.
– თქვენი პროექტი როგორი უნდა იყოს?
– მინდა, ჩემი თავი გამოვცადო. მთავარი პროდიუსერი ვერ ვიქნები, ამისი გამოცდილება არ მაქვს, მაგრამ იდეები, რაც პროექტთან "ცეკვავენ ვარსკვლავები" დაკავშირებით მქონდა, მინდა, ჩემს შოუში გამოვიყენო. მართალია, იქ ვარსკვლავები არ იცეკვებენ, მაგრამ... ჩემი აზრით, შემეძლო თუნდაც იმ პროექტში უფრო კარგად გამეკეთებინა რაღაც–რაღაცეები, რომ უკეთესი ყოფილიყო.
– მამათქვენი, ბატონი თენგიზი, სულ აღნიშნავდა, ვიდრე ჩემი შვილი პროექტში იქნება, ჟიურიში არ დავჯდებიო. რადგან ამ სეზონზე აღარ იცეკვებთ, ბატონ თენგიზს ჟიურიში ხომ არ ვიხილავთ?
– არ ვიცი, შემოთავაზება არ ჰქონია. მე მქონდა უამრავი შემოთავაზება, რომ კიდევ მეცეკვა, მაგრამ სულ უარს ვამბობდი. ახლა ალბათ მიხვდნენ, რომ ვერ დამიყოლიებენ და შეიძლება მამას ჟიურის წევრობა შესთავაზონ.
– თქვენი სიძე, გოჩა ჩერტკოევი, იქნება ჟიურიში?
– შემოთავაზება აქვს და აპირებს თუ არა ჩამოსვლას, ეს ჯერ არც თავად იცის და არც – მე.
– ისე დაემთხვა, რომ ამ პროექტის მონაწილეებს პირად ცხოვრებაში შეექმნათ პრობლემები, ცნობილი შეყვარებული წყვილები ერთმანეთს დაშორდნენ, როგორც თქვენ და სალომე ჭაჭუა. თქვენი აზრით, ამ მოვლენებს პროექტთან რაიმე კავშირი ჰქონდა?
– არა, ალბათ დამთხვევა იყო. ამ წყვილების ურთიერთობაში მანამდეც იქნებოდა დაშორებები, მაგრამ პროექტში უფრო დიდი პოპულარობა მოიპოვეს, ხალხი მეტად დაინტერესდა მათი ცხოვრებით და ალაპარაკდნენ. ზოგი ვარსკვლავი სულ ვარჯიშობდა, სულ დარბაზში იყო და შეიძლება ესეც გახდა მიზეზი... მათ პირადში არ ვერევი, ამიტომ ზუსტი დასკვნების გაკეთება არ შემიძლია. არა მგონია, რომელიმე წყვილი ცეკვას დაეშორებინა. ცეკვას არც მე და სალომე დავუშორებივართ.
– თქვენ და სალომე 8 წელი იყავით შეყვარებულები და დაქორწინებას არ ჩქარობდით. იქნებ ასეთი გაჭიანურებული ურთიერთობა იყო დაშორების მიზეზი?
– ვთვლი, რომ, თუ წყვილს დაშორება უწერია, მათი ურთიერთობა შეყვარებულობის პერიოდშიც დაინგრევა და ოჯახურ ცხოვრებაშიც. ისეთი შეყვარებული მინდა, ვინც სულ ჩემთან ერთად იქნება, ჩემთან ივლის, საუკეთესო მეგობარი გახდება. თუ ჩვენ შორის ასეთი დამოკიდებულება არ შედგება, მნიშვნელობა არ ექნება, ხელი მექნება მოწერილი თუ არა, ჩვენი ურთიერთობა მაინც დამთავრდება.
– თქვენი წყვილი ერთბაშად გახდა პოპულარული, ხალხი თქვენი პირადი ცხოვრებით დაინტერესდა... იქნებ ამანაც იმოქმედა თქვენს ურთიერთობაზე.
– ჩემზე არ უმოქმედია, სალომეზე ვერაფერს გეტყვით. ბევრი ისეთი რაღაც არის, რასაც ვერასოდეს გავარკვევ და აღარც ვინტერესდები. ის ჭორებიც წავიკითხე, მამულიჩა და სალომე ერთად არიანო, გიორგი ვარდოსანიძე და სალომე დაქორწინდნენო. სალომეს ისე ვენდობოდი, ჩემთვის აზრი არ ჰქონდა, რას გავიგებდი. სულ ერთად ვიყავით – ერთ დარბაზში, ერთად დავდიოდით, სახლში მე მიმყავდა და მომყავდა, ყველაფერს ერთად ვაკეთებდით. ვინც რას წამოაყრანტალებს, ყველას დევნას ვერ დავუწყებ. თითოეულს რომ გამოვეკიდო, გამოვა, მათი ცხოვრებით დავიწყო ცხოვრება. ჩემი ცხოვრება მაქვს, ვცდილობ, ჩემი მიზნები განვახორციელო, გავერთო და კარგად ვიყო. დანარჩენი, ვისაც რა უნდა, ის ილაპარაკოს.
– ისიც თქვეს, სალომემ და გიგიმ ბათუმში ერთად დაისვენესო.
– ერთად ვიყავით, მაგრამ სპორტული შეკრება გვქონდა და ჩვენთან ერთად იყვნენ ოთოც და ჯულიანაც. ყველა ერთად ვიყავით სამუშაო ვიზიტით.
– სალომესთან შერიგებას არ აპირებთ?
– არა.
– ასე კატეგორიულ უარს რატომ ამბობთ? ცხოვრებაში ხომ ყველაფერი ხდება.
– ბევრი მიზეზია და ამას ერთი კონკრეტული რაღაცის გამო არ ვამბობ. ვერც და არც ვიტყვი, რომ სალომეს მიმართ მთლიანად გამიქრა გრძნობა და ის ჩემთვის არავინ არის, მაგრამ აღარ არის ის გრძნობა, რაც იყო. ბევრი ისეთი რაღაც მოხდა, რომც შევრიგდეთ, ვიცი, გულში მაინც დარჩენილი მექნება რაღაც, ასეთი ურთიერთობა კი არ მინდა. მოკლედ, მე არ ვაპირებ შერიგებას და, როგორც ვიცი, ეს არც სალომეს უნდა. მე და სალომე ჩხუბით არ დავშორებულვართ, მერეც ერთად ვიყავით, მაგრამ ბოლოს რაღაც მოხდა და უკვე ერთი თვეა, საერთოდ არ ვეკონტაქტებით ერთმანეთს.
– არ გჯერათ, რომ დაშორების შემდეგ მეგობრებად დარჩენა შესაძლებელია?
– მეგობრობა ძალიან ფართო ცნებაა. სალომე ჩემთვის ვერასოდეს იქნებოდა ისეთი მეგობარი, ვისაც მოვუყვებოდი, რომელი გოგო მომწონდა. რაღაც დონეზე კარგი ურთიერთობა გვქონდა. ჩემი ყოფილებიდან ბევრს ვემეგობრები.
– ბევრი "ყოფილი" გყავთ?
– 25 წლის ბიჭი ვარ და ერთი ყოფილი რომ მყავდეს, ძალიან ცუდი და სამარცხვინო იქნებოდა.

– ახლაც ხომ არ გყავთ გვერდით საყვარელი ქალი?
– მყავს, მაგრამ ამ ეტაპზე ამაზე ლაპარაკი არ მინდა.
ქეთი დინოშვილი, ჟურნალი სარკე