ქართველი ბერი 20 წელია მთის წვერზე მარტო ცხოვრობს

კაცხის სვეტისა და იქ განმარტოებული ბერის ამბავმა გასულ წლებში ევროპული მასმედია დააინტერესა, ამჯერად რუსულ პრესაშიც გაჩნდა სტატია ბერ მაქსიმეზე (ქავთარაძეზე), რომელიც ოცი წელია, მარტო ცხოვრობს.

კაცხის სვეტის ისტორიის გაცნობის შემდეგ მოთხრობილია ბერი მაქსიმეს შესახებ. რუსული პრესის თანახმად: ''მაქსიმე მას მერე გახდა ბერი, რაც ციხიდან გამოვიდა. გადაწყვიტა შეცვლილიყო. ''ახალგაზრდობაში ვსვამდი და ნარკოტიკებს ვყიდდი.

როცა ამან ციხემდე მიმიყვანა, მივხვდი, რომ შეცვლის დრო იყო. ადრე მეგობრებთან ერთად კაცხის სვეტის სიახლოვეს ვსვამდი ხოლმე ღვინოს. მაშინ ვიცოდით, რომ ერთ დროს აქ ბერები ცხოვრობდნენ'' , - ამბობს ბერი, რომელიც 1993 წელს ავიდა მიუვალ სვეტზე და იქ ოცი წელი გაატარა. მაშინ ბრეზენტის ტენტის ქვეშ ეფარებოდა ავდარს.

ახლა კი რთულ ცხოვრებისეულ სიტუაციებში ჩავარდნილი ადამიანები მასთან რჩევისა და ნუგეშის მოლოდინში მიდიან. კვირაში ორჯერ მაქსიმე სვეტიდან ჩამოდის, რომ მათ დაელაპარაკოს და დაამშვიდოს.

ბერ მაქსიმეს სტუმრების შესახებ ძველ გაზის ბალონზე ხის უროს დარტყმით მორჩილი ამცნობს. მისი ნებართვის გარეშე მაღლა ასვლა აკრძალულია.

ბოლო წლებში მონასტრის ტერიტორია გაფართოვდა. მაქსიმეს გარდა აქ კიდევ ორი ბერი ცხოვრობს, დიაკვანი და ერთი მორჩილი. ოცი წლის განმავლობაში მაქსიმემ შეძლო მონასტრის აღორძინება.

''აქ სიწყნარე და სიმშვიდე სუფევს, რაც ღმერთს გაგრძნობინებს'' , - ამბობს მაქსიმე.

ჟურნალი ''რეიტინგი''