"ვინ მოკლა ილია?" ანუ რა აღმოაჩინეს მკვლევრებმა შსს-ს არქივში

ჩუბინაშვილის ქუჩაზე, ილია ჭავჭავაძის მუზეუმთან გზა დილიდან გადაიკეტა. გადასაღებ მოედანზე ეტლიც მალე გამოჩნდა. ამ დღეს ილიასა და ოლღას თბილისიდან საგურამოში გამგზავრების სცენას იღებდნენ. მთავარ როლებს მსახიობები, კოტე თოლორდავა და ნანუკა ხუსკივაძე ასრულებენ. ფილმის სამუშაო სახელწოდებაა - "ვინ მოკლა ილია?"

- ფილმის გადაღების იდეა როგორ დაიბადა?

მიხეილ ბერინაშვილი, სცენარის ავტორი და რეჟისორი:

- მოგეხსენებათ, ილიას მკვლელობის ფაქტზე სისხლის სამართლის საქმე შსს-ს არქივშია დაცული და 11 ტომს მოიცავს. ფილმის გადაღება მას შემდეგ დაიგეგმა, რაც ისტორიკოსებმა და მკვლევრებმა აღნიშნულ საქმეში ახალი და აქამდე უცნობი გარემოება აღმოაჩინეს. შეიძლება ითქვას, რომ ილიას მკვლელობის საქმე ხელახლა გამოვიძიეთ. ფილმის გადაღება არქივის დირექტორის, ომარ თუშურაშვილის იდეა იყო.

- ამ ფილმით გაეცემა თუ არა პასუხი კითხვას - ვინ მოკლა ილია?

- ამაზე ფილმის გამოსვლის შემდეგ ვისაუბროთ. აქცენტი სამართლებრივ კრიმინალურ დეტალებზე კეთდება. ილიას ცხედრის გაკვეთის სამედიცინო დასკვნა თანამედროვე ექსპერტიზის მიერ იქნება შეფასებული.

- განსხვავება დიდია?

- საკმაოდ, და ჯობს, ეს სხვაობა ფილმში მაყურებელმა თავად ნახოს. საგულისხმოა იმ ტყვიის ტრაექტორია, რომელიც ილიას მოხვდა.

- ფილმის გადაღება რა ეტაპზეა?

- მკვლელობის სცენა გადაღებულია. სავარაუდოდ, ოქტომბრის დასაწყისში ყველა ეპიზოდის გადაღებას დავასრულებთ. ჩვენს ნამუშევარს მაყურებელი ახალი წლის დადგომამდე იხილავს.

- ბერბიჭაშვილის როლს ვინ ასრულებს?

- მსახიობი პაატა მხეიძე. ირაკლი ჩოლოყაშვილი კი ერთ-ერთი მკვლელის როლშია. საქმის გამომძიებელი და მთხრობელი ზაზა იაქაშვილი გახლავთ. ამ ფილმით, ჩემი, როგორც რეჟისორის დებიუტი შედგება.

ომარ თუშურაშვილი, შსს-ს არქივის დირექტორი:

- არქივში ჩატარებული ბოლო სამუშაოების შედეგად, რამდენიმე უაღრესად საინტერესო დოკუმენტი იქნა აღმოჩენილი: ილიას მკვლელობასთან დაკავშირებით, აქამდე მხოლოდ 2 ვერსია არსებობდა, ჩვენეული ვერსია კი განსხვავებულია, რომლის გასამყარებლად სამედიცინო ექსპერტიზას მივმართეთ. მათ მიერ ჩატარებულმა კვლევებმა კიდევ უფრო მეტი დამაჯერებლობა შეგვძინა.

- თქვენი ვერსიით, ილია ბერბიჭაშვილს არ მოუკლავს?

- ის მკვლელობის დაგეგმვაში მონაწილეობდა, მაგრამ თავად არ უსვრია. ილიას 1 ტყვია ჰქონდა მოხვედრილი. ვვარაუდობთ, რომ გასროლა იმერლიშვილმა მოახდინა. მისი კავშირი ამ მკვლელობასთან და იმ ბანდასთან, რომელიც ტყეში იყო ჩასაფრებული, დოკუმენტურად დადასტურებულია.

- არქივში რა ახალ მასალას გაეცანით?

- ეს არის 1907 წლის დოკუმენტები, რომელიც თვითონ დუშეთის მაზრაში იყო შედგენილი. ფილმში ისტორიკოსების მოსაზრებებსაც გაეცნობით.

ინტერვიუ სრულად იხილეთ ჟურნალ "გზის" ხუთშაბათის ნომერში.