ბექა ჩხაიძე ეკო ფანგანის დასაბრუნებლად იბრძვის _ "საყვარელ ქალთან მტყუანი ვარ"

მომღერალი ბექა ჩხაიძე და მოდელი, ახლა უკვე ტელესახეც, ეკო ფანგანი, სამი წელი ითვლებოდნენ შეყვარებულ წყვილად. მერე კი მოულოდნელად ერთმანეთს დაშორდნენ. როგორც ბექა ამბობს, ისინი გარემოცვისა და სხვათა ენების მსხვერპლი გახდნენ, მათი დაშორება შეცდომა იყო და ახლა ის სიყვარულის დასაბრუნებლად იბრძვის. რამდენიმე კვირის წინ ეკომ "სარკისთვის" მიცემულ ინტერვიუში აღნიშნა, რომ ბექასთან შერიგებას არ გამორიცხავდა. სამწუხაროდ, როგორც ბექამ გვითხრა, ენის მიტან–მოტანამ არც ამ სტატიის დაბეჭდვის შემდეგ დააყოვნა და შერიგებამდე მისული საქმე ჩაიშალა.
– ბექა, თქვენსა და ეკო ფანგანს შორის დიდი სიყვარული იყო. ჰარმონიული წყვილის შთაბეჭდილებას ტოვებდით. მერე რა მოხდა თქვენ შორის, რატომ დაშორდით?
– ჩემი და ეკოს დაშორება ვითომ კეთილისმსურველი ხალხის დამსახურებაა, ვითომ ჯიგრების, რომლებსაც გულის სიღრმეში ჩვენი დაშორება ძალიან უხარიათ. ასეთებს რა გამოლევს? უბრალოდ ხალხს არ უნდა ავყოლოდით, მაგრამ, სამწუხაროდ, მე და ეკო ალბათ სხვების ენებს ავყევით. ჩვენს ურთიერთობას დაშორებას ვერ დავარქმევ.
შეიძლება ვერ გითხრათ, მომავალში რა მოხდება, მაგრამ ისიც ხომ ხშირად ხდება, რომ ნაჩხუბარი, დაშორებული წყვილი წლების შემდეგ რიგდება... მინდა, ჩვენს ყველა "კეთილისმსურველს" გადავცე, მიუხედავად იმისა, რომ უკვე 5–6 თვეა ერთად აღარ ვართ, არ ვთვლი, რომ მასთან დაშორებული ვარ.
– ეკონტაქტებით ერთმანეთს?
– კი, ისე რა. ტელეფონით ვეხმიანებით ერთმანეთს. სიმართლე გითხრათ, ერთმანეთის ნახვას ორივე თავს ვარიდებთ, რატომ – არ ვიცით, ალბათ გულის ფართხალის ამბავია! რამდენიმე დღეა, არ დამირეკავს. როცა საჭიროა, თვითონაც მირეკავს, ერთმანეთის მტრები კი არ ვართ!
– არ გისაუბრიათ ამ თემაზე, რომ ურთიერთობა თავიდან დაგეწყოთ?
– როგორ არა, მაგრამ რაღაც ნიუანსები არსებობს, რაშიც მტყუანი ვარ და ამის განხილვა–გადახარშვა მიდის.
– დაშორებაში საკუთარ თავს ადანაშაულებთ?
– კი, ბევრ რამეს ალბათ მაინც ჩემს თავზე ვიღებ, მაგრამ ვის არ უჩხუბია და ვინ ვის ვითომ არ დაშორებია?
– რამდენიმე თვე ეკოს გარეშე – როგორ გრძნობთ თავს?
– ეკოს გარეშე უდიდეს დისკომფორტს ვგრძნობ. სამი წლის განმავლობაში ერთმანეთს შევეჩვიეთ, დროის უმეტეს ნაწილს ერთად ვატარებდით. რთულია იმ ადამიანის გარეშე ყოფნა, რომელიც ძალიან მიყვარს. თუმცა, თუ სამუდამოდ დავშორდებით, არც ეს იქნება კატასტროფა, ვინ არ დაშორებულა?
– ეკოს სიყვარულის დასაბრუნებლად რას აკეთებთ?
– ტრაბახს ვერ დავიწყებ, მაგრამ ეკოსთან ერთად ბევრი რამ ხალხმაც ნახა. სადარბაზოსთან გულების დანთება და კიდევ რა გითხრათ? ვინ აღარ სთხოვს, რომ შემირიგდეს. ეკო ჩემს ქმედებებს დადებითად აფასებს, ძალიან გაუხარდა და ეს მან პირადადაც მითხრა. ქალია და მაინც ვთვლი, რომ ამ ყველაფრის გადახარშვას დრო სჭირდება. ჩემი გადმოსახედიდან მამაკაცები ცოტა თავხედები ვართ... შეიძლება მასთან ისეთი შეცდომა დავუშვი, დრო სჭირდება. ურთიერთობა მხოლოდ სადარბაზოსთან ცეცხლის დანთებით არ წყდება, ეკოს ჩემზე წყენამ უნდა გაუაროს.
– შეიძლება ითქვას, რომ შერიგების პროცესში ხართ?
– არ ვიცი. ამ ტლიკინა და ვითომ კეთილისმსურველი ადამიანების ხელში რამდენჯერაც შერიგებამდე მივედით, იმდენჯერ უბედურება დატრიალდა. ერთ რამეში დავრწმუნდი, არავის უნდა მოუსმინო. ერთმანეთში ყველაფერი პირადად უნდა გაგვერკვია, ამას კი ვერ მივაღწიეთ. ენის მიტან–მოტანამ დაგვაშორა, ვიღაცეებმა ჯერჯერობით თავისი გაიტანეს, მაგრამ ბოლომდე მაინც ვერავინ გაიტანს თავისას.
– ბოლომდე იბრძოლებთ?
– ხელჩაქნეული რომელი კაცი გინახავთ? ან რომელი კაცი გინახავთ მიზნისთვის რომ არ მიეღწიოს?
– ეკომ რამდენიმე კვირის წინ "სარკესთან" აღნიშნა, რომ თქვენთან შერიგებას არ გამორიცხავს და ძალიან დადებითადაც მოგიხსენიათ.
– მე და ეკო ერთმანეთს სამუდამოდ რომ დავშორდეთ, დარწმუნებული ვარ, მთელი ცხოვრება მისთვის ისევ ის ბექა ვიქნები და ის ჩემთვის ისევ ის ეკო იქნება, ვინც მიყვარდა. თუ ყურს მოვკრავ, რომ ეკოს ცხოვრებაში ვჭირდები, მის გვერდით ვიქნები, რადგან ის ყველაზე ერთგული ადამიანია, მე ეს პირადად გამოვცადე. შეიძლება ეკო ჩვენს შერიგებას არ გამორიცხავს, მაგრამ ისიც თქვა, ამ ეტაპზე არ მცალია, სამსახური მაქვსო. ალბათ ამისთვისაც ექნება დასაფიქრებელი დრო.
– სანამ დაშორდებოდით, თქვენი ურთიერთობა რა ეტაპზე იყო, დაოჯახებას ხომ არ აპირებდით?
– საბოლოო ჯამში, ოჯახი უნდა შეგვექმნა, მაგრამ იმ პერიოდში არ ვფიქრობდით. უკვე ის ურთიერთობა გვქონდა, რომ ქორწინებამდეც მივიდოდით. სიმართლე გითხრათ, ამ საკითხს დიდ ყურადღებას არც ერთი ვაქცევდით. ეკო ისეთი ოჯახის შვილია, ნამდვილად არ მოხდებოდა, რომ ბექა ჩხაიძესთან ერთად ევლო რამდენიმე წელი და ოჯახი არ შეექმნა. ვიცი, ძალიან გულნატკენია. თუ გადახარშავს, ხომ კარგი, თუ არადა, მაინც გადავახარშვინებ. თუ ვერაფერმა გაჭრა, ღმერთმა ბედნიერი ამყოფოს!
– ეკოს დასაბრუნებლად დიდხანს რომ მოგიწიოთ ბრძოლა, მოთმინება გეყოფათ?
– ჩემთვის ეკოს სამუდამოდ დაკარგვა ჯერჯერობით წარმოუდგენელია და სადამდეც საჭიროა, იქამდე ვიბრძოლებ. უნდა დავიჯერო, რომ საბოლოოდ ისევ ერთად ვიქნებით. ვიცი, რომ ეკოს სიგიჟემდე ვუყვარვარ და თვითონაც კარგად იცის, რომ მეც სიგიჟემდე მიყვარს. რაც უფრო ნაკლებად მოვუსმენთ ხალხს, ორივესთვის უკეთესი იქნება.
– მის ხასიათს ალბათ კარგად იცნობთ.
– ეკო ემოციურია, მაგრამ ვთვლი, რომ ეს საჭიროა. ბევრი დადებითი თვისება აქვს, თურმე ყველაზე კარგი ყოფილა. თუ შევრიგდით, ხომ კარგი, თუ არა და, ამით ქვეყანა არ დაინგრევა, მაგრამ ერთმანეთთან იმხელა სიყვარული გვაკავშირებს, უკეთესია, შევრიგდეთ.
– ამ 6 თვის განმავლობაში, რაც ერთად არ ხართ, თქვენს ცხოვრებაში სხვა ურთიერთობის დაწყების მცდელობა არ ყოფილა?
– არა, ეს პერიოდი თვალი არავისკენ გამქცევია, ალბათ არც ეკოს გაქცევია თვალი ვინმესკენ.
– როგორია სიმღერა მაშინ, როცა საყვარელი ქალი გვერდით არ გყავთ?
– ეკო რომ ჩემს სიმღერებს უსმენს, რასაც იმ დროს გრძნობს, მეც იმავეს განვიცდი, როცა ვმღერი და ვიცი, რომ ჩემ გვერდით არაა.
– თქვენს კარიერაში რა სიახლეებია?
– ჩვენს ანსამბლს უამრავი სიახლე აქვს, ამერიკაში მივდივართ, იქ კონცერტები იგეგმება, მალე კლიპსაც გადავიღებთ. სპონსორის სახითაც ძალიან კარგი პიროვნება გამოჩნდა.
– ამ ხნის განმავლობაში ეკო თუ ესწრებოდა თქვენს საღამოებს?
– კი, რა თქმა უნდა. მას ჩვენი საღამო წაუყვანია კიდეც.
– ამ ეტაპზე შერიგებისკენ მიდის საქმე?
– მე და ეკო გარემოცვის მსხვერპლი ვართ. უკვე ვრიგდებოდით, მაგრამ ეს "ფეისბუქი" კიდევ ერთი უბედურებაა. ვიღაც უსახელომ ეკოს მისწერა, ახლა ბექა იქ არის და "გულაობსო". მინდა, ვისარგებლო შემთხვევით და თქვენი ჟურნალის საშუალებით ჩვენს "კეთილმოსურნეებს" ვუთხრა: თქვენი დღეც დადგება, ყველა სათითაოდ აგებთ პასუხს!. თუ შევრიგდებით, მაშინვე ერთნი უნდა გავხდეთ, ერთად ვიცხოვროთ, თორემ ვიცი, ჩვენ შორის ისევ არეულობა მოხდება.
სოფიო ბოჭორიძე, ჟურნალი სარკე