ზაზა ბეჟაშვილი: "სახლი არ მაქვს და სასაცილო იქნება ლაპარაკი, რომ ცოლი მომყავს"

მსახიობ ზაზა ბეჟაშვილის, მეგობრებისა და თაყვანისმცემლებისთვის – ზუზუს, ცხოვრებაში ამჟამად არც ისე კარგი პერიოდია, პრობლემები არ ასვენებს. გული სწყდება, რომ პროფესია, რომელიც ძალიან უყვარს, მის ფინანსურ დამოუკიდებლობას ვერ უზრუნველყოფს. ახლახან ქართულ–აზერბაიჯანულ სერიალში "ალი და თეოს" გადაღებებზე მიიწვიეს, მაგრამ პროდიუსერთან კამათი მოუვიდა და გადაღებები მიატოვა. ამჟამად ლოდინის რეჟიმშია, შეიძლება რუსულ–ქართულ სერიალში მთავარ როლზე დაამტკიცონ.
რაც შეეხება მის პირად ცხოვრებას, ზუზუ ისევ შეყვარებულია, მაგრამ დაოჯახებაზე, "ტრადიციულად", არ ფიქრობს. ამისი დროც მოვაო, გვითხრა. მის უახლოეს გეგმებში თურქეთში მარტო გამგზავრება და კარგი დასვენება შედის.
– ზაზა, ამ ეტაპზე რას აკეთებთ, თქვენს შემოქმედებაში რა სიახლეებია?
– ცხოვრების ამ ეტაპზე ვერ ვიტყვი, რომ კარგად ვარ. ზაფხულია და ამიტომ სამუშაო არ არის. ქართულ–რუსული პროექტის გაკეთების მოლოდინში ვარ. მანამდე იყო სერიალი "ალი და თეო", სადაც მიმიწვიეს. სერიალში ჩემი შესვლა უცებ მოხდა და ასევე უცებ წამოვედი, რადგან მივხვდი, იქ ჩემი ადგილი არ იყო. ახლა უკვე დავრწმუნდი, რომ რომელ პროექტშიც დამიძახებენ, ყველგან არ უნდა წავიდე.
– იმ სერიალთან დაკავშირებით რა პრობლემა გქონდათ?
– პროდიუსერთან მომივიდა უთანხმოება და ამიტომ წამოვედი. ჯერ ვერ ვიტყვი, სულ მივატოვე თუ არა გადაღებები, მაგრამ კამათის დღეს წამოვედი. ვერ გეტყვით, რომ დაბრუნება მინდა, მაგრამ იმდენი პროფესიონალიზმი ნამდვილად მაქვს, რომ გადაღებები არ ჩავუშალო. ჩემი გმირი თუ კიდევ იქნება საჭირო, მივალ და ვითამაშებ.
ამ ეტაპზე ჩემს ცხოვრებაში სხვა არაფერი ხდება. აჭარაში ვიყავი, მაგრამ დასვენება არ მეყო და სექტემბერის 10–ში თურქეთში წავალ.
– ქართულ–აზერბაიჯანულ სერიალში ვის როლს თამაშობდით?
– გამომძიებლის, რომელსაც ფარხადი ერქვა. ჩემთვის ძალიან დიდი პრობლემა იყო ტექსტები. ყველა მსახიობმა თვეებით ადრე იცოდა თავისი ტექსტები და მე კი წინა დღით მიგზავნიდნენ. ჩემით უკმაყოფილო არავინ იყო, მაგრამ ჩემ მიმართ დამოკიდებულება არ მომეწონა. ასე კარგად და რბილად არასოდეს მოვქცეულვარ, როგორც მათთან, მაგრამ...
– კონკრეტულად რა მოხდა, კონფლიქტი რის გამო დაიწყო?
– ერთ–ერთმა სტუდენტმა მსახიობმა ბიჭმა რაღაცეები აურია, სხვა პროექტში გადავიდა. ამის გამო პროდიუსერმაც ძალიან ინერვიულა და მეც. ვიცი, რას ნიშნავს, როცა მსახიობი გტოვებს და სხვაგან მიდის. იმ დღეს ამის გამო მასთან ერთად ვნერვიულობდი, ისიც კი ვუთხარი, მაქვს დრო და ისე გადმოვეწყობი, როგორც თქვენ გინდათ–მეთქი, მაგრამ თურმე ასე ზედმეტად არ უნდა ჩავრეულიყავი. მივხვდი, რომ უბრალოდ შენი საქმე უნდა აკეთო და მორჩა! კოსტიუმების მხატვარს ყველას ვუყვარვარ, რადგან ვეუბნები, მითხარით, რა გინდათ და მე მოვიტან იმაზე უკეთესს, ვიდრე თქვენ გაქვთ–მეთქი. ვცდილობ, როგორც შემიძლია, ყველას გავუადვილო საქმე. ამ ყველაფრის შემდეგ, როცა გადაღებაზე მივედი და მანქანიდან გადმოსულს ქართველმა პროდიუსერმა ცუდი ტონით მომმართა, მივხვდი, რომ იქ ჩემი ადგილი აღარ იყო. არადა იმ ადამიანს დიდ პატივს ვცემდი. თუ პროდიუსერი ტონის მაღლა აწევით მეუბნება, რომ ის პროდიუსერია, მე იქვე ვახვედრებ, რომ მსახიობი ვარ.
– როგორ ფიქრობთ, ქართველ მსახიობებს ასარჩევად გაქვთ საქმე, რომ რაღაც პროექტები დაიწუნოთ, რაღაც მოიწონოთ?
– 10 უხარისხო პროექტში მონაწილეობას 2 ხარისხიან პროექტში მონაწილეობა მირჩევნია. სადაც არაა საკმარისი ანაზღაურება, სადაც შემოქმედებითად ვერ დავიხარჯები და თანაც ტონს ვერ შეარჩევენ, იქ ჩემი ადგილი არაა. ჩემს პროფესიაში ძალიან განებივრებული ვარ, მეორე კურსიდან ვთამაშობ ცუდ თუ კარგ ფილმებში, სერიალებში. არჩევანის უფლებას ყოველთვის ვიტოვებ. ძალიან მაგარ აზერბაიჯანულ ფილმში ვითამაშე, სადაც ყველაფერი უმაღლეს დონეზე იყო, მაგარი ჰონორარებიც მოგვცეს. სწორედ ამის გამოა, რომ ეს ფილმი სადაც კი მიაქვთ, პრიზის გარეშე არ ბრუნდება. მამაკაცის როლის საუკეთესო შესრულებისთვის მეც მივიღე პრიზი. ბედნიერი ვარ, რომ ერთი რეჟისორიც ვერ იტყვის, ზუზუმ საქმე გამიფუჭაო.
– როცა შემოთავაზებას იღებთ, რა არის თქვენი მთავარი მოთხოვნა, რაც უნდა დააკმაყოფილონ?
– გადაწყვეტილებას სცენარის მიხედვით ვიღებ. პირველივე ზარიდან ვხვდები, რა ხდება და ჩემ მიმართ როგორი დამოკიდებულება აქვთ. ინტუიციაც განმივითარდა და დიდი გამოცდილებაც დამიგროვდა. გამორიცხულია, გადაღებასა თუ მოლაპარაკებაზე ცუდ ხასიათზე მყოფი მივიდე, მაგრამ, თუ თავად მაყანებენ ცუდ განწყობაზე, ამით მხოლოდ საკუთარ საქმეს აფუჭებენ.
ახლაც აპირებენ სერიალის გადაღებას, ვნახოთ, რა გამოვა. ინტელექტუალური იუმორი იქნება, რაც ძალიან მიყვარს. მთავარ როლში მე მოვიაზრები. თუ ეს პროექტი გამოვიდა, ჩემს ცუდ ხასიათს შეცვლის და მერე რომ მესტუმრებით, კარგ განწყობაზე დაგხვდებით. ძალიან მინდა კარგი სამუშაო.
– ქართველი მსახიობების ფინანსური მხარე გამოსწორდა? დიდ პროექტებში რომ გიწვევენ სამუშაოდ, შესაფერის ანაზღაურებას გაძლევენ?
– ყველაზე მეტად ფულზე ლაპარაკი მიჭირს და ამის გამო საკუთარ თავზე ძალიან ვბრაზდები. როცა მარაზმ, სასაცილო თანხას გთავაზობენ, საშინელებაა. სერიალებს რომ თავი დავანებოთ და რეკლამებზე ვილაპარაკოთ, გეკითხებიან ჰონორარს, პასუხობ, მერე თავისას გთავაზობენ, ჩვენ ამდენი გვაქვს და მეტს ვერ გადაგიხდითო. ჩემს "შებმას" არაფერი უნდა, თუ მომიდგები. სულ უფასოდაც მიმუშავია, გააჩნია ზრდილობას და დამოკიდებულებას. უნდა ვიცოდე, რომ იქ, სადაც მე მეძახი, მართლა გჭირდები. არ შეიძლება მსახიობს იმდენს უხდიდე, რომ თუნდაც ერთი ჰონორარით მანქანის ყიდვა ვერ შეძლოს.
გასული საუკუნის 90–იანი წლები აღარ არის, რომ თვითგადარჩენაზე ვიფიქროთ. ყველა ეტაპი გავიარე და ბევრი რამ ვიცი, საზღვარგარეთ შეიძლება დიდი თანხები არ შემოგთავაზონ, მაგრამ იმდენს მაინც მოგცემენ, რომ შეურაცხყოფილად არ იგრძნო თავი. ზოგს უხარია ტელევიზორში გამოჩენა და ამისთვის იქით იხდის ფულს. კი, ბატონო, აიყვანონ ასეთები, მაგრამ მე აღარ შემიძლია, დავიღალე! ბევრჯერ თანხა რომ დაუსახელებიათ, ტელეფონი მიმითხლეშია, არადა შეიძლება იმ წუთში ჯიბეში ორი ლარიც კი არ მქონოდა. უმეტეს შემთხვევებში მოლაპარაკება ასეთი ტექსტით იწყება – "ბიუჯეტი არ გვაქვს". ჩემი პასუხია კი ასეთია: "არც მე მაქვს ბიუჯეტი და ფული მჭირდება". ზუსტად ვიცი, რომ ამ ინტერვიუთი ბევრ მსახიობს მოვფხან გულს, ბევრი მათგანი განიცდის იმას, რაზეც ახლა მე ვლაპარაკობ.
– ზაფხულის თემას დავუბრუნდეთ. ბათუმში ვისთან ერთად დაისვენეთ?
– ბათუმში მე და რუსთაველის თეატრის მსახიობი მანანა აბრამიშვილი წავედით. ვნახე ის ხალხი, ვინც ძალიან მომნატრებია.
– "ფეისბუქზე" თქვენი და ნინო გაჩეჩილაძის ფოტოები ვნახე, აჭარაში გაქვთ გადაღებული.
– მე და გაჩკას ძალიან გვიყვარს ერთმანეთი. ბათუმში ვნახე და ძალიან გამიხარდა. ძალიან კარგად გავერთეთ, მაგრამ იქიდან დაღლილი, გაცვეთილი, გამოფხეკილი ჩამოვედი. ახლა სახლში გავდივარ რეაბილიტაციას. იქ ძირითადად მეგობრები მპატიჟებენ და მათთან ჩავდივარ. მეც მინდა, მქონდეს იმდენი ჰონორარი, რომ ერთხელ მე დავპატიჟო ისინი.
– თურქეთში ვისთან ერთად აპირებთ წასვლას?
– მარტო მივდივარ. ყველაზე კარგად ამ დროს ვისვენებ. აუზზეც მარტო დავდიოდი, ეს კარგი საშუალებაა, იფიქრო და ყველაფერი დაალაგო.
– პირად ცხოვრებაში რა სიახლეები გაქვთ?
– ამ მხრივ ყველაფერი კარგადაა. ვფიქრობ, რომ ჩემი ცხოვრება ძალიან საინტერესოა.
– დაქორწინებას არ აპირებთ?
– ყველას ჰგონია, რომ კარგად მიცნობს, მაგრამ ამ დროს მეც კი არ ვიცნობ ჩემს თავს კარგად. არასოდეს არაფერს ვგეგმავ. არ ვიცი, რას ნიშნავს, როცა ამბობენ, ერთი წლის, ორი წლის შემდეგ ამას და ამას ვიზამო. ეს ჩემთვის ძალიან სასაცილოა. დაახლოებით მაინც რომ ვიცოდე, ვაპირებ თუ არა დაოჯახებას, აუცილებლად გეტყოდით. თუ ეს მოხდება, პირველად "სარკეს" გავაგებინებ.
– ახლა თუ ხართ ისე შეყვარებული, რომ უახლოეს მომავალში ოჯახის შექმნაზე იფიქროთ?
– მსახიობის ცხოვრება ასეთია, ვისაც როგორი უნდა, ისეთი უნდა იყო. მაყურებელმა თუ ისეთი არ დაგინახა, როგორიც აწყობს, არაფერი გამოვა. ვიყო ვიღაცისთვის შეყვარებული, ვიღაცისთვის – დაოჯახებული, მოკლედ, ვისაც როგორ აწყობს, ისეთი. პრობლემებზე ლაპარაკი არ მიყვარს, მაგრამ ამჟამად ამის მოგვარებაზე ვარ გადართული. თუმცა ეს იმას არ ნიშნავ, რომ სიყვარულს მიტოვებული ვყავარ. საბედნიეროდ, ჯერ იმ ასაკში ვარ, რომ ვიღაცას მოვეწონო, მეც მომეწონოს, იყოს ფლირტი, ურთიერთობები. ძირითადად სულ ჩემნაირ არანორმალურებთან მაქვს ურთიერთობა, ამიტომ მათთან არასოდეს მაქვს იმაზე საუბარი, როდის უნდა მოვიყვანო ცოლად. ალბათ ჩემს ცხოვრებაში ამისი პერიოდიც მოვა.
– როცა ადამიანი დაქორწინებას აგვიანებს, მას ხშირად ეუბნებიან, რომ იმის გამო მაინც უნდა შექმნას ოჯახი, შვილი ჰყავდეს.
– შვილიც მინდა და მეორე ნახევარიც, რომელიც ყოველთვის მყავს. რაც მინდა, ყველაფერი რომ ჩამოვთვალო, მეტყვი, აბა, რა დაოჯახებაზე გველაპარაკებოდიო. შეიძლება ძალიან ადვილი მისაღწევია ჩემი "მინდა", თუნდაც რომელიმე პროექტში რომ მოვიგო ბინა, საკუთარი სახლი არ მაქვს. მყავს დედა, ძმა, ვისთვისაც ყველაფერი ისე უნდა მოვაწყო, რომ მათ თავი არაკომფორტულად არ იგრძნონ. ამ ყველაფრის ფონზე ძალიან სასაცილო უნდა იყოს ლაპარაკი იმაზე, რომ ცოლი მომყავს და ქორწილი მექნება. მინდა, ჰარმონიულად ვიყო ჩემს თავთან, პროფესიასთან, მეგობრებთან... ღმერთმა დამიფაროს, ამ ყველაფერმა პატარა ადამიანად მაქციოს, მაშინ არაფერი მინდა. იყო დრო, როცა ყველაფერი მქონდა, მაგრამ ამას არ "გავუფუჭებივარ".
– ყველაზე მეტად როდის იყავით იმედგაცრუებული?
– პროფესიაში არ ვყოფილვარ იმედგაცრუებული, რასაც ადამიანებთან მიმართებაში ვერ ვიტყვი. მე თუ ვინმე მიყვარს, მისგან არაფერს ვითხოვ, პირიქით, იქით გავცემ და ამაზე ძალიან "ვკაიფობ". ამ გრძნობის არქონას სჯობს, გქონდეს და თუნდაც გაწბილდე. ჩემს ცხოვრებაში ვიღაცეები "ადამიანჩიკებად" იქცნენ, ეს კი იმან განაპირობა, რომ მათი ცხოვრება უცებ კარგისკენ შეიცვალა. მე ძალიან ბედნიერი ვარ ჩემი ცხოვრების თეთრი და შავი ხაზებით, ყველაფერი მაქვს განცდილი. ამიტომ მეცინება, როცა ვიღაც მანქანას ყიდულობს და მერე აღარ მირეკავს, რადგან ჰგონია, რომ მისთვის ეს ყველაფერია. ყოფილა პერიოდები, როცა ყველაფერი მქონდა და მერე – აღარაფერი, მაგრამ ვინც მიცნობს, ის გეტყვით, რომ ამას არ შევუცვლივარ. სხვის ცვლილებას რომ ვხედავ, იმედები მაშინ მიცრუვდება.
საბედნიეროდ, ისეთი ხალხიც მყავს გვერდით, ვინც ჩემი ცხოვრება გაიტანა, გვერდით დამიდგა, ცუდად ვიყავი და მდგომარეობიდან გამომიყვანა. ეს კი პომპეზურად ან სხვების საჩვენებლად არ გააკეთეს. ძალიან ადვილად ვივიწყებ ცუდს, არავის ვებუტები, მაგრამ "ადამიანჩიკებთან" ურთიერთობა უკვე აღარ შემიძლია.
– პროექტ "ცეკვავენ ვარსკვლავებ"–ის პროდიუსერმა ნოე სულაბერიძემ "ფეისბუქის" საშუალებით კითხვა დასვა, მესამე სეზონის მონაწილედ რომელ ვარსკვლავს ისურვებდითო და უმეტესობამ თქვენ დაგასახელათ. არ გქონიათ შემოთავაზება? ამ პროექტს ხომ ნამდვილად შეუძლია თქვენი ბინის პრობლემა მოაგვაროს.
– პროექტის მეორე სეზონში დამირეკეს, მაგრამ მერე გადაიფიქრეს, რამაც ძალიან გამაღიზიანა. რატომღაც ხალხი დაინტერესდა, რატომ არ ვიღებ პროექტში მონაწილეობას. "ფეისბუქზე" არაერთხელ მომხვდა თვალში კითხვა, რატომ არ ვიყავი ამ პროექტში. ერთ–ერთმა ჟურნალისტმა მითხრა, ნოეს დავურეკეთ და გვითხრა, ჯერ მხოლოდ გია სურამელაშვილის მონაწილეობაა გადაწყვეტილიო. მე ამ პროექტის ინტერესი მაქვს და არ ვიცი, რა იქნება. თუ უნდათ, დავფიქრდები და თუ არ უნდათ, არც ამ პროექტით დამიწყია კარიერა და არც ამ პროექტით დავამთავრებ.
– კარგად ცეკვავთ?
– მიუზიკლებში მიცეკვია. მე ვარ მსახიობი, რომელიც მღერის და ცეკვავს. არ ვამბობ, რომ ყველაფრის მღერა შემიძლია და ყველა ცეკვის შესრულება, მაგრამ რაღაცეები გამომდის. ამიტომ, თუკი დამიძახებენ პროექტში, სიამოვნებით მივიღებ მონაწილეობას. რისკია და მე მიყვარს გარისკვა. ნოესთან ერთხელ მქონდა ამაზე საუბარი და ვნახოთ, რა იქნება.
ქეთი დინოშვილი