ქეთა თოფურიას ოფიციალური გათხოვება რუსული შოუბიზნესის წლის ყველაზე მასშტაბურ ცერემონიად აღიარეს

მოსკოვში მცხოვრები ქართველი მომღერლის, ჯგუფ "ა სტუდიოს" სოლისტის, ქეთა თოფურიას ქორწილი მთელი რუსული შოუბიზნესისთვის იქცა მნიშვნელოვან მოვლენად. საქორწილო ცერემონიალი და დაბადების დღე ქეთამ 9 სექტემბერს ერთად აღნიშნა მოსკოვის პრესტიჟულ საკონცერტო დარბაზ "ლუქსორ ვილიჯში". ქორწილი მთლიანობაში შოუ–პროგრამას ჰგავდა. გაფორმება და ცერემონიალი ცნობილი ზღაპრის "ყინულის დედოფალის" მიხედვით გაკეთდა. პატარძალი და სიძე, ლევ გეიხმანი, "ა სტუდიოს" სიმღერაზე "ია ისკალა ტებია" შევიდნენ დარბაზში, სადაც სტუმრები ფეხზე ამდგარნი შეეგებნენ.
ქორწილზე მიწვეულთა რაოდენობა რუსული ბომონდისთვისაც კი შთამბეჭდავი იყო – 500 ადამიანზე მეტი. ამის გამო ეს ცერემონიალი რუსული შოუბიზნესის 2013 წლის ყველაზე მასშტაბურ ქორწილად აღიარეს.
პატარძალი თეთრ, ასიმეტრიული ფორმის საქორწილო კაბაში ბრწყინავდა, სიძე შავ სმოკინგში იყო გამოწყობილი. ქეთას ანგელოზის ფორმაში გამოწყობილი ორი ბავშვი მიუძღოდა და წინ ვარდის ფურცლებს უყრიდა, რაც ძალიან გულისამაჩუყებელი სანახაობა იყო.
ქორწილში მთელი რუსული შოუელიტა გახლდათ მისული, ასე რომ, ერთმანეთის მიმართ არცთუ კეთილგანწყობილი კლანების წარმომადგენლები გვერდიგვერდ მოხვდნენ, მაგალითად, ალა პუგაჩოვა და იგორ კრუტოი. რუსული შოუბიზნესის ეს ორი ვეშაპი, წლებია, ერთმანეთს აღარ ეკონტაქტება და შეხვედრებსაც გაურბის. ქეთას ქორწილი კი ამ მხრივ გამონაკლისი აღმოჩნდა. პრიმადონამ ქეთა შემდეგი სიტყვებით დალოცა: "ქეთა, გისურვებ, რომ შენ გარშემო არასდროს ყოფილიყოს მსგავსი ჭორები, რასაც ჩემსა და მაქსიმზე ავრცელებენ" (იგულისხმა ჭორები, თითქოს მაქსიმ გალკინი ალას შორდება).
ცერემონიალის პირველი ნაწილის წამყვანი რუსი მომღერალი და ქეთას მეგობარი ალექსეი ჩუმაკოვი გახლდათ. მეორე ნაწილი კი მაქსიმ გალკინმა წაიყვანა. ბუნებრივია, ეს დღე სხვა კოლეგებმაც ქეთას სიმღერებით მიულოცეს, განსაკუთრებით აქტიურობდნენ ვალერი მელაძე, სოსო პავლიაშვილი და ლეონიდ აგუტინი. ქორწილში ქართული სიმღერებიც აჟღერდა. ქეთამ "თბილისო" შეასრულა, სოსო პავლიაშვილმა კი ქართულ მოტივებზე მთელი დარბაზი ააცეკვა.
პატარძლისთვის სიურპრიზი აღმოჩნდა, როდესაც მისი მეგობრები ქორწილში მაისურებით მივიდნენ, რომლებზეც ქეთას ბავშვობის ფოტო იყო გამოსახული და დაბადების დღე ამ ფორმით მიულოცეს. გავრცელებული მოსაზრება, რომ ქეთას მეჯვარე მომღერალი ქრისტინე იმედაძე იქნებოდა, რომელიც მას ამ დღეს გვერდიდან არ მოშორებია, მცდარი აღმოჩნდა. მიზეზი მარტივია – ქეთასა და ლევს ჯვრისწერა არ ჰქონიათ, რადგან ბანკირი ლევ გეიხმანი ეროვნებით ებრაელია.
კრისტალებიანი საქორწილო კაბა ქეთამ შუაღამეზე გამოიცვალა და შედარებით მოკრძალებული, თუმცა ასევე თეთრი კაბა ჩაიცვა, რომელიც მას ცეკვაში ხელს არ უშლიდა.
თაფლობისთვე ახალდაქორწინებულებმა ჯერ კიდევ ქორწილამდე, აგვისტოში მოიწყვეს ერთ–ერთ ეგზოტიკურ კუნძულზე. ქორწილის შემდეგ ქეთას "ა სტუდიოსთან" ერთად დატვირთული საგასტროლო გრაფიკი ელის.