ნინი ცნობილაძე: "კარგი სამოსის და კოსმეტიკისთვის ფულის მოსაგროვებლად ვიშიმშილებ კიდეც"

ახალგაზრდა მომღერალი ნინი ცნობილაძე ჩაცმის საკითხებში სულ რამდენიმე ადამიანს ენდობა, მათ შორის – მამას. მის გარდერობში ბევრია მამის შერჩეული სამოსი. პროექტ "ახალ ხმაშიც" რამდენჯერმე ეცვა მისი ნაყიდი ტანსაცმელი. უყვარს თავისუფალი, თინეიჯერული სტილი, იცვამს სადად, ზოგჯერ კი ქუჩაში ძმის მაისურებითაც დადის. თავის მოსაწონ ტანსაცმელს უცხოეთში ყიდულობს, თბილისურ მაღაზიებში არც ხარისხი მოსწონს და არც – ფასები. თვლის, რომ საქართველოში ხალხს ატყუებენ და იაფფასიან სამოსს ძალიან ძვირად ყიდიან.
– ნინი, ყოველდღიურ ჩაცმულობაში რომელ სტილს ანიჭებთ უპირატესობას?
– მიყვარს, როცა მოხერხებული ტანსაცმელი მაცვია. ჩემი ძმის მაისურებითაც დავდივარ. ისე უბრალოდ მაცვია ხოლმე, რომ ერთხელ სადღაც ვიყავი და მკითხეს, აქვე ცხოვრობო. ეგონათ, რომ გვერდით სახლიდან ვიყავი გამოსული. ზედმეტად მოწესრიგებული არ ვარ. თუ სადმე განსაკუთრებულ ადგილას მივდივარ, ჩაცმაზე მაშინ ვზრუნავ.
– სამოსის არჩევისას რას აქცევთ ყურადღებას – ფასს, ხარისხს...
– ბრენდს! მირჩევნია, ერთი მქონდეს და კარგი, ვიდრე ათასი და უბრალო. ადრე ამას დიდ მნიშვნელობას არ ვანიჭებდი, მაგრამ ახლა ყურადღებას ვაქცევ.
– დროთა განმავლობაში გემოვნება შეგეცვალათ?
– ადრე ჩემს სტილში არ ვიყავი გარკვეული და არც მოდურ ჟურნალებს ვათვალიერებდი. ეს საკითხები არ მაინტერესებდა, რადგან ქალაბიჭა ვიყავი. ახლა კი უკვე ჩემი სტილი მაქვს. გემოვნებიან ადამიანებს ძალიან ვაფასებ.
– ვინ მიგაჩნიათ ყველაზე გემოვნებიან ადამიანად?
– ნანი ბრეგვაძე ჩემთვის ძალიან გემოვნებიანი ქალია. ბავშვობიდან ვგიჟდები სარა ჯესიკა პარკერზე. სადმე რომ დავინახო, შეიძლება დავუჩოქო. ჩემთვის ყველაზე ლამაზი ქალია და ძალიან მაგრად იცვამს. მამაჩემი მოცეკვავე იყო და სულ საზღვარგარეთ დადიოდა გასტროლებზე. მას ყოველთვის ფანტასტიკურად ეცვა. საქართველოში საერთოდ რომ არ იყო ფერადი პიჯაკები, მამა მაშინ იცვამდა. მის გემოვნებას იმდენად ვენდობი, რაც უნდა იყიდოს ჩემთვის, ყველაფერი მომწონს და სიამოვნებით ვიცვამ. შანსი არაა, ისეთი რაღაც შემირჩიოს, რომ არ მომეწონოს. სხვათა შორის, "ახალ ხმაშიც" მეცვა მისი ნაჩუქარი ტანსაცმელი. ყველა მეკითხებოდა, სად იყიდეო. ვეუბნებოდი, მამამ იყიდა ჩემთვის–მეთქი და ძალიან უკვირდათ.
– თქვენს გარდერობში რა ფერები ჭარბობს?
– ფერად სამოსზე ვგიჟდები. შეიძლება, რომ ყველას შავი ტანსაცმელი ეცვას? ამის გამო სულ ვჩხუბობ. ვერასოდეს ვიმუშავებ ისეთ ადგილას, სადაც შავ–თეთრ ფერებში ჩაცმა დამჭირდება. იყო პერიოდი, როცა სხვადასხვა ბანკებში სტაჟირებას გავდიოდი, მაგრამ მივხვდი, რომ იქ ვერ გავძლებდი. ჩემი მეგობრები მუშაობენ ბანკში და ერთხელ მათთან ისეთ ჭრელ ტანსაცმელში მივედი, ყველამ მე დამიწყო ყურება.
– ფერებს თამამად ახამებთ ერთმანეთთან თუ ამ დროს სიფრთხილეს იჩენთ?
– თამამად ვახამებ, მაგრამ გარკვეულ წესებს ვითვალისწინებ. მაგალითად, სტაფილოსფერი მწვანესთან არ უნდა ჩაიცვა. ერთ ან ორ ფერში არასოდეს ვიცვამ, 3–4 ფერს ვუხამებ ერთმანეთს.
– სამოსის შეკერვა უფრო მოსახერხებელია თქვენთვის თუ მაღაზიებში შეძენა?
– ტანსაცმელს მხოლოდ მაშინ ვიკერავ, როცა, მაგალითად, ქორწილში მივდივარ. მეზარება მოზომვებზე სიარული, ამიტომ მაღაზიებში ყიდვა მირჩევნია.
– სამოსში ფული არასოდეს გენანებათ?
– არც სამოსში და არც – კოსმეტიკაში. ოღონდ კარგი სამოსი და კოსმეტიკა შევიძინო და შემიძლია ერთი კვირა ვიშიმშილო. ალბათ ყველა გოგო ასეა. თუ ლამაზად გამოიყურები, დანარჩენი ყველაფერი მეორეხარისხოვანია. სწორედ ამიტომ ჩემს წონასაც ყოველთვის ვაკონტროლებ. მართალია, დიდად არასოდეს ვიმატებ, მაგრამ პურს მაინც არ ვჭამ, სამი წელია პურზე უარი ვთქვი. თავიდან გამიჭირდა, მაგრამ მერე მივეჩვიე. ყველა მეხვეწება, პური ვჭამო, მაგრამ ვეღარ ვჭამ. არც ტკბილეული მიყვარს დიდად, მაგრამ, თუ მომინდა, შეიძლება ღამის 5 საათზე ისე გავგიჟდე, რომ გავიდე და ვიყიდო.
– სასცენო სამოსს რის მიხედვით არჩევთ, მთავარ ყურადღებას რას აქცევთ?
– სცენაზე კომფორტული სამოსის ჩაცმა ძალიან მნიშვნელოვანია. ერთ–ერთ კონცერტზე ძალიან ლამაზი კაბა და ფეხსაცმელი მეცვა, ეს ყველამ აღნიშნა, მაგრამ იმ დღეს იმ სამოსისთვის საერთოდ არ ვიყავი მზად და სიმღერაში საშინლად შემეშალა ხელი. მას შემდეგ ვთქვი, რომ სცენაზე არასოდეს ჩავიცვამ ისეთ მაღალქუსლიან ფეხსაცმელს და ისეთ ვიწრო კაბას, როგორიც მაშინ მეცვა. გაშეშებული ვიდექი და ვერ ვინძრეოდი. მაყურებლის წინაშე რომ გადიხარ, ისედაც ნერვიულობ, თან სიმღერაზე ფიქრობ და ამ დროს ჩაცმაზე ყურადღების გადატანა ზედმეტია.
– სცენისთვის სპეციალურად იკერავთ სამოსს თუ თქვენი გარდერობიდან არჩევთ?
– ჩემს გარდერობს ვიყენებ. საქართველოში ტანსაცმლის ყიდვა არ მიყვარს, გარდერობს ძირითადად საზღვარგარეთ ვაახლებ. თბილისში რომელ მაღაზიაშიც უნდა შეხვიდე, სულ ერთი და იგივე რაღაცეებია და თან უკვე მოძველებული კოლექციები. კაბა, რომელშიც საზღვარგარეთ 25 ფუნტი მივეცი, თბილისის ერთ–ერთ მაღაზიაში 300 ლარზე მეტი ღირდა. ყოველთვის მიმართლებს და როცა საზღვარგარეთ მივდივარ, მაღაზიებში ფასდაკლებები მხვდება. ის ბრენდები, რაც აქ ძალიან ძვირია, იქ იაფია. უცხოეთში მართლა ფასდაკლებებია და აქ რა ხდება? ხალხს ატყუებენ.
– სხვა რა გზაა, ყველას ხომ არ აქვს საზღვარგარეთ საყიდლებზე სიარულის საშუალება?
– თქვენ გგონიათ, მე მაქვს ამის საშუალება? ახლახან ინგლისში ვიყავი, მაგრამ იქ წასვლა "ახალი ხმის" პრიზად მერგო. სულ მინდა, ახალი სამოსი მეცვას, მაგრამ ზოგჯერ ამის საშუალება არ არის. ახალი ტანსაცმელი რომ მაცვია, მგონია, ყველაზე ლამაზი ვარ. ერთი და იმავე სამოსის ბევრჯერ ჩაცმა არ მიყვარს და საერთოდაც, ტანსაცმელი ძალიან მალე მბეზრდება, მერე კი სხვებს ვჩუქნი.
– საყიდლებზე მარტო გიყვართ სიარული?
– არა, ვისაც ჩემნაირი გემოვნება აქვს, მასთან ერთად მიყვარს სიარული. ვფიქრობ, ნორმალური გემოვნება მაქვს და სხვისი რჩევა დიდად არც მჭირდება. ცუდად არასოდეს ჩამიცვამს და ჩემთვის უგემოვნო არასოდეს უწოდებიათ.
– "ახალ ხმაში" თქვენი გემოვნებით არჩევდით ტანსაცმელს თუ კონკურსანტებს დიზაინერი გაცმევდათ?
– ერთ–ერთ მაღაზიაში უნდა ჩაგვეცვა, მაგრამ მე იქიდან ვერაფერს ვირჩევდი. ნატო დუმბაძე დამეხმარა სამოსის შერჩევაში. ზოგი მისი გარდერობიდან შევარჩიეთ, ძალიან მაგარი გემოვნება აქვს.
– ბრმა კასტინგზე ჟიურის ყურადღება მაშინვე მიიქცია თქვენმა ბრჭყვიალა კედებმა, ყველამ მოგიწონათ. თვლით, რომ ფეხსაცმელი ჩაცმულობაში მნიშვნელოვანია?
– ჩაცმულობაში ყველაფერი ძალიან მნიშვნელოვანია. კარგი ფეხსაცმელები და ჩანთები ძალიან მიყვარს, მაგრამ სწორედ ასე ვგიჟდები კაბაზეც და კოსმეტიკაზეც. ძალიან მომწონს, ქალი რომ მაღალქუსლიან ფეხსაცმელებზე დგას, მაგრამ ეს მაშინ, თუ უხდება და კარგი სიარულიც იცის. მეზიზღება, 15–20 სანტიმეტრიანი ქუსლებით რომ დადიან.
– არის ისეთი სტილი, რომელსაც ვერ ირგებთ?
– ზედმეტად ქალური სტილი არ მიხდება. ასე რომ ჩავიცვა, ძალიან სასაცილო გამოვჩნდები. ახალგაზრდული, ცოტა თინეიჯერული სტილი მომწონს.
– გატყობთ, რომ არ გიყვართ სამოსის აქსესუარებით გადატვირთვა, დიდად არც სამკაულები გეყვარებათ. ასეა?
– მართალი ხართ, აქსესუარების ყოველდღიური ხმარება ძალიან მიშლის ნერვებს. რაც შეეხება სამკაულებს, პატარა საყურეებს და ჩემს საყვარელ საათს თუ გავიკეთებ. ვერ ვიტან და მაღიზიანებს, როცა ბევრ სამკაულს ერთად აისხამენ ხოლმე. განსაკუთრებული აქსესუარები მაქვს, რომლებსაც ასევე განსაკუთრებულ დღეებში ვიყენებ.
– როგორი ჩაცმული ბიჭები მოგწონთ?
– ბიჭს კარგი ბრენდის სამოსი უნდა ეცვას. სჯობს, ყოველდღე ერთი და იმავე ეცვას და იყოს ბრენდი, ვიდრე სხვადასხვა, მაგრამ მოდღლეზილი მაისურები. მათზე ქეჟუალი მომწონს – ჯინსები, მაისურები, პერანგები. ვერ ვიტან, ბიჭს დილიდან ღამემდე სათვალე რომ უკეთია. რატომ უნდა გეკეთოს სათვალე მაშინ, როცა საჭირო არაა? ეს არ მესმის. ალბათ იმ სათვალეებიან ტიპებს ბაძავენ, რომლებსაც ტელევიზიით ხშირად აჩვენებენ. ვგიჟდები ძველმოდურ ბიჭებზე.
– ძველმოდური ბიჭი როგორია?
– აი, ისეთები, გოგოს პატივს რომ სცემენ, მისი ფასი იციან, მათთან რომ არ იგინებიან. ჯენტლმენი ბიჭები მომწონს, ნორმალურად აღზრდილები და განათლებულები. დღეს კი ასეთ ბიჭებს ძველმოდურს ეძახიან. ცანცარა ტიპები არ მიყვარს.