სალომე ბაკურაძე იოგას ვარჯიშებს იწყებს

მომღერალი სალომე ბაკურაძე მაყურებელმა ხუჭუჭი, შავი თმით გაიცნო და მას შემდეგ მის გარეგნობაში არაფერი შეცვლილა. ამბობს, რომ საკუთარი სტილი უკვე იპოვა და ექსპერიმენტების პერიოდიც უკან მოიტოვა. თუმცა არ გამორიცხავს, რომ ოდესმე პლასტიკურ ქირურგს მიაკითხოს და გარეგნობაში რაიმეს შეცვლა მოინდომოს. თმა მისი სისუსტეა, ყველაზე მეტი დრო ხვეული თმის დამორჩილებას მიაქვს. თუ ვარცხნილობა მოსწონს, კარგ განწყობაზე დგება და მერე ყველაფერს ხალისით აკეთებს. ფორმაში რომ იყოს, დრო და დრო დიეტების დაცვა უწევს. ახლა კი გადაწყვიტა, უფრო ეფექტურ საშუალებას მიმართოს და აქტიურად ივარჯიშოს.
– სალომე, თავდაპირველად თქვენი სამომავლო გეგმების შესახებ ვისაუბროთ. უახლოეს მომავალში რას აპირებთ?
– ისევ ვუბრუნდები რადიო "იმედს", სადაც წამყვანი ვარ და ასევე ახალი სამსახური მაქვს სტუდიაში, რომელიც "კომედი არხის" ბაზაზეა შექმნილი. იქ ვოკალის პედაგოგი ვარ. სამომავლოდ ახალი სიმღერის ჩაწერას ვაპირებ. მთელი ზაფხული დაკავებული ვიყავი. დასვენება და მუშაობა ერთმანეთს შევუთავსე.
– ზოგიერთი თქვენი კოლეგა მუსიკალურ ტელეპროექტებში იღებს მონაწილეობას იმისთვის, რომ მსმენელს თავი შეახსენოს ან უბრალოდ, სცენის მონატრების სურვილი დაიკმაყოფილოს. თქვენც ხომ არ გიხილავთ რომელიმე კონკურსში? მით უმეტეს, რომ ამის გამოცდილება გაქვთ, პროექტებში "ნუცას სკოლა", "ჯეოსტარში" მონაწილეობდით.
– არ ვაპირებ. ყოველთვის ვამბობდი, რომ კონკურსები არ მიყვარს. პროექტი "ჯეოსტარი" კი სულ სხვა რამ იყო ჩემთვის. აუცილებელი იყო, ეს ნაბიჯი გადამედგა და მონაწილეობა მიმეღო. რომ არა ეს პროექტი, ბევრი წვალება მომიწევდა იმისთვის, რომ ჩემი შემოქმედება მსმენელამდე მიმეტანა. ასე რომ, კონკურსანტი უკვე ვიყავი და კიდევ რამდენ პროექტში შეიძლება მივიღო მონაწილეობა? თან, ვთვლი, რომ დღეს ხალხი ისე აღარ მცნობს, როგორც ჯეოსტარელ სალომე ბაკურაძეს. ჩემი სახელი და გვარი კონკურსის გარეშეც იციან.
– მას შემდეგ, რაც პროექტში გამოჩნდით და ფართო საზოგადოებამ გაგიცნოთ, 5 წელი გავიდა. რა შეიცვალა ამ პერიოდში თქვენს სასცენო იმიჯში?
– იმიჯს საქართველოში ხშირად არ იცვლიან. აქ არ არის ისეთი ბაზარი, რომ ამის საჭიროება იყოს. ვარცხნილობის შეცვლას კი თავად ვერ ვეგუები. ვფიქრობ, რომ სხვანაირად არც მომიხდება. სხვათა შორის, მაკიაჟის სწორად გამოყენება სწორედ "ჯეოსტარში" ვისწავლე. მაგრამ, რა თქმა უნდა, დღესაც ვერ ვიკეთებ ისე კარგად, როგორც პროფესიონალი ვიზაჟისტების ჯადოსნურ ხელებს გამოსდით. ყველაზე კარგად თმის ვარცხნილობის დაყენება შემიძლია.
– დღეს მსოფლიო სცენაზე თამამი, თითქმის ვულგარული იმიჯია მომგებიანი. საქართველოში ამის საჭიროება არ დგას?
– ჩვენს შოუბიზნესში ეს ნიშა თავისუფალია და შეიძლება საჭიროც არის, ვინმემ თამამი იმიჯი მოირგოს, ეს ადგილი დაიკავოს, მაგრამ გააჩნია შემსრულებელს. არ არის აუცილებელი, სცენაზე ყველამ გაიხადოს, მაგრამ ვინც ამას მოიხდენს, მისი გულშემატკივარი ვიქნები.
– თქვენს გარეგნობასთან დაკავშირებით ცნობადობა რაში გზღუდავთ?
– ყოველთვის ფორმაში უნდა ვიყო. შეიძლება მაკიაჟით არ ვიარო, მაგრამ საკუთარ თავს უფლებას არ მივცემ, შინიდან მოუწესრიგებელი გავიდე. ამაში არ ვგულისხმობ იმას, რომ წიწიბურას საყიდლად გასული ცნობილი ბრენდის სამოსს ვიცვამ. უბრალოდ, უნდა გეტყობოდეს, რომ თავს უვლი.
– ქართულ თუ უცხოურ შოუბიზნესში ალბათ ბევრია ისეთი, ვინც მოგწონთ გარეგნობით, ჩაცმის სტილით... არასოდეს გაგჩენიათ სურვილი, ვინმესთვის მიგებაძათ?
– მართლაც ბევრია ისეთი, ვინც მომწონს, მაგრამ არ ჩამოვთვლი. ვთვლი, რომ კარგი რაც არის, უნდა დაინახო, ისწავლო და ეს პროცესი შეიძლება ცხოვრების ბოლომდე გაგრძელდეს. ცუდს ვერაფერს ვხედავ იმაში, როცა ვინმეს კარგ მიგნებას შენც მოირგებ, ოღონდ შენებურად და არა – პირდაპირ. ახლა ასეთი ტენდენციაა, ყველა ერთმანეთს ბაძავს. თუ ვინმე გადაწყვეტს, რომ თმის ბოლოები გაიღიავოს, ყველა იმავეს აკეთებს. შეიძლება შვიდი დაქალიდან შვიდივეს თმის ერთი და იგივე ფერი ჰქონდეს. თუ ჟილეტებია მოდაში, ყველას ის აცვია უნიფორმასავით. ეს მიმბაძველობა ცოტა მაღიზიანებს. მოდის ტენდენციებს მთელ მსოფლიოში ითვალისწინებენ, მაგრამ ინდივიდუალიზმს არ კარგავენ. მეც ძალიან მიყვარს მოდურად ჩაცმა, მაგრამ ერთფეროვნებას ყოველთვის ვერიდები.
– თანაც ალბათ იმაზეც უნდა იფიქრო, მოდური ტენდენციებიდან რა გაითვალისწინო, რა გიხდება და რა – არა. ფერებიც სწორად უნდა შეარჩიო.
– გეთანხმებით. ვთვლი, რომ ნებისმიერი სამოსის მორგება შეიძლება, მაგრამ, მაგალითად, ჩემს ხასიათში სპორტულად ჩაცმა არ ზის. რაც შეეხება ფერებს, ვთვლი, რომ ჩემთვის სცენაზე და ზოგადადაც, ნათელი ფერებია მომგებიანი. თუ მთლიანად სამოსი არა, რაიმე დეტალი მაინც უნდა იყოს ნათელი და კაშკაშა.
– რა უნდა იყოს თქვენს გარდერობში აუცილებლად ძვირადღირებული?
– ძალიან მიყვარს, როცა საათი და სათვალე კარგი ხარისხისაა. შეიძლება ჩვეულებრივი მაისური ჩავიცვა, მაგრამ ეს ორი აქსესუარი ნამდვილად კარგი უნდა იყოს.
– თქვენი გემოვნების ჩამოყალიბებაში განსაკუთრებული როლი ვინ ითამაშა?
– ჩემს გემოვნებაზე ოჯახის წევრებიდან თუ გარემოცვიდან ალბათ ცოტ–ცოტა ყველამ მოახდინა გავლენა. მათ რჩევებს ყოველთვის ვითვალისწინებ. დედა ყოველთვის ძალიან მეხმარებოდა. მისი ნაყიდი სამოსი ყოველთვის მომწონს. დედაც, დეიდაც და ჩემი დაც, რომელიც ჩემზე 8 წლით უფროსია, ყოველთვის მაძლევენ რჩევებს გარეგნობასთან დაკავშირებით. მათ ზუსტად იციან, რა უხდებათ და ასევე ზუსტად იციან, მე რა მიხდება. არ მაძლევენ საშუალებას, ჩემი გარეგნობის მიმართ სუბიექტური ვიყო.
– ოდესმე პლასტიკურ ქირურგთან მისვლის სურვილი თუ გაგჩენიათ?
– ჩემი გარეგნობით კმაყოფილი ვარ და კონკრეტულად არაფრის შეცვლა მინდა, მაგრამ არ გამოვრიცხავ, მომავალში პლასტიკურ ქირურგსაც მივმართო. ჩემს ასაკშიც იკეთებენ პლასტიკურ ოპერაციებს და ამაში ცუდს ვერაფერს ვხედავ, თუ, რა თქმა უნდა, ნორმას გადაცილებული არაა.
– სარკის წინ მდგომს ცუდ განწყობაზე რა გაყენებთ?
– თუ ჩემი ვარცხნილობა არ მომწონს და სამოსი დისკომფორტს მიქმნის, ცუდ ხასიათზე ვდგები.
– ზედმეტ კილოგრამებთან ბრძოლისთვის, ფორმის შესანარჩუნებლად რა ნაბიჯებს დგამთ?
– ვარჯიშს სულ ვიწყებ და მერე კალაპოტიდან ვვარდები. მეგობრები იოგაზე სიარულს ვაპირებთ. ფორმაში რომ ვიყო, სხვადასხვა დიეტას მუდმივად ვიცავ, მაგრამ ადამიანი რობოტი არ არის და ხანდახან თავს კვების რეჟიმიდან ამოვარდნის და დიეტის დარღვევის უფლებას ვაძლევ.