რაში აქვს აღებული 42 მედალი ახალ ''მის იუნიორს''

წელს, 16 სექტემბერს, ''მის იუნიორი'' უკვე მეექვსედ ჩატარდა და გამარჯვებული, 15 წლის გაბრიელა ხვედელიძე გამოავლინა. როგორც კონკურსის ორგანიზატორი მაია ზაალიშვილი ამბობს, გაბრიელა ერთ წელიწადს მოემზადება და შემდეგ რომელიმე საერთაშორისო კონკურსზე გაემგზავრება. ძირითადად, ამგვარ კონკურსებზე 16 წლამდე გოგონებს არ იღებენ ხოლმე.

თანაც, სილამაზის კონკურსის ქართველი ორგანიზატორის აზრით, იმ გამოცდილებამ, რომელიც ამ კუთხით მიიღეს, დაანახვა, რომ ერთწლიანი მომზადება მაინც არის საჭირო, ასეთი ტიპის ღონისძიებაზე ქართველმა წარგზავნილმა თავი რომ გამოიჩინოს. საერთაშორისო დონეზე სხვადასხვა ქვეყანას უკვე მუდმივად მოდელები წარადგენენ ხოლმე, რომელთაც კონკურსებამდე საკმაო გამოცდილება აქვთ მიღებული.

გაბრიელა ხვედელიძე ტანმოვარჯიშეა და 42 მედლის მფლობელი გახლავთ. საკუთარი თავის შესახებ სიამოვნებით გვესაუბრა.

- ''ფეისბუქიდან'' შევიტყვე ამ კონკურსის შესახებ. მონაწილეობა დედასთან ერთად გადავწყვიტე. მივედი კასტინგზე, ამიყვანეს და დაიწყო მზადების პროცესი. საკმაოდ ცუდად გამომდიოდა სიარული, რადგან ტანვარჯიშში ცოტა სხვანაირად დავდივართ და ამისი გამოსწორება მჭირდებოდა. ძალიან რთულად შევეჩვიე ქუსლებზე სიარულს. აქამდე ქუსლიანი ფეხსაცმლით არ მივლია. ეს ყველაფერი არ მეზარებოდა, საინტერესო იყო, რადგან ეს კონკურსი მრავალმხრივ განვითარებას ითხოვს. ''მის იუნიორი'' გრიგოლეთში ჩატარდა. მონაწილე გოგონები ძალიან მომეწონა, გარშემო მყოფები ძალიან კარგად მექცეოდნენ. რაც შეეხება თავად კონკურსს, დიდი სიამოვნებით მივიღებ მონაწილეობას სხვა კონკურსებშიც.
- პირველ ადგილს ელოდი?
- სიმართლე რომ გითხრათ, არ ველოდებოდი პირველ ადგილს. ყველა გოგონას გაუხარდა, არ ველოდებოდი ასეთ რეაქციას, რადგან სპორტში ასე არ ხდება. ძალიან დიდი კონკურენციაა და შენი გამარჯვება ყველას არ უხარია. სილამაზის კონკურსზე კი ყველა მგულშემატკივრობდა.
- მხატვრული ტანვარჯიშით როდის დაინტერესდი?
- 5 წლის ვიყავი, როდესაც დედამ მხატვრულ ტანვარჯიშზე მიმიყვანა, თავადაც ვარჯიშობდა და მის გზას ვაგრძელებ. 42 მედალის მფლობელი ვარ. 2012 წელს რუსეთში, ნიჟნი-ნოვგოროდში ტარდებოდა ევროპის ჩემპიონატი მხატვრულ ტანვარჯიშში. ძალიან მაღალი დონის შეჯიბრება იყო და უკრაინასა და აზერბაიჯანს საკმაოდ ძლიერ კონკურენციას ვუწევდით, როგორც გუნდმა, მესამე ადგილი დავიკავეთ. ასევე ევროპის ჩემპიონატის პრიზიორი გავხდი.
ყოველ წელს რუსეთში ტარდება შეჯიბრება ''მის ვალენტინა'' , იქ მეოთხე ადგილზე გავედი, მაგრამ მომცეს ნომინაცია და ''მის ვალენტინა'' გავხდი. ათასი მხატვრული ტანმოვარჯიშიდან საქართველო გამოარჩიეს. ამ ტიტულს აძლევენ ყველაზე ლამაზ ტანმოვარჯიშეს და მის მინიჭებას ჟიური წყვეტს. ''მის ვალენტინას'' უნდა ჰქონდეს განსაკუთრებული ხიბლი, გამოსვლისას უნდა ჩანდეს ღიმილიც, ემოციაც, კარგად უნდა გადმოსცე, რასაც ასრულებ. ვიყავი ასევე მსოფლიო თასზეც. როდესაც ჩემი გამოსვლის დრო დადგა, წამყვანებმა ჩემ შესახებ ინფორმაცია გამოაცხადეს, მათ შორის რამდენი შეჯიბრების გამარჯვებული გახლდით. მას შემდეგ, რაც გამოსვლა დასრულდა, თქვეს, საქართველოდან როგორი ლამაზი გოგონა გამოდის და რა გემოვნებიანი კაბა აცვიაო (იღიმის).
- შენთვის სპორტია მთავარი თუ მოდელობა გინდა?
- ორივეს მოსწრება მინდა. მოდელობა ახალი სფეროა ჩემთვის, მაგრამ მსურს, ამ მიმართულებით განვვითარდე. მინდა, მადლობა ვუთხრა კონკურსის ქორეოგრაფ ნატო ტომარაძეს, რომელიც პოდიუმზე სიარულს მასწავლიდა.

ნინო მურღულია
ჟურნალი ''რეიტინგი''