ნუკი კოშკელიშვილი: "ექსკლუზიურად თქვენ გეტყვით – შეყვარებული მყავს!"

ტელევიზიისა და შოუბიზნესის პოპულარულმა სახემ, ნუკი კოშკელიშვილმა, ზაფხულის თავგადასავლები დაასრულა და მალე ეკრანს ახალი გადაცემით და პირად ცხოვრებაში სიახლით დაუბრუნდება. ინტერვიუს წინ გავუსწრებთ და გაცნობებთ – ნუკი კვლავ შეყვარებულია. თავისი რჩეულის ვინაობას არ ამხელს, მხოლოდ იმაზე მიანიშნებს, რომ ის ცნობილი სახე არ არის.
– ნუკი, ჯერ იმაზე გვიამბეთ, რა გადაცემაში გამოჩნდებით.
– "კომედი შოუს" ბიჭებმა დამირეკეს და მითხრეს, რომ ძალიან უნდოდათ ჩემთან თანამშრომლობა. მითხრეს, რამე გადაცემა გავაკეთოთ და როგორი სტილის გირჩევნიაო. ეს გადაცემა თავად მოიფიქრეს. ჩვენი სტუმრები გადაცემის თემასთან კავშირში არ იქნებიან. მაგალითად, ჟურნალისტ სტუმარს ვესაუბრებით მანქანების შესახებ და ა.შ. ერთად გავარკვევთ, ჩვენთვის უცნობი თემის გარშემო რა ხდება. შეიძლება აღმოჩენებიც გვქონდეს. გვექნება დავალებები ჩვენი რესპონდენტებისთვის, რომლებიც ძალიან სახალისო იქნება. სტუდია ისეა მოწყობილი, რომ შინაურული გარემო იგრძნობოდეს. ჩვენთან პირველად იქნება დაშვებული გადაცემის ჩაწერისას მობილურზე პასუხი და ეს ეთერში გავა. ეს იქნება შოუ, რომელსაც საღამოს განსატვირთად უყურებენ. ჩვენი სტუმრები იქნებიან ცნობილი სახეები და სწორედ ამიტომ დავარქვით გადაცემას "ფეის ნუკი".
– კომედიურ ჟანრში მუშაობა როგორ წარმოგიდგენიათ, გამოგივათ?
– ეს ნამდვილად ახალია ჩემთვის. რთულია კომედიურ ჟანრში მუშაობა. როგორც ცნობილია, მაყურებლის გაცინება ბევრად რთულია, ვიდრე – ატირება. არასდროს მიხუმრია და ვნახოთ, როგორ გავართმევ თავს. ამ გადაცემაში სრული იმპროვიზაცია იქნება და არა – დაწერილი ხუმრობები.
– "კომედი შოუს" ხელმძღვანელ ალეკო მალხაზიშვილს და სხვებს როგორ შეეწყვეთ?
– ალეკო არასდროს არის მკაცრი. როცა ხედავს, რომ მოწყენილი ვარ, ყველანაირად ცდილობს, კარგ ხასიათზე მომიყვანოს. ამ არხზე, შინაარსიდან გამომდინარე, წარმოუდგენელია, ბოღმა და ცუდი ადამიანები მუშაობდნენ.
– რომელი გადაცემა წარმოგიდგენიათ "ფეის ნუკის" კონკურენტად?
– არ ვიცი. უკონკურენტო გადაცემაა. ეს არხი გათვლილია იმ ადამიანებზე, რომელთაც იუმორი უყვართ და სხვა არაფერი აინტერესებთ. რადგან ამ არხის კონკურენტი არ არსებობს, გამოდის, რომ ჩემს გადაცემასაც არ ეყოლება კონკურენტი.
– მაყურებლები თქვენ და მსახიობ რუსკა მაყაშვილს ხშირად გადარებენ ერთმანეთს. ინტერნეტგამოკითხვებიც დგება: "ნუკი ჯობია თუ რუსკა?" რა აზრის ხართ ასეთ შედარებაზე ან საერთოდ რატომ გადარებენ?
– ეს მეც მაინტერესებს. ალბათ იმიტომ, რომ ბავშვებს ორივე ძალიან ვუყვარვართ. რუსკა ფანტასტიკური ადამიანი, ძალიან ნიჭიერი და მეგობრულია. მიხარია, რომ მას მადარებენ და არა – ვინმე სხვას.
– რამდენიმე ხნის წინ თქვენი საკმაოდ თამამი ფოტოსესია გამოაქვეყნეთ, რის გამოც ბევრმა გაგკიცხათ. ამ ნაბიჯს ხომ არ ნანობთ?
– არათუ ვინანე, ექსკლუზიურად გეტყვით, რომ ძალიან მალე კიდევ ნახავთ ჩემი და მამუკა კიკალიშვილის ერთობლივ ნამუშევარს, რომელიც ასევე ხმაურიანი იქნება. არ არსებობს, რომ ყველას მოეწონო. მე ყოველთვის ვამბობ იმას, რომ უნდა გააკეთო ის, რაც გინდა, რა თქმა უნდა, ნორმის ფარგლებში. მშობლებს ჩემი ეს ნაბიჯი ძალიან მოეწონათ.
– როგორც ვიცი, წელს საკმაოდ კარგად დაისვენეთ, იყავით ბათუმში, პარიზში, მონტე კარლოში, ნიცაში... ბევრი შთაბეჭდილებით იქნებით დატვირთული.
– დასვენება მაისში დავიწყე. ბათუმიდან ორ დაქალთან ერთად პარიზში წავედი, მერე – ნიცაში, კანში, მონტე კარლოში, სან ტროპეში და მერე ისევ ბათუმში დავბრუნდი. დიდი ხანია ასე კარგად არ დამისვენია. მინდა აღვნიშნო, რომ ნიცასა და ბათუმს შორის ბათუმს ვარჩევდი. პარიზში ბევრი მუზეუმი ვნახეთ. ვცხოვრობდით სამვარსკვლავიან სასტუმროში, რადგან გადავწყვიტეთ, უფრო ბევრი ადგილი გვენახა, ვიდრე ძვირადღირებულ სასტუმროში დაგვეტოვებინა თანხა და ტელევიზორისთვის გვეყურებინა. არ გვიშოპინგია. მოგზაურობისას ღირსშესანიშნაობების დათვალიერება მირჩევნია მაღაზიებში სიარულს. ეს თბილისშიც მეყოფა.
ამ მოგზაურობისას გაგვქურდეს კიდეც, მაგრამ, საბოლოო ჯამში, ნამდვილად კარგი ზაფხული იყო.
– ბოლო პერიოდში თქვენი პირადი ცხოვრება აქტიურად განიხილება. ძველი თემაც კი განახლდა და ერთ–ერთმა ინტერნეტტელევიზიამ გიორგი ქორქიასთან დაკავშირებით გკითხათ, თუ რა ხდებოდა თქვენ შორის წლების წინ. როგორ ფიქრობთ, რატომ დასჭირდათ თქვენი წარსულის გახსენება?
– არ ვიცი, რატომ მკითხეს გიორგი ქორქიას შესახებ. ზოგადად პირად ცხოვრებაზე საუბრის წინააღმდეგი არ ვარ. ისეთი პროფესია მაქვს, რომ ხალხისთვის საჯარო უნდა ვიყო. რაც შეეხება გიორგის, ჩვენ მეგობრები ვართ, უახლოესი – არა, მაგრამ მაინც მეგობრები. თავის დროზე, როცა რეალურ შოუ "კოდში" ერთად მივიღეთ მონაწილეობა, იყო ბუმი, რომ თითქოს ერთად ვიყავით. დღეს ამის შესახებ კითხვა ალბათ იმიტომ გაჩნდა, რომ დიდი ხანია ჩემს პირად ცხოვრებაზე ახალი არაფერი გაუგიათ. ოთო მარგოშვილს ერთი წლის წინ დავშორდი და მას მერე ჩემ შესახებ ახალი არაფერი გაჟღერებულა. ამიტომ ძალიან ძველი გაახსენდათ.
– ვიცი, რომ ოთოსთან მეგობრობთ. ბევრს უკვირს ყოფილი შეყვარებულების მეგობრობა.
– დიდი განსხვავებაა მეგობრობასა და შეყვარებულობას შორის. შეყვარებულები შეიძლება მეგობრები იყვნენ, მაგრამ მეგობრები ვერ იქნებიან შეყვარებულები. შეყვარებულთან სხვა პასუხისმგებლობა გაქვს. ოთოს დიდ პატივს ვცემ. ვმეგობრობთ, მაგრამ ეს იმას არ ნიშნავს, რომ ყოველდღე ვხვდებით ერთმანეთს.
– ახლა თუ არის სიყვარულის ობიექტი თქვენს ცხოვრებაში?
– ექსკლუზიურად თქვენ გეტყვით – შეყვარებული მყავს! ჯერ სახელს და გვარს არ გავამხელ.
– ცნობილი სახეა?

– არა, ცნობილი სახე არ არის. ასაკსაც არ გეტყვით, თუმცა ჩემზე ბევრად უფროსი არ არის. ეს არც სამსახურებრივი რომანია. მე ამ ურთიერთობას სიყვარულს და გაგიჟებას ვერ დავარქმევ, უბრალოდ ერთად ვართ და ვნახავთ, რა გამოვა. ერთმანეთი მოგვწონს.
– ნუკი კოშკელიშვილის გვერდით დგომა რთულია?
– ალბათ და სწორედ ამიტომ მე ყოველთვის ვირჩევ ისეთ მამაკაცებს, რომლებსაც ეამაყებათ, მათ გვერდით მყოფი ქალი სხვებსაც რომ მოსწონთ. ასეთი კაცი არასდროს ეჭვიანობს.
– ბედნიერი ხართ?
– კი, ბედნიერი ვარ. ეს ძალიან კარგი გრძნობაა, რაც დიდი ხანია არ მქონია.
მანანა ნოდია, ჟურნალი სარკე