"გვერდით ისეთი გოგო უნდა მყავდეს, რომ ყველა მამაკაცს ჩემი შეშურდეს"

იუმორისტ გიგა ტაბიძეს სულ ორჯერ უყვარდა. ამბობს, რომ ამ ურთიერთობებში შეცდომები თავად დაუშვა და საყვარელ ქალებთან დაშორების მიზეზიც სწორედ ეს გახდა. შეყვარებული გიგა თურმე რამდენადაც ყურადღებიანია, იმდენად ეჭვიანიც გახლავთ. შეიძლება შეყვარებულს უმიზეზოდაც ეჩხუბოს, თავისი დანაშაული კი მის ფანჯრებთან სერენადით ან ორიგინალური სიურპრიზით გამოისყიდოს. 23 წლის იუმორისტი თაყვანისმცემელი გოგონების რიცხვს არ უჩივის. მათი რაოდენობა გიგას პოპულარობის პარალელურად იზრდება. არ მალავს, რომ ყველას ეპრანჭება და მათ პაემანსაც ხშირად უნიშნავს, მაგრამ სერიოზულ ურთიერთობებზე ჯერჯერობით არ ფიქრობს.
– გიგა, თქვენს ცხოვრებაში არ გამოჩნდა საყვარელი ქალი?
– ამ ეტაპზე სერიოზული ურთიერთობა არავისთან მაქვს, თავისუფალი ვარ. ნამდვილი სიყვარული სულ ორჯერ მეწვია, ორივე სიყვარული სტუდენტობის პერიოდს მახსენებს, მაგრამ ამ ურთიერთობებზე საუბარი არ მინდა, არ მსიამოვნებს.
– მათთან დაშორების მიზეზი რა გახდა?
– საკუთარ თავს ვადანაშაულებ ყველაფერში. პირველ შეყვარებულს რომ დავშორდი, მივხვდი, რომ მართლა მიყვარდა.
– აღარ სცადეთ მასთან დაბრუნება?
– არა, რადგან იმ მომენტში სიამაყეს ვერ ვძლიე. ჩვეულებრივ ურთიერთობებში ამაყი არ ვარ, შემიძლია ხშირად წავიდე დათმობაზე, მაგრამ ამ შემთხვევაში ასე მოხდა.
– ახლა როგორი გოგონები იქცევენ თქვენს ყურადღებას?
– ქალი ძალიან მომხიბვლელი, მიმზიდველი და ყველასათვის სასურველი უნდა იყოს. ჩემ გვერდით ისეთი გოგო უნდა იდგეს, ყველა მამაკაცს ჩემი შეშურდეს. ამის ამბიცია ნამდვილად მაქვს. ქალი განათლებული უნდა იყოს. ერთმანეთის გაგება უნდა შეგვეძლოს. ისეთ გოგოს ვერ ავიტან, რომელსაც ჩემს ხუმრობაზე რეაქცია არ ექნება.
– გოგოსთან ურთიერთობის წამოწყებაში რამდენად გეხმარებათ იუმორი?
– იუმორი ყველაფერში მეხმარება და მათ შორის ქალთან ურთიერთობის წამოწყებაშიც. როდესაც შენს ხუმრობაზე გოგოს შესაბამისი რეაქცია აქვს, ჩათვალეთ, რომ ურთიერთობა შედგა. იუმორის ზღვარის დაცვა ნებისმიერ დროს საჭიროა, მაგრამ, სიმართლე გითხრათ, იუმორი სიცანცარეში ხშირად გადამსვლია და ამ დროს საკუთარ თავს ვაჩერებ ხოლმე.
– ვიცი, რომ ეკრანზე გამოჩენის შემდეგ თქვენი თაყვანისმცემელი გოგონების რიცხვი გაიზარდა. როგორ გამოხატავენ თქვენდამი სიმპათიას?
– ვერ უარვყოფ, რომ თაყვანისმცემელი გოგონების რიცხვმა იმატა. სიმპათიას კი სხვადასხვანაირად გამოხატავენ, "ფეისბუქზეც" მწერენ და ქუჩაშიც მცნობენ, მიღიმიან და თვალს მაყოლებენ. მეც ანალოგიურად ვიქცევი, ვუღიმი, თვალს ვუკრავ და ვეპრანჭები. მათი ასეთი ყურადღება ძალიან მომწონს. გოგონები ძირითადად გაცნობის მიზნით მწერენ, ზოგიერთს შევხვედრივარ კიდეც.
– მერე თქვენი მოხიბვლა ვერავინ შეძლო?
– ამ ეტაპზე არასერიოზული ურთიერთობებით შემოვიფარგლები. ყველა გოგო მომწონს, ვისაც ვხვდები. თუმცა ისეთი შემთხვევებიც ყოფილა, გოგო ფოტოებზე ძალიან მომწონებია, შეხვედრის შემდეგ კი მასზე აბსოლუტურად სხვანაირი წარმოდგენა შემქმნია.
– გოგონები როდის გიცრუებენ იმედებს?
– პირველ რიგში, ხელოვნურობა არ მომწონს. ადამიანი სინამდვილეში როგორიც არის, ისეთი უნდა დარჩეს. გოგო რაღაცის წარმოჩენას რომ ცდილობს და რეალურად ისეთი არ არის, ჩემთვის უინტერესო ხდება. ურთიერთობაში აქტიური გოგონები არასოდეს მხიბლავდა და ახლაც ასეა.
– ფიქრობთ, რომ ურთიერთობებში კაცია წამყვანი ფიგურა?
– კი, ურთიერთობაში მამაკაცს რაღაც ხომ უნდა დაუტოვო? ალბათ ყველა ბიჭს შეხვედრია აქტიური გოგო და არც მე ვარ გამონაკლისი, მაგრამ, როგორც კი ქალს ასეთ რაღაცას ვამჩნევ, მის მიმართ ინტერესს მაშინვე ვკარგავ. არ მომწონს, როცა გოგო ყველაფრის მიმართ ინიციატივას იჩენს. ვფიქრობ, რომ მე უნდა ვიყო ის ადამიანი, რომელიც ურთიერთობას წარუძღვება. მერე უკვე, როცა ურთიერთობა შედგება, ამას აღარ აქვს მნიშვნელობა. კიდევ რაც არ მიყვარს, ეს ტყუილია.
– მშვენიერი სქესის ტყუილის მსხვერპლი გამხდარხართ?
– როგორ არა! ახლა კი სულ ფრთხილად ვარ. გოგო შეიძლება სიმართლესაც მეუბნებოდეს, მაგრამ სულ მგონია, რომ მატყუებს. მათ უკვე რთულად ვენდობი და ახლა, როცა ურთიერთობას ვიწყებ, უფრო დაკვირვებული ვარ.
– როგორი ხართ, როცა გიყვართ?
– აუტანელი ვხდები! იცით, როგორი აუტანელი ვარ? ხანდახან მსიამოვნებს, რომ მას რაღაცაზე ვეჩხუბები. როცა მიყვარს, ხანდახან ვიღაცაზე უაზროდ ვეჭვიანობ. საყვარელი ქალისთვის ათას სიგიჟეს ჩავდივარ!
– მაგალითად, რა შეიძლება ჩაიდინოთ მისთვის?
– ბანალური რაღაცეებით დაწყებული ორიგინალურით დამთავრებული, შემიძლია ყველაფერი ჩავიდინო. მაგალითად, ფიალით ხელში მის სახლთან ვიმღერო, მის აივანზე პარაშუტით დავეშვა. ერთხელ ჩემი მეორე შეყვარებული თურქეთში დასასვენებლად იყო წასული. ღამით ვისაუბრეთ, დილით კი თავზე დავადექი. ამის შესახებ არაფერი იცოდა. მის სასტუმროს ძლივს მივაგენი და რომ დამინახა, თვალებს არ უჯერებდა, იქაური მცხოვრები ვეგონე, რომელიც თურმე მე მგავდა. როცა შეყვარებული ვარ, საჩუქრების კეთებაც მიყვარს, მაგრამ უფრო სადღესასწაულო დღეებში.
– ისეთ ასაკში ხართ, ალბათ მშობლები დაოჯახებასაც გთხოვენ. ცოლის მოყვანაზე არ ფიქრობთ?
– ამ თემით შეწუხებული არ ვარ, თუმცა დედას განსაკუთრებულად უნდა, რომ ცოლი მოვიყვანო. 23 წელი ის ასაკია, როცა ცხოვრებაში კიდევ ბევრი რამის გაკეთება გინდა. მეორე ნახევარი რომ გყავს, რაღაც–რაღაცეებს ერიდები და ვერ რისკავ. ჯერჯერობით ცოლის მოყვანას არ ვაპირებ, მაგრამ, თუ დიდი სიყვარული მეწვია და ძლიერ გრძნობებში გადავვარდი, ალბათ ამ ნაბიჯსაც გადავდგამ.
– თავისუფალ ურთიერთობებზე რა აზრის ხართ?
– ჩემს შეყვარებულთან ქორწინებამდე სექსი აუცილებლად უნდა მქონდეს. ქალის პატიოსნებას მისი ქალწულობით არ განვსაზღვრავ. თუ შემიყვარდა, უცხოელსაც მოვიყვან ცოლად და არაქალიშვილსაც. ჩემთვის ეს პრობლემას ნამდვილად არ წარმოადგენს. ქართველი გოგოები ურთიერთობაში კომპლექსიანები არიან, ბევრი რაღაცის გაკეთება უნდათ და მხოლოდ იმის გამო არ აკეთებენ, რომ ამას ქართული ტრადიცია კრძალავს.
– საქმიანი, რეალიზებული ქალები რამდენად მისაღებია თქვენთვის, თუ გირჩევნიათ, მხოლოდ ოჯახის მოვლაზე იყოს გადართული?
– არ მომეწონება, მხოლოდ საქმეზე გადაერთოს და ოჯახი მეორე პლანზე გადასწიოს. თუმცა, თუ მეყვარება, ალბათ საქმიან ქალსაც შევეგუები.
– რა პროფესიის ქალს ვერ შეეგუებოდით ოჯახში ან პირიქით?
– პოლიციელს ვერ ავიტანდი. არ მომეწონება, ჩემი მეუღლე დამნაშავეებს დასდევდეს და ისროდეს. მამაკაცური ქალები არ მომწონს, ისე, ნაზი პოლიციელებიც ხომ არსებობენ? მაგრამ არა, მაინც ვერ შევეგუებოდი. ქალი პოლიციის ფორმაში ძალიან სექსუალური და მიმზიდველია, მაგრამ ჩემ გვერდით ასეთს ვერ ავიტანდი. წარმოიდგინეთ, მე სახლში ვიყო წამოწოლილი და ჩემი ცოლი იარაღით ვიღაცეებს დასდევდეს... ასეთი არ მინდა. სამაგიეროდ, კარგი იქნება, თუ იუმორისტი ცოლი მეყოლება, ერთმანეთს უფრო გავუგებთ.
– როგორ ჩაცმულ ქალებს აყოლებთ თვალს?
– მომწონს, კლასიკურად რომ იცვამენ, მაგრამ არა – ყოველდღიურად. ისეთი ტანსაცმელი მომწონს, რომელიც ქალის ფორმებს კარგად გამოკვეთს. ჩემი აზრით, კლასიკური სტილი მათ უფრო დახვეწილს ხდის.
სოფიო ბოჭორიძე, ჟურნალი სარკე