სკანდალური მასალის სკანდალური გამოხმაურება - რა უპასუხა ზვიად გოგიაშვილმა გიული ჯაგაევას

ამ კვირის ჟურნალ ''რეიტინგში'' მასალა გამოქვეყნდა, სათაურით ''ყოფილი ნაციონალი მაღალჩინოსნის მეუღლე დახმარებას ითხოვს'' . ჩვენი რესპონდენტი ქალბატონი გიული ჯაგაევა გახლდათ, რომელიც თავად გვესტუმრა რედაქციაში და ყოფილ მეუღლეზე პრესის ფურცლებზე საუბარი გაბედა. ის ამბობდა, რომ ყველაფრის დაკარგვის საშიშროების წინაშე იდგა, რადგან მისი ათწლიანი ოჯახური ცხოვრება განქორწინებით დასრულდა.

გიული ჯაგაევასა და ზვიად გოგიაშვილის საქმე დღეს სასამართლოშია. როგორც ჩვენი რესპონდენტი ამბობს, მისი ყოფილი მეუღლე ყველა ხერხსა და ღონეს იყენებს იმისთვის, რომ ბინის გარეშე დატოვოს და შვილები წაართვას.

ზვიად გოგიაშვილი ''ნაციონალური მოძრაობის'' ხელისუფლების ერთ-ერთი წარმომადგენელი გახლდათ, შინაგან საქმეთა სამინისტროს თანამშრომელი, მაღალჩინოსანი, კერძოდ კი, გია ბარამიძის შს მინისტრობისას კადრების სამმართველოს უფროსის პირველ მოადგილედ მუშაობდა.

როგორც გიული ჯაგაევა ამბობდა, მას დღესაც შენარჩუნებული აქვს კავშირები შს სამინისტროში და ყოფილ ცოლს ემუქრება, ტერორისა და ფსიქოლოგიური ზეწოლის ქვეშ ამყოფებს, თუმცა თანაცხოვრების პერიოდში ძალიან ხშირად ხელითაც შეხებია...

სტატიის გამოქვეყნებისა და საიტზე განთავსების შემდეგ, ჩემს პირად ''ფეისბუქზე'' ბატონმა ზვიად გოგიაშვილმა მომწერა, რადგან მასალის დასასრულს ვწერდით: ''ჩვენთვის უცნობია თავად ზვიად გოგიაშვილის პოზიცია ზემოთ თქმულთან დაკავშირებით. თუკი ის მოისურვებს გამოხმაურებას, მზად ვართ, მისი მოსაზრებაც გავაცნოთ მკითხველს აღნიშნულ საქმესთან დაკავშირებით'' ...

ეს კი ბატონი ზვიადის მოკლე წერილი გახლავთ, რომელსაც უცვლელად გთავაზობთ:

''სასაცილო იქნებოდა, სატირალი რომ არ იყოს ამ ადამიანის მდგომარეობა... მე ამ სტატიაზე კომენტარს არ გავაკეთებ - კომენტარები იმათთვის მიმინდია, ვისაც ამის სურვილი ექნება. ვინც ყურადღებით წაიკითხავს სტატიას, კარგად მიხვდება რასთან და ვისთან აქვს საქმე...
P.შ. როცა ჟურნალის ეს ნომერი და სტატია იბეჭდებოდა (სავარაუდოდ გუშინ ღამით), მე და ჩემი ბარტყები მშვენივრად ვერთობოდით ევროპის პარკში! სტატიის ავტორ სალომე დადიანს ჩემი რეაქცია აინტერესებს სტატიასთან დაკავშირებით. მინდა მას და ქალბატონ გიულის ვაცნობო - ჩემი რეაქციაა ჩომპლეტე Iგნორე!

P.P.შ. სტატიაში ოთარ ჭილაძის გამონათქვამებზეა საუბარი, რომელიც მე ჩემს გვერდზე გავაზიარე და რომელთაგან ერთ-ერთი სტატუსს კომენტარად წარვუმძღვარე... წაიკითხეთ, რა წერია ამ სტატიაში ამ გამონათქვამზე და რა ეწერა ჩემს გვერდზე სინამდვილეში და თავად მიხვდებით სად არის სიმართლე და სად სიცრუე...''