ლაშა ღლონტი: "ამერიკაში კონცერტის დროს არ მინერვიულია იმდენი, რამდენიც ბათუმში ვინერვიულე"

კვარტეტ "ალილოს" ხელმძღვანელი, ლაშა ღლონტი, სიმღერით მთელ მსოფლიოს უვლის და ქართველი ემიგრანტებისგან ყველგან დიდი სიყვარულს იღებს, მაგრამ ყველაზე თბილი ქალაქი მისთვის ბათუმია, სადაც დაიბადა და გაიზარდა. რამდენიმე კვირის წინ მომღერალმა საყვარელ ქალაქს სოლო კონცერტი მიუძღვნა. ორსაათიან პროგრამაში კვარტეტი "ალილო" და ლაშას ქალიშვილი ანა ღლონტიც მონაწილეობდნენ. კონცერტმა ანშლაგით და ზღვა ემოციით ჩაიარა. ამ ემოციებს ლაშა ღლონტი ახლა "სარკეს" უზიარებს.
– ბატონო ლაშა, საკონცერტო ნერვიულობამ უკვე ჩაიარა. ახლა მშვიდად შეგიძლიათ გაიხსენოთ, როგორ შეხვდით თქვენ და ბათუმი ერთმანეთს.
– ჩემი სოლო კონცერტი ბათუმის ოპერის თეატრში 16 აგვისტოს გაიმართა, რომელშიც მონაწილეობა მიიღო კვარტეტმა "ალილომ" და ჩემმა ქალიშვილმა ანამ. საღამომ სრული ანშლაგით ჩაიარა. უამრავი ტურისტი იყო, მათ შორის გამოვყოფ გერმანელებს, რომლებსაც ჩვენი ენა არ ესმოდათ, მაგრამ ქართული სიმღერა ძალიან კარგად შეიგრძნეს. კონცერტის დამთავრების შემდეგ კულისებში შემოვიდნენ და თავიანთი ემოციები გამიზიარეს. ჩემი უკრაინელი მეგობრები სპეციალურად ამ კონცერტისთვის ჩამოვიდნენ ბათუმში.
– რა რეპერტუარით წარდექით მსმენელის წინაშე?
– კონცერტი, სახელით "ლაშა ღლონტი და მეგობრები", ერთი წლის წინ ფილარმონიის დიდ საკონცერტო დარბაზში გაიმართა, სადაც მონაწილეობდნენ ესტრადის მომღერლები, ჩემი მეგობრები. ამჯერად, სამწუხაროდ, მათ ვერ შეძლეს ბათუმში კონცერტზე ჩემ გვერდით ყოფნა, რადგან სხვადასხვა ტურნეებით იყვნენ დაკავებული. ბათუმის კონცერტისთვის ერთი თვით ადრე დავიწყეთ მზადება. ძველი და ახალი სიმღერები შესრულდა, ფაქტობრივად იმპროვიზირებული საღამო იყო.
მინდა, მადლობა ვუთხრა ადგილობრივ მსმენელს, თბილისელ დამსვენებელს. ისინი დარბაზში ბევრნი იყვნენ. ამ კონცერტს მედიის მხრიდან დიდი გამოხმაურება მოჰყვა, ყველა ტელეარხმა გააკეთა სიუჟეტი. მსმენელი ამბობდა, დიდი ხანია ბათუმში ასეთი კარგი საღამო არ ჩატარებულაო. ჩემი მხრიდან უხერხულია ამაზე საუბარი, მაგრამ მაყურებელი ვერ მალავდა ემოციას. კონცერტის შემდეგ ბანკეტი გვქონდა. შემდეგ ქობულეთშიც გავმართეთ კლუბური საღამო.
– თბილად შეგხვედრიათ მშობლიური ქალაქი.
– ბათუმი ჩემი ქალაქია, იქ დავიბადე და გავიზარდე, სკოლაც ბათუმში დავამთავრე. მოვიდნენ ჩემი ბავშვობის მეგობრები, სკოლის ამხანაგები, მასწავლებლები, სიმღერის პედაგოგები, ამიტომ ეს კონცერტი ჩემთვის ორმაგად საპასუხისმგებლო იყო. რამდენიმე თვის წინ მე და ნატო გელაშვილს ამერიკის შეერთებულ შტატებში გვქონდა სოლო კონცერტი და იქ არ მინერვიულია იმდენი, რამდენიც 16 აგვისტოს ბათუმში. მაყურებელი ზღვა ემოციას მაძლევდა დარბაზიდან.
– შარშან ფილარმონიაში გამართულ სოლო კონცერტზეც იმღერა თქვენმა ქალიშვილმა. ერთი წლის შემდეგ რა ცვლილებას ამჩნევთ მასში, იგრძნობა ზრდა?
– ჩემი ქალიშვილი თეატრალურ უნივერსიტეტში კინომცოდნეობაზე სწავლობს, დატვირთული გრაფიკი აქვს, მაგრამ სიმღერასაც ასწრებს. მიხარია, რომ ამ მხრივ მასში დიდი წინსვლა შეინიშნება. იყო პერიოდი, როცა ანა ნაკლებად იყო სიმღერით დაკავებული, მაგრამ ახლა ისევ მოიწადინა. ვნახოთ, რა გამოვა. არ მინდა, ჩემი გავლენის ქვეშ მოექცეს და ხალხმა მისი ნამღერი მარტო იმიტომ დააფასოს, რომ ჩემი შვილია.
– რა განცდაა ქალიშვილთან ერთად სცენაზე დგომა?
– როცა ანამ 9 წლის ასაკში გურამ თამაზაშვილთან და კვარტეტ "ალილოსთან" ერთად პირველად იმღერა, საოცარი ემოცია მქონდა. მიხაროდა, რომ ჩემი შვილი მღეროდა. ახლა, როცა ერთად ვმღერით, ემოციები ნაკლებად მაქვს, მასთან ერთად სიმღერას ალბათ შევეჩვიე და იმიტომ. სცენაზე ჩემი პარტნიორია. რაც მთავარია, მის მუსიკალურ გემოვნებას ვენდობი, ჩემს ახალ სიმღერებს ვასმენინებ და მის შენიშვნებსაც ვიღებ.
– შვილისადმი სად უფრო მომთხოვნი ხართ, სახლში თუ სცენაზე?
– მუსიკას და სიმღერას რაც შეეხება, ჩემზე უფრო მკაცრი, მგონი, არავინ არის და ეს შეგიძლიათ სხვა მომღერლებსაც ჰკითხოთ. სახლში კი ზედმეტად დემოკრატი ვარ.
– ბათუმში თქვენი და ანას ყველაზე დიდი ქომაგი ალბათ თქვენი მეუღლე იყო.
– რასაკვირველია. თეა აჭარაშიც ჩემ გვერდით იყო და საერთოდ ჩემი ყველა კონცერტი მისი დახმარებით ტარდება. გულიანად მეხმარება, ჩემთვის მასზე სანდო ადამიანი მეორე არ არსებობს.
– თქვენი ცოლი პროდიუსერობასაც ხომ არ ითავსებს?
– ჩემი ძირითადი შემოსავლის წყარო სიმღერა არ არის, ბიზნესით ვარ დაკავებული. იმ შემთხვევაში კი, როცა ბევრი შემოთავაზება და რამდენიმე კონცერტი ერთდროულად მაქვს, შეიძლება ითქვას, თეა ჩემი მენეჯერიც არის.
– ამ ზაფხულს სადმე დასასვენებლად იყავით?
– არა. სულ რამდენიმე დღე გავჩერდით ბათუმში, სანაპიროზე გასარუჯადაც არც გავსულვარ. მაისში ოჯახთან ერთად თურქეთში დავისვენე. ჩვენ მარტო არასდროს მივდივართ დასასვენებლად. თეა და ანა პრეტენზიულები არ არიან, მათთან ერთად დასვენება დიდი კომფორტია. დიდ სამეგობროსთან ერთად დასვენებაც ძალიან კარგია. თქვენც გირჩევთ ბევრ მეგობართან ერთად დასასვენებლად წასვლას. ყველა ერთად კარგად ვისვენებთ, ყოველგვარი შეზღუდვების გარეშე.
– როგორი იყო ბათუმი თქვენს ბავშვობაში და როგორია ახლა?
– იცით, მთავარი რა არის? ბათუმში ხალხი არ შეცვლილა, როგორი კარგი ადამიანებიც ჩემს ბავშვობაში ცხოვრობდნენ, ისეთივე თბილი და მოსიყვარულე მოსახლეობაა ახლაც. ბათუმს პროვინციად არასდროს აღვიქვამდი და არა იმიტომ, რომ ბათუმელი ვარ. ცივილიზაცია იქიდან შემოდის, ამ ქალაქს ევროპული მენტალიტეტი აქვს, კარგი ინტელიგენცია ჰყავს. ბავშვობაში სასტუმრო "ინტურისტთან" ვცხოვრობდი, სადაც ყველა ჩამოდიოდა და ისვენებდა. აი, ამ გარემოში ვიზრდებოდი. ჩემი ქალაქი ძალიან არის გალამაზებული, წელს დამსვენებელიც ბევრი იყო. ჩემდა გასახარად, დასასვენებლად მსოფლიოს სხვადასხვა ქვეყნიდან იყვნენ ტურისტები. ბათუმი საერთაშორისო დანიშნულების ქალაქად იქცა. ჩემი იქ ყოფნის დროს საბაგირო გზა გაიხსნა, მაგრამ გასეირნება ვერ გავრისკე, ძალიან მეშინია.
– ბათუმში ახლაც გაქვთ სახლი?
– დიახ, ძველი კიროვის ქუჩაზე, სადაც ჩემი მშობლები ცხოვრობენ. მინდოდა, მათთან დიდხანს დავრჩენილიყავი, მაგრამ, სამწუხაროდ, ვერ შევძელი.
– მსმენელი რა სიახლეს უნდა ელოდოს თქვენგან?
– ერთი ახალი სიმღერა ჩავწერე, რომლის პრემიერაც სექტემბერში მაქვს დაგეგმილი. ოქტომბერში კი კვარტეტი "ალილო" ამერიკის შეერთებულ შტატებში მიემგზავრება და კანადასაც ვეწვევით. რამდენიმე თვის წინ მე და მურმან ჯინორია ვიმყოფებოდით ამერიკაში, შემდეგ ნატო გელაშვილთან ერთად გახლდით და ახლა "ალილოსთან" ერთად გავმართავთ თბილ და ქართულ საღამოებს. ნიუ იორკში და მის შემოგარენში დაახლოებით 200 000 ქართველი ემიგრანტი ცხოვრობს. მინდა, "სარკის" საშუალებით ისინი მოვიკითხო. მათ უყვართ და ენატრებათ ქართული სიმღერა. გაოცებული დავრჩი – ჩემს სიმღერას "მონატრებიხარ ფიქრებს" მთელი დარბაზი მღეროდა, ფაქტობრივად მე არ მიმღერია. საბავშვო სტუდია მაქვს, პატარებს ვამზადებთდა ამ საქმეს სექტემბრიდან განვაახლებ. ახლო მომავალში კი ყალიბდება ახალი ბრენდი, რომელიც დაკავშირებული იქნება კვარტეტ "ალილოსთან". ამ ეტაპზე მეტის თქმის უფლება არ მაქვს.