როგორ შეურიგდა ლევან ყოჩიაშვილი სახლიდან წასულ ცოლს

მსახიობ ლევან ყოჩიაშვილის ცხოვრებასა და საქმეში საოცარი დამთხვევები მოხდა. სერიალსა და რეალობაში მოვლენები ისე განვითარდა, სინამდვილესა და მოგონილ სიუჟეტს შორის ზღვარის გავლება თავადაც უჭირდა. ჯერ რეალურ ცხოვრებაში დაშორდა ცოლს, შემდეგ – სერიალში. მას მერე, რაც სცენარისტებმა ეკრანულ ცოლს, ნინას შეარიგეს, თავის ჭეშმარიტ მეუღლესთან, მარინა ყაჭაშვილთანაც მოაგვარა ურთიერთობა და ცოლ–ქმარმა ძველებურად ერთად გააგრძელეს ცხოვრება.
სხვათა შორის, მარინაც დიასახლისია ნინასავით. აქამდე მთელ დროს ორი შვილის გაზრდას უთმობდა, ახლა კი სურს, მუშაობა დაიწყოს და საქმეში რეალიზებული ქალი გახდეს. პროფესიით უცხო ენების სპეციალისტია.
ოჯახს ბზარი ცოტა ხნის წინ გაუჩნდა. მარინა კახეთში, მშობლებთან წავიდა და შვილებიც წაიყვანა. როცა ეს ამბავი გავრცელდა, ყველა ამბობდა, მათ შორის მესამე ჩადგაო. ლევან ყოჩიაშვილმა მაშინ ეს ინფორმაცია უარყო. უსიამოვნება სულ სხვა რამის გამო მოგვივიდაო, გვითხრა.
"კინოში თუ გერევა ცხოვრება, რეალურ ცხოვრებაშიც გერევა ყველაფერი. ეს პროფესია ემოციებზე, გრძნობებზეა დამყარებული. შეიძლება ჯერ ცხოვრებაში დაგემართოს რაღაც და მერე ის ფილმში გამოიყენო. ემოციურად იხსენებ, როგორ იყავი იმ დროს. აჰყვება ხოლმე ერთმანეთს ცხოვრებისეული პერსონაჟის დეტალები... სერიალში ნინასთან დაშორებამდე მოხდა ჩვენი ამბავი", – გვითხრა ლევან ყოჩიაშვილმა მაშინ, როცა ცოლთან დროებით იყო განშორებული.
ახლა კი, როცა ოჯახური იდილია დაიბრუნეს, მარინა ყაჭაშვილი "სარკეს" უამბობს, როგორ დაძლიეს მან და ლევანმა რთული პერიოდი.
– მარინა, სერიალ "ჩემი ცოლის დაქალების" დასაწყისში, სანამ ლევანი ძალიან პოპულარული გახდებოდა, ერთმანეთზე უზომოდ შეყვარებულები ჩანდით. რატომ აირია ურთიერთობა?
– არაფერი არეულა. უბრალოდ ვიჩხუბეთ და დროებით ცალ–ცალკე ვიყავით. ახლა კი ისევ ერთად ვართ. ჩხუბიც არ ერქვა, ჩვეულებრივი უთანხმოება იყო ცოლ–ქმარს შორის.
– ეტყობა, მაინც უფრო მეტი იყო, ვიდრე ჩვეულებრივი უთანხმოება, თორემ სახლიდან არ წახვიდოდით.
– ჩვენ გადავწყვიტეთ, სანამ ერთმანეთი ძალიან არ მოგვენატრებოდა, ცალ–ცალკე ვყოფილიყავით. მე–16 წელი დაიწყო, რაც ერთად ვართ. სხვა დროსაც გვქონია უთანხმოება, მაგრამ ალბათ გავიზარდეთ და ასე იმიტომ მოვიქეცით.
– ლევანი პოპულარობამ შეცვალა?
– არა, არ შეცვლილა და ჩვენი უსიამოვნება სულაც არ იყო დაკავშირებული მის პოპულარობასთან. თავისი საქმის პროფესიონალია, კარგი ადამიანია და ისე არ მომხდარა, რომ პოპულარობა თავში ავარდნოდა. ქუჩაში ვერ გაივლი ლევანთან ერთად, ისეთი ამბავი ხდება მის გარშემო, მაგრამ ცხოვრებაში არაფერი შეცვლილა. ეს იყო ჩვეულებრივი ოჯახური უსიამოვნება. არანაირი მესამე პირი ჩვენს ურთიერთობაში არ ყოფილა. ასეთი კითხვაც კი არ დასმულა. უაღრესად ერთგული, პატიოსანი ადამიანია, საუკეთესო მამაა. როგორი მსახიობია, თქვენც ხედავთ.
– ისე აქებთ, ამით აღიარებთ, რომ ეს უსიამოვნება თქვენი ბრალი იყო. როგორი იყო ის პერიოდი თქვენთვის, რომელიც ლევანის გარეშე გაატარეთ?
– როცა საყვარელ ადამიანთან ერთად არ ხარ, რა თქმა უნდა, რთულია.
– შესარიგებლად პირველი ნაბიჯი რომელმა გადადგით?
– ჩვეულებრივად, ბუნებრივად შევრიგდით. არც ჩხუბითა და აყალმაყალით დავშორებულვართ და არც შერიგება ყოფილა განსაკუთრებული.
– სერიალში მისმა გმირმა ცოლს შესარიგებლად უზარმაზარი სიურპრიზი მოუწყო.
– მსგავსი არაფერი ყოფილა. დაიწერა კიდეც, სერიალის მსგავსად მოხდა ლევანის პირად ცხოვრებაშიო. ჩვენს ურთიერთობას იმ პრობლემასთან საერთო არაფერი აქვს, რაც ფილმში იყო და მთელი საქართველო გააგიჟა.
– ზაფხული როგორ გაატარეთ?
– ზაფხულში ერთად ვიყავით მთელი ოჯახი დედოფლისწყაროში. იქ ლევანის მამამ სახლი აგვიშენა და გაგვირემონტა. ჩვენ კი ავეჯით მოვაწყვეთ. მთელი ზაფხული მე და ლევანი ამ სახლის მოწყობით ვიყავით დაკავებული. ლევანს ყველაფერი ეხერხება. რაც შეძლო, ყველაფერი თავად გააკეთა. სახლში რაც უნდა გაფუჭდეს, ხელოსნის მოყვანა არ გვჭირდება. ონკანიდან დაწყებული, ყველაფრის შეკეთება შეუძლია. ერთად ვწყვეტდით, რა გვეყიდა და სად რა დაგვედგა. ლევანი საოცრად მოწესრიგებულია. თუ სახლში ყველაფერი თავის ადგილზეა, მშვიდად არის და პრობლემა არ აქვს.
მეც და ლევანიც დედოფლისწყაროდან ვართ. იქ ბევრი მეგობარი გვყავს და მათთან ერთად ვატარებდით დროს. თან დავისვენეთ, თან სახლის მოწყობაც დავამთავრეთ, რომელიც ძალიან ლამაზია. ასე რომ, კარგი და შედეგიანი ზაფხული იყო.
ლევანს ქეიფი უყვარს. კახეთში როგორი ქეიფიც იციან, მოგეხსენებათ. ისეთი შეგრძნება მაქვს, თითქოს ჩვენს ცხოვრებაში არანაირი უსიამოვნება არ ყოფილა. ზაფხულის შემდეგ ჩამოვედით თბილისში და ჩვეულებრივად გრძელდება ცხოვრება.
ჩვენი ჩხუბის შემდეგ დედოფლისწყაროში წავედი და ბავშვებიც წავიყვანე, რამდენიმე თვე იქ დადიოდნენ სკოლაში. გოგონა, კესო, დედოფლისწყაროში დავტოვეთ. კარგი სკოლა გვაქვს და გადავწყვიტეთ, იქ ისწავლოს. პატარა კი წამოვიყვანეთ. კესოს დედოფლისწყაროში ყოფნა უნდა. იქ კარგი მეგობრები ჰყავს.
– მამა როგორ ეგუება ქალიშვილის ცხოვრებას სხვაგან?
– ლევანი 19 წლის იყო, კესო რომ გვეყოლა. მამას არ ეძახის. კესოსთვის ლევანი ლევანია. თბილი, მეგობრული ურთიერთობა აქვთ. გარეგნულადაც ძალიან ჰგვანან ერთმანეთს. დედოფლისწყაროში ყოველ კვირას ჩავდივართ. გაგებით შევხვდით კესოს ამ სურვილს.
– "ჩემი ცოლის დაქალების" გადაღება დაიწყო. ლევანი ძალიან დაკავებულია?
– დილიდან საღამომდე გასულია.
– რაც ალბათ თქვენს ნერვებზე მოქმედებს.
– არანაირად. პირიქით, რაც მეტი გადაღება აქვს, უფრო კმაყოფილი ვარ.
– როცა ლევანის გმირი ცოლს ღალატობდა, რა რეაქცია გქონდათ?
– როცა ფილმს ვუყურებ, ლევანს ჩემს ქმრად კი არა, მსახიობად აღვიქვამ, რომელიც ძალიან კარგად თამაშობს თავის როლს. სხვა ქალებივით მეც ვბრაზობდი, მისი გმირი მეუღლეს რომ ღალატობდა. რადგან ასე გააბრაზა ამ ამბავმა მთელი საქართველო, ვთვლი, რომ ძალიან კარგად ითამაშა. მთელი ოჯახი დიდი ინტერესით ველოდებით, რა მოხდება ახალ სეზონში.
– დათოს საყვარლის, ნათიასნაირ ქალებზე რას ფიქრობთ?
– ასეთ ქალებს ვერასოდეს გავუგებ. რატომ უნდა დაანგრიონ სხვისი ოჯახი, ვერ ვხვდები! იქ ბავშვებია, ამდენი ხნის ოჯახია. თუმცა ცხოვრებაში იმდენი რამ ხდება, ვერ ვიტყვი, ნათია ცუდია–მეთქი. არის მიზეზები, რაც განაპირობებს, რომ კაცმა ასეთი ნაბიჯი გადადგას. ვერავის განსჯი. თუ მარტო ქალს უნდა და კაცს – არა, მაშინ ურთიერთობა არც შედგება. მაინც უფრო კაცზეა ბევრი რამ დამოკიდებული. ქალი თავისი ბუნებით მაცდურია და კაცმა ამას უნდა გაუძლოს.
ისე, სხვის მაგივრად ლაპარაკი ყოველთვის ადვილია. არ უნდა იფიქრო, რომ იმ სხვას რაც დაემართა, შენ არ დაგემართება. ხომ შეიძლებოდა, დათოს ნათია აერჩია, მაგრამ ნინა ამჯობინა.
– როცა ქმარი სხვა ქალისკენ იწყებს ყურებას, ამაში ცოლის ბრალიცაა?
– შეიძლება რაღაც აკლია კაცს ოჯახში და ამ რაღაცას სხვაგან ეძებს. ამიტომ ყველა ცოლმა მეტი ყურადღება, მეტი სითბო უნდა გამოაჩინოს, რომ კაცმა იგივე სხვაგან არ ეძებოს. ჩვენმა ოჯახმა უკვე ბევრ წელს გაუძლო ისე, რომ მსგავსი პრობლემა არ გვქონია. ვფიქრობ, მეც და ლევანიც ვახერხებთ ერთმანეთისთვის სითბოსა და სიყვარულის განაწილებას. იმდენად პატარები ვიყავით და ისეთი სიყვარულით დავქორწინდით, ვერც წარმომიდგენია, ვინმემ ჩვენს ურთიერთობას ხელი შეუშალოს. რაც თავი მახსოვს, ლევანთან ერთად ვარ.
– ინტერვიუში გვითხრა ცოტა ხნის წინ, შეიძლება აღარც კი შევრიგდეთო.
– გაბრაზებული იყო და ალბათ იმიტომ თქვა, თორემ საკითხი ასე არც დამდგარა. ჩვენი გოგონა განიცდიდა, რაც ჩვენზე პრესაში იწერებოდა. ორივეს გვეწყინა. ისე არ ყოფილა, რომ მარტო ერთი გავბრაზებულიყავით.
მოდით, ყველაფერი ისე განვიხილოთ, როგორც ახლა არის. ერთად კარგად ვართ და გვიხარია ცხოვრება. სამწუხაროდ, ძალიან ცოტა დრო აქვს ჩვენთვის. როცა თავისუფალია, ისვენებს, ტელევიზორს უყურებს. ვცდილობ, ყოველთვის მოწესრიგებული დავხვდე და ყველაფერი ისე გაკეთებული დავახვედრო, როგორც მას გაუხარდება. ბევრისგან გამიგია, როცა პოპულარულები ხდებიან, თავში უვარდებათო. ლევანი კი ისევ ისეთი უბრალო ადამიანია, როგორიც აქამდე იყო. პოპულარობა და ყურადღება სიამოვნებს, მაგრამ მაინც ისევ ისეთია. მის გვერდით შეუმჩნევლად ვერ გაივლი. ავტოგრაფებს, სურათების გადაღებას სთხოვენ და ისიც ყველასთან უბრალოა. ჩვენზე ბევრს ჭორაობენ და ათას რამეს ამბობენ. მთავარია, რომ ახლა ერთად და კარგად ვართ და სულ არ მაინტერესებს, ვინ რას იტყვის.
– ოჯახურმა პრობლემებმა შეიძლება სიყვარული მოკლას?
– არა. თუ გიყვარს, გიყვარს. უბრალოდ მერე გარკვეული პრობლემები იჩენს თავს. ჩვენ გავიზარდეთ ამ სიყვარულთან ერთად და კი არ ნელდება, უფრო ძლიერდება. უერთმანეთოდ ნამდვილად ვერ გავძლებდით. ვერც წარმომიდგენია ლევანის გარეშე ცხოვრება. ჩვენ იმან გაგვაბრაზა, რაც შეიძლება სხვა ოჯახებში ყოველდღეც ხდება. უბრალოდ სხვას სხვა რეაქცია აქვს და ჩვენ სხვანაირი გვქონდა.
– რომელი უფრო ფიცხი ხართ?
– მე არ ვარ ფიცხი. ლევანმა უფრო იცის უცებ გაბრაზება. უკვე ვიცით, ლევანს რა უყვარს, რა აღიზიანებს და ყველა ვცდილობთ, ისე მოვიქცეთ, რომ არ გავაბრაზოთ. მისი სიფიცხე ყვირილით კი არ გამოიხატება, ეწყინება ხოლმე და იბუტება. რომ გაიბუტება, შემორიგება სჭირდება და ამის ხერხები ვიცი. ყურადღება არ აკლია, მაგრამ, როცა გაბუტულია, მაშინ მთელი დრო მას უნდა დაუთმო. მგონი, ყველა მამაკაცი ასეა, დიდ ყურადღებას ითხოვენ ქალისგან.
– რა უყვარს განსაკუთრებით?
– შემწვარ ქათამზე გიჟდება, ისე უყვარს. როგორი გაბუტულიც უნდა იყოს, შეგირიგდება. ასევე უყვარს კარგი ღვინო და სალათები.
– თავად რითი განებივრებთ?
– თვითონაც უყვარს საჩუქრების კეთება. არასოდეს დაავიწყდება რომელიმე მნიშვნელოვანი თარიღი. ჩემთვის, ბავშვებისთვის, ახლობლებისთვის მუდამ ყიდულობს საჩუქრებს. ბედნიერია, როცა იმას იყიდის ჩემთვის, რაც მინდა. ასევეა დედამისთანაც.
სიყვარული რომ გამოხატო, აუცილებელი არ არის, რაიმე საჩუქარი მიართვა. შეიძლება ერთმა სიტყვამ, მოქმედებამ უფრო დიდი სითბო დაგანახოს და უკეთეს ხასიათზე დაგაყენოს, ვიდრე სასწაულმა საჩუქარმა.
ლევანს მაღაზიებში სიარული არ უყვარს, ვერაფრით წაიყვან. ყველაფერს მე ვყიდულობ მისთვის. ჭკუიდან გადაჰყავს არჩევის, ჩაცმა–გახდის პროცესს. ურჩევნია, სხვამ უყიდოს და როცა მოუნდება, მაშინ ჩაიცვას.
– თქვენ მუშაობთ?
– არა. ვმუშაობდი, მაგრამ ვასიკო პატარა იყო და დავანებე თავი. ოჯახს ასე სჭირდებოდა და მეც ვფიქრობდი, რომ ასე მეტად გამოვადგებოდი ჩემს შვილებს. ახლა აღარ არიან ისეთი პატარები და ალბათ დავიწყებ მუშაობას. ქალი რეალიზებული უნდა იყოს, თავდაჯერება ემატება და ბევრი რამ უკეთესად გამოსდის. როცა მუშაობ, საკუთარი თავის იმედიც გაქვს. კაცსაც გააჩნია, როგორ უდგება ცოლის მუშაობის საკითხს. ბევრ კაცს არ სიამოვნებს ეს ამბავი და ურჩევნია, მისმა ცოლმა მუდმივად სამზარეულოში იტრიალოს. ლევანს ეს პრობლემა არ აქვს. როცა ადამიანს პროფესია აქვს, უნდა იმუშაოს.

– ლევანი კბილის ექიმთან ხშირად დადის?
– არც ისე. ლევანს კარგი კბილები აქვს. ასე რომ, ამ მხრივაც თავი ქუდში მაქვს.
– ეჭვიანი არ ხართ?
– არა, საერთოდ არ ვარ ეჭვიანი და ალბათ იმიტომაც, რომ ლევანი ძალიან კარგი ადამიანია და ამის საბაბი არასოდეს მოუცია.

– სერიალში დათოც არ აძლევდა ნინას ეჭვიანობის საბაბს.
– ის დათო გოცირიძეა და ეს ლევან ყოჩიაშვილი! ღმერთმა დამიფაროს, ნინას დღეში აღმოვჩნდე.
რუსუდან ადვაძე, ჟურნალი სარკე