ბერას კონცერტის გამო სასწავლო პროცესი ჩაშალეს

თელავში, ცენტრალურ მოედანზე, დღეს, 20:00 საათზე „ბერას“ კონცერტი გაიმართება. სცენა „ქართუ ბანკის“ წინ, N1 საჯარო სკოლის შესასვლელთან დამონტაჟდა, რის გამოც სკოლაში სასწავლო პროცესი არ მიმდინარეობს. როგორც კახეთის საინფორმაციო ცენტრს მოსწავლეებმა განუცხადეს, სკოლის ადმინისტრაციამ ისინი გააფრთხილა, რომ გაცდენილი გაკვეთილები რომელიმე შაბათს ჩატარდება, დღეს კი კონცერტს დაესწრნენ.
კახეთის საინფორმაციო ცენტრი N1 საჯარო სკოლის დირექტორს მაია ოთარაშვილს ვერ დაუკავშირდა. ის სატელეფონო ზარებს არ პასუხობს.
როგორც თელავის საგანმანათლებლო რესურსცენტრის ხელმძღვანელმა ლია ბაზიერაშვილმა კახეთის საინფორმაციო ცენტრს განუცხადა, სკოლას უფლება აქვს, 1 დღით სასწავლო პროცესი შეწყვიტოს და გაცდენილი საათები შემდეგში აანაზღაუროს.
„ეროვნული სასწავლო გეგმით, სკოლას უფლება აქვს სკოლის საჭიროებიდან გამომდინარე, 1 დღით დაითხოვოს მოსწავლეები. ეს სკოლის გადასაწყვეტია. სწავლა დღეს მხოლოდ 1-ელ სკოლაში გადაიდო იმის გამო, რომ იქ უნდა გაიმართოს ღონისძიება, თქვენც კარგად იცით რა ღონისძიებაც. სწავლა „ბერას“ კონცერტის გამო არ გადადებულა, იმის გამო გადაიდო, რომ იქ ბევრი ხალხი იტრიალებს და არ არის მიზანშეწონილი ბავშვები იქ იყვნენ. სკოლის ადმინისტრაციის გადაწყვეტილება უკანონო არ არის, მათ ამის უფლება ჰქონდათ. გაცდენილი გაკვეთილები რომელიმე შაბათს ჩატარდება.
– კონცერტი 20:00 საათზეა დაგეგმილი, სკოლაში გაკვეთილები 2 საათისთვის მთავრდება, სცენა უკვე დამონტაჟებულია, ხალხი ალბათ საღამოს შეიკრიბება, სწავლის გადადება ზუსტად რამ გამოიწვია?
საგანმანათლებლო რესურსცენტრის უფროსმა კითხვას არ უპასუხა და ტელეფონი გათიშა.
კახეთის საინფორმაციო ცენტრი კოალიცია „ქართული ოცნების“ თელავის ორგანიზაციის ხელმძღვანელს ნანა ხვისტანსაც დაუკავშირდა. მისი თქმით, მას არ აქვს ინფორმაცია, რომ „ბერას“ კონცერტის გამო სკოლაში სწავლა არ მიმდინარეობს. „კონცერტს ჩვენ არ ვუკეთებთ ორგანიზებას. ჩემი ინფორმაციით, ორგანიზატორი შპს „ქართული ოცნებაა“.
„ბერას“ კონცერტის გამო, დღეს, თელავში, რამდენიმე საათით ერეკლე მეორეს გამზირი გადაიკეტება.
„ბერას“ ტურნე სახელწოდებით „ჩვენ ვართ საქართველო“ 14 სექტემბერს დაიწყო და 25 ოქტომბერს თბილისში დასრულდება. ტურნეს ფარგლებში კონცერტი საქართველოს 10 ქალაქში ჩატარდება.