ინგა გრიგოლია და ნოდარ მელაძე ერთმანეთს ჭორებს უვრცელებენ

ტელეწამყვანი ინგა გრიგოლია რამდენიმეწლიანი ჟურნალისტური პაუზის შემდეგ ტელეკომპანია "ტვ 3"–ზე "დიდი პოლიტიკით" დაბრუნდა. მალე მის გადაცემას მეორე წამყვანი ეყოლება – ჟურნალისტი ნოდარ მელაძე, რომელიც თავად მიიწვია. საქართველოში ხელისუფლების შეცვლის შემდეგ ნოდარი ტელეკომპანია "იმედიდან" წავიდა და ეკრანზე აღარ გამოჩენილა. ახლა კი ის ლა ინგა გადაცემას მონაცვლეობით, დღეგამოშვებით წაიყვანენ.
ნოდარმა უკვე ნახა ინგას მუშაობის ბობოქარი სტილი, მაგრამ არ შეშინებია. უმცროსი თაობის კოლეგას ინგა "შვილო"–თი მიმართავს, ერთმანეთს "ფეისბუქით" ხშირად ეხუმრებიან და ამით საზოგადოებას საჭორაო თემებს აძლევენ.
ინგა: როცა გადაცემისთვის გუნდის დაკომპლექტებას ვაპირებდი, ნოდარს შევხვდი და ვილაპარაკეთ. პირველებს თქვენ გეუბნებით, რომ საპრეზიდენტო არჩევნების შემდეგ ამ გადაცემას დღეგამოშვებით მე და ნოდარი წავიყვანთ. მეც ისევე ვიმუშავებ მის ეთერზე, როგორც ის ჩემსაზე მუშაობს. მიმაჩნია, რომ ნოდარი არაჩვეულებრივი წამყვანია. ნოდარი 21–ე საუკუნეა, მე კი მე–20 საუკუნიდან წამოსული ჟურნალისტი ვარ. თუ ვინმეს ვანდობდი ჩემს გადაცემას, ეს ნოდარი იყო.
– ნოდარ, ინგას წინადადება თქვენთვის მოულოდნელობა იყო?
ნოდარი: როცა "იმედში" ახალი გუნდი მოვიდა და 5 საათზე "ქრონიკის" ეთერით მაყურებელს დავემშვიდობე, ჯერ ტანსაცმელიც არ მქონდა გამოცვლილი, რომ პირველი ზარი ინგა გრიგოლიასგან იყო. მკითხა, რა გეგმები მქონდა. ვუთხარი, რომ არანაირი გეგმა არ გამაჩნდა. მაშინ სხვა პროექტის გაკეთებას აპირებდა, მითხრა, არ ინერვიულო, ჩემთან წამოხვალო. მერე ის პროექტი არ აეწყო. ახლა კი, როცა დამირეკა და შემომთავაზა, მასთან სამუშაოდ წავსულიყავი, ბევრი არ მიფიქრია. ყოველთვის მხიბლავდა იმ ადამიანებთან მუშაობა, რომლებიც თავიანთ საქმეში პროფესიონალები არიან. მოვედი იმისთვის, რომ ინგასგან ბევრი მესწავლა და ეს შევძელი. ძალიან დინამიკური ადამიანია, მტვერსასრუტსაც კი ვეძახით, რადგან როცა რაღაცის თქმა გვინდა, ერთი სიტყვით ზუსტად ხვდება, რის თქმას ვაპირებთ.
– ადვილად შეეგუეთ ახალ სამუშაო ადგილს?
ინგა: ძალიან შეზღუდული რესურსების მქონე ტელეკომპანიაა. ამიტომ ისეთი ადვილი არ არის აქ მუშაობა, როგორც აწყობილ არხებზე. მთელი გუნდი გათენებამდე ზის და მუშაობს. მე 3 საათამდე ვქაჩავ და მერე სახლში მივდივარ.
ნოდარი: მაგრამ, რაც მთავარია, სულ კონტაქტზეა. ინგა ჩვენ მიმართ ძალიან მზრუნველია, რაც დილის 6 საათამდე სამსახურში ყოფნას გვიიოლებს.
ინგა: დანაშაულის გრძნობა მაქვს, როცა მე მივდივარ და ესენი სამუშაოდ რჩებიან. მივდივარ იმიტომ, რომ მეორე დღეს ისეთი გადაცემის წაყვანა შევძლო, რომელსაც ხარისხი არ დაუვარდება. ნოდარიც ზუსტად ჩემნაირი გადარეულია. საოცარი ენერგეტიკა აქვს, გინდა თუ არა, თავის გადაცემას მაინც გაყურებინებს.
– ნოდარ, არაერთხელ მსმენია, რომ მუშაობის პროცესში ინგა ძალიან მკაცრია...
ინგა: რაც ერთად ვმუშაობთ, ნოდარმა ერთხელ ნახა ჩემი გაბრაზება.
ნოდარი: ეს ტელევიზიის თანმდევი პროცესია. მთავარია, რომ ინგა უსამართლოდ არაფერს ეუბნება თანამშრომლებს.
ინგა: ნოდარმა ცოტა ხნის წინ პირველად ნახა ჩემი აფეთქება, მაგრამ ეს მას არ ეხებოდა, კადრებთან დაკავშირებით გავბრაზდი. ისე ვჩხაოდი, მიხვდა, რომ ჩემთან მუშაობა ადვილი არაა. როცა ვიკივლე, საქმე უცებ გაკეთდა, მანამდე კი არ კეთდებოდა. ჩემთან მუშაობა ადვილი არაა. ძირითადად ის ადამიანები ვართ ერთად, ვისთანაც სხვა დროსაც ვმუშაობდი. არც სამუშაოა ადვილი და არც მე ვარ "კანფეტი", მახსოვს, ერთი–ორმა ადამიანმა ეს ტემპი ვერ "გაქაჩა" და წავიდა. მე არ ვარ მშვიდი და, როცა რაღაც ფუჭდება, ემოციებს გამოვხატავ.
– ნოდარ, ჟურნალისტიკაში ინგას დაბრუნებას როგორ შეხვდით?
ნოდარი: ვფიქრობ, რომ უნდა დაბრუნებულიყო. ნებისმიერ სფეროში ყველაფერს რეიტინგი ზომავს. სადაც ახლა ჩვენ ვსხედვართ, ორი კვირის წინ არაფერი იყო, სრულიად მოულოდნელად გავიდა ეთერში და გადაცემამ დიდი რეიტინგი დადო. ეს კი იმაზე მეტყველებს, ამ ადამიანის ეთერში დაბრუნებას ხალხი ელოდა. ეს არის ინგა გრიგოლიას რეიტინგი.
– ცოტა ხნის წინ ნანუკა ჟორჟოლიანმა "სარკესთან" თქვა, ინგა ბრენდიაო და აღიარა, ქართულ ჟურნალისტიკაში ინგა მომენტრაო.
ინგა: ნანუკა არის ის ადამიანი, რომელსაც არ "უტყდება" თავის კოლეგაზე დადებითად ილაპარაკოს. ჩვენ ისე გავედით ეთერში, არანაირი რეკლამა არ გვქონია, ნანუკამ კი თავისი პირველი ეთერის უზარმაზარი დრო დამითმო. არ შეეშინდა, "რუსთავი 2"–ის ეთერში ელაპარაკა ახალშექმნილ "ტვ 3"–ზე და ჩემგან ინტერვიუ აეღო. როგორც წესი, ასეთი რაღაცეები არ ხდება. არიან ჟურნალისტები, რომლებსაც კომპლექსები აქვთ, შენ სხვა მედიასაშუალებას წარმოადგენ და ამიტომ არ უნდა გამოგაჩინოო.
– ნოდარ, გინდათ თუ არა, ინგასთან კონკურენცია მაინც მოგიწევთ, თამასას დაბლა ვერ დასწევთ. ეს არ გაშინებთ?
ნოდარი: ობიექტურად რომ შევაფასოთ, გადაცემის რეიტინგი ინგაზე დგას. როდესაც მითხრა, ჩემთან ერთად გადაცემა უნდა წაიყვანოო, შემეშინდა. ვიფიქრე, რამდენად წამომყვებოდა ის მაყურებელი, ვისთვისაც ეს გადაცემა ინგასთანაა გაიგივებული. ძალიან დიდი გამოცდილება აქვს, თავისი აუდიტორია ჰყავს, მე კი მასთან შედარებით ახალბედა ვარ. გარკვეული რისკი არის, მაგრამ, რადგან თავად გამოთქვა სურვილი, ღირს, რომ ვცადო.
– ინგა, მაყურებელი როგორ შეგხვდათ, პირად საუბრებში რას გეუბნებიან?
ინგა: მაყურებელი, რომელიც მაგინებს, არასოდეს მირეკავს. სხვა ზარები და გამოხმაურებები, რომლებიც მქონდა, ყველა პოზიტიური იყო. რესპონდენტები ამბობდნენ, ინგა უცებ გაცოცხლდაო. რამდენიმე დღეა გარეთ არ გავსულვარ, რომ ქუჩაში ვინმეს აზრი გამეგო, ამ ხალხის და რესპონდენტების გარდა, არავინ მინახავს, მათ შორის – არც დედაჩემი. ახლა რასაც ყოველდღიურად ვაკეთებ, ადრე კვირაში ერთხელ ვაკეთებდი. იმისთვის, რომ რეიტინგი არ დაგვივარდეს, ახალი სუნთქვაა საჭირო და ეს ახალი სუნთქვა სწორედ ნოდარი იქნება.
– მაგრამ ნოდარი ნაციონალების ხელისუფლების მიერ მითვისებული ტელეკომპანიის სახე იყო და შესაბამისად მათთან ასოცირდება. "მოდელირებული ქრონიკაც" არ დაგავიწყდეთ.
ინგა: ყველაზე დიდ იდიოტიზმად მიმაჩნია ადამიანების დაყოფა. ადრე თუ ვიღაც "იმედზე" მუშაობდა, სხვაგან აღარ უნდა იყოს? როცა მიშა სააკაშვილი მოვიდა, ერთი ხელისმოსმით ყველა ჩაგვრეცხა, რადგან შევარდნაძის დროსაც ვმუშაობდით. მაშინ ბევრი ვიომეთ, რომ ჟურნალისტები მართლა არ ჩავერეცხეთ. წარმოუდგენელი სისულელეა, ნოდარ მელაძე გყავდეს ტელევიზიაში და პირდაპირ ეთერში არ დასვა. თქვენ კარგად იცით, რომ მისი გადაცემები რეიტინგებს ხსნიდა. პოლიტიკურ გადაცემაში კი არასოდეს მინახავს, მაგრამ დარწმუნებული ვარ, რომ ძალიან მაგარი იქნება.
ნოდარი: "იმედზე" 5 წელი ვმუშაობდი და ფაქტია, რომ ამ არხის სახედ ვითვლებოდი. მიმყავდა საინფორმაციაო გამოშვება, ვიყავი ჟურნალისტი და მქონდა ჩემი გადაცემა. ყველაფერს რეიტინგი განსაზღვრავს. ამოიღონ ძველი რეიტინგები და ნახონ, რა გადაცემებს ჰქონდა ყველაზე მაღალი რეიტინგები და როგორი იყო მაშინდელი რეპორტაჟების ხარისხი.
– შეიძლება გადაცემას რეიტინგი ჰქონდეს, მაგრამ მისი წამყვანი ხალხს არ მოსწონდეს. ინტერესდებით იმ ადამიანების აზრით, ვინც მინუსებზე მიგითითებთ?
ინგა: არის ხალხი, ვისთვისაც მნიშვნელობა არ აქვს, კარგს ვაკეთებ თუ ცუდს, მაინც მაკრიტიკებენ. ასეთი ადამიანების შეხედულებები საერთოდ არ მაინტერესებს, მაგრამ, როცა მიმითითებენ, გადაცემაში რა არის გამოსასწორებელი, ეს ყოველთვის საინტერესოა ჩემთვის. რაც შეეხება ნოდარს, მის მიმართ იყო სრულიად მიზანმიმართული შეტევა, რადგან მას მიჰყავდა ყველაზე რეიტინგული ტოქ შოუ, რომელზეც მთელი კვირა ხალხი ლაპარაკობდა.
ნოდარი: არის კრიტიკა და არის ლანძღვა. როცა ისეთი ადამიანები მაკრიტიკებენ, რომლებსაც ჩემზე მეტი გაუკეთებიათ, ბუნებრივია, ვითვალისწინებ. ცალკე არსებობს ლანძღვის კამპანია. იყო დრო, როცა ჩემი მისამართით ცუდი დამოკიდებულება იყო, მაშინ ამ ყველაფრის სკანირება გაკეთდა და დადგინდა, რომ სამი ოთხი აიპი მისამართი იყო. მაშინ მივხვდი, რომ ყველაფერი გამიზნულად კეთდებოდა. მათ აქვთ თავიანთი აზრის გამოხატვის უფლება, რა პრობლემაა!
– ასე ადვილია ლანძღვის ატანა?
ნოდარი: გეთანხმებით, რომ ძალიან რთულია, მაგრამ მერე ყველაფერი გავიაზრე და მივხვდი, რომ ეს ყველაფერი ჩემი დისკრედიტაციის მიზნით ხდებოდა, ამიტომ ჩვეულებრივ მოვლენად აღვიქვი.
ინგა: მე ძალიან ვნერვიულობდი ამ გინებებზე და ლანძღვაზე, როცა პოლიტიკაში ვიყავი. როცა საჯარო პირი ხარ, თმენის ვალდებულება გაქვს, რომელიც ვერ მოვირგე. დაახლოებით სამჯერ მაინც მომინდა სასამართლოში შემეტენა სარჩელი, რადგან შეურაცხყოფილი ვიყავი, ისეთი რაღაცეები იწერებოდა, მაგრამ ამისი უფლება არ მქონდა. ფაქტობრივად პირზე საკეტი მედო, ახლა კი ისეთი ბედნიერი ვარ – ვინმე შემაგინებს, შევაგინებ, გამლანძღავს და ასჯერ მეტად გავლანძღავ. საქართველოში ხალხი გადაირია, ისეთ რაღაცეებს ვკითხულობ, რომ ვგიჟდები!
– პოლიტიკიდან ისევ ჟურნალისტიკაში დაბრუნებული ინგა როგორ მიიღეს რესპონდენტებმა? ზოგი იმასაც ამბობდა, მიკერძოებას ვერ გაექცევაო.
ინგა: მაყურებელი იმასაც ნახავს, ჩემი პოლიტიკური გუნდის წევრებს როგორ მოვიწვევ გადაცემაში. ყველა იმ კითხვას დავუსვამ, რომელიც დასასმელია. რაც შეეხება რესპონდენტებს, ყველამ ძალიან კარგად მიიღო ჟურნალისტიკაში ჩემი დაბრუნება. უკვე ძალიან ბევრი გვყავდა სტუმრად ექსკლუზივებით. ყველამ მითხრა, ძალიან კარგია, რომ ბრუნდები, ტელევიზია შენიაო. ერთადერთი რესპონდენტი, რომელიც ძალიან მინდოდა, მომეწვია და უარი მითხრა, ეს იყო გიორგი მარგველაშვილი. ცოტა დავიბენი, რატომ არ მოვიდა ჩემს გადაცემაში სტუმრად. არც ერთ სხვა რესპონდენტს უარი არ უთქვამს.
ერთი წელი გავიდა, რაც პოლიტიკიდან წამოვედი და სრულიად განეიტრალებული მაქვს ჩემი პოლიტიკური ემოციები.
– მარგველაშვილის უარის მიზეზი იცით?
ინგა: არა. იმედია, მერე მაინც მოვა.
– ინგა, "ფეისბუქის" თქვენს გვერდზე ნოდარს "შვილო" უწოდეთ, რაც განხილვის საგნად იქცა...
ინგა: აი, რატომ არ უნდა იმაიმუნო "ფეისბუქზე"! ნოდარი ჩემზე ბევრად პატარაა და მართლა ისეთი განცდა მაქვს, როგორიც ჩემი შვილის მიმართ. რომელიღაც სააგენტოსაც ედო ეს სტატუსი. ვერაფრით წარმომედგინა, თუ სააგენტოს შეეძლო, ჩემი რაღაც ხუმრობა დაეწერა. ჩვენ ერთი უბედურება გვჭირს – თუ რომელიმეს "ფეისბუქი" ჩართული დაგვრჩა, ნოდარი საშინელ "პოსტებს" დებს. მაგალითად, ცოტა ხნის წინ ნოდარმა ჩემი "ფეისბუქის" გვერდზე "დაპოსტა", ოჯახის შექმნას ვფიქრობო.
ნოდარი: ის თქვი, ასეთი რაღაცეები ვინ დაიწყო. ოთახში ჩამკეტა და ისეთი რაღაც "დამიპოსტა", მთელი საზოგადოება აალაპარაკა.
ინგა: "დავუპოსტე", ერთი გოგო მიყვარს და ახლა სიყვარულს ავუხსნი–მეთქი და მერე ამან სამაგიერო გადამიხადა. ამ "პოსტების" გამო ისეთი ამბავი ატყდა, ჩემმა პროდიუსერმაც კი დამირეკა, რა ხდება, რა ოჯახის შექმნაზე ლაპარაკობო. არის ხალხი, რომელიც ამ ყველაფერს სერიოზულად აღიქვამს.