ზარი ციხიდან... რა ხდება თამუნა მუსერიძის ცხოვრებაში

''ვინ არის თამუნა მუსერიძის ახალი სიყვარული'' - სტატიებმა ამ სათაურით გასულ კვირას თითქმის ყველა საიტი მოიარა. მიზეზი თამუნას მიერ ''ფეისბუქზე'' გამოქვეყნებული სტატუსი გახლდათ, რომლის მიხედვითაც ტელეწამყვანმა გვაუწყა, რომ ურთიერთობა აქვს ლაშა კიკალიშვილთან. ლაშა ''საზოგადოებრივი მაუწყებლის'' თანამშრომელია. თამუნას ცხოვრების ამ სიახლეს საიტები რომ გამოეხმაურნენ, ამან ტელეწამყვანი გააღიზიანა. როგორც აღმოჩნდა, თამუნამ ეს ნაბიჯი აბეზარი თაყვანისმცემლის მოსაცილებლად გადადგა. რეალურად კი ის და ლაშა ბავშვობის მეგობრები არიან და სასიყვარულო ურთიერთობა არ აკავშირებთ. ამ ამბავს კიდევ ერთი საინტერესო გაგრძელება მოჰყვა, მუსერიძეს ყოფილმა შეყვარებულმა უსაყვედურა, რადგან ამ ნიუსში მისი სახელი და გვარიც მოხვდა და უფრო მეტიც, უთხრა, რომ პირადი ცხოვრების აწყობაში ხელი ეშლებოდა. რა მოხდა რეალურად, ამის შესახებ თამუნა მუსერიძე გვესაუბრება. მე გამოვალ დამნაშავე...''

- ''ფეისბუქზე'' ერთი ადამიანი მწერდა, რომლის ვინაობასაც, სამწუხაროდ, ვერ დავასახელებ და ვერც იმას ვიტყვი, რას წარმოადგენს. ცნობილი ადამიანი არ არის, მაგრამ მაინც ვერ ვიტყვი, ვინ არის. იმ დღეს, როდესაც ეს სტატუსი გამოქვეყნდა, ''პირველი არხის'' დილისთვის პრომო გადავიღეთ და კიკალასთან (ლაშა კიკალიშვილი - ავტ.) სახლში ვიყავი, პრომოს ამონტაჟებდა, თან სოციალურ ქსელში ვიყავი შესული. ამ დროს ის ადამიანი ისევ გააქტიურდა, უამრავ მესიჯს მწერდა. თან ისეთი სიტუაცია იყო, რომ ვერ ვეტყოდი, არ მოეწერა. თან არ მინდოდა, ამ საქმეში სხვები ჩარეულიყვნენ. ამ დროს მითხრა ლაშამ, სტატუსი გამოაქვეყნე, რომ ჩემთან ერთად ხარ და შეგეშვებაო. მაშინ ვერაფრით წარმოვიდგინე, რომ ჩვენი ''ღადაობა'' სტატუსი ასეთ ამბავს გამოიწვევდა. მე და ლაშა ერთად გავიზარდეთ, ერთი უბნელები ვართ. მეორეც, ეს არის ადამიანი, რომელმაც ოთხი წლის წინ ჩემი ''სივი'' ''საზოგადოებრივ მაუწყებელზე'' მიიტანა. თვითონ დიდი ხანია, რაც იქ მუშაობს და ვთხოვე, კასტინგია, არ ვიცი, ვის მივმართო და გთხოვ, ჩემი ''სივი'' მიიტანე-მეთქი. ამის შემდეგ დამირეკეს, შემამოწმეს და ამიყვანეს წამყვანად. წარმოიდგინეთ, ამდენი წელია ვიცნობ და ახლა გაგვიჩნდა სიყვარულის გრძნობა? სტატუსი მხოლოდ ერთი დღით დავაყენეთ, მეორე დღეს წავშალეთ. საიტებზე გამოქვეყნების შემდეგ მთელი საქართველო მირეკავდა. ჩემი და ლაშას საერთო მეგობარი ამერიკაში ცხოვრობს და იმანაც დამირეკა, რა დაგემართა ამ სიბერეშიო.
- ამ სტატუსს რამე სერიოზული პრობლემა ხომ არ მოჰყოლია შენთვის ან ლაშასთვის?
- საბედნიეროდ, არა, რადგან ლაშას შეყვარებული არ ჰყავს. ადრე ვინც უყვარდა, იმ გოგონას ვიცნობდი და გადასარევი ურთიერთობა მქონდა. ერთადერთი პრობლემა ის იყო, რომ ხალხი მწერდა, ყველას ეგ ინფორმაცია აქვს გაზიარებული, რა დაგემართათ, ხალხო, ბავშვობის მეგობრები ხართ და ახლა რა გჭირთო.
- ლაშას რა რეაქცია ჰქონდა გამოხმაურებაზე?
- როდესაც შემომთავაზა, ჩვენი ურთიერთობის შესახებ ''ფეისბუქზე'' გამომექვეყნებინა, გავაფრთხილე, რა შეიძლებოდა ამას მოჰყოლოდა და ვუთხარი, რომ არ ვურჩევდი. მიპასუხა, კარგი რა, რა უნდა მოხდესო. როდესაც ყველა საიტზე გამოქვეყნდა ინფორმაცია, ლინკები გადავუგზავნე. მაგრამ არაფერი უთქვამს, იცინა.

- იმ ადამიანმა, თავს რომ გაბეზრებდა, რა მოგწერა?
- ამ ინფორმაციის გამოქვეყნების შემდეგ აღარ მოუწერია. გაჭრა... მაგრამ ამას საიტზე მოჰყვა კომენტარები, შენ თუ არ გინდა, ადამიანი ვერ შეგაწუხებსო. მე არ მითქვამს, რომ ის პიროვნება სახლში მივარდებოდა, მაგრამ ისეთი ადამიანია, რომ, წესით, არ უნდა მოეწერა. ძალიან არ მინდა მისი ვინაობის გამხელა, იმიტომ, რომ ისევ მე გამოვალ დამნაშავე. ამიტომ ვერ გავეცი ისეთი პასუხი, როგორსაც სხვა მომაბეზრებელ ადამიანებს ვეუბნები.
- მახსოვს, ციხიდანაც ხშირად გირეკავდნენ პატიმრები, ეს ზარები არ შეწყდა?
- რას ლაპარაკობთ, უამრავი წერილი მაქვს დღემდე შენახული და საჩუქრებსაც აქამდე მიგზავნიან. ძალიან მადლობელი ვარ ამ ადამიანების, მაგრამ ბოლო ფაქტს მოგიყვებით. არის ერთი პატიმარი, რომელიც დიდი ხანია მირეკავს და უკვე ხმაზე ვცნობ. ცოტა ხნის წინ დამირეკა და მეუბნება, ქალბატონ მარინას სთხოვეთო. დედაჩემს გულისხმობდა. მარინასგან რა გნებავთ-მეთქი და საქმე მაქვს, ოჯახის ახლობელი ვარო. ''მაგოიმებდა'' , ეგონა, ხმაზე ვერ ვიცნობდი. დედასთვის ახსნა ვერ მოვასწარი, ვინ იყო, ისე გადავაწოდე ტელეფონი. დედას უთხრა, უკაცრავად, ქალბატონო მარინა, გიორგი დამალაპარაკეთო. ამ შემთხვევაში ჩემს ძმას გულისხმობდა. დედა პანიკაში ჩავარდა, რატომ გირეკავენ, შენს ძმას რატომ კითხულობენ, ხომ მშვიდობააო. გიორგი დაელაპარაკა, მაგრამ ის ერთსა და იმავეს უმეორებდა, ძმასავით დამელაპარაკეო. ის დღე ასე დამთავრდა. მეორე დღეს დარეკა და ისევ ქალბატონი მარინა უნდოდა. დედასთვის უკვე ახსნილი მქონდა, ვინ იყო და დაელაპარაკა. უთხრა, თქვენი შვილი მიყვარს და საქმეში ჩაერიეთო. ეს ადამიანი ძალიან უცნაურ რაღაცაზეა დაჭერილი.
- მაინც რა დააშავა?
- ხშირად იჭერენ და პერიოდულად გამოდის. ბოლო გამოსვლის დროს ჩემს სახლთან მოვიდა და ერთ-ერთ მაღაზიაში შევიდა. გამყიდველებს უთხრა, თამუნას რა უყვარს, უნდა ვუყიდოო. გოგონებმა უთხრეს, უხერხულ მდგომარეობაში ნუ ჩაგვაგდებო. სთხოვდა, ფულს დაგიტოვებთ, მისთვის მაქვს შეგროვებულიო. მოკლედ, ეს ადამიანი ალბათ მეასედ დაიჭირეს. ნაქირავებ ბინაში ცხოვრობდა, იტალიურ ეზოში და დიასახლისის გასაშრობად გაფენილი სველი ხალიჩა ჩამოხსნა და გაიქცა. როდესაც ნახეს, რომ ხალიჩა მოპარული იყო, წყლის წვეთებს გაჰყვნენ და შუა გზაში დაიჭირეს. შემდეგ დამირეკა და თავად მომიყვა ამ ამბავს. თან დაამატა, იმიტომ არ ვიხდი თავდების თანხას, რომ სახლი ვიყიდე ერთ-ერთ რაიონში, სადაც ძროხები, ღორები და ქათმები მოვაშენე და როდესაც გამოვალ, ამ თანხით სახლის რემონტს დავასრულებ და შენ წაგიყვანო. წარმოიდგინეთ, როგორი ბედნიერი ვიქნები ძროხებსა და ღორებში.
- გამოდის, რომ დედას შენი ხელი სთხოვა...
- უთხრა, თამუნა არ მიკარებს, იქნებ, თქვენ დაელაპარაკოთ და უთხრათ, რომ კარგი ბიჭი ვარო. დედამ აუხსნა, თქვენ რეკავთ 29 წლის გოგონას დედასთან, 19 წლის რომ იყო, მაშინაც არ მეკითხებოდა ჭკუას და როგორ ფიქრობთ, ახლა დავარწმუნებ, რომ კარგი ბიჭი ხართო?!.
- რით გამოგარჩიეს პატიმრებმა, თავად რას გეუბნებიან?
- ტელეფონის ნომერი, რომელზეც მირეკავენ, უკვე ათი წელია მაქვს და ძალიან ბევრმა ადამიანმა იცის. არ ვცვლი, იმიტომ, რომ კონცერტების ორგანიზატორებმაც იციან და ხშირად მჭირდება. რაც შეეხება გამორჩევას, როგორც იცით, რადიოშიც ვმუშაობ, ჩემი გადაცემა ღამის თორმეტიდან სამ საათამდე გადის და აქტიურად უსმენენ, მოსწონთ.
- თამუნა, პირველ შეკითხვას დავუბრუნდეთ, რატომ დაგჭირდა იმ ცნობილი სტატუსის გამოქვეყნება თუნდაც ხუმრობით, ახლა აღარ ხარ შეყვარებული?
- პრობლემა ისაა, რომ საიტებზე გამოქვეყნებულ ნიუსებში ახსენეს ჩემი ყოფილი შეყვარებული (საბა ხაჟალია - ავტ.). ამ ადამიანთან კონტაქტი მაქვს, მაგრამ ისეთი ურთიერთობა აღარ მაქვს. ძალიან არ ესიამოვნა. მომწერა, ხომ შეიძლება, ისე დაიწეროს შენზე მასალა, რომ ჩემი სახელი და გვარი აღარ ახსენონო. ხელს მიშლი პირადი ცხოვრების აწყობაშიო. თავისთავად, ჩემი ფიგურა ხელს უშლის და იმედია, ჟურნალისტები გაითვალისწინებენ და ამ ადამიანის სახელსა და გვარს აღარ ახსენებენ. მით უმეტეს, არც ისე ცოტა ხანია, რაც დავშორდი. ნოემბერში ხდება ერთი წელი, რაც ერთად აღარ ვართ. უბრალოდ, მას შემდეგ შეყვარებული აღარ მყოლია.

ნინო გიგიშვილი
ჟურნალი ''რეიტინგი''