ქმარმა რომ არ გიღალატოთ...

ეს ამბავი ერთ ტროპიკულ ქვეყანაში მოხდა. ქალიშვილმა დედასთან დაიჩივლა, რომ ქმარი ღალატობდა.

დედამ უთხრა:

"ეს საქმე გამოსწორებადია. მომიტანე თმის ორი-სამი ღერი, ოღონდ ჩვეულებრივი კი არა, ვეფხვის ულვაშიდან ამოძრობილი!"

"რას ამბობ, დედა!" – შეშინებულმა უთხრა ქალმა.

"შეეცადე, შენ ხომ ქალი ხარ, ყველაფერი უნდა შეძლო!"

დაფიქრდა გოგონა. შემდეგ დაკლა ცხვარი, ხორცის ნაჭერი აიღო და ტყეში წავიდა. მოფარებულ ადგილას დაჯდა და დაიცადა.

ვეფხვიც მალე გამოჩნდა და გააფთრებული მისკენ გამოიქცა. ქალმა ხორცის ნაჭერი მიუგდო და გაიქცა.

მეორე დღეს ისევ მივიდა ტყეში იგივე ადგილას. ვეფხვი კვლავ გამოქანდა მისკენ. გოგონამ ისევ მიუგდო ხორცის ნაჭერი, მაგრამ არ გაიქცა, უყურებდა, როგორ შეექცეოდა ცხოველი.

მესამე დღეს, როცა ვეფხვმა ქალი ხორცის ნაჭრით ხელში დაინახა, კუდის ქიცინი დაიწყო. როგორც ჩანს, ცხოველი ელოდებოდა მას და გოგონამ პირდაპირ ხელიდან აჭამა ვეფხვს ხორცი.

მეოთხე დღეს ვეფხვი სიხარულით გაიქცა გოგონასკენ და ცხვრის ხორცი რომ შეჭამა, თავი ქალს კალთაში ჩაუდო და გაინაბა. ქალმა დრო იხელთა, ცხოველს ულვაშიდან სამი ბეწვი ამოაძრო და დედას წაუღო.

"აი, ხომ ხედავ, - უთხრა მან ქალიშვილს, - შენ შეძელი გარეული ვეფხვის მოთვინიერება. ახლა წადი და მოათვინიერე საკუთარი ქმარი!"

ჟურნალი "და ქალი"