ვანო ჯავახიშვილი: "ოთარ ტატიშვილს ჩემს შოუში არ გამოუშვებენ"

"მთავრობის ჯამბაზი აღარ ვარ", – იუმორისტმა ვანო ჯავახიშვილმა ახალი სატელევიზიო სეზონი ახალი ხუმრობით დაიწყო. პოლიტიკურად ცხელი შემოდგომა "ვანოს შოუშიც" იგრძნობა, როგორც მის მონოლოგში, ისე სტუმრების კონტინგენტში, თუმცა მანამდეც ყოველთვის ასე იყო, პოლიტიკა გახლდათ შოუს მთავარი სახუმარო თემა. ახლა კი ვანოს სურს, ამ მხრივ ცვლილება მოახდინოს და ქართულ შოუბიზნესსაც "წაეშველოს" თავისი რეპლიკებით. როგორც "სარკეს" გაუმხილა, მისი ოცნებაა, ერთხელაც ისეთ ქვეყანაში გაიღვიძოს, სადაც გამუდმებით არჩევნები არ იქნება დანიშნული.
– ვანო, თქვენს შოუს უკვე მეშვიდე წელი დაუდგა. ერთი და იმავე საქმის კეთება ცოტა მოსაბეზრებელი ხომ არ გახდა, რაიმეს შეცვლას ხომ არ გეგმავთ?
– 7 წლის განმავლობაში ყველა გადაცემას ჰქონდა გამოხმაურება. ესაა ერთ–ერთი სიამოვნება, რაც ამ შოუს ახლავს თან, თუმცა მოგატყუებთ, რომ გითხრათ, არ ვიღლებით და არ გვბეზრდება–მეთქი. ყოფილა შემთხვევა, როცა გვიფიქრია, რომ აქ უნდა დაგვემთავრებინა, მაგრამ მერე ქვეყანაში ისეთი ამბები ვითარდებოდა, რომ იმ თემატიკაზე მაშინვე იწერებოდა სცენარი და მზადდებოდა შოუ.
აგვისტოში შვებულებაში ვიყავი, ქვეყანაში კი ისეთი საკითხები წამოიჭრა, გული მწყდებოდა, ეთერში რომ არ ვიყავი. არ მინდოდა, ის ამბები გამომეტოვებინა, რომლებიც მერე დაძველდებოდა. მაყურებელი მივაჩვიეთ ჩვენი შოუს ყურებას, ამის მიღწევას კი დიდი დრო დასჭირდა. ყველამ იცის, რომ "ვანოს შოუ" საღამოს 10–ის ნაცვლად, 11 საათზე იწყება. გვიანია, მაგრამ მაყურებელი მაინც გველოდება. ეს კი გუნდის თითოეული წევრისთვის ძალიან მნიშვნელოვანია.
ხუმრობები მოვალეობის მოხდის მიზნით არასოდეს დაგვიწერია. ჩვენი მუღამია, ისეთი სცენარი შევქმნათ, რომელზეც ბევრი ილაპარაკებს. ჩვენ არ გვიყვარს ფურორებით დაწყება, ბევრი სტუმრის მოყვანა და ამით გადაცემის შეფუთვა, ჩვეულებრივი სტილით ვმუშაობთ. შოუს ელემენტებით გადაცემის გაკეთება დიდი ხარჯია, რეიტინგებში სხვაობასაც ვერ ვხედავ, ამიტომ მივყვებით დინებას.
– სანამ ქვეყანაში ხელისუფლება შეიცვლებოდა, ამბობდნენ, რომ თქვენ მთავრობის პიარზე მუშაობდით, მათზე კეთილად ხუმრობდით. ახლა თქვენი დადებითი განწყობა სხვა ადრესატებისკენ არ წავა?
– რატომღაც ყველა ასე ფიქრობს, მაგრამ შეგიძლიათ ერთი დღე მოხვიდეთ და დაესწროთ სცენარის შექმნას. ბოლო ორი კვირა ისეთი რეალობა შეიქმნა, რომ პრეზიდენტზე ნაკლებად გვქონდა ხუმრობები. ჩვენ ყველა პოლიტიკურ ფიგურაზე თანაბრად ვხუმრობთ. არ აქვს მნიშვნელობა, ნაციონალები იქნებიან, "ოცნების" წარმომადგენლები თუ "ქრისტიან–დემოკრატები", ჩვენ ყველაზე ვხუმრობთ...
– ყველაზე რეიტინგული გადაცემა როდის გამოდის, როცა ნაცმოძრაობიდან გყავთ სტუმარი თუ როცა – "ოცნებიდან"?
– როდესაც ნაციონალები მყავს ხოლმე სტუმრად, ხშირად ვხუმრობ. ისეთი ტენდენცია წამოვიდა, რომ თუ ნაციონალი ხარ, ეს დანაშაულია და ამაზე ბევრს ვხუმრობთ. "ქართული ოცნების" წარმომადგენლები ნაკლებად მოდიან სტუმრად. შებოჭილები არიან, ფიქრობენ, რომ რაღაც ისეთს ვეტყვი, რაც არ ესიამოვნებათ. ამ დროს სულაც არ ვფიქრობ ასე. "ოცნებიდან" ჩემი ძველი მეგობრები უპრობლემოდ მოდიან ჩემთან – ზვიად ძიძიგური, ეკა ბესელია, კობა დავითაშვილი, ლევან ბერძენიშვილი... თუმცა ჩემს გადაცემაში ჯერ ღრმა ოცნებისტი არ მოსულა.
–– ვის გულისხმობთ?
– ასეთი ბევრია...
– გქონიათ მცდელობა, ბიძინა ივანიშვილი მოგეწვიათ სტუმრად?
– რა თქმა უნდა, ბიძინა ივანიშვილს შევთავაზეთ ჩვენს გადაცემაში მოსვლა, ასევე – გიორგი მარგველაშვილს, კახი კალაძეს, თეა წულუკიანს, მაგრამ... არჩილ კბილაშვილსაც შევთავაზე და მითხრა, 6 თვის მერე მოვალო. თქვენ ჟურნალისტი ხართ და მიხვდებით, თქვენც რომ იგივე გიპასუხონ, ნასიამოვნები ხომ არ დარჩებით? ვინც შეიძლება, რომ ყურებადი იყოს, ყველა თავს იკავებს.
– იუმორისტული შოუების ოცნებაა, ქვეყნის პირველი პირი ჰყავდეთ სტუმრად. ალბათ მიხეილ სააკაშვილსაც შესთავაზებდით თქვენს შოუში მოსვლას. მისგან რა პასუხი გაქვთ?
– ვგეგმავთ, მიხეილ სააკაშვილი მოვიდეს გადაცემაში. ის არასოდეს ყოფილა რომელიმე გასართობი ტიპის შოუს სტუმარი. ნანუკა ჟორჟოლიანს კი ჰყავდა სტუმრად, მაგრამ ეს იყო გარე გადაღება, სტუდიურ ჩაწერას სულ სხვა დატვირთვა აქვს. აქ ზის მაყურებელი, რომელსაც დიდი მუხტი მოაქვს. ერთი სიტყვით, ვცდილობთ და ვნახოთ, რა გამოვა. ერთხელ იყო შეთავაზება, მაგრამ გადამიდო.
– როცა მიხეილ სააკაშვილი დატოვებს პოსტს, ალბათ მაშინ უფრო რეალური გახდება მისი სტუმრობა თქვენთან.
– შეიძლება პრეზიდენტობის პერიოდშიც მოახერხოს და მოვიდეს. არ ვიცი.
– ერთ–ერთ გადაცემაში ახსენეთ, რომ მთავრობის ჯამბაზი აღარ ხართ. ახლა ვისი "ჯამბაზია" ვანო ჯავახიშვილი?
– ახლა დამოუკიდებელი ჯამბაზი ვარ! ვაყალიბებ არასამთავრობო ორგანიზაციას "ჯამბაზები საქართველოსთვის" და მისი ხელმძღვანელი ვიქნები. ეს ფრაზა – "მთავრობის ჯამბაზი" – ჩემი მოგონილია. ამ ყველაფერზე ბევრი ვიხუმრეთ. ესეც ჩვეულებრივი პროფესიაა, ადრე მეფის კარზე იყვნენ ჯამბაზები. მე ერთი პატარა, ხუმარა კაცი ვარ.
– ახალ პოლიტიკურ რეალობას როგორ აღიქვამთ?

– გინდათ, პოლიტიკაზე ვისაუბროთ?
– გადაცემაში სულ პოლიტიკაზე ხუმრობთ, ამიტომ საინტერესოა, რეალურად როგორ აფასებთ ქვეყანაში მიმდინარე მოვლენებს.
– რა გითხრათ... დღეს ცოტა უძრაობის პერიოდია, რაც ძალიან არ მომწონს. სულ მოძრაობაში ვიყავით, სწრაფად მივდიოდით რაღაცეებისკენ, მაგრამ რატომღაც უცებ გავჩერდით. უძრაობა საშინლად არ მომწონს, დღითიდღე უფრო მეტი ადამიანი მხვდება, ვინც სამსახური დაკარგა. თუ ასე გაგრძელდა, ალბათ უკანაც წავალთ. ისეთი ქვეყანა ვართ, რომ აქ, ჩემი აზრით, სულ არჩევნები იქნება. ისეთ დღეზე ვოცნებობ, რომ გავიღვიძებ და უახლოეს პერიოდში არჩევნები არ იქნება დაგეგმილი. ახლა ხომ საპრეზიდენტო არჩევნებია, მაისში კიდევ არჩევნებია. არჩევნების პერიოდი არ მომწონს, რადგან ამ დროს ხალხი ერთმანეთს ვერ იტანს. პოლიტიკური შეხედულების გამო შეიძლება მეგობარმა მეგობარს ხელი დაარტყას.
– გქონიათ ასეთი შემთხვევა?
– არა, თუმცა ჩემ ირგვლივ ბევრი მსგავსი რამ მსმენია, ცოლ–ქმარს პოლიტიკურ თემებზე სერიოზული კონფლიქტი მოსვლიათ. სუფრასთან პოლიტიკის გამო ხშირად ჩხუბობენ. პოლიტიკური ფიგურების და გუნდების გამო რატომ უნდა დავხოცოთ ერთმანეთი? რატომ, რის გამო?! იმის გამო, რომ რომელიღაცა პოლიტიკოსმა ჩვენზე უკეთ იცხოვროს?!

– ფაქტია, რომ თქვენს შოუს ჟანგბადს სწორედ ეს ხალხი აწვდის. რომ არა პოლიტიკური ქაოსი, რაზე იხუმრებდით?
– გამოჩნდება სახუმარო თემა. ძალიან დიდი სურვილი მაქვს, ქართულ ესტრადაზე ხუმრობები განვაახლო, რომ იქნებ ეს სფერო აღორძინდეს. დღეს კულტურის სფეროს წარმომადგენლები ნაკლებად რეიტინგულები არიან, ვიდრე პოლიტიკოსები, რაც ძალიან ცუდია. პოლიტიკოსებს არც უნდა ვიცნობდეთ, ნორმალურ ქვეყნებში ასე ცხოვრობენ.
– იმისთვის, რომ პოლიტიკურ თემებზე იხუმროთ, გამუდმებით თვალი უნდა ადევნოთ პოლიტიკურ მოვლენებს, გამოსვლებს, შეფასებებს. ალბათ უკვე საკმაო ინფორმაციაც დააგროვეთ ქართულ პოლიტიკაზე.
– რა თქმა უნდა, ამ დროს გამოცდილებას აგროვებ, ხვდები, როგორ არის ქვეყანა მომართული. მანამდე ეს ყველაფერი არ ვიცოდი, პროცესებს გვერდიდან ვადევნებდი თვალს. ახლა რასაც ლაპარაკობენ, ყველაფერს ვუკვირდები და შემიძლია ანალიზის გაკეთება. ჩემს გამოსვლას შეგიძლიათ ქვემოთ დააწეროთ – ექსპერტი. ურთიერთობებმაც ბევრი რამ შემძინა... უდიდესი ტელეგამოცდილება მივიღე, დღეს კამერასთან რომ ვდგები, სულ სხვა ადამიანი ვარ. ჩემგან ყველა ელოდება, რომ გავაცინო, ეს კი ძალიან რთულია.
– პრეზიდენტობის ერთი კანდიდატი უკვე გყავდათ სტუმრად, სხვებსაც მიიწვევთ გადაცემაში?
– ცესკო ზღუდავს მათ გამოჩენას ეკრანზე, ეს უფასო რეკლამაში ითვლება. პრინციპი ასეთია, თუ ერთს მოიწვევ გადაცემაში, მაშინ ყველა უნდა დაპატიჟო. ასე რომ, ყველა მათგანთან დავრეკეთ და მოპატიჟება გავუგზავნეთ. გვინდა, რომ ეს პერიოდი პოლიტიკურად დავტვირთოთ შოუ.
– თქვენს კონკურენტად რომელიმე გადაცემას ან წამყვანს აღიარებთ?
– ყველა მსგავს გადაცემას ვაღიარებ, არ ვარ ის ადამიანი, რომელიც იტყვის, ჩემი გადაცემაა კარგი და სხვები – ნაკლებადო. ასეთი შეფასება დიდი შეცდომა იქნება. ყველა გადაცემას ვაკვირდებით. ამ გადმოსახედიდან ჩვენ ვლიდერობთ, მაგრამ არ ვიცი, მომავალში რა იქნება. კარგი იქნება, თუ ასეთი პროექტები ერთსა და იმავე დღეს და დროს არ გავა ეთერში. ასე უფრო მეტი შემართებით გავაკეთებდით გადაცემას.
– რატომ ემთხვევა თქვენი საეთერო დრო სხვებისას?
– ჩვენ ჩვენი დრო გვაქვს, ჯერ ჩვენ ვიყავით და მერე დანარჩენები. ჩვენ დღეს არ ვცვლით.
– გეცინებათ კონკურენტების ხუმრობებზე?
– რაღაცეებზე გვეცინება, რაღაცეები არ მოგვწონს, რაღაცეები ცუდ ხუმრობად მიგვაჩნია. ისინიც ასე ფიქრობენ ჩემს გადაცემასა და ხუმრობებზე.
– კონკურენტებიდან პირადად ვის იცნობთ?
– ვასიკო ოდიშვილი, რაც "რუსთავი 2"–დან წავიდა, მას შემდეგ არსად შემხვედრია, მაგრამ ერთმანეთს კარგად ვიცნობთ. რაც შეეხება ოთარ ტატიშვილს, პირადად არ ვიცნობ, მაგრამ ვიცი, რომ ნიკა არაბიძე ოთართან მეგობრობს, ისინი ძველი თანაგუნდელები არიან.
– არ გიფიქრიათ მათი მოპატიჟება "ვანოს შოუში"?
– არა მგონია, ოთარი მოვიდეს ჩვენთან, არ გამოუშვებენ, რადგან მისი შოუ "ღამის შოუს სტუდიის" პროდუქტია. ჩვენ კი "ღამის შოუსთან სტუდიასთან" კარგი ურთიერთობა არ გვაქვს.
– ფილმში, რომელსაც "კომედი ჯგუფი" იღებს, თქვენ რა როლი გერგოთ?
– ეს არის საოჯახო კომედია. ყველა თანამშრომელი აქტიურადაა დაკავებული, დილის 8 საათიდან საღამოს 8 საათამდე მიმდინარეობს გადაღებები. მთავარ როლში მიშა ანდღულაძეა. ჩემი გმირი ბანკის მმართველია. ამ ფილმში იუმორი არ მწყალობს, ვცდილობ, ყველა გავაცინო, მაგრამ არ გამომდის. ფილმის გადაღება სულ სხვა ყოფილა.
– სცენარის შინაარსს არ გაგვანდობთ?
– ცოლ–ქმარი ერთმანეთს შორდებიან და მამა ქალის იმიჯით იწყებს მუშაობას თავისი შვილების ძიძად...
– ცნობილი ჰოლივუდური ფილმის "მისის დაუტფაირის" გადამღერება იქნება?
– დიახ, ოღონდ ჩვენი სცენარი განსხვავებულია. ჩვენს ფილმს "ძიძა" ჰქვია.
– ამ ყველაფრის ფონზე თქვენი ოჯახური ცხოვრება როგორ მიედინება?
– ყველას ვუსურვებდი ისეთ ცოლქმრობას, როგორიც მე და ჩემს მეუღლეს (თამარ მურუსიძე. ავტ.) გვაქვს. ერთმანეთისთვის ვცხოვრობთ, ყოველდღე ვფიქრობ, რითი ვასიამოვნო. დღემდე შეყვარებულები ვართ. გამიმართლა, რომ ასეთი კარგი ცოლი მყავს. ის ჩემი ყველაზე დიდი კრიტიკოსია, რაც ძალიან მომწონს. ისიც ჩემსავით ერკვევა იუმორში, მისი შენიშვნები ყოველთვის ობიექტურია. პროფესიით ჟურნალისტია, მაგრამ სამსახური არ აქვს. ახლა ბავშვი ბაღში დადის და უკვე დავიწყეთ სამსახურის ძებნა. "სარკეში" ხომ არ გაქვთ მისთვის ადგილი?
– "რუსთავი 2"–ში არ გაუწიეთ რეკომენდაცია?
– ასეთი რაღაცეები არ მიყვარს. "კურიერში" უნდა გადავიდე და ვუთხრა, ჩემი ცოლი კარგი ჟურნალისტია და მუშაობა დააწყებინეთ–მეთქი? ეს ჩემი სტილი არ არის. მისი პროფესია ძალიან შრომატევადია, თუმცა არ მივეკუთვნები იმ კატეგორიის კაცებს, ცოლებს სახლში რომ დასვამენ ხოლმე. გამიხარდება, რეალიზებული თუ იქნება.
– თქვენს ბიჭთან, პატარ ნიკოლოზთან, როგორი ურთიერთობა გაქვთ ჩამოყალიბებული?
– ჩემი შვილი უკვე 5 წლისაა და, როგორც გითხარით, საბავშვო ბაღში დადის. შინ რომ ვბრუნდები, ყოველდღე ახალ–ახალ რაღაცეებს მახვედრებს, რასაც იქ სწავლობს. ტექნოლოგიებში მისი ასაკის შეუფერებლად ერკვევა, ისეთ ფუნქციებს "აძრობს", რომელიც არც მე ვიცი და არც ჩემმა ცოლმა. უცხო ენებისადმი აქვს მიდრეკილება, ანბანი აქვს აიპოდში გადმოწერილი და რუსულს და ინგლისურს თავისით სწავლობს. მოკლედ, დედასაც ძალიან ჰგავს და მამასაც. ვთვლი, რომ არამარტო ჩემი შვილია ნიჭიერი, თაობა მოდის საოცრად განვითარებული, მათ ინდიგო ბავშვებს ეძახიან.
ვცდილობ, ყურადღებიანი მამა ვიყო. მას არასოდეს ვეჩხუბები, დედა–შვილი კი ხშირად კამათობენ. შვილთან ერთად ისედაც ცოტა დროს ვატარებ და ამიტომ არასოდეს ვტუქსავ. ჩემს შოუებს უყურებს, განსაკუთრებით უყვარს "კომედი შოუ" და პერსონაჟი მარეხი, ანუ თათია სულუაშვილი.
– მეორე შვილის ყოლას არ გეგმავთ?
– ახლო მომავლის გეგმებში მეორე შვილი არ შედის.
ლანა კიკნაძე, ჟურნალი სარკე