რას ერჩის ''ნიჭიერი'' თავის სასქესო ორგანოს

23 წლის თემო ლოლაძე ''ნიჭიერის'' ეთერში გასვლის შემდეგ მთელმა საქართველომ გაიცნო, თუმცა არ იციან, რომ ამ ახალგაზრდამ რამდენიმე თვის წინაც გააოცა საზოგადოება. თემო ტრუსის ამარა კახი კალაძის გამოსამშვიდობებელი მატჩის დროს სტადიონზე შეიჭრა. ახლა კი თავისი პოპულარობა ''ნიჭიერში'' გამოსვლით გაიმყარა. მან ფილარმონიის სცენაზე ბლოკები და ხის ნაჭრები გადაიმტვრია, ამაში კი მეგობრები დაეხმარნენ. მეორე ტურში გადავიდა, თუმცა ძალიან დიდი იყო შანსი, რომ შოუ დაეტოვებინა, რადგან ნომერი უცნაურად დაიწყო. ჟიურის არწმუნებდა, რომ მწოლიარე მდგომარეობაში ჰაერში გაჩერდებოდა, თუმცა ისე, რომ მხოლოდ ფეხები ექნებოდა სკამზე დალაგებული. ეს უცნაური ნომერი არ გამოუვიდა და ორჯერ იატაკზე დაეცა. როგორც ინტერვიუს დროს გავარკვიეთ, ეს მისი გამოსვლის ნაწილი ყოფილა და ჟიურის გასამხიარულებლად მოიგონა, რეალურად კი ბლოკებისა და ხის ნაჭრების იმედად იყო, რამაც სახელი მთელ საქართველოში გაუთქვა.

- თბილისში დავიბადე და გავიზარდე. ცხრა წელი ვთამაშობდი ფეხბურთს და ტრავმის გამო თავის დანებებამ მომიწია. ამის მიუხედავად, ბევრი მარათონი მოვიგე. როცა დრო მაქვს, იპოდრომზე მივდივარ და ვვარჯიშობ. ერთხელ ქაღალდის თვითმფრინავების კონკურსი მოვიგე, საქართველოს ჩემპიონი გავხდი და ავსტრიაში წავედი, ზალცბურგის მსოფლიო ჩემპიონატზე. იქ ოცეულში მოვხვდი და ძალიან კარგი ხალხი გავიცანი.
- საკმაოდ ორიგინალური იმიჯი გაქვს...
- ბავშვობიდან გრძელ თმას ვატარებ. ბებია მეხუმრებოდა ხოლმე, პონის ჰგავხარო. ბლანჟე სპეციალურად არ მაქვს, უბრალოდ, წვერი სხვაგან არ ამომდის. ამის გამო დონ კიხოტს მამსგავსებენ. ერთი ძმა მყავს, 33 წლის, მოსკოვში ცხოვრობს და საქმიანობს. ჩემგან განსხვავებით, ის დაიჩაგრა, რადგან სხვა დროში დაიბადა. ოჯახში გრძელ თმასა და საყურეს უშლიდნენ. მახსოვს, სახლიდან ჩვეულებრივი შარვლით გადიოდა და გარეთ დახეულ ჯინსებს იცვამდა. მამას ჩემი გიჟობები დიდად არ მოსწონდა. მამა პროფესორია, ბაბუა - ლექტორი. ოჯახში არამისაბაძ შვილიშვილად მივიჩნეოდი.
- ნომერი, რომელმაც ''ნიჭიერში'' ყველა გააოცა. ასეთი უცნაური გართობა საიდან მოიგონე?
- ყოველთვის მინდოდა ასეთ შოუში მონაწილეობა. ჩემი ნომერი იუმორისტულია, თუმცა ბევრი მაზოხისტურსაც უწოდებს. მე მგონი, გაამართლა, რადგან ნახევარი თბილისი ჩემზე და ჩემი სხეულის ერთ ნაწილზე ლაპარაკობს.
- ნომერი უცნაურად დაიწყე, ჟიურის არწმუნებდი, რომ მწოლიარე მდგომარეობაში, ერთ სკამზე ფეხის ქუსლებით ჰაერში გაჩერდებოდი.
- ეს ყველაფერი იუმორი იყო, რეალურად ასეთი რაღაც არ ხდება. მიყვარს რისკი, მთელი ცხოვრება ასე მოვდივარ. საქართველოში ყველაფერი რისკია, ყოველდღე სახლიდან გასვლაც კი. ხომ ნახეთ, ჟიურიმ ნომრის დასაწყისში ორი ''არა'' მომცა, დამცინეს, არც იფიქრებდნენ, რომ შემდეგ ტურში გადამიყვანდნენ.
- რაც შენ სცენაზე გააკეთე, მგონი, არ არის ნორმალური, თუნდაც იმიტომ, რომ ჯანმრთელობისთვის საშიშია.
- ამის მიღწევა ვარჯიშის შედეგია, თან არსებობს ტექნიკა, რომ ტკივილი აირიდო. ამ ნომრის შემდეგ მომიწია ექიმთან მისვლამ და მშვიდობაა, არავითარი პრობლემა არ მაქვს (იცინის). მშობლები ჩაწერას არ დასწრებიან და ეთერში რომ ნახეს - გაგიჟდნენ, მამა მეუბნებოდა, ცოტა ნორმალური რამე ვერ მოიფიქრეო? სიმღერა მე არ შემიძლია და ცეკვით დღეს ვერავის გააოცებ.
- თემო, სად მუშაობ?
- ერთ-ერთ გასართობ ცენტრში ანიმატორად. ''ნიჭიერში'' გამოსვლის შემდეგ, სამსახურში რომ მივედი, ბავშვებმა მიცნეს, ჩემთან ერთად სურათებს იღებდნენ და ავტოგრაფებს მთხოვდნენ.
- ყველაზე გიჟური კიდევ რა გაგიკეთებია ცხოვრებაში?
- ალბათ გახსოვთ, კახი კალაძის გამოსამშვიდობებელი მატჩი, სტადიონზე ტიტველი გადავხტი. ეს იყო ჩემი ოცნების ასრულება. ფეხბურთელები ამ სიურპრიზს არ ელოდნენ. მთელი ბავშვობა იმაზე ვოცნებობდი, რომ ''დინამოს'' სავსე სტადიონზე გავსულიყავი. თან ''მილანის'' გულშემატკივარი ვარ, მოედანზე ჩემი კერპები იყვნენ. მათ წინ გავირბინე და თან ისე, რომ ვიღაც კი არ ვიყავი, ყველა მე მიყურებდა. ჩემი ფავორიტი ფეხბურთელი ინძაგი გამომეკიდა. ხალისიანი გამოვიდა ყველაფერი. კარგად გაერთნენ.

- ''ნიჭიერს'' დავუბრუნდეთ... შენი უცნაური ნომრით ჟიურიში მყოფი ქალბატონები გააბრაზე.
- სამაგიეროდ, მერე ხომ გამხიარულდნენ, ტანზე რომ შემოვიხიე (იცინის). იმედი მაქვს, არ ინანებენ ნახევარფინალში და მიხვდებიან, რომ სწორი არჩევანი გააკეთეს. ახლა განსაკუთრებულად ვემზადები. არ გეტყვით, როგორ გამოვალ. ხალხის მხრიდან იმხელა გამოხმაურება მოჰყვა ჩემს გამოსვლას, რომ სოციალურ ქსელში უამრავი შეტყობინება მომდის.

- როგორ ფიქრობ, სპორტის ამ უცნაურ სახეობას საქართველოში მიმდევრები გამოუჩნდებიან?
- იმედია, არა, რამე რომ არასწორად მოხდეს, მერე მე მომთხოვენ ბავშვების გაკეთებას. ისედაც ცოტა დავრჩით დედამიწაზე მამაკაცები (იღიმის). ძალიან ბევრ ცნობილ ადამიანს ვიცნობ. ამ ნომრის შემდეგ ყველა მწერდა, ეს სიგიჟე როგორ ჩაიდინეო.
- ვინ არიან შენი ცნობილი მეგობრები?
- ნინუცა მაყაშვილი, ნიკა გრიგოლია, მიშა ანდღულაძე, რომელიც ჩემი ბავშვობის კერპია. პირველად მიშას ცოლისდა, ია უძილაური გავიცანი. როგორც იცით, ის საქართველოში პირველი ქალი ფიტნესმოდელია. ერთმანეთი დანახვისთანავე მოგვეწონა. მალე დავმეგობრდით და შემდეგ მთელი ოჯახი გავიცანი.
- წეღან ახსენე, რომ სოციალურ ქსელში ბევრი შეტყობინება მოგდის, ყველაზე უცნაური რა მოუწერიათ?
- მეტსახელებს მარქმევენ. ''კვერცხულესს'' მეძახიან, ჰერკულესის პონტში გადააკეთეს. ასევე მეძახიან ''კვერცხმენს'' , ''გოგლი-მოგლის'' . ვიღაცამ ჩაკ ნორისს ტანზე ჩემი თავი მიამონტაჟა და ღადაობენ.
- შენ, მგონი, გივი სიხარულიძის სერიოზული კონკურენტი გახდი, რადგან აქამდე მას ეძახდნენ ქართველ ჩაკ ნორისს.
- (იცინის) ალბათ, სიძლიერეში ვარ კონკურენტი... ერთმა მომწერა, რომ კასტრირებული ვარ. დავამშვიდე, რომ არ ვარ, მაგრამ ვუთხარი, რომ ამის დასადასტურებლად სურათს ვერ გადავიღებდი, რადგან უფრო დიდი გამოხმაურება მოჰყვებოდა. ქუჩაში ხალხი რომ მხვდება, მეკითხებიან, ჩაცმული რატომ ხარო.
- თემო, ახლა საუბარი შენი პირადი ცხოვრებით გავაგრძელოთ. ადვილად ხიბლავ გოგონებს?
- გოგონებისგან უყურადღებობას არ განვიცდი. მე მგონი, მოვწონვარ. ბავშვობაში კომპლექსი მქონდა. მხოლოდ სპორტით ვიყავი დაკავებული და სხვა არაფერი მაინტერესებდა. თავის დანებების შემდეგ, ჩემს იმიჯზე უფრო მეტად ვიზრუნე და ყოველთვის ვცდილობ, ისე გამოვიყურებოდე, რომ გოგონას, რომელიც ჩემთან ერთად იქნება, არ შერცხვეს.

- რითი ხიბლავ გოგონებს?
- სიშიშვლით... რა თქმა უნდა, ვხუმრობ, ალბათ უფრო - ჩემი იუმორით. ერთხელ ერთი გოგონა მეექვსე სართულიდან გავიცანი, ქაღალდის თვითმფრინავით. აივანზე იჯდა და მე ზედა სართულზე ვიყავი. ქაღალდის თვითმფრინავი გავაკეთე, ზედ ჩემი ''ფეისბუქის'' მისამართი დავაწერე და ზევიდან ვესროლე. პირდაპირ ფეხებთან დაეცა. გოგონა გაოცდა და ''ფეისბუქზე'' დამამატა. მართალია, შორს ვერ წავედით, მაგრამ კარგ მეგობრებად დავრჩით.
- რთული შეყვარებული ხარ?
- არა, ეჭვიანი არ ვარ. მინდა, ნდობაზე ავაწყო ურთიერთობა. შემიძლია, გოგონა მარტო გავუშვა კლუბში. არც ჩაცმულობაზე მაქვს პრეტენზია. მომწონს, როდესაც ჩემს გოგონას სექსუალურად აცვია. ახლა შეყვარებული არ მყავს, მარტო ვარ. ტაიმ-აუტი მაქვს აღებული.
- თემო, რა პროფესიის ხარ?
- წელს ჩავაბარე მაგისტრატურაში ტელეკომუნიკაციის ფაკულტეტზე. მამაჩემისთვის ყველაზე მთავარი სწავლაა. მამას უნდა, პროფესორი გავხდე, მაგრამ ჩემი თავი ამ ამპლუაში ნაკლებად წარმომიდგენია.
- კიდევ თუ გაქვს რაიმე უცნაური გატაცება?
- მეგობრები ''ფრის ბი''-ს ვთამაშობთ. ფილმებში ალბათ გინახავთ, როდესაც მთავარი გმირები საკუთარ ძაღლებთან თეფშებით თამაშობენ. პატრონი თეფშს უგდებს და ძაღლი კბილებით იჭერს. ისეთი სპორტია, სადაც ორივე სქესი თამაშობს. მოწინააღმდეგე ჯგუფებში ექვს-ექვსი ადამიანი ვართ, მონიშნულია ადგილები, სადაც მოწინააღმდეგე გუნდის მიერ ნასროლი თეფში უნდა დაიჭირო.
- კბილებით იჭერთ?
- არა, ვის აქვს მაგის კბილები?! ისე, ძალიან კარგი იდეაა.
- მსახიობობაზე არ გიფიქრია?
- ძალიან მინდა. ანიმატორად მუშაობისას, ხან კლოუნი ვარ, ხან - ჯეკი ბეღურა. ვნახოთ, იქნებ, კინოშიც გადამიღონ.
- ძალიან თავისუფალი ადამიანი ხარ. ცხოვრობ ისე, როგორც მოგწონს და გიხარია. საქართველოში ეს რთული არ არის?
- გამიმართლა, რომ დედაქალაქში ვცხოვრობ. თავიდან ჩემს გრძელ თმაზე ბევრს პრეტენზია ჰქონდა, მაგრამ გოგონებში პოპულარული ვარ და მიხვდნენ, რომ არატრადიციული ორიენტაციის არ ვარ. ახლა უფრო პატივს მცემენ.
- რომელ ქვეყანაში იცხოვრებდი?
- საქართველოში სულ ''ავტოსტოპით'' ვმოგზაურობ და ჩემი ოცნებაა, რომ მთელ მსოფლიოში ვიმოგზაურო. ამერიკაში მინდა ჩავაღწიო.
- ათი წლის შემდეგ როგორ წარმოგიდგენია შენი ცხოვრება?
- მაგ კითხვას ალბათ დღეში ცხრაჯერ ვუსვამ საკუთარ თავს. პოპულარობა მინდა, ხალხი რომ შემხვდება - გამიღიმოს. მსიამოვნებს ყურადღება.
ნინო გიგიშვილი
ჟურნალი ''რეიტინგი''