გიორგი ვარდოსანიძისა და სალომე ჭაჭუას ტანგო ზღვის სანაპიროზე

მსახიობ გიორგი ვარდოსანიძეს ერთი ოცნება უკვე აუხდა - სპექტაკლში დორიან გრეის გმირზე მუშაობა დაიწყო. მუსიკისა და დრამის თეატრი დეკემბერში პრემიერისთვის ემზადება. როგორი იქნება ეს გმირი XXI საუკუნეში, - ამაზე წლის ბოლოს ვისაუბრებთ. ახლა კი მსახიობი პროფესიულ სიახლეებსა და პირად ცხოვრებაზე მოგვითხრობს.

- ვილნიუსიდან ახალი ჩამოსული ხარ. გასტროლმა როგორ ჩაიარა?
- ვილნიუსში სულ 4 დღე ვიყავით, "მაკბეტი" ვითამაშეთ. გასტროლმა კარგად ჩაიარა. კრიტიკოსებმა მხატვრობაზე, სცენოგრაფიაზე, მსახიობებზე დადებითი რეცენზიები დაწერეს. მიხარია, რომ ჩვენს გამოსვლას ასეთი გამოხმაურება მოჰყვა. იქაურ მსახიობებს, კრიტიკოსებს აინტერესებდათ, დასი რა სპეციფიკით მუშაობს. ძალიან გაუკვირდათ, როდესაც დავით დოიაშვილმა უთხრა, - ჩვენ გვყავს მსახიობები, რომლებიც არიან პლასტიკურები, მღერიან და თამაშობენო.

- რიგითმა მაყურებელმა როგორ მიგიღოთ?
- ცოტათი თავშეკავებული მაყურებელია, მაგრამ პირველი ნაწილი და შემდეგ სპექტაკლი რომ დამთავრდა, ისეთი ტაში დასცხეს, გაგვიკვირდა. თავად არ შევხვედრივარ, მაგრამ ვიცი, სპექტაკლს იქ მცხოვრები ქართველებიც ესწრებოდნენ.

- ახალ სპექტაკლზე მუშაობა დაიწყე, არა?
- რამდენიმე დღეა, ნინი ჩაკვეტაძემ დაიწყო მუშაობა სპექტაკლზე - "დორიან გრეი". დორიან გრეი მე ვარ.

- ოცნება აგხდენია. მახსოვს, ერთხელ ინტერვიუში მითხარი, ჩემი საოცნებო როლიაო.
- მართალია, ერთადერთი საოცნებო როლი მქონდა. ამ გმირს მოწიწებით ვეპყრობი, ცოტათი მეშინია კიდეც.

- ოსკარ უაილდის მთავარი პერსონაჟი რით გიზიდავს?
- ეს გმირი დიდ მეტამორფოზას განიცდის, სწორედ ამიტომაა ძალიან საინტერესო სამუშაო. მსახიობმა უნდა შეძლო და გაიარო გზა - ანგელოზიდან ეშმაკამდე. ვნახოთ, რა გამომივა. დორიან გრეი ჩემი ასაკის პერსონაჟია. რომ არ გამომივიდეს, ამას ასაკს ვერ დავაბრალებ. რამდენიმე დღეა, რეპეტიციები დავიწყეთ. მე და დორიანი ჯერ ვერ "ვძმაკაცობთ", ერთმანეთს უბრალოდ, შორიდან ვიცნობთ. იმედია, მალე დავმეგობრდებით. სპექტაკლში ეპოქა შეცვლილია. არ მინდა, ყველაფერი გავამხილო, მაგრამ იმის თქმა კი შემიძლია, რომ ეს გმირი XXI საუკუნეში ცხოვრობს.

- სპექტაკლში შენთან ერთად, რომელ მსახიობებს ვიხილავთ?
- თორნიკე გოგრიჭიანს, გიორგი ბახუტაშვილს, ეკა დემეტრაძეს და შაკო მირიანაშვილს.

- ედიშერ გოგსაძე შენი ახალი პერსონაჟია სერიალიდან - "კოქტეილი". მასზე რას გვეტყვი?
- გადაღებები გრძელდება. მეორე სეზონი ბევრად ფერადი, ლამაზი და მრავალფეროვანია. გავფართოვდით, პავილიონი გვაქვს. ვერ ვიტყვი, რომ ჩემს ედიშერს ლევანიე ხომერიკის მსგავსი წარმატება აქვს. ჯერ ახალი დაწყებულია და ამ გმირზე იმედს ვამყარებ.

- გადაცემაში "გააცინე და მოიგე" კარგად ერთობი.
- მიხარია, რომ ამ გადაცემას მაღალი რეიტინგი აქვს. სრული იმპროვიზაციაა და გადაცემის ხიბლიც ამაშია.

- "ცეკვავენ ვარსკვლავების" აქტიური მაყურებელი ხარ. ამისთვის რამდენიმე მიზეზი გაქვს...
- არც ერთ გადაცემას არ ვტოვებ, რადგან ბევრი ჩემი მეგობარი ცეკვავს. რეპეტიციებსაც ვესწრები. თითოეული მონაწილის კარგად მესმის. საკუთარ თავზე მაქვს გამოცდილი, არაპროფესიონალისთვის რა დიდი შრომაა საჭირო, რომ მაყურებლის წინაშე ღირსეულად წარდგეს.

- კულუარებში დაძაბულობა იგრძნობა?
- რა თქმა უნდა, ძალიან ნერვიულობენ. შოუ ახალი დაწყებულია და უკვე დაღლილები არიან. პირველ სეზონზე, ეკრანზე ატირებულ მონაწილეს რომ ვხედავდი, ის ცრემლები ყალბი მეგონა, ახლა კი ვიცი, იქ რა დიდი სტრესია. შარშან მეც მათსავით დაძაბული ვიყავი. ამ პროექტმა სერიოზული ნევროზი დამმართა.

- და წონაში 20 კილო დაგაკლებინა, არა?
- დილიდან დაღამებამდე ვვარჯიშობდი, მართლა თავდაუზოგავად ვშრომობდი.

- შრომა დაგიფასდა. წლევანდელი მონაწილეებიდან რომელს გულშემატკივრობ?
- გამოკვეთილი ლიდერები გოგონები უფრო არიან. ნოდარ გურგენაშვილს ვგულშემატკივრობდი, ჩემი ფალავანი იყო. პროექტი რომ დატოვა, ვინერვიულე.

- სალომე ჭაჭუაზე რას გვეტყვი?
- სალომე პროფესიონალი მოცეკვავეა, ნოდარი კი ჩემი რჩეული ვარსკვლავი იყო.

- მოგებული მანქანა გაყიდე?
- გავყიდე და იმ ფულით ვალები გადავიხადე. ბანკის ვალი 20 ათასამდე მქონდა დაგროვილი; ოჯახის წევრებსა და მეგობრებს პატარა საჩუქრები გავუკეთე, დავისვენე და ახალი მანქანაც ვიყიდე. მთელი წელი ჩემს "რენჯ როვერზე" რომ ლაპარაკობდა, მაინტერესებს, აწი რაღას იტყვის ოთარ ტატიშვილი?!

- სახლის ასაშენებლად მიწას რომ ეძებდი, იპოვე?
- ჰო, რაღაც გეგმები მქონდა, მაგრამ მერე მივხვდი, ამ ეტაპზე არარეალურ საქმეს ვეჭიდებოდი და შევეშვი.

- მატერიალური მდგომარეობის გამო?
- რა თქმა უნდა! ქამარი ძალიან უნდა შემომეჭირა, რომ ეს საქმე წამომეწყო და ცოტა ხნით შევეშვი. ძალიან მინდა, ქალაქგარეთ პატარა სახლი მქონდეს, სადაც ყოველდღიურობისგან გაქცეული თავს შევაფარებ.

- გუშინ რომ დაგირეკე, იმ პირობით შემხვდი, პირად ცხოვრებაზე თუ არაფერს გკითხავდი. პირობა კი მოგეცი, მაგრამ უნდა დავარღვიო...
- (იცინის) გინდა, მაინც მალაპარაკო?

- შენი და სალომე ჭაჭუას სიყვარულის ამბავს ბევრი ადამიანი აგრესიულად შეხვდა. როგორ ფიქრობ, ამის მიზეზი რა იყო?
- მე და სალომე ერთად ვართ, კარგად ვართ და ვერ ვხვდები, ადამიანები რატომ იბოღმებიან? მათ ან საკუთარი პირადი ცხოვრება არ აქვთ, ან ბოროტები არიან, ან - უსაქმურები. არ მინდა დავიჯერო, რომ ქვეყანაში ამდენი ბოროტი ადამიანი ცხოვრობს.

- წყენა "ფეისბუკში" პოსტითაც გამოხატე.
- მიუხედავად იმისა, რომ სოციალურ ქსელში აქტიურობით არ გამოვირჩევი, მომინდა, ჩემი განწყობილების შესახებ დამეწერა.

- ამ ყველაფერზე სალომე როგორ რეაგირებს?
- გული სწყდება, მაგრამ ყველას ვერ ვუპასუხებთ, ნერვების აშლაც არ ღირს. ვინც ჩვენ გვიცნობს, იციან, როგორებიც ვართ. არავის არაფრის მტკიცებას არ დავუწყებთ.

- სოციალურ ქსელში ზღვის ნაპირზე გადაღებული შენი და სალომეს ფოტო გავრცელდა, რომელზეც მხოლოდ თქვენი სილუეტი ჩანს. ამ ფოტოზე მიამბე.
- ეს ფოტო მეგობარმა, კვარიათში გადაიღო. ვიღაცებს ეგონათ, რომ სხვა აზრი იყო ჩადებული, სინამდვილეში კი ცეკვის ილეთია.

- ზღვის ნაპირზე ცეკვავდით?
- მე და სალომე ვრეპეტიციობდით. ვგეგმავდით, მომავალში ჩემი პორტფოლიოსთვის გადაგვეღო, როგორ ვცეკვავ ტანგოს. კვარიათში მეგობრებთან ერთად ვიყავით, ბიჭები მწვადს წვავდნენ და ერთ-ერთმა მათგანმა ეს ფოტო გადაგვიღო.

- შენი და სალომეს შესახებ ლაპარაკი მაშინ დაიწყო, როცა "ცეკვავენ ვარსკვლავებში" დაგაწყვილეს. ერთიც და მეორეც მაშინ ყველაფერს უარყოფდით...
- მას შემდეგ კიდევ სხვა ადამიანებთან დამაწყვილეს და დამაქორწინეს. ამას მიჩვეული ვარ. მე და სალომე ამ შოუში დავმეგობრდით, 2-3 თვის წინ კი მივხვდით, რომ მეგობრობა სხვა გრძნობაში გადაიზარდა. სალომე ჩემი და თამთა შალამბერიძის დაშორების მიზეზი ნამდვილად არ ყოფილა. თამთას დაახლოებით, 1 წლის წინ დავშორდი.

- დღეს მასთან როგორი ურთიერთობა გაქვს?
- სამწუხაროდ, ვერ ვმეგობრობთ, მაგრამ მას წარმატებებს გულით ვუსურვებ!

- შენი და სალომეს ურთიერთობა მომავალში როგორ წარმოგიდგენია?
- ამაზე არც კი ვფიქრობთ, მომავალს არ ვგეგმავთ. ერთმანეთი გვიყვარს და ამ ურთიერთობით ვტკბებით. მინდა, მომავალშიც ასე იყოს.

- ერთმანეთს რჩევას ხშირად აძლევთ?
- რა თქმა უნდა, ერთმანეთის აზრი ჩვენთვის მნიშვნელოვანია. ერთმანეთს ვეხმარებით.

- ორივე პოპულარული ხართ. ერთმანეთზე ეჭვიანობთ?
- არა, ჩვენს ურთიერთობაში ნდობის ხარისხი ძალიან მაღალია.

- სიგიჟეებზე რას იტყვი?
- სიგიჟეები არასდროს მაკლდა და არც ახლა მაკლია. ყველაფერს ნუ მომაყოლებ, ცოტას ჩემთვისაც დავიტოვებ.

თამუნა კვინიკაძე

ჟურნალი ”გზა”