თამუნა ნიკოლაძის და, სოფო ნიკოლაძე, მომავალმა ქმარმა კონსტანტინე თედელურმა ხიზილალის ტორტით მოხიბლა

პოპულარულმა მსახიობმა, თამუნა ნიკოლაძემ, არც ისე დიდიხანია, რაც და, სოფო გაათხოვა. სიძედ კი, არც მეტი, არც ნაკლები, შეფმზარეული ჰყავს, თანაც გერმანიაში მიღებული გამოცდილებით. ის საქართველოში ცოტა ხნის წინ ჩამოვიდა და უკვე მეორე ტელეპროექტში მუშაობს თავისი პროფესიით, თუმცა განათლებით არქიტექტურისა და ინტერიერის დიზაინერია. კონსტანტინე თედელური და სოფო ნიკოლაძე მალე პირველი შვილის მშობლები გახდებიან.
– კონსტანტინე, პირველ რიგში, კულინარიაზე გკითხავთ. ამ საქმით რატომ დაინტერესდით?
კონსტანტინე: საქართველოში ყოფნისას სულ მომწონდა სამზარეულოში რაღაცეების კეთება, მაგრამ ვერ ვიტყვი, რომ კარგი კულინარი ვიყავი. ბერლინში მარტო დავრჩი და თავისთავად მომიწია ამ საქმის კეთება, ანუ კულინარიის სწავლა. იქაურ მეგობრებს ჩემ მიერ მომზადებულ სადილს რომ ვასინჯებდი, მოსწონდათ. ამიტომ მივედი ბერლინში არსებულ ქართულ რესტორანში, სადაც ერთკვირიანი პრაქტიკა გავიარე, შემდეგ კი შეფმზარეულის თანაშემწედ ამიყვანეს. ერთი წლის მერე შეფმზარეული გავხდი. ამასობაში ბერლინში გაიხსნა მეორე ქართული რესტორანი, სადაც მიმიწვიეს.
– ტელევიზიაში როგორღა აღმოჩნდით?
კონსტანტინე: საქართველოში დაბრუნების მერე ტელეკომპანია "მაესტროზე" მუსიკალურ პროექტ "მაგთიფანში" კვირაში ორჯერ მაყურებლების და მონაწილეების წინაშე კერძებს ვამზადებდი. პროექტის დასრულების შემდეგ გავიგე, რომ ტელეკომპანია "იმედში" "დღის შოუსთვის" კულინარიის წამყვანს ეძებდნენ. მივედი, სხვადასხვა ეტაპი გავიარე და თანამშრომლობა დავიწყეთ.
– როგორც გავიგეთ, თქვენ პოპულარული მსახიობის, "დები ღლონტებიდან" ერთ–ერთის, თამუნა ნიკოლაძის სიძე ხართ, მისი და სოფო გყავთ ცოლად. თქვენი სიყვარულის ისტორია სად და როგორ დაიწყო?
სოფო: 2008 წელს კონსტანტინე თბილისში იყო ცოტა ხნით ჩამოსული და საერთო მეგობრისგან გავიცანი. სულ ორჯერ ვნახე. მერე, 2011 წელს, მე და ჩემი მეგობარი, რომელიც ასევე კოტეს მეგობარია, სამოგზაუროდ ბერლინში წავედით. იქ უკვე კოტეს სახლში მივედით და ჩვენი სიყვარულის ისტორიაც დაიწყო. იქიდან ერთად წამოვედით. ერთ თვეში კი ხელი მთხოვა.
– ალბათ თავისი კულინარიული ნიჭით გაკვირვებდათ.
სოფო: ისე დაემთხვა, რომ იქ მომიწია დაბადების დღის გადახდა. კოტემ ხიზილალის ტორტი გამიკეთა იმიტომ, რომ მთელი დღე რესტორანში მუშაობდა და სხვა ტორტის გაკეთება ვერ მოასწრო.
– ხიზილალის ტორტი როგორია?
კონსტანტინე: რთული რეცეპტი არაა. ხრაშუნა პურზე კარაქი წავუსვი, ზემოდან ხიზილალა და ლიმონის ნაჭერი დავადე... (იცინიან).
– კონსტანტინე, სოფო პირველივე დანახვისას მოგეწონათ?
კონსტანტინე: ვერ ვიტყვი, რომ მე და სოფომ ერთმანეთი როგორც კი დავინახეთ, შეყვარებულებად ვიქეცით. როგორც მეგობრის მეგობარი, ისე გავიცანი. როგორც კი ჩამოვიდა ბერლინში, იმ საღამოსვე კლუბში წავედით გასართობად და იმ დღიდან ერთად ვართ.
სოფო: ერთ თვეში უკვე ნიშნობა გვქონდა. ერთმანეთის ოჯახები გავიცანით. ახლა მარტო, დამოუკიდებლად ვცხოვრობთ.
– ქორწილი გქონდათ?
სოფო: ქორწილი ჯერ არ გადაგვიხდია. არც ხელი გვაქვს მოწერილი და არც ჯვარი გვაქვს დაწერილი. არადა ორივე ტრადიციულ ქართულ ოჯახებში ვართ გაზრდილი. ახლა შვილს ველოდებით, ამიტომ ქორწილი გადავდეთ, მერე გადავიხდით.
– კონსტანტინე, იმ პერიოდში, როცა სოფო გაიცანით, მისი და, თამუნა ნიკოლაძე ქართველი მაყურებლის საყვარელი სერიალის ერთ–ერთი პოპულარული პერსონაჟი იყო. იცოდით მის შესახებ?
კონსტანტინე: არა, დედმამიშვილებზე ჩამოვარდა საუბარი და სოფომ მითხრა, რომ მსახიობი და ჰყავდა, რომელიც ერთ–ერთი სერიალის მთავარი გმირი იყო. ძალიან მომწონს თამუნა, შეფარული იუმორის გრძნობა აქვს.
– სოფო, რადგან ქმარი კარგი კულინარი გყავთ, ეს იმას ნიშნავს, რომ სამზარეულოში არაფრის კეთება გიწევთ?
სოფო: ასეც არ არის. მეც ვამზადებ კერძებს, მაგრამ ძირითადად სახლში არც ვიკვებებით. დიდი კულინარი არ ვარ, მაგრამ რამეს თუ ვაკეთებ, კოტესგან ვიღებ რჩევებს. ძალიან მიყვარს ვიეტნამური სამზარეულო და ბერლინში ყოფნისას ხშირად მანებივრებდა ვიეტნამური კერძებით. მათში ბევრი ისეთი ინგრედიენტი შედის, რომელიც აქ არ იშოვება, თუნდაც კრევეტებს ვერ იყიდი. აქ ზღვის კარგი პროდუქტი ძვირი ღირს.
– სოფო, ორსულობის გამო ეგზოტიკური კერძების სურვილი ხომ არ გაგიმძაფრდათ?
სოფო: პრეტენზიული ორსული არ ვარ. არც კოტეს სჭირდება ჩემთვის განსაკუთრებული კერძების მომზადება. ძალიან მიყვარს ჩინური სამზარეულო, მაგრამ ორსულობის პერიოდში მისგან თავს ვიკავებ.
– სოფო, მოგწონთ თქვენი ქმრის მუშაობა პირდაპირ ეთერში?
სოფო: ძალიან ვგულშემატკივრობ კოტეს და მთლიანად გადაცემას. რა თქმა უნდა, კონსტანტინეს ბევრ რამეს ვურჩევ, რადგან საქართველოში არ ცხოვრობდა და კარგად არ იცნობს ქართველ საზოგადოებას. აქ წარმატებას და პოპულარობას ცუდი მხარეებიც მოჰყვება. სახლში ერთი პოპულარულ სახე უკვე მყავს და ვიცი, ეს რას ნიშნავს – ბევრი ადამიანის ინტერესის ობიექტი ხდები.
კონსტანტინე: აქ ადამიანები ერთმანეთის ცხოვრებით ცხოვრობენ. ვიღაც ყოველთვის ინტერესდება ვიღაცის პირადი, ინტიმური დეტალებით. მერე ამაზე თავიანთი ინტერპრეტაციებით საუბრობენ. ყველაფერი უკეთესად იქნება, თუ ყველა თავის საქმეს გააკეთებს. ჯერჯერობით ჭორის ობიექტი არ გავმხდარვარ.
– კონსტანტინე, რა განსხვავებაა თბილისურ და ბერლინურ ურთიერთობებს შორის?
კონსტანტინე: ერთ შემთხვევას მოვყვები: აქ ერთ–ერთ კლუბში ვცეკვავდი და თან ვიღიმებოდი. ეს ბუნებრივია, რადგან, თუ ცუდ ხასიათზე ხარ და არ გეღიმება, რატომ იცეკვებ? ამ დროს ერთ–ერთი ქლაბერი მომიახლოვდა და გაკვირვებულმა მკითხა, აქ ყოფნა გიხარიაო. გამიკვირდა და ვერც გავიგე, რა უნდოდა კითხვის ავტორს. აქ უკვირთ, თუ იღიმები.
სოფო: გერმანიაში ყველა იღიმება, იცნობ თუ არა. ესეც გარკვეული ნიღაბია, რა თქმა უნდა, მაგრამ ბევრად სასიამოვნოა ღიმილიანი სახის დანახვა, ვიდრე მოღუშულის.
– კონსტანტინე, საინტერესოდ და ორიგინალურად გაცვიათ. ეს სტილი თავად შეარჩეთ?
კონსტანტინე: სამოსის დეტალებს თავად ვქმნი და შემდეგ მკერავს ვაკერვინებ. მოდაც მაინტერესებს, მაგრამ ჰობის დონეზე.
სოფო: გადაცემაში თავისი დიზაინით შეკერილი სამოსი აცვია. ერთ–ერთი საინტერესო დეტალი იყო კოტეს პერანგზე ქართული ჩოხის ელემენტი გულმკერდზე საწამლით, სადაც სუნელებს ყრის.
– დაბოლოს, რა არის თქვენი საერთო, საყვარელი კერძი, რომლის რეცეპტსაც გაგვიმხელთ?
სოფო: ძალიან გვიყვარს სოკოს წვნიანი.
კონსტანტინე: ხახვს წვრილად დავჭრით, მოვშუშავთ, შემდეგ წვრილ სახეხზე ქამა სოკოს გავხეხავთ, ავურევთ ხახვთან ერთად, სამი წუთი ვშუშავთ თავდახურულ მდგომარეობაში, შემდეგ ვასხამთ ერთ ლიტრ წყალს, ვადუღებთ იქამდე, სანამ წყალი არ განახევრდება. მერე ერთ ლიტრ ნაღებს ვასხამთ, ვუზამთ მარილს, წვრილად დაჭრილ კამას და შავ, დაფხვნილ წიწაკას გემოვნებით.
მანანა ნოდია, ჟურნალი სარკე