თინა კანდელაკი ოლიმპიური ჩირაღდნითა და მაისურზე წარწერით "საქართველო-რუსეთი"

რუსეთში მოღვაწე ქართველი ჟურნალისტი თინა კანდელაკი სოცლიალურ ქსელ "ფეისბუქში" სოჭის ოლიმპიადაში საქართველოს მონაწილეობის თემას ეხმაურება.

"საქართველოში ზოგიერთი ძალის განზრახვა ქვეყანამ ბოიკოტი გამოუცხადოს სოჭის ოლიმპიურ თამაშებს - ეს პირველ რიგში ქართველ სპორტსმენებზე დარტყმაა, რომლებიც ბოლო წლები ამ მოვლენისთვის ემზადებიან. მართალია, ზამთრის სპორტის სახეობებში საქართველოს ნაკრები - ძალიან მცირეა, მაგრამ ეს არ ნიშნავს, რომ პოლიტიკოსების მოგონილი მოტივების გამო სპორტსმენებსა და მთელ ქვეყენას ეს ზეიმი უნდა წაერთვათ. მით უფრო, რომ ქართველ სპორტსმენებს რუსეთში ნამდვილად ელოდებიან. სპორტი პოლიტიკის მიღმა უნდა იყოს. რაც ყველაზე მნიშვნელოვანია, დარწმუნებული ვარ, რომ რუსეთი და საქართველო მეგობრულად იცხოვრებენ",- წერს კანდელაკი სოციალურ ქსელში.

ჟურნალისტი სოციალურ ქსელში ფოტოსაც აქვეყნებს, რომელზეც ოლიმპიური ჩირაღდანი უჭირავს და მაისური აცვია წარწერით: საქართველო - რუსეთი.

არასამთავრობო ორგანიზაციების - "საერთაშორისო გამჭვირვალობა საქართველოსა" და "სამართლიანი არჩევნების" ორგანიზებით სოჭის ოლიმპიადის ბოიკოტირების საკითხზე პეტიცია შემუშავდა, რომელზეც ონლაინ რეჟიმში ხელმოწერების შეგროვება მიმდინარეობს.

საქართველოს მოქალაქეების აზრით, რომლებიც პეტიციას უერთდებიან, დაუშვებელია სოჭის ოლიმპიადაში ქვეყნის მონაწილეობა მაშინ, როდესაც რუსეთის ხელისუფლება სისტემატურად არღვევს 2008 წლის 12 აგვისტოს შეთანხმებას და ახდენს საოკუპაციო ზოლის გადმოწევას.

2014 წლის ზამთრის ოლიმპიური თამაშები 7 თებერვალს სოჭში ჩატარდება. საქართველოს სახელით ოლიმპიადაში 4-მა სპორტსმენმა უნდა მიიღოს მონაწილეობა.