"ჩემი ორივე ყოფილი ქმარი ერთი და იმავე გვარ–სახელის, ერთი ასაკის და ერთ თვეში დაბადებულები იყვნენ"

ჩემს ცხოვრებაში უცნაური რამ მოხდა. ორჯერ გავთხოვდი და ჩემი ორივე ქმარი ერთი და იმავე გვარ–სახელის, ერთი ასაკის და ერთ თვეში დაბადებულები იყვნენ. ორივესთან დამენგრა ოჯახი.
პირველი ქმარი ძალიან ცუდი ადამიანი აღმოჩნდა. მასთან ცხოვრება არ შეიძლებოდა, რადგან ბოლოს უკვე ფიზიკურ შეურაცხყოფაზე გადადიოდა. ისეთი ტრავმა მომაყენა, განქორწინების შემდეგ გათხოვების ხსენებაც არ მინდოდა. ვერავინ მიბედავდა იმის თქმას, რომ მეორედაც შემექმნა ოჯახი, მაგრამ მერე ყველაფერი შეიცვალა.
ერთ დღეს თანამშრომლებთან ერთად სუფრასთან ვიჯექი. ერთ–ერთს ქმარმა მოაკითხა, რომელსაც მეგობარი მოჰყვა. იმ ბიჭმა თავისი გვარ–სახელით მიიქცია ჩემი ყურადღება. ჩემი ქმრის მოსახელე და მოგვარე იყო. ამაზე უნებურად მქონდა რეაქცია, მან კი ამის გამო მომაქცია ყურადღება. სუფრასთან მოვყევი, რომ ჩემი ყოფილი ქმარი მისი მოსახელე და მოგვარე იყო. ამის შემდეგ საუბარი გავაბით, გამომკითხა, სადაურები იყვნენ, ფუძე სად ჰქონდათ. მითხრა, მასთან არანაირი ნათესაური კავშირი არ მაქვსო. ბოლოს ხუმრობით ვუთხარი, ახლა რომ გავიგო, თქვენი ჰოროსკოპიც ემთხვევა ერთმანეთს, გავგიჟდები–მეთქი. პირადობის მოწმობა რომ დამიდო, თვალები ლამის ბუდიდან ამომიცვივდა. მხოლოდ რიცხვი არ ემთხვეოდა, ერთ წელიწადს და ერთ თვეში იყვნენ დაბადებული!
მეორე დღეს დამირეკა და ხუმრობით მითხრა, შენი ქმრის ორეული გირეკავ, ოღონდ გაცილებით უკეთესი ვარიანტიო. შესანიშნავი იუმორი ჰქონდა და ამით მომხიბლა. ცოლთან ისიც გაყრილი იყო. ერთმანეთს ძალიან დავუახლოვდით. ცოლობა რომ შემომთავაზა, ბევრი არ მიფიქრია და გავთხოვდი. შეყვარებულობის პერიოდში სულ სხვანაირ თვისებებს ამჟღავნებდა, ყოველ შემთხვევაში, მე სხვანაირად ვხედავდი. ერთ ჭერქვეშ დავიწყეთ თუ არა ცხოვრება, იმდენი მსგავსება ვიპოვე მასა და ყოფილ ქმარს შორის, რომ... ახლაც არ ვიცი, ასე რამ დამაბრმავა და მანამდე რატომ ვერ დავინახე ის, რასაც პირველი ქმრისგან გამოვექეცი. თითქოს ჩემი ცხოვრება მეორდებოდა. ბოლოს უკვე ფიზიკურ მსგავსებასაც ვამჩნევდი და ამან ლამის ჭკუიდან შემშალა. მივხვდი, რომ იმ ადამიანისგან უნდა წამოვსულიყავი და ასეც მოვიქეცი.
ახლაც არ ვიცი, ასეთი რამ როგორ ან რატომ მოხდა ჩემს ცხოვრებაში. სხვათა შორის, ჩემები წინააღმდეგები იყვნენ, რომ მას გავყოლოდი ცოლად. მეუბნებოდნენ, მართალია, ნათესავები არ არიან, მაგრამ მისი ჯიშის არის და რაღაცით მაინც ემსგავსებაო. ჩემი ძმის ცოლს ჰოროსკოპების სჯერა, ამიტომ სულ მაფრთხილებდა, არ გარისკო, ერთმანეთს ვერ შეეწყობითო. მე კი ყველას წინააღმდეგ წავედი და ასეთ მდგომარეობაში აღმოვჩნდი.
მაინც ვთვლი, რომ ჩემს თავს რაღაც ამოუხსნელი მოვლენა მოხდა. თითქოს ჩემი ბედისწერა იყო, რომ ორივე ოჯახი უნდა დამნგრეოდა.
სარკის ერთგული მკითხველი