ვისი ვალის გამო ათენებდა ღამეებს მაშო მელქაძე

მაშო მელქაძის გმირი სერიალში ''ჩემი ცოლის დაქალები'' ბრენდებზე გადარეული გოგოა, თავად მაშოსაც ძალიან უყვარს შოპინგი და ფულს იმდენად სწრაფად ხარჯავს, რომ საფულეში ჩადებასაც კი ვერ ასწრებს. მიუხედავად ამისა, მას შემდეგ, რაც დედა გახდა, მის ცხოვრებაში პირველ ადგილზე შვილი - კატუშა დადგა და ყველაფერს იმის მიხედვით საზღვრავს, თუ რა დასჭირდება პატარას.

- თუ ფული მაქვს, ორ დღეში ვრჩები უფულოდ, რადგან ძალიან მხარჯველი ვარ. მიყვარს შოპინგი და შემიძლია, ბოლო კაპიკები ისე დავხარჯო, რომ მეორე დღეზე არ ვიფიქრო. იმდენად მიყვარს ახალი ნივთები, თუ რამე მომეწონა, არ აქვს მნიშვნელობა, ეს ფეხსაცმელი იქნება, ჩანთა თუ სხვა რამ, მაშინვე ვყიდულობ. თუმცა, მას შემდეგ, რაც ბავშვი შემეძინა, მასზე გადავერთე, კატუშამ დაიკავა ის ფინანსები, რასაც საკუთარ თავს ვახმარდი.
- მხარჯველი ყოფილხარ და ფინანსურად არასახარბიელო მდგომარეობაში არ აღმოჩენილხარ?
- არა. სანამ ბავშვი მეყოლებოდა, ვახერხებდი იმას, რომ გზის ფული ოჯახში ''მეშოვა'' , ახლა კი, სიმართლე გითხრა, ამდენს ჩემი თავისთვის ვეღარ ვიმეტებ.
- ფულის დაგროვება თუ გჩვევია?
- არ შემიძლია შეგროვება. მითქვამს, მოდი, 100 თუ 200 ლარს არ დავხარჯავ და შევინახავ-მეთქი, მაგრამ ესეც არ გამომდის.
- შენი შემოსავლით რაიმე მნიშვნელოვანი გიყიდია?
- რასაც ვყიდულობ, ის ჩემთვის მნიშვნელოვანია, მაგრამ რაიმე ძვირად ღირებული ნივთი სახლისთვის, მაგალითად, ტელევიზორი, სარეცხის მანქანა არ შემიძენია, უბრალოდ, ჩემი ხელფასი ამას ვერ გასწვდება.
- დაბალი ანაზღაურების გამო საქმეზე უარი გითქვამს?
- თავიდან ანაზღაურებას არანაირი მნიშვნელობა არ ჰქონდა. ვინც ამ პროფესიას ირჩევს, ამას ფულის გამო არ აკეთებს. სხვათა შორის, დღემდე მეუხერხულება ფულზე დალაპარაკება, როდესაც საქმეს მთავაზობენ, მაგრამ ოჯახის შექმნის შემდეგ მეტი შემოსავალი გინდა და ამ საკითხისადმი ყურადღებაც იზრდება. მიუხედავად ამისა, დაბალი ჰონორარის გამო არასდროს ვიტყვი უარს კარგ როლზე, უარი შემიძლია, იმ შემთხვევაში ვთქვა, თუ როლია უინტერესო. ზოგადად კი, მსახიობობა საქართველოში, ალბათ, ერთ-ერთი დაბალანაზღაურებადი პროფესიაა.
- შეგიძლია, გაიხსენო შენი პირველი ჰონორარი?
- კი, 10-11 წლის ვიქნებოდი, როცა გიგა ლორთქიფანიძის ფილმში ''ნუ გააღვიძებ'' მივიღე მონაწილეობა, კლასში ერთ-ერთი მოსწავლის როლი განვასახიერე და ოცი ლარი გადამიხადეს. ჩემი ასაკის ბავშვისთვის, ერთდღიან შრომაში აღებული ოცი ლარი ნორმალური ანაზღაურება იყო და ძალიან მიხაროდა, ყველას ვუყვებოდი ამის შესახებ.
- შენი ცხოვრებიდან ფინანსურად კრიზისული პერიოდი თუ გახსენდება?
- ჩემი ხელფასის იმედად არ ვცხოვრობ, რადგან არასტაბილური შემოსავალი მაქვს. ჩემთვის ხელფასი ბონუსივითაა, თვეში მაქსიმუმ რაც ამიღია - 800 ლარია, საშუალოდ 400-500 ლარით კი ოჯახის შენახვა, თქვენც იცით, რომ ძალიან რთულია. მხოლოდ ჩემს ფინანსებზე რომ იყოს დამოკიდებული ჩემი ოჯახი, რასაკვირველია, კრიზისი მექნებოდა.
- რამდენად მეოჯახე ხარ, კარგი პროდუქტის შერჩევა თუ შეგიძლია?
- შემიძლია კარგი პროდუქტის შერჩევა. ძირითადად მარკეტებში დავდივარ და იქ შევაჭრება გამორიცხულია, ბაზარში კი უფრო დედა დადის.
- ბანკიდან კრედიტი გამოგიტანია?
- არა, აქამდე არასდროს მქონია ბანკთან ურთიერთობა, ცოტა ხნის წინ ტელეფონი გამოვიტანე განვადებით, ესაა და ეს. ზოგადად, ვალის აღების მეშინია და არ მიყვარს, მართლა რაღაც სერიოზული უნდა ხდებოდეს, რომ მე ბანკიდან სესხი გამოვიტანო. ამას წინათ, ჩემს მეგობარს, ყველაზე ახლო დაქალს, 100 ლარი გამოვართვი და ღამეები არ მეძინა. როცა თანხა დავუბრუნე, გაეცინა, ბავშვს ჩემს სახელზე რაიმე უყიდეო. მე კიდევ წესიერად არ მეძინა. თუ ფული მაქვს, მეც დიდი სიამოვნებით ვეხმარები მეგობარს საჭიროების შემთხვევაში.
- აზარტული თუ ხარ?
- არა, არ ვიცი ეს კარგია თუ ცუდი. არასდროს არაფერი მომიგია, არასდროს გამჩენია სურვილი, მეყიდა ლატარიის ბილეთი, არ მაინტერესებს ასეთი რაღაცები.
- ოდესმე ფული არ გიპოვია?
- მე და ჩემმა მეგობარმა ბავშვობაში ძალიან ბევრი ფული ვიპოვეთ. ზამთარში, ქარში ეზოში ვთამაშობდით და ამ დროს ვიპოვეთ იმდენი ფული, რომ კარგა ხანს, დაახლოებით 3 საათს ვკრეფდით, სახლში რომ ვთქვით, ვიპოვეთო, მშობლები შოკირებული იყვნენ, ზოგი ტალახიდან ავიღეთ და სველი იყო, ჰოდა, მერე ბებო მაუთოებინებდა კიდეც. ეს გახლდათ უგაზობის, უშუქობის და ზოგადად გაჭირვების პერიოდი, მე და ჩემმა მეგობარმა ფული გავიყავით და მახსოვს, ორივეს ოჯახში კარგა ხნის განმავლობაში ინახებოდა ეს თანხა, როცა ვიტყოდი, რომ ფული შოკოლადისთვის თუ ნაყინისთვის მჭირდებოდა, უპრობლემოდ მაძლევდნენ, მეტიც, ვიცოდი სად იდო და თავადაც შემეძლო ამეღო.
- რაც შეეხება საჩუქრებს, შეგიძლია გაიხსენო, განსაკუთრებულად რას გაუხარებიხარ?
- მე და ჩემს მეგობრებს, განსაკუთრებით კი ეკა აბშილავას, დაბადების დღის საჩუქართან დაკავშირებით გვაქვს ტრადიცია, ერთმანეთს სიურპრიზებს ვუწყობთ და განსაკუთრებულად ვასაჩუქრებთ. კონკრეტულად ვერ ჩამოვთვლი, მაგრამ ჩემთვის ყველა საჩუქარი გამორჩეულად სასიხარულოა.
- თავის მოვლა ესთეტიკის გარდა, ფინანსურ მხარესაც უკავშირდება.
- კი, მაგრამ, რაც ბავშვი მყავს, წარბსაც და ფრჩხილსაც თავად ვიკეთებ, რადგან ამისთვის შედარებით ნაკლები დრო მრჩება, თუმცა მანამდე ყველაფერს სალონში ვიკეთებდი.
- რაც შეეხება საფულეს, მას განსაკუთრებულ მნიშვნელობას ანიჭებ?
- საფულეში ფულის გარდა ყველაფერს ვინახავ, მაგალითად, საბუთებს, სავიზიტო ბარათებს, პირადობის მოწმობას, ფულის ჩადება კი მავიწყდება.
- აბა, სად ინახავ ფულს?
- ისე მალე ვხარჯავ, რომ შენახვას ვერ ვასწრებ (იცინის). ერთი საათი მჭირდება იმისთვის, რომ ფული გავაქრო.
- შენი გმირივით ბრენდებზე ხარ გადართული თუ სადაც რა მიიქცევს შენს ყურადღებას, იმას იძენ?
- საერთოდ არ ვარ ორიენტირებული ბრენდებზე, ჩემთვის მთავარია, სამოსი მომიხდეს და თავი კომფორტულად ვიგრძნო.
- ზოგადად, ვისთან ერთად დადიხარ ხოლმე საშოპინგოდ? მეუღლე თუ დაგყვება?
- მართალია, მეუღლეს დრო არ აქვს, მაგრამ როცა სცალია, ერთადაც მივდივართ ხოლმე, თუ არადა, რომელიმე დაქალთან, ჩემს დასთან ან დედასთან ერთად მივდივარ საყიდლებზე. მართალია, კაცებს ბევრი სიარული არ უყვართ, მაგრამ დათო მეხმარება გადაწყვეტილების უცბად მიღებაში, მეუბნება, გიხდებაო, ან კიდევ პირიქით, არ გინდაო. არადა, სამოსთან მიმართებაში ძალიან მერყევი ვარ, შეიძლება, რაღაც მომეწონოს, მაგრამ ჩაცმის შემდეგ ვერ მივხვდე, მინდა თუ არა. ბევრჯერ მქონია შემთხვევა, როცა შეძენის შემდეგ ნივთი არ გამომიყენებია.
- ფასდაკლებებს თუ ელოდები ხოლმე, რომ სარფიანად იშოპინგო?
- არა, ძირითადად მაშინ ვშოპინგობ, როცა ამის საშუალება და დრო მაქვს, არ ველოდები ფასდაკლებას, რომ მაინცდამაინც მაშინ შევიძინო სამოსი.
- მილიონი რომ მოგცენ, რას გააკეთებდი?
- ავიყვანდი სამ ძიძას, რომლებიც ჩემთან ერთად იქნებოდნენ და სადმე მაგარ ადგილას დავისვენებდი ჩემს ოჯახთან ერთად.

ციცი ომანიძე
ჟურნალი ''რეიტინგი''